韓國錦城飯店@尖沙嘴

之前掛住寫世博遊，連米G蓮都少左出巡。其實早幾日凍到得返5、6度果幾日，都有冒住冰冷寒風放工飆出尖沙嘴，就係為左試試下面喱間「韓國錦城飯店」。

錦城的門面不算太搶眼，隨時行過左都唔知 / 十小碟前菜和燒牛肋肉

諗返都有幾年無食過韓燒，其實唔係唔鍾意食，不過每次燒完後D衫都會成陣BBQ味，加上幾熱氣，所以少食。對上一次係食應該係旺角登打士街果間「梨和園」，但它兼營日式料理和打邊爐，味道一般，查返資料原來仲執埋笠添！另外，5、6年前亦幫襯過較大路的「漢陽苑」，以及另一間同在尖沙嘴的「釜山」！


十小碟前菜之一Kimchi唔算太辣 / 燒羊肉 / 石頭窩飯 $90

由於無帶新歡Pentax去，要用返電話影！講返喱餐，由於無得訂位，趕到去時友人已拎好籌，由於要等，就先去逛逛隔籬街的天地書局。很喜歡逛這間書店，因為通常都好少人，夠清靜又有凳坐，是等人等食的「隱閉聖地」。後來老闆娘打來話有位，就行返去開餐。來到樓上雅座坐好後，先來的是十小碟前菜，有泡菜、小魚乾、芽菜、菠菜、豆腐、雜菜沙律、酸菜魚片等，陣勢非常強勁，另外再叫了牛內和羊肉作燒烤，當然還要試試「鎮店招牌菜」的石頭窩飯。


食咁多熱氣野要歎返杯茶先 / 海鮮蔥油餅 $150 / 燒羊肉

十小碟前菜當中，基爾較愛泡菜、菠菜和酸菜魚片，小魚乾就太鹹，芽菜豆腐和沙律一般。牛肋肉和羊肉都是水準之作，燒起來夠香，只是切得較零碎，份量太少唔太抵食。石頭窩飯則用珍珠米煮成，算係足料，由侍應姐姐即席加辣醬撈成，味道OK，如果愛食煲仔飯的應該會鍾意，因為都幾多飯焦。另一味可以畀distinction的是海鮮蔥油餅，上碟時有成7、8大片，有點似pizza，餡料主要係青椒、蔥和魷魚，其實本來基爾係唔食蔥的，但食落無乜蔥味，批邊脆脆地又幾好食，不過食兩片已經好飽飽滯滯。


海港城今年的聖誕燈飾比以往遜色 / 街上見到新劃設的禁煙區

因為人少所以唔係叫好多味，埋單計約$140 per head，都算係可以一試之選。食飽飽後睇錶都係9點幾，於是就順便行去海港城睇下聖誕燈飾當散步。記憶中都好多年無睇燈飾，比較有記憶的是幾年前海港城門前那架小火車，非常壯觀！今年就真係好一般，而且人又多，望兩眼都係走人。另外唔知近來大家行街時有冇留意地面上畫的喱D所謂「禁煙區」，基爾雖然唔食煙也怕聞二手煙，但都覺得喱D「禁煙區」幾戇居，因為界內界外吸煙對他人的影響根本無分別。


1881 Heritage的旋轉木馬燈飾比較可觀 / 附近一帶名店逼滿內地自由行同胞

由於海港城無咩睇，於是再行過去1881 Heritage，之前見人影過喱度的旋轉木馬燈飾唔錯。限於手機拍攝關係，當然唔會影到咩靚相，不過喱個兩層旋轉木馬燈飾確實係唔錯的，甚至有人專程黎影婚紗相，都幾誇張！


聖誕燈飾襯托下的前水警總部 / 旋轉木馬可惜只是擺設，不能騎上去玩

夜色下的1881 Heritage其實都幾靚，之前基爾都有黎影過（詳見﹕白之戀人一八八一）。不過由於今次四周圍都幾多人，加上簡陋攝影器材所限，影兩三張已經無乜心機再影，附近的名店又無咩睇，所以再行返出海傍星光大道逛逛。


永安、香格里拉、洲際一帶尖東海傍，計起來至少有10年無來過睇燈飾

睇新聞都話今年聖飾大不如前，來到尖東海傍就絕對感受到，基本上大廈外場都係一些陳年行貨，無乜特色或令人眼前一亮之作。本來以為可以由新世界那邊屈返入室內避寒，點知去到先醒起新世界正準備拆卸所以都圍晒木板，被迫要冒住攝氏5度的維港颳面寒風行晒成條星光大道，最後到中國城大噴泉那邊才有天橋行返入去，但已經凍到流晒鼻水，算係一次幾難忘的尖東自由行睇燈飾之旅。

 

韓國錦城飯店 Korea Kam Sing Restaurant
尖沙咀堪富利士道5號地下