武漢迎花潮@夜遊長江

由年頭寫到年尾，這趟武漢遊上過高山落過江湖，又終於寫到來尾聲……雖然唔會好似大台劇集咁擺幾圍酒一齊睇大結局，但話晒係最終回點都要特別少少，就去個夜遊長江船河啦！

本來都無諗住去遊船河（價錢頗貴），不過聽人講話好值得去睇江邊兩岸的夜景，咁食飽飯之後就行返去漢口江邊碼頭搭船吧！



其實漢口沿江大道入夜後又真係幾靚，華燈璀璨的舊租界直情可以媲美上海外灘的燈醉人醉氣派。上圖右果座於民初年代原是漢口花旗銀行，是建於1921年的仿古希臘建築風格大樓，1991年獲列為湖北省文物保護古蹟，大門口仍保留了The National City Bank of New York的招牌，現時由中國工商銀行進駐。



花旗銀行隔籬是這座建於1920年的漢口匯豐銀行大樓，屬古典主義風格建築，正面柱廊的10根大柱採用古希臘Ionic Order風格，現時則是中國光大銀行武漢分行。點解漢口都有上海外灘那種「十里洋場」華麗建築？咁要講返清朝咸豐年代的歷史……



話說1860年英法聯軍攻陷北京，搞到火燒圓明園之後例必又要簽和約，漢口就成為當時開放租界通商的城市之一，清末民初時就設有英法德俄日五國租界，成為全中國第二大港口，地位緊次於上海。上圖右是江漢關（當時的海關大樓）；左圖可見日清洋行；左下分別是太古洋行和漢口橫濱正金銀行大樓（全部都係20年代租界舊建築）。



由碼頭邊遠眺夜幕低垂的長江，見到有艘貌似半圓形的小遊船都幾得意咁喎！基爾就係坐住佢去夜遊長江了。



遊船隔籬仲停泊了一艘戰艦係咪好勁！按艦上編號八卦上網找找資料，原來是排水量400噸的興化艦，昔日是反潛護衛艇，1982年建造，2013年退役，現於武漢科技館展出。



如果去參觀展館應可以憑門票登艦參觀吧！不過夜晚來到當然沒有開放了……咁就繼續向前行過去遊船那邊，準備去遊長江。



3月來武漢唔知算淡季定旺季，不過登船的遊人都頗多，見船仲未開咁又四圍行下，又影下長江兩岸夜景先啦！上圖右圓圓地那座建築物就係武漢科技館，戰艦就停泊在它對出的江面。



遊船頂層的天台露台就長這樣！整艘船其實一共有三層，第一和第二層是室內（幾乎都無乜人坐），大部份遊人都不怕凍，全部上晒頂層看風景，雖然有點食西北風，但勝在無玻璃窗阻隔吧！



開船後又會經過戰艦和岸邊連接的武漢科技館，夜晚戰艦上黑鼆鼆沒開燈，都幾有神秘感，與背後華燈初上的高聳豪宅似乎有很大對比。



漢口與對岸的武昌和漢陽合組成著名的「武漢三鎮」，不要以為只有香港的臨海豪宅有價有市，武漢這類內地一線城市應該也不遑多讓……



遊船沿住長江向前駛，會穿過日間時到訪過的長江大橋和龜山電視塔，要留意夜晚的長江大橋還會亮燈，而且燈光還會變色呢！



江面上其實都幾多類似的遊船公司，幸好武漢這一段長江本身夠闊夠廣，所以完全無塞船的感覺。由河上遠望兩岸的晴川閣和黃鶴樓，這時早已亮起了投射燈飾，同日間看時又有不同的感覺。



花了成兩舊水來夜遊長江初時確有少少肉赤（初頭仲以為至少會有些美點雙輝招呼下，點知係完全冇）……不過搭正晚上八點，當地原來會有個「幻彩詠長江」之類的音樂彩燈show，又好似幾有睇頭喎！



隨著船上的音樂奏起，沿江兩岸所有高樓大廈就像化成屏幕一樣投射出一幕幕大禹治水又有扒龍舟之類的影像，由於規模非常大（試想像條龍差不多相當於由中環上環一直飛到過去筲箕灣，又由麗港城再沿海飛返去尖沙嘴鐘樓咁！）所以都算值回票價了。



個燈光show約莫只係十五至二十分鐘左右吧！完show後所有遊船就陸續靠返岸散場了。最後返到酒店都唔算太夜，不過因為第二朝要坐超早機走，咁沖完涼都要早少少上床睡，無謂再出去逛夜街玩到咁盡啦係咪！上圖是翌朝黎明時份出機場時，同場加映的看日出節目。計埋上西峰山頂果朝早，這趟武漢之旅短短幾天竟然看了兩次日出！



南航價錢平預了是特早機出發，武漢機場回程個候機室好細，但好彩設施都好新淨，又要讚佢個廁所都係出奇地乾淨（可能因為晨咁早根本都無乜人用過）！好耐未試過要坐車和行樓梯上飛機，仲要係非常準時完全無delay，未夠八點已安坐機艙準備好起飛。



短途機基爾唔介意坐窗口位，因為唔多需要出出入入吧！反正難得對住個窗就影影窗外航拍，飛機起飛無耐可以影到武漢市郊的田園靚風景，下面彎彎曲曲果條大河應該是長江啦！



飛機上的早餐印象中好似係三文治加果汁之類（沒甚特別所以無影），個人覺得簡簡單單的麵包三文明比難食的炒麵炒飯意粉來得更合適。食飽再望望飛機下面，仲見到條長江喎，真係比萬里長城仲要長又長……



令人喜出望外係這朝早天氣幾好機艙外的能見度幾高，而且全程飛機都唔係飛得太高，可以一直睇到下面越過高山又越過谷的地面情況，間中又會飛越某些不知名城市。上圖這處應是將近落機時飛越了廣州和珠江。



後來飛機一直飛到出去接近南海邊沿時，可能大氣層多了潮濕溫暖海洋氣流關係，又開始欣賞到一望無際的雪白雲海了。



當飛機開始下降穿過雲層果一剎那感覺好有趣，如果發白日夢伸手出窗外的話，彷彿可以觸摸到似天花板般接近的浮雲（好驚訝原來可以同個天咁接近，不要笑基爾咁大鄉里）！



穿過了厚厚的雲層之後，來到眼下的已換上了熟悉的香港風貌，有冇人認得上面這個近年都幾出名的「千島湖」水塘？基爾記得之前睇人地的行山網誌都有介紹過，不過自己就仍未到訪過。



心水清的可能一眼就睇得出，無錯就係大欖水塘了！由高空望落去可以見到條河由水塘一直伸出大海，平時如果有出入過屯門公路或者青山公路的話，一定會經過這處河口。



再飛出少少，仲會見到黃金海岸和龍珠島，再打橫望過去那個長長沙灘就係新舊咖啡灣和青山灣一帶，薄霧中還隱約見到屯門市區的高樓大廈，總算為這次旅程畫上圓滿句號了吧！