北海道牧場餐廳@北角

休業了很久的食探基爾終於又有機會再出動，今次依然是圍繞老地方北角走，幫襯了這間新開不久的北海道牧場餐廳分店。

店裏的二人桌實在太細，搞到部份野食要暫放鄰桌

之前都聽聞過喱間北海道牧場以3.6牛乳炒蛋很香滑很出名，在尖沙嘴和銅鑼灣也有分店，不過一直都無試過，心諗應是綽頭式的「高檔茶餐廳」吧！聽講佢最近終於開到來北角，咁近基爾點都要去做一次半次探子交下功課先得。去到見是慣常街舖食店坐位都非常逼，周六lunch竟還要舖外企街排隊，加上落雨索性放棄改去隔籬茶餐廳算了！


多士併磨菇炒蛋

後來另擇日子搵了一日weekdays再去，這次特登選了tea time先去就係唔想等位，去到果然順利有位即時入座。不過下午茶選擇不多而且單看menu已知份量太少（更甚是價錢唔算平唔抵食），最終揀返$40午餐兩份，分別是「北海道套餐」：多士併火腿炒蛋、叉燒湯通粉；以及「自家製肉丁全餐」：多士併磨菇炒蛋、自家製肉丁湯意粉；另配熱檸茶及北海道熱咖啡。


自家製肉丁湯意粉和叉燒湯通粉

其實成個餐基爾較滿意的就只有個磨菇炒蛋，唔知係咪真係用北海道3.6牛乳來炒，感覺真係幾嫩滑軟林林，蛋香也味濃，算是鎮店招牌菜吧！可惜是其他東西也確實平凡得令人有點意外，所謂的叉燒通粉和肉丁湯意粉跟本同普通茶餐廳貨色無異，令人有點失望！


朱古力醬牛乳窩夫

如果撇開值得加分的牛乳炒蛋而言，以$40大元食一個這樣平凡（且份量偏少）的set lunch真的不算抵（甚至有點搵笨），如果還要企街等位實在no way啦！由於叫set meal加$12有兩片朱古力醬牛乳窩夫，反正唔知下次幾時會再來就試埋佢。其實基爾唔係太清楚搽上朱古力醬和花生醬的「窩夫」，同一般街邊阿伯賣的「格仔餅」有乜分別？只係覺得街邊檔格仔餅至少應更新鮮熱辣吧！

北海道牧場餐廳 Hokkaido Dairy Farm Restaurant
北角七姊妹道30號地下