川龍甲龍孖住行:下@荃灣

短時間內又有「川龍take 2」之行，證明喱條行山路線確實係幾hit的。首先當然又係指定動作，由荃灣坐小巴上川龍飲茶hea坐，跟住又忙住去拎點心沖茶，與上次大同小異，此part不再贅述！

大帽山郊野公園 / 行山徑也是越野單車徑 / 深林人不知 / 沿山路搭級而上

在端記坐夠食夠傾夠之後又起錨！不過這次不是行菜田那邊往引水道的方向，而是另一邊往大帽山郊野公園的上山路，所以起步這段路也要花費少少氣力，好彩剛才已叉足電，基本上無乜難度。上到大帽山郊野公園燒烤場後，先去過廁放低少少野先，因為之後不會再有方便的地方，順便也可以先歇歇腳才再上路。


長在石上的地衣 / 恍如一把大傘子的大葉植物 / 甲龍林徑路牌

從郊野公園側的荃錦坳漁護署管理站出發，附近山邊有一條上山小路，無幾耐就見到甲龍林徑的大木牌匾楝在路旁，這裏就是起點所在。由這裏往前走，大部分已是天然的泥地小徑，不過修葺得尚算整齊，也不難行，加上很多時都有林蔭夾道，所以即使是盛暑季節也不用怕烈日曝曬。此外，沿路還經常見到一些築在路旁的「通識教育路牌」，提提行山人士附近有咩特別的植物或動物可以欣賞到，例如青苔地衣和各種蕨類大葉植物，它們外貌雖然平平無奇，不過原來是要在水質非常潔淨而且空氣質素極佳的地方才會生長，所以都唔係度度都見到架！


遠眺石崗村屋 / 不算太崎嶇的山路

講返甲龍林徑，原來它是古時八鄉、石崗一帶村民往來荃灣的必經之路，全長逾6公里，如果好似基爾咁行下影下hea下，都要差不多2.5小時。沿路指示充足，基本上不怕蕩失路，要注意是由於部分行山徑與越野單車徑係共用一條路，所以行行下不時要避單車，要小心一點！沿途除左睇奇花異草之外，這邊與引水道那邊一樣可以居高臨下睇風景，不過這次看的不是荃灣的「石屎森林」，而係石崗一大片低矮的鄉郊村屋和綠悠悠的田園景色，還有遠處傳來的吱吱鳥語作背景音樂，感覺其實有少少似去左外國咁，所以黎喱度行下都可以暫時止下遊埠癮。


竟然會有黃麂出沒 / 花徑不曾緣客掃

再沿山路往下走，又發現路邊樹立了一個告示牌，當然唔係「熊出沒，小心！」果隻，只係話喱度原來係會有黃麂出沒的，叫D人唔好嚇親佢地！可惜當日見唔到，基爾亦從來無見過野生黃麂（反而在芬蘭的野外見過reindeer，即係幫聖誕老人拖雪橇的馴鹿），原來佢地都係屬於鹿科動物，非常機靈，幾乎遠遠聞到人類陣味都會即閃，所以唔係咁易見到佢地廬山真面目的！


農場鮮奶小食亭 / 裏面其實似個小農場多點 / 甲龍林徑的出口

行行下話咁快就來到甲龍林徑位於石崗雷公田村的出口，附近有一間「農場鮮奶小食亭」，售賣的奶製甜品聲稱係「地道出產」，反正腿也走得有點累，就入去幫趁下順便抖抖。走入去一望，其實似農場營舍多過小食亭，地方都幾大（仲有個羊欄），不少行山友都會來這裏先醫肚作中途站。


小食亭內買的rum酒提子雪糕 / 薑汁撞奶 / 芒果布甸

由於基爾不太受得牛奶，所以只食左幾粒燒賣同埋少少布甸，只見同行友人去賣完薑汁撞奶又去encore埋rum酒提子雪糕擺滿台，齋睇無得食的基爾都有少少唔抵得！Anyway，在農場小食亭內hea坐下，一面欣賞下石崗的田園風光，一面數下羊欄裏面走來走去的黑草羊，都係幾愜意的。


石崗軍營 / 農場鮮奶小食亭內的羊欄 / 黃昏夕陽下的雷公田村

Hea坐陪食之後再moon walk去雷公田村口，近石崗軍營外有個巴士站，又剛巧有架51號巴士黎到，當然立即三步併作兩步跑去上車。真係好耐無坐過單層巴士，都幾盞鬼，不過一陣就返到荃灣咯！落車後唔知去邊度覓食好，喱頭基爾都唔太熟，於是四圍顎下顎下行下行下就黎到上面喱間野，門口寫住任食兼唔駛加一，只係百鬆D蚊都好似幾抵，就入去試試。


在石崗軍營旁坐51號單層巴士返回荃灣 / 近愉景新城的碌冧法式越南料理

推門走入去，裏面原來都幾靚，暗暗的好似幾有情調咁款，至少唔似門外的茶餐廳feel！坐低之後睇睇有咩食先，其實都係D札肉檬粉、越式拼盤之類一般的越南餐廳菜式，唔算有咩新意。後來叫到埋台食落原來真係好一般，份量亦唔多，部分要叫幾碟先至夠分，而且味道都係水準之下，有些甚至叫幾次都一直冇來，連奶茶汽水全都淡茂茂似開水，都莫再講話甜品！基爾就覺得「小巴黎」或者之前去大坑食的「新越」就好食好多。後來翻查OR，喱間野原來都真係幾劣評如潮，還是早早將它從「米G蓮名冊」剔除為妙！

附錄﹕川龍甲龍林徑路線圖