武漢迎花潮@東湖公園

國慶long weekend竟然無飛出去外遊逍遙快活？咁得閒就不如繼續follow埋基爾這個花潮網誌吧……上回講到大清早去了睇油菜花田，食個靚lunch之後又返入省城去行個公園先！

去逛乜野公園咁巴閉？咪就係去上圖喱個東湖公園趁櫻花節個墟囉！成個東湖景區其實都幾大幾多地方行，不過基爾只集中去了磨山景區櫻花樹最多的部份（門券盛惠60大元人仔）。



由磨山區公園大門進去的櫻花園入口就長這樣！由於這裏位處於武昌市區，一早預了賞櫻人潮定必人山人海，幸好又未至於墟陷到行花市果隻，尚算有足夠走動空間！



由於今年回暖較快，初頭都擔心公園的櫻花樹半數會過了櫻吹雪，幸好又比想像中滿開喎，有靚花睇咁同人逼下都無妨！



東湖風景真心覺得係幾靚，即使相比日韓台不少賞櫻勝地應該也不會輸蝕。當然如果人潮少一點相信一定畀足滿分，不過話明係賞櫻旺季，不太可能會少人了吧！



翻查少少資料，才知東湖水域面積達33平方公里，足足比杭州西湖大六倍之多，也是全中國第二大的「城中湖」云云……



由於湖邊的櫻花景色最美最壯闊，唔駛講大部份遊人都集中在湖邊影相打卡，有些熱門的賞櫻角度都要花少少時間輪候才可影到。



唔知係咪因為有櫻花開的關係，令成個亭園的設計也充滿了東瀛風情，冷不防會以為自己真的去了兼六園那類日式著名庭園。



據網上資料所講，目前世界上有「三大櫻花園」，原來大鄉里基爾竟然都有幸去過其中兩個喎！除了這裏的武漢東湖公園之外，有冇人猜到另外兩處在邊度呢？



應該都有好多人去過，分別係日本青森縣的弘前公園和美國的華盛頓州櫻花園！不過基爾年前係10月尾去弘前公園睇紅葉，櫻花季節就未去過，只見公園入面都有好多櫻花樹，想必賞櫻旺季一定都好有睇頭吧！



東湖公園的櫻花品種同之前去武漢市郊行山看到的那些中華野櫻花品種又好唔同，這裏明顯比較多日本櫻花品種，據資料話首批移植到來的櫻花樹是由日本前首相田中角榮所贈，紀念中日建交。



園內的這座仿唐木塔建築都係影相打卡焦點之一，日本不少名苑古寺都有這類三重塔和五重塔。據聞屈原和李白都曾到訪東湖題詩，毛主席亦曾來遊湖視察四十幾次之多。



咦！乜行行下仲見到有櫻花仙子在花叢中現身喎！睇真原來係有人穿了古裝來玩cosplay，果位姐姐仔仲擔埋梯來真係超級勁！



櫻花本身都弱不禁風，畀這位姐姐仔咁做佈景影造型照，水袖一揮又跌落幾朵花瓣，如果畀日本人睇到會唔會傻眼？Anyway，這就係各處鄉村各處例吧！又或者佢地有領許可證可以咁樣影相都未定。



其實公園裏本身都有管理員巡邏，有時有些遊客太過份見過會吹銀雞警告（真係好耐冇見過人吹銀雞，可能有人甚至唔知銀雞係乜）……其實斯文少少好似上圖小妹妹咁扮大長今在櫻花樹下影張靚相咪幾好！



由於是春天關係，櫻花園裏其實同場仲有好多其他唔同顏色的花盛開，上圖這種紫花基爾覺得都幾靚，絕對是櫻花的最佳陪襯品。



另外仲有之前剛剛在大余灣那邊看過的油菜花；至於上圖右的粉紅色好大朵的花樹開得比櫻花還要燦爛，遠看驟眼會以為是櫻花呢！



不過當然3月來到，始終看櫻花是重點吧！據聞現時園內已種植了逾萬株櫻花樹，當中的八重垂枝櫻、關山櫻、雲南早櫻、染井吉野、普賢像和大島櫻等都是櫻花中的極品……



要基爾逐一去分清乜櫻打櫻寫caption當然不可能，總之就係一個字：「靚！」（咪交行貨喎！）公園裏的花叢中還修建了不少木棧道，遠遠看見不少遊人穿起和服打傘遊走，就像幅東瀛浮世繪。



行過少少又見到個「白髮魔女」傳人？當堂嚇了一嚇！原來又係玩cosplay……好想知日本人去賞櫻時多唔多會著到咁好玩？



沿湖繼續繞一圈走走，由這個角度再影下塔樓先！通常如果有遊人駐足影相的位置，基爾都會埋去莊一莊睇下係咪有靚角度影相。



影出來的構圖效果又真係幾唔錯，喱位靚哥仔果然有眼光！經佢教路在櫻花樹梢之間夾埋座塔樓咁影，又真係幾正喎，係咪有少少攝影大師風範先（自我陶醉mode開動）！



夾埋湖邊那些櫻花垂枝影又如何？突然覺得攝影技術進步了不少，定還是個view本身就係靚，任何人求其影都係咁靚？



拎住手機在湖邊係咁兜兜轉轉「獵艷」，美好時光不知不覺間就這樣流逝，無意之中睇睇隻手錶才赫然發現原來遊花園竟已遊了成兩粒幾鐘真係好誇張！不過仲未捨得走住喎，因為在黃昏斜陽映照下，基爾還要拍埋段櫻吹雪短片先肯走呢！