銀杏館@太子

朋友A剛歐遊完返黎約食飯、睇相兼聽佢講下有趣「旅行經」。基爾於是又特登「提早」少少收工，以9秒9竄出去太子會合大隊，A提議去警察會附近那間銀杏館開飯，反正未食過，就去試試。

銀杏館門面裝修得古色古香，大牌匾甚具中國味

如果之前睇過星期X檔案、鏗鏘集又或者蔡瀾阿蘇之類的飲食節目，都會聽過銀杏館吧！佢地係屬於為長者提供就業機會的社企，專請長者當侍應，畀機會佢地可以從工作中重拾自信及肯定自我，亦為部分貧困而未想倚賴綜緩生活的長者提供再培訓及就業服務，咁有意義的食肆當然要去支持下。


芋頭煲仔鴨的芋頭非常入味；鹵水鴨舌味道較清淡但肉質豐厚

位於中環的老店及佐敦分店相信比較多人幫趁過，而太子這間於去年才開業。初時見太子這邊人流不算多，但原來都要等位，不過在門口招呼的侍應伯伯非常有禮貌，經常出來提醒還有多少張台就到，事實上也不是要等太久，無耐就有位招呼我地入去。


蜜豆配上鮮百合及蓮藕片感覺fresh得來也很爽口

坐低打開menu睇睇，其實大部分都係一些久違了的經典懷舊菜式，基爾率先點了鹵水鴨舌作頭盤。記得幾年前第一次去台灣時食過，反而香港則不是很多食店會做得好味，所以之後就無再食了，這次即管點來回味一下。其餘幾味就交由食神S發辦，基爾就自顧自與A傾下佢果D德荷之旅見聞。


乾燒有機茄子也是一道惹味的傳統菜式

結果仲叫了芋頭煲仔鴨、乾燒有機茄子及「當年美味」系列的季軍得獎菜蜜豆鮮百合炒藕片。基爾好少食鴨，如果有得揀，通常會先選燒鵝，不過這個芋頭煲仔鴨又幾唔錯，至少芋頭夠林而且吸收晒鴨的肉味，齋食芋頭已經好正！乾燒有機茄子則外脆內軟，口感獨特得來又香口。蜜豆鮮百合炒藕片則很有住家菜風味，食完鴨煲和炸茄子後再食蜜豆、百合和蓮藕片感覺特別清新。


麥味十足的Erdinger啤酒，酒樽同酒杯都好靚；飯後甜品綠豆沙

侍應伯伯後來又推介了上面這款德國Erdinger啤酒，基爾唔識飲當然就無試，不過據A講麥味就幾濃，可以媲美佢在德國飲果D。最後還有糖水附送，不過就只有綠豆沙，當然比起基爾煲果D差得遠啦！（詳見﹕跟阿媽學煮?之四）最主要係缺少了陳皮的香味……Anyway，作為飯後的小甜品也是不過不失的。埋單計每人也只是一舊水，算是抵食而且傾得開心的一餐！

 

銀杏館 Gingko House
太子西洋菜北街171-173號