遺忘的卡式時光@郭小霖+陳百強

近日天氣熱到暈，放假都唔係咁想出街，繼續做下宅男為妙。係屋企悶悶地有乜好做？一於又拎舊野出黎搞下……今次就搞下D古董cassette，睇睇有冇發霉先，就揀喱3餅啦！

先講最右手面果餅《郭小霖》（1987），80年代中期郭小霖唱的幾首盞鬼「蝙蝠俠」情歌曾紅極一時，依家當然好難想像喱款歌都會大hit，不過80's的廣東樂壇就係勝在歌曲類型繁多，而且有很多意外驚喜。

講返郭小霖，最鍾意的始終係《從不知》和《分手真相》，當然仲有廣告歌《迷惘》，可惜全部都無收錄在這專輯中，想聽的話可以搵返《一些事一些情》果隻精選碟。幸而喱餅帶仍有水準不俗的《情人身邊》和《畫筆》，值得一提的是郭小霖把聲幾特別，是屬於一聽就能認出那類型，反而依家好多歌手把聲都無甚style，好多時聽完都認唔到係邊個唱，試問又點會紅得起呢！



再講Danny，中間淺綠色果餅精選《我的所有》（1989）可說是經典中的經典，裏面13首歌全都耳熟能詳，包括有《煙雨淒迷》、《凝望》、《我的故事》、《從今以後》、《癡心眼內藏》、《至愛》……不過基爾的心水卻是半冷的《無聲勝有聲》，盒帶裏面張歌詞寫住係無記電視劇《衰鬼逼人》的插曲，對喱套劇真係完全無印象，唔知有無blog友睇過？男女主角係邊個做架呢？主題曲又係邊首？（按﹕多謝blog友阿摩提供的資料——《衰鬼逼人》由溫兆倫、毛舜筠主演，主題曲同是丹尼仔主唱的《令你著迷》，作曲竟然也是郭小霖，真係好橋喎！）

至於最左則是陳百強另一張經典專輯《凝望》（1987），裏面除了有大熱的點題作《凝望》及《迷失中有著你》之外，仲有《至愛》及翻唱英文原版《Greatest Love Of All》；其餘就是比較冷門的作品，但又不代表唔好聽，例如《您令我心醉》、《沒法可續緣》都是水準不俗的慢板歌；《愛沒有不對》更是一顆滄海遺珠，而《散‧聚》則很有style，非一般大路情歌可比。