聽歌其實都有季節之分，單單講廣東歌，例如秋天會鍾意聽《從不知》、《微涼》；冬天會鍾意聽《冷雨》、《絕戀》、春天會聽《破曉》……咁夏天又有冇乜消暑歌推介？下面喱隻CD就係基爾的仲夏夜至愛。
1989年李敏同劉文娟以CU才女校花招牌出擊，走的主要是依家唔會再興的抒情校園民歌路線，當年在樂壇上都算係一股清泉，即使依家看來也不覺得out和俗套吧！至於喱隻《十年十美》（1998）出版的時候，其實夢劇院已經摺埋左好耐，只是為了紀念她們出道10周年的總結專輯而已。碟中包括有夏天必聽的《飄去夏天》，係夢劇院出道時的主打歌，即使在酷熱天氣下，聽著也覺得涼浸浸！《四分三日》、《天生一對》和《我是藍鳥》也是基爾的「飛佛」，唔知點解咁多年以來都唔係咁接受到中島美雪把聲，反而覺得夢劇院這個廣東話版本《我是藍鳥》是真正的青出於藍勝於藍！
夢劇院也唱過唔少翻唱歌，除左《我是藍鳥》之外，仲有Joni Mitchell的《Both Sides Now》，夢劇院唱的仍是英文原曲，但感覺上Joni Mitchell原裝版比較country一點，節奏輕快一點；而夢劇院唱的版本可能由於是二人和唱，反而更添民歌味道，更柔和好聽，是完全兩種不同的感覺，唯一遺憾是這張《十年十美》竟然沒有收錄《Both Sides Now》。
快歌方面，夢劇院有幾首代表作要畀like，例如喱張精選碟內就收錄了《全自動星夜》和《真相》，兩首水準都甚高，而且仲很有80's電子組合味道！碟內不能不提的，當然仲有好有style的鋼琴獨奏慢歌《愛人》，李敏的詞填得正之外，唱得仲正！連結業作《再見會是老地方》也是夢劇院的經典……
夢劇院當年咁紅點解會拆伙呢又？記憶中踏入90年代後，劉文娟先往日本作交換生，其後李敏又到了加拿大讀電影，後來她又成為填詞人和出書的才女，也曾當過DJ；劉文娟回來後曾做過一輪無記，之後就淡出娛樂圈了。兩人拆伙後始終沒有再復合出碟或演出~~~~~或許，當兩個人踏上人生分岔路之後，真的會是「你有你的生活，我繼續我的忙碌」，緣份盡了就很難有機會重逢吧！
沒有留言:
張貼留言