浦和日本料亭@上環

喱次基爾山長水遠出到上環，初頭唔知食乜好，因為鄉下仔向來都好少黎喱頭覓食，後來行到去永安斜對面見到這間「浦和日本料亭」，聽聞話幾OK的，冇再細諗就入左去（其實係因為天氣太熱不想再四圍搵）！

唔知係咪周日中上環通常都唔會太多人幫趁喱類食店，果陣雖然係lunch時段，但店內真係烏蠅唔見多隻，可以揀返個舒舒服服的角落卡位坐。打開餐牌一睇原來選擇都幾多，而且除左清酒之外咩野都可以任叫任食，無乜限制，咁先至叫做放題丫嘛！好啦，首先叫了刺身拼盤、幾款炸物和串燒。睇OR話平時旺場時係要等好鬼耐才上菜，但喱日無乜客，就無喱個問題，5分鐘內已經有野食落肚。



雖然店內比較幽暗，幸而基爾部老爺DC仍算勉強應付到，在昏黃的熿燈光下，刺身都好有光澤，唔會啞晒色，幾新鮮似的，對版！炸物方面，那些炸茄子、炸蕃薯都OK，唔會太油膩。而基爾的至愛天婦羅蝦都很有水準，至少似係即叫即炸，蝦身也炸得很乾脆，不會油淋淋。食完炸野好熱氣，再叫了什菜沙律降下火先，另外仲叫多款蟹籽沙律，當堂refresh返晒！



之後不能不叫的還有三文魚生同埋一口牛，前者非常鮮嫩，不過基爾唔敢食太多生野，所以都係淺嘗幾舊就算。至於一口牛是切成一粒粒很小巧的燒牛肉粒，同樣由於基爾對牛肉有敏感，之前拎過野後亦唔敢狂食，所以都係同樣淺嘗即止。



當日其實仲食左好多野，包括螺肉刺身、香蔥吞拿魚腩手卷、軟殼蟹手卷、燒鯖魚、清酒煮硯、吉列蠔、炸餃子、各式壽司……最緊要係那個和牛火鍋，牛肉其實食得不多，但其他豆腐金菇粟米等配菜都非常足料，而且更重要的是D湯底可以畀基爾用黎打邊爐，淥一淥D三文魚先食，非常有用。最後還有綠茶或豆腐雪糕做甜品，正呀！可惜由於只掛住食同傾偈，好多時都唔記得左影相！

值得一讚係喱度除左汽水咖啡柑桔檸茶果汁任添任飲之外，侍應手腳也很勤快，服務態度也very good，可能係由於人客少的關係吧！至少沒有出現好似OR話要食客呆等或叫了貴價野不來的惡劣情況，最後埋單計連加一約$220。基爾見OR給了這間浦和日本料亭都有3.1分，個人就覺得好中肯合理了！

 

浦和日本料亭 Urawa Japanese Restaurant
上環德輔道中244-252號東協大廈地下及地庫