舊金山居閑話@Sacramento:上

不知不覺間，又回歸到闊別已久的金山網誌，眨下眼原來已經回來快一年了，希望唔會忘記那些有趣的旅居生活細節吧！

這朝早plan了大清早出發，咁早去邊？就係搭兩個幾鐘車去加州首府行一轉。一朝早吃過輕鬆早餐就起行，車駛出到市郊時天色好像不太好，幸好沒下雨。上圖這一望無際的大平原換了在香港會變成什麼景象（起一百個太古城應綽綽有餘吧）……



很多人可能會以為加州首府不是在San Francisco嗎？咁講返少少歷史先：其實早在19世紀中葉加州首府先後落戶在Monterey、San Jose、Vallejo、Benicia和San Francisco，到了1854年後才正式確立在Sacramento，至今已經有超過160年歷史。



來到Sacramento市中心，就見到上面這座宏偉得來又有點似Washington D.C.國會大廈的感覺，佢就係加州的州政府總部大樓。



不過喱度明顯就無首都白宮、國會或五角大樓那邊的保安咁嚴密，至少外圍的花園也沒加裝圍欄也不太見有巡警，只見花園裏樹立了棵好高大的聖誕樹，到訪當天正好是聖誕平安夜前夕。



有冇人去過金鐘的「門常開」？這裏就類似是這種政府建築物，加州的參眾議院都位於大樓內。與此同時它也是California State Capitol Museum，介紹好多關於加州歷史和政府運作架構，所以遊客也可入內參觀。



咁話明係政府建築物，安檢可說是在所難免，尤其在美國就更加嚴密。基爾記得去花園道美國領事館申請簽證時都要過幾重關卡，來到美國自己地頭更之然要過一過X-Ray和金屬探測先入到去。



安檢完之後順利入到去大門口，就見到牆邊有這座大木椅，突然間覺得有點似昔日皇帝的龍座，又或者珍寶海鮮舫那類畀遊客拍照的龍椅之類，唔知係咪畀州長議長高官之類的大人物接見外賓時坐呢？



經過龍椅之後見到條長長的走廊，兩邊牆上掛了介紹加州各個county的櫥窗，有好多名稱和地方真係聽都未聽過，大部份都簡單講解了當地的歷史和風土名物氣候之類，好似一本濃縮版的加州風物誌。



例如上圖這處叫做Tulare，是位於加州中部的一個縣，唔知當地係咪有好多果園呢？只見佢成個櫥窗都擺滿晒好多水果。市中心地區原來只有約六萬人，香港一條村分分鐘多人過佢！另外仲有個叫Glenn縣位於北加州，人口更少只有約三萬，不過就有個Mendocino National Forest（八卦上網睇過是典型洛磯山脈樹林湖泊靚景），每年吸引好多遊客去hunting、fishing、camping、bird watching同埋aquatic sporting咁話喎……



跟住又見到Santa Cruz，基爾之前寫的金山網誌都有去過喱度喎！有冇人仲認得山崖邊那座古老的紅燈塔？（重溫可click去：Santa Cruz）現在它已活化做滑浪博物館，成個櫥窗設計都突出了滑浪聖地的主題。



話明係金山當然有部份county主力去sell掘金的旅遊業吧！大部份掘金淘金熱點都係位於加州東邊近內華達州那一帶，例如上圖這個名叫Sierra的地方就有個火車運金礦的模型，果度有個叫Ruby Mine的金礦場，仲擺了幾舊金在櫥窗內（但有大大隻字寫明係exact replica of gold nuggets）。



最後影返個wide shot先，這條大理石走廊就長這樣，兩邊就是擺放介紹各county的櫥窗，分前後兩段。依家先知原來加州有咁多個county，土地面積比廣東省還要大兩倍有多（但人口當然少好多啦）！



走過大理石長走廊之後就來到大圓穹頂的中庭位置，之前在室外的花園時都見過中央這個似大教堂的圓頂建築，內部則有很精美的雕花裝飾，感覺似歐洲的大教堂咁宏偉。



不過大圓穹頂下面唔係擺放聖母或者耶穌像，而係15世紀發現美洲新大陸的哥倫布像，仲有西班牙的Isabella女王和一名小侍童的大理石像。



唔駛問這座大理石像一定就係講述歐洲人開發和管治美洲起源的歷史了吧！大廳雖然沒有其他的聖像畫、蠟燭台祭壇、大型管風琴或者告解室之類，但同一般教堂都一樣很有點莊嚴肅穆的氣氛。



叫得做museum，咁都仲有其他野睇下，例如上圖右記憶中好似係昔日打長途電話的電訊房，基爾無仔細入去參觀，望落好似仲保留了入錢機，但電話就拆走了。左邊是一座木製的自助紀念幣鑄幣機，只需要五毫子美金就可親手印一枚，可惜基爾沒有散銀在身。



行上二樓中庭的環形走廊再四圍八下，這裏的紅色花磚靚得來又有點似曾相識，望落感覺幾似HKU主樓那裏的百年花地磚，但這裏的維修保養都好得多，燈光映照下依然閃亮生輝……（左下的銅像忘了去看是什麼加州偉人？唔知會唔會係年輕時的朗奴列根？）



政總大樓內都設有museum常見的紀念品店，杯杯碟碟tee恤冷衫外套毛巾匙扣磁石貼postcard等應有的旅遊紀念品都有出售，加州大灰熊圖案也經常在紀念品上出現，不過基爾費事拎又無地方擺，所以近年都盡量戒買souvenir了！