武漢迎花潮@大余灣

眨下眼又來到秋分兼迎月夜（食飽月餅未），這個花潮網誌不經不覺hea寫了大半年，係時候要加快少少節奏努力寫埋佢……在武漢最後一天full day要好好利用，大清早六點幾起身先來個靚靚酒店早餐是常識吧！

雖則話係洲際，但對酒店的自助早餐向來不抱太大期望，好多時草草了事塞飽少少個肚就趕住出去遊逛，無謂浪費時間hea太耐吧！



不過這間的早餐又比預期豐富喎！除了慣見的麵包煎蛋腸仔之外仲有唔少中式粉麵熱食供應，對飲食唔太嘴尖挑剔的話，絕對合乎食得飽的要求（時間太耐其實都唔太仔細記得食了乜，但記憶中味道是ok的）。



好喇唔浪費時間，食飽就要火速起行！不過一行出酒店大門口……咦！乜事咁大霧呢？雖然老家的三月春日梅雨天都經常見到大霧的清晨，但原來武漢這裏也會，希望不是大陸常見那種因空氣污染而引致的霧霾吧！



幸好隨車由北面一直駛出去市郊後，太陽漸漸升高，霧氣又開始徐徐消散了！馬路旁的農田仲見到一大片金黃花海添！



三四月來武漢除了去看櫻花之外，其實另一樣主菜就係必定要來大余灣這邊看油菜花田，由車上看出去已經覺得好一望無際好有氣勢。



大陸鄉村地方最懂做生意，去看油菜花田打卡自然要收入場費（以前未發展旅遊業可能唔駛），幸好這裏門票只收60蚊人仔，尚算是合理水平吧！



單單睇售票處對面幅地圖已覺得成片油菜花田都幾大，翻查資料先知原來這裏足足有3000幾畝咁大。



基爾數口較差，都唔太清楚究竟3000幾畝即係有幾大，睇睇上面張相會唔會有少少大約概念？這一大片油菜花田間之間，其實係有條行人小徑畀遊人可穿梭花海中央拍照。



面積單位太複雜計唔掂，又係時候要用用網上換算計算機，結果計出3000畝即大約兩平方公里，咁兩平方公里又即係有幾大呢？



咁又去查下維園有幾大對比下啦！原來係19公頃……咁結果最終計落即係成個油菜花海有大約10.5個維園咁大喎（計了好耐先計得出，煩）！



行行下又見到有個「十二生肖稻草人植物試驗區」（個名咁長？定還是係三處地方？）依家先知原來長頸鹿入選了做十二生肖之一喎（講笑咋吓嘛）！小圖果隻似係老鼠定豬？



這裏原本仲有個看徽派馬頭牆建築的古鎮，不過行過去又有點遠，而且又差不多到了食lunch時間，所以唔去住啦！臨走前在花田邊仲見到上圖這個好特別的「Open Area」！