行下行下歐洲區展館其實都已經七七八八，要排的又無乜心機去排幾粒鐘，於是行上天橋四圍影下就準備結束喱個閃電歐洲之旅。
歐洲聯合館隔籬的阿塞拜疆館 / 行人天橋上遠眺匈牙利館
首先見到有3D風景影片睇的阿塞拜疆館，門前遊人依舊絡繹不絕。其實唔太明阿塞拜疆、阿美尼亞、格魯吉亞這些中亞國家點解會變左歐洲國家，據介紹阿塞拜疆館又係力sell千百年來扮演絲路橋梁的角色，相信同之前睇過的吉爾吉斯、塔吉克等展館也是大同小異吧！再行前又見到用了1000條木柱包圍著的匈牙利館，這些大木柱一半是固定的，一半是可動的，固定的高8米，可動的則高3.5米。據稱木柱會隨音樂旋律上下起伏，非常奇妙，但當時行過又唔覺佢會郁！
挪威館也是以樹木為主題 / 在天橋上遠眺荷蘭館
行無耐又見到挪威館，它由15棵巨樹模型拼砌而成，原材料來自木頭和竹子，可在世博結束後循環再用，非常環保。巨樹由5米到15米高低不一，營造出錯落有致的空間，將訪客引入挪威的自然地貌……入唔到就睇下展館外貌算數！在橋上也可遠眺荷蘭館，之前看簡介知道佢有一條長約400米的8字形「快樂街」，連接20間獨立小屋，每間小屋就是一間小展廳，走近看也見到遊人在館內走來走去，不過要排長龍就no way啦，實在花不起時間！
紅色的克羅地亞館聽聞無甚可觀 / 立陶宛館靈感源自含苞欲放的花蕾
好喇行咁耐天橋就由喱度落返地面先，睇下仲有冇滄海遺珠。落橋位左邊有間紅噹噹的展館，走近睇原來係克羅地亞館。據簡介館內牆上有10座幻燈機，介紹克羅地亞人的城市生活面貌，原來領帶也是發源自這國家，館內紀念品商店會出售特色的領帶和女士披肩等，不過由於之前見blog友寫話無野睇，所以無入去。再行又見到立陶宛館，唔知門口排長龍的同胞知唔知立陶宛在哪裏呢？Anyway，咁多人都係掠門而過算了。
俄羅斯館頂部的鏤空圖案是俄國傳統雕花裝飾
其實之前沿天橋行咁遠，最主要係想去搵搵俄羅斯館，因為之前睇blog友介紹話俄館會有意外驚喜，所以專程走到歐洲區的邊陲，希望入到俄館睇下。單睇外貌，12個白色「花瓣」塔樓已經很有特色，外形設計類似古代斯拉夫人的小村落，據聞夜晚還會變成黑、紅、金色。再行去隊頭問下D小白菜義工大約要排幾耐，佢話要3粒鐘以上！好，走後門繞過後面間餐廳入去睇下，間餐廳有D拍烏蠅feel，店員見基爾裝裝下就出來招呼，話如果幫襯可以免排入館云云。再望下餐牌先，嘩！二人餐都要成4、5舊水人仔喎！當堂投降，立即打退堂鼓。
鑑於在歐洲區大部分展館坐底要排兩、三個鐘的關係，實在太無癮，一於殺過去隔籬的美洲區睇下，希望果邊人氣無咁勁，可以偷雞入到幾間館參觀下啦！欲知後事如何，當然又係要稍等下回分解！
沒有留言:
張貼留言