2020年2月1日 星期六

寧波會館@中環

近大半年都極少與友共聚相約食飯,這晚旅行腳們難得興致到,就選了在weekday於中環搞飯局,基爾收工即急急腳坐車赴會!



基爾大鄉里第一次來這類同鄉會開餐,聞說是開業於1968年的老字號,只招待會員(而且會費都幾貴),很有點私人會所味道。



網上資料簡介話這裏吃的是上海寧波菜,不過看上面這幾味似乎又不似想像中咁濃油赤醬,感覺與王家沙、三六九甚至姥姥果類有點分別。例如隻圓碌碌的醉雞($110)賣相幾靚,食落也有濃濃花雕香味;黃金蝦球($240)和蔥油海蜇頭($170)雖然幾貴但幸好份量足味道也不錯。



比較搞笑係侍應阿姐,除了經常來催促落單外,本來叫的萵筍海蜇頭上檯時見碟上竟只有寥寥兩條萵筍,問佢係咪落錯單佢又話冇,叫她夾多幾條萵筍來又左推右搪似的,最後都不了了之……上圖這味幸好沒搞錯,糖醋排骨($105)同外面吃的不一樣,有點似茄汁豬扒。



另外還叫了中規中矩的小籠包($60/6個),甜品方面有拳頭咁大個的高力豆沙($60/5個),不過豆沙餡不算太多。最後加埋兩碗白飯($26/2碗)和茶芥加一之類,總計人均約兩舊水,抵食與否就見仁見智吧!



除了侍應阿姐多蝦碌之外,另一樣要扣點分數的是館內環境也相當嘈雜,基本上全晚要擘大喉嚨才可以傾到偈,埋單走時真有點耳鳴不適感!聽聞menu中還有無錫脆鱔、炒蟹、醉豬手和燻蛋、臭豆腐等小食也值得一試,但大前提要頂得順超嘈吵的環境……



吃飽飯傾飽偈之後就差不多要各自散水了(以免無車搭返屋企),反正不趕時間,基爾就放棄坐喧鬧的地鐵,改由Landmark漫步到去碼頭,選擇搭船過海享受多一點悠閒與寧靜。



由澳洲回來換了手機後,記憶中好似都無乜機會試過佢影夜景的效果。這部日系品牌(自從進入智能手機年代後就沒轉過會)雖說不是什麼貴價貨,但無腳架下影夜景原來都幾唔錯,至少沒有鬆郁矇也夠亮度,自問要求不高絕對收貨了(p.s.順帶有留意鐘樓的4點鐘,確是用了羅馬數字IIII而不是IV)。

香港寧波同鄉會 Ning Po
中環德己立街2-18號業豐大廈401-405室

47 則留言:

  1. 兩舊水, 算係好抵食呀
    返來我都無坐過渡輪

    回覆刪除
    回覆
    1. 新春大吉 蝦碌阿姐
      日系手機 鐘樓IIII寫

      刪除
    2. 毛:依家出街食飯也差不多是這價錢了吧....
      下次同專員回來可以去坐下囉^^

      刪除
  2. 王家沙、三六九係一般人的上海菜。唔係寧波菜。

    回覆刪除
    回覆
    1. 外省人就唔太識分得咁仔細:P
      一般都係京川滬菜撈埋一齊XXD

      刪除
  3. 睇你介紹我覺得菜式都唔錯,但嘈吵就....

    回覆刪除
    回覆
    1. 有啲人可能就鍾意佢夠晒中國人的熱熱鬧鬧氣氛吧XXD

      刪除
    2. 依家我諗都少咗人出街食飯係咪?

      刪除
    3. 真係靜好多,原來香港人都幾怕死 :P

      刪除
    4. 菲臘兄最近有沒有也少了出外影相?

      刪除
  4. 今時今日食肆仲有超嘈吵的環境……難得好生意。

    回覆刪除
    回覆
    1. 茶樓好多都好嘈因為啲枱排得好密XXD

      刪除
  5. 寧波會館印象中都算中上,環境嘈吵咁就麻麻。

    回覆刪除
  6. 如果私人會所、會員制,價錢就不算貴啦!

    回覆刪除
    回覆
    1. 其實我都好少去喱類高級地方呢....XXD

      刪除
  7. 如果高級食肆都嘈嘈吵吵,就不入高級之流了。如果是好吃的,也不能計較得那麼多。最怕是使了錢,但又唔好食。

    回覆刪除
    回覆
    1. 同其他食肆酒樓咁都係比較熱鬧吧^^
      也可能檯擺放得比較密啦
      幸好味道都算ok的

      刪除
  8. 相片影得幾靚,嘈吵環境確實很難傾談。

    回覆刪除
    回覆
    1. 多謝你^^
      係呀如果想與同桌朋友傾下偈會有點難度吧

      刪除
  9. 今個新年團年飯,我也在這兒吃。家人有朋友是會員,幫手訂位。這兒來過兩、三次,菜,我覺得不錯。要吃醬油跟醋那款「糖醋排骨」,需要預訂!

    回覆刪除
    回覆
    1. 原來阿摩也是這店常客^^
      菜肴確也不錯大廚也有水準的
      OIC原來要預訂

      刪除
  10. 新年快樂基兄,上面味味餸我都好鍾意食,每人兩舊水喺呢啲環境呢啲級數嘅地方度食算好抵,傾計又好feel!😋

    回覆刪除
    回覆
    1. 大家咁話新年快樂萬事勝意龍馬精神^^
      這次叫的應該都算是大路菜式人人啱食吧
      最好就係可以坐足成晚唔洗急住交檯囉

      刪除
  11. 恭賀新禧
    寧波會館會員好似有錢人,記得唐英年都喺會員,食物唔錯...
    哈...日系Sony手機以不復當年,不過啱自己需要就得喇
    我由三星用轉用咗...華為P30 Pro,拍攝都幾好,但要時間適應

    回覆刪除
    回覆
    1. 也祝你出入平安萬事勝意^^
      個會籍其實都幾貴呀
      以前這品牌的相機都多捧場客的,所以感覺佢個手機鏡頭也應不錯吧
      當然近年我也見有用華為手機的影相出來質素都好高因為佢個名牌鏡頭好正!你要影多點靚相啦^^

      刪除
  12. 咬小龍飽就龍馬精神 心想事成! :D 正斗!

    回覆刪除
  13. 先祝gael兄鼠年快樂,身體安康…
    我覺得私人會所的餸菜比較精緻,品質不會馬虎!!
    一向羅馬數字四,都係IV冇咩印象係IIII……

    回覆刪除
    回覆
    1. 補返句,你的夜景相影得好靚……

      刪除
    2. 也祝森兄學業事業都有好成績^^
      菜式不錯也算很地道吧
      話哂係招呼同鄉應不會馬虎...
      係呀都係你上次寫blog提過所以我才留意到呢
      多謝你鼓勵謝謝^^

      刪除
  14. 新年快樂!
    會員先入到來嘅餐廳黎講,我傳統認為呢d系高級地方,d會員應該有番咁上下素質... 但若講嘢語調達到嘈雑嘅程度,我唸我應該會退會 :P

    回覆刪除
    回覆
    1. 也祝你新年快樂萬事勝意!
      如果喜歡熱熱鬧鬧也ok
      唔知會唔會有偏廳貴賓廳之類就可以傾得舒服D

      刪除
  15. 其實我唔識分寧波菜同上海菜嘅分別呢。^^”

    又,未去過會館嘅我都有“錯覺”以為喺會館食飯服務會好dd,環境又安靜dd添。

    回覆刪除
    回覆
    1. 其實我都唔係好識...
      好吃就ok了^^
      理論上應該都係至少服務係有較高水準吧

      刪除
  16. 宜家出去食野應該好少人。

    回覆刪除
  17. 恭喜發財呀!
    環境太嘈, 就算幾好食都好, 肥人都唔會去..haha

    回覆刪除
    回覆
    1. 也祝你萬事如意龍馬精神!
      你比較喜歡靜靜地撐檯腳係咪^^

      刪除
  18. 疫情消退後才再找朋友外出聚餐啦。

    回覆刪除
    回覆
    1. 應該都係啦
      大家都身體健康最緊要呢

      刪除
  19. 去啲咁高級既地方食飯,哈哈~
    不過又比想像中平,而家食晚餐百幾二百走唔甩:(

    回覆刪除
    回覆
    1. 純粹去試下而已^^
      都係呀依家去茶樓或普通餐廳食個飯也不便宜呢!

      刪除