一連病左幾個禮拜，仲未完全好返，依家D感冒菌好厲害，大家都要小心D。喱幾個禮拜即使放假都足不出戶專心訓覺養病，今日已經好返少少，咳少左。拎返病前最後一次出動的「老照片」出黎執一執，撻上blog畀大家睇睇，雖然過左少少氣，都值得重溫下！
近喱幾年都有去工展會，因為之前有friend做CMA所以有飛拎，今年雖然佢quit左，但公司又忽然有飛派，所以仲有得去。通常工展會喱D場合都係同基爾媽去，其他friend都無乜興趣嘛！事實上基爾媽本來都話無乜特別野要買，也不會學其他阿蟬咁推車仔去掃貨，因為一來果D野又唔係特別平，所以都係抱住趁墟的心態去逛逛吧了！上圖是銅鑼灣方向的入口，一入到去就有工展小姐投票，我當然無咁無聊去投票啦！只係快look過，水準一般！後來睇報紙知道中間果位冠軍係「威馬電器」小姐，不過基爾覺得左面亞軍果位姐姐靚少少。
山長水遠黎到當然唔只係及女啦！行入去順住逐排舖頭行下，有D舖都整得幾靚幾特別架！鉅記（上圖右）整到成個世遺咁，左邊個養陰丸塔則好有共產feel，唔知咳食養陰丸得唔得呢？不過其實成個場D舖頭大部分同以往一樣，都係一貫的賣野食的店舖，有賣麵、賣罐頭、豉油、餅乾……基本上係一個露天超級市場，價錢卻不特別平，要好大批大批咁買先有discount，所以好多阿叔阿蟬都推車仔黎方便掃貨！至於基爾媽最初都按兵不動，睇定形勢先再算！
後來行行下，我發現場中央有個幾面熟的建築物，就係上圖喱個上海世博counter，整到成個中國館的樣子咁，幾宏偉架！於是就同基爾媽講分開一陣，鼠左入去參觀。展館原來係中旅社的counter，專門sell上海世博的團和酒店機票package，我比較有興趣係裏面展覽的各國展館模型。如果blog友之前有留意《永樂大典》，都知道基爾有介紹過各國的展館，上圖右喱個就係香港館「玻璃貨櫃」屋，右下紅色果間當然就係仿唐建築的中國館，而藍色果幾隻就係吉祥物，一個手掌大小的毛公仔都要五六十蚊呀！
再行過少少，仲有各國展館的大海報（上圖左），同我之前介紹果D大同小異，另外值得一看的還有紀念郵票，一套8個，設計都唔錯架！不過就幾貴，所以都係無買到！第時若真係有機會去上海，先再諗下買黎做紀念品啦！
再會合返基爾媽，行下行下又發現竟然有夾萬賣，真係第一次見，不過好似無乜人去睇，相信大部份人都係買野食居多，夾萬喱D唔係咁多人買！再行遠D，喱間專賣咖啡的也幾有心思。基爾唔係太識歎咖啡，所以唔知喱個牌子係咪好出名，不過有陳豪賣廣告，應該係幾出名卦！個檔位除左擺貨外，仲有個角落擺左D好古色古香的咖啡機，同埋一袋袋用麻包袋裝住的咖啡豆，display得幾靚！至於食野方面，見有人食炒蜆，不過基爾作病就唔敢食，只試食上圖左果兜仔麵，唔好睇佢好似無乜特別咁，但其實都幾好味道。左圖個蛋撻係蛋撻王買的，成$5/個，幾鬼貴，但又唔特別好食，唔抵！基爾公司樓下果間$2.5/個，仲好食得多！
行到尾聲，就準備由天后方向走，睇到喱位小朋友係路邊係咁轉喱個輪，真係有D似以前歡樂今宵的幸運輪，唔知係咪想幫個工展會增加返D懷舊味道呢？至於送的都係D糧油雜貨，費事拎所以無去轉！最後，登登登?~~~到底有乜收穫呢下？就係上圖左果堆餅乾、罐頭、臘腸、一大袋壽桃麵，仲有基爾好鍾意食的美味棧鮑魚菇罐頭，真係好食過真鮑魚架！係咪好cheap呢我！
沒有留言:
張貼留言