珍郵庫@天氣現象

之前睇sample時都有猶疑過好冇訂埋喱套「風雷雨電」首日封，因為單看照片設計確係有點平平無奇，不過見唔貴最後都決定買啦！

其實以往郵政署推出首日封一般都只出4枚郵票，近年就經常加碼至6-8張，另外還有小型張、小全張，實在多不勝數，為免床下底空間耗盡所以必須更謹慎挑選才是上策。這次一套6款天氣郵票分別展現了彩虹、霜、雲、閃電、霧和雨6種香港常見天氣現象，不過郵票始終限制於size，似乎就不太感受到壯麗的天象景觀，效果比預期遜色。



6張之中基爾僅較喜歡閃電（$3.1）和霧（$3.7）兩張而已！反而$5小型張更可觀，它以2012年7月襲港的十號風球韋森特做主角，衛星圖像清晰可見風眼，很有實感和趣味性。其實設計上可索性將郵票取消以免重覆，直接在小型張的颱風畫面上印製出$5郵票齒孔就已夠簡潔精美了！



預訂郵票還附送了這支「天氣筆」，其實基爾都幾抗拒郵政署成日以這類無聊的紀念品作招徠，因為很多時都不實用，平白替地球製造垃圾而已！基爾寧願佢訂夠一定銀碼後有九折還來得實際一點吧！



打開包裝華麗的筆盒睇睇（又一浪費地球資源），裏面支筆也不過是普通原子筆，筆套上有個雲狀的扣，還有兩個金屬小按扭，按住不同按扭時會分別在筆桿頂亮起紅燈和白燈，燈光基本上不太亮，無可能用來做電筒，完全唔了解發明者的用心，難度會有人帶這支筆去夜觀星象或看演唱會嗎？奇哉！

天氣現象
發行日期：2014年3月27日