川龍甲龍孖住行:上@荃灣

無得外遊，唯有繼續本地四圍遊！這次揀了去行荃灣川龍，仲一連去左兩次。莫非真係咁吸引值得一去再去？當然係「純屬巧合」而矣~~~可能貪果度可以順便飲下茶食個包吧！

端記茶樓 / 二樓雅座大騎樓 / 大蒸籠內有多款點心供應

以前去川龍飲茶的，多數係行山晨運的阿叔和大嬸，不過自從有蔡瀾阿蘇等名人介紹過後，就多左好多後生仔女貪懷舊去試下佢地那些所謂古老茶樓風味。反正也不難去，由荃灣港鐵站行天橋過去川龍街，坐80號綠van沿荃錦公路上大帽山，就可直達位於山腰的川龍，車程少於半粒鐘（$4.7），真係未坐暖張凳已經到。


分配點心的阿姐 / 白灼西洋菜及釀炸豆腐 / 各式甜辣醬麻醬自取

茶樓其實就在川龍總站旁邊，無獨有偶兩次都幫趁了端記，因為貪佢的「樓上雅座」有大露台靚景，玩籠雀在這裏hea坐飲下茶，清風隨來，即使炎炎夏日都係一種唔錯的享受。點心方面，都係一貫老牌茶樓常見的糯米雞、雞紮、棉花雞、鳳爪排骨、粉粿、山竹牛肉、鵪鶉蛋燒賣之類，唔夠飽的話仲有糯米飯和久違了大包。


咖喱魷魚等幾款點心 / 茶樓外的石澗 / 陽台上的雀籠 / 西洋菜田

點心的味道感覺上同市區的茶樓分別不大，只是製作比較傳統，而且樣樣都幾大碟。當然喱道另一賣點就係「全自助服務」，由開茶到拎點心都係要自己一手一腳搞掂，亦毋須要拎點心紙去蓋印，食飽之後就叫伙計數數台面點心碟就可埋單，所以唔好食完就順手拎走D碟，否則分分鐘變左食「霸王餐」畀人問候！


龍門郊遊徑林蔭夾道 / 步行徑旁的扶輪亭 / 荃灣半山豪宅寶雲匯 / 遠眺荃灣市區高樓大廈

食飽hea坐一陣就起錨！第一次去主要由川龍沿龍門郊遊徑行去城門水塘的菠蘿壩小巴站，全程只需2小時左右，由於是沿引水道而行，所以九成係石屎平路，絕對唔辛苦，沿途也可盡覽山下荃灣一帶的「石屎森林景」，若在天朗氣清的日子，還可遠眺藍巴勒海峽對岸青衣北的「樓景」。雖然與鬧市僅一山坡之隔，不過這條林蔭小道尚算清幽恬靜空氣清新，至少不會有車來車往的煩囂感覺。


三疊潭西方寺及萬佛塔 / 寧靜的引水道及步行徑

睇完樓之後繼續行行重行行，無耐轉入三疊潭一帶則見到山下的西方寺和圓玄學院等佛道寺觀。西方寺建於1972年，由永惺法師籌建。由半山引水道往下望，除了可以見到白牆金頂的大雄寶殿、天王殿等中式建築群外，最矚目的就是高9層的萬佛塔，氣勢非常雄偉，與內地或台灣的佛塔相比也不失禮。至於圓玄學院更是早於1953年已開幕，集合了儒釋道三教的殿閣，昔日是不少古裝片的取景場地，近年每逢秋季還成為賞菊的勝地。


步行徑旁的洋紫荊 / 米白色的曼陀羅

沿引水道一路走，除了有「大地在我腳下」的感覺外，稍為留心少少路邊仲可以欣賞到唔少奇花異卉，例如上面是本地也很常見的洋紫荊和曼陀羅。香港市花洋紫荊幾乎在各區鬧市屋村都可見其蹤影，不過這裏的紫荊花可能吸收了日月精華和山壑靈氣，所以開得特別艷紅又大朵。至於曼陀羅則原產於印度，現時東南亞一帶都很常見，一般在4至9月開花，花冠下垂呈喇叭狀，大多是白色，有一隻手掌那麼大，本身具毒性，所以不能亂掂。三國時代華陀曾以曼陀羅製成有麻醉作用的「麻沸散」，即後來的「蒙汗藥」；明代時李時珍的《本草綱目》也有以曼陀羅入藥的記載。


步行徑旁的路牌 / 扶輪亭內的石桌椅 / 波光粼粼的城門水塘 / 正在山坡上食草的黃牛

睇完花花草草之後，開始發現前面有幾隻馬騮的蹤影，原來已經來到城門水塘的菠蘿壩，壩底有個小巴站，可乘82號綠van返回荃灣市區。不過這天似乎不太夠喉，順道又行上城門水塘郊野公園hea陣才返歸。這次看到的水塘景其實同上次差不多，水位也不太高（詳見﹕城門瑤池在水中央），不過意外收穫係見到一隻在路邊食草的牛牛，見佢在崖邊腳震震咁食草都幾牙煙！原來人同動物搵食都係唔容易的……

附錄﹕川龍城門引水道路線圖