繼續寫「偏門」野，這次「南柯戲夢」講的唔再係熱門的《求婚的惡魔》、《死神來了4》、《波兒》又或者被人鬧爆的《District 9》，這些hit片在blog海中已經有大把人爭住講，姑且抱住人講我唔講的宗旨，同時也避免再被人鬧「睇完你寫，我仲駛睇咩！」所以如非必要，暫且放棄談新片，集中精力寫舊戲，反正舊戲也有好多未必人人都睇過的「滄海遺珠」！今次說的是兩齣上下集愛情經典。
《情留半天》1995 / 《日落巴黎》2004
兩齣電影都不是在戲院看，而是在電視上看，「地點」係明珠台。早前睇電視時意外地睇到電視台的宣傳片段，稱會在一晚內連續3小時播映《情留半天》（Before Sunrise）及《日落巴黎》（Before Sunset），這項「壯舉」確實令戲迷驚喜（佢地都唔係成日都事事旦旦的）。翻查網料，《情留半天》只曾在1995年7月於Art Centre上映，而且只是「曇花一現」般只映了一個周末，之後就再無正式公映過，只間中在電影節或BC早場之類打下「游擊」做一兩場。自從金獅、BlockBuster等先後執笠後（幾乎要大喊一場），要睇冷門戲更是難比登天，即使930都極少選播！好彩近日逛影碟舖，已見有喱兩套經典戲「復刻」再現。
鍾意歐遊的blog友睇過《情留半天》和《日落巴黎》後，可能會再多給點分數，因為這套被譽為「浪漫歐遊二部曲」的經典幾乎將維也納及巴黎最靚的一面展現在銀幕上。在男主角伊雲鶴基（Ethan Hawke）及女主角茱莉迪比（Julie Delpy）串演「導遊」下，3小時內閒盪過塞納河、多瑙河邊，穿梭於充滿歐洲中世紀風情的石階與小巷，坐過古老的有軌電車，也乘過塞納河的觀光船（去過巴黎的都有坐過吧）、登上摩天輪、hea坐咖啡室……老實說，真係好睇過好多嘈喧巴閉柴哇哇一味只識講「好鮮味啊！」之類的所謂旅遊節目。唔知會否真係有人睇完戲後，真的去重遊一次男女主角踏過的路。
說回戲軌，故事的開頭（《情留半天》）講的是一對年輕男女，在開往維也納的火車上偶遇，起初兩人是因車廂內一對鬧交的德國夫婦而打開了話匣子。怎料話題一開就沒完沒了，剛失戀的伊雲還索性邀約茱莉齊齊在維也納下火車，在市內一起閒盪半天繼續「吹水」，難得茱莉竟又大膽地一口答應。由此兩人便展開了半天的經典談心之旅，由兩性相處、社會制度、文學藝術、哲學歷史等，天南地北無所不談，全片101分鐘內幾乎推滿了他們的神交對話，部分更是用長達十幾分鐘的長鏡頭直落拍攝（難度媲美Tony Jaa在《拳霸》中踢館的經典場面，由底層一直打到上頂樓，連續十分鐘長鏡頭一take過），點可以唔畀伊雲同茱莉一個「服」字。全片幾乎是他們的「二人吹水世界」，他們那些長如水蛇卵的對白彷彿都是自然流露、發自內心，沒半點念讀白的痕蹟，演技水準之高可想而知。
對於伊雲鶴基這位美國影星，相信大家不會感到陌生，唔知點解一直覺佢似英國演員多一點，可能係因為當年佢演過死詩人協會成員，其詩人形象實在太深入民心之故。在《情留半天》中一臉鬍子的他，演起不羈失戀才子起來也入木三分。至於十幾年前風華正茂的茱莉迪比，更可說是恍如一朵出於污泥含苞待放的純淨白蓮，一舉手一投足都散發著很特別的氣質。後來重看奇斯洛夫斯基的《白》時，再次印證自己無走漏眼，證明佢唔係「霎眼嬌」女星。
年輕人總會輕狂，伊雲和茱莉在維也納邂逅把臂同遊半天後，轉眼又來到了天亮時分（回應戲名before sunrise），但他們沒半點難捨難離，甚至沒有交換聯絡電話、地址（90年代中應該仲未興email或msn），只相約了6個月後再在維也納火車站重聚，以考驗兩人的緣份。《情留半天》就這樣留下來一個open ending，鏡頭分別影住兩人各自乘火車遠去，再剪接出兩人在維也納遊過之處的畫面……
由於下集《日落巴黎》是緊接《情留半天》立即播出，稍事「沐浴更衣」後立即又要黐實返部電視機，因為續集立即就要展開（好彩唔駛好似以前的戲迷咁要苦等9年，才等到下集在2004年公映）。
導演Richard Linklater可能同基爾一樣想考驗下戲迷的忍耐力！否則想不通為何要足足等9年才拍下集。幸而《日落巴黎》一開場就急不及待交代了伊雲與茱莉到底會否依約重聚，再續前緣，答案竟然係﹕緣慳一面！原因係茱莉因婆婆突然重病而無法如期於6個月後再去維也納應約。緣份就係咁奇怪，錯過了就不可能回頭。伊雲最初也撒謊稱自己當年也沒去維也納應約，以免茱莉太傷心，後來言談間他又露出馬腳，其實佢係有去維也納。Anyway，結果他們足足等了9年，才再在巴黎的一間書店重聚，伊雲當了作家，也結過婚有個兒子；茱莉則在情路上尋尋覓覓，兩人似乎都放不下9年前的一段奇緣。巧合的是，這次重逢也同樣因種種原因，只能共聚半天，在日落前伊雲要乘飛機返回美國。結果茱莉就利用這珍貴的半天，帶「舊情人」在巴黎四處遊逛，延續9年前的「談天說地」之旅。
《日落巴黎》與上集《情留半天》一樣「長氣」十足，秉承Erich Rohmer以對話說故事的風格，不喜歡的人可能會覺得悶爆，但若領悟到對話中的睿智，就會愛不惜手拍案叫絕。這次兩人談的更富「現代感」，除了男歡女愛外，還有全球化、綠色和平、莎翁……事隔9年伊雲與茱莉默契依舊，只是兩人臉上多了一份滄桑，當年青春逼人的茱莉變成中女，氣質雖依舊在，卻始終難掩唏噓！
下集同樣保留了一個open ending，日落時份伊雲趕往機場離去前，先送了茱莉回家，並以茱莉即場獻唱一曲《A Walts for a Night 》作結。到底伊雲聽完深情一曲後會否放棄回美國，與茱莉雙雙「私奔」去，希望不須再苦等9年後才有答案！
沒有留言:
張貼留言