由浦西坐一程免費地鐵專車去返浦東園區，目標先鎖定在歐洲館區。由於尋晚已行了其中一部份，所以這天又主攻另一邊，不過其實展館的日景同夜景都有不同感覺，所以在喱一帶兜兜轉轉也不會覺得悶。
在歐洲廣場上率先見到葡萄牙館 / 設計恍如童話小屋的白俄羅斯館
由地鐵站上返地面，行冇耐就來到歐洲廣場，率先見到的是外貌像個大木盒的葡萄牙館，據介紹它用了大量環保軟木，築成外立面幕牆和展區牆壁貼面，裏面劃分了四大時區，通過門廳、柱廊、電子屏幕和主題展區展示葡萄牙的歷史、文化、經濟和國民生活，展現自中古至今5個世紀以來葡中的聯系及其對現代葡萄牙的影響……冇室內相，當然係因為入唔到去啦！唔緊要，行過D見有間「童話小屋」仲吸引！
白俄館天花圓頂有幅巨型卡通民居圖畫 / 由屋頂垂下了十幾幅白俄人畫的風景及人物畫
原來喱間咁色彩繽紛的是白俄羅斯館，它以卡通和油畫展示白俄在城市發展中獲得的成就。首都明斯克經歷二戰後的重建，城市中保留的歷史文化遺產讓人感受到這座城市對和平的珍惜和對戰爭的憎惡。此外，一幅幅懸掛在牆上的手繪傳統建築圖畫和城市生活面貌，也展現了白俄羅斯人的活力和對未來生活的幢幜。
捷克和斯洛伐克雖早在90年代初已經分手，但兩間並排的展館依然樣簡約合襯
白俄館對面見到兩座style相近、同樣用了素淨的白灰色和抽象圖案作外牆的展館，走近一看原來是捷克和斯洛伐克「兩兄弟」。由於之前看介紹世博的電視節目，知道捷克館仿製了一尊查理橋上的聖像來展覽，所以都想入去睇下。行到門口發現排隊的人不算多，只等了約15分鐘就入得。
捷克館內查理橋的揚聶波姆斯基聖像 / 捷克著名小說家卡夫卡 / 變身ice hockey star
入到捷克館果然沒有失望，立即就見到1:1實物原大的查理橋聖像，記得2001年基爾去到布拉格時也有逛逛查理橋，橋上有30尊聖人銅像，這次來世博的只是其一。很喜歡聖像背後的大型風景畫，加上出色的燈光效果，影相出來確實真的有點像去了布拉格。捷克除左sell查埋橋之外，仲有國寶級小說家卡夫卡，可能唔少blog友都有睇過佢的代表作之一《變形記》（Die Verwandlung / Metamorphosis）。當年遊布拉格舊城時（詳見﹕戀戀老山城布拉格）也曾逛過Golden Lane，卡夫卡的故居就在那裏，雖然只是一間小木屋，但廳中的小窗可盡覽山下伏爾塔瓦河（Vltava River）的靚景，可說是地靈人傑的豪宅。
捷克館裏有很多這種有趣的天花板倒吊裝飾
除了卡夫卡同查理橋之外，捷克館內還有力sell國寶級運動ice hockey，行過又順便影返幀扮野相留念，因為相信基爾都無乜機會去打ice hockey了。再行入少少，突然見到唔少人一齊「頭岳岳」咁，搞咩呢？咦，原來天花板真係有正野睇喎~~~~因住畀櫥窗跌落黎果D碟掟親呀（純粹視覺效果）……都係走先！
之前去愛爾蘭館有街景睇，黎到捷克館一樣有，仲要靚好多 / 3D版許願池唔知靈唔靈架呢？
沿路繼續行，仲見到唔少布拉格的舊城街景，e.g.天文鐘、聖維特教堂、堤恩教堂等，像真度確係幾高的，不過由於基爾以前去過，所以就無謂阻住國內同胞爭位去影喇！反而基爾覺得展廳盡頭喱個3D版許願池就幾特別，如果用手觸碰這個「水面螢幕」，真係會即時泛起漣漪，好玩得來又夠詩意！
為紀念蕭邦冥誕200周年，歐洲廣場的大舞台上有蕭邦鋼琴樂章的演奏會
行完充滿虛擬城市感覺的捷克館後，來到歐洲區中央的大廣場，見舞台上剛好有鋼琴表演，原來係為了為紀念蕭邦冥誕200周年而彈奏的樂章。雖然入唔到波蘭館，好彩在這個露天廣場都有返少少表演睇下，而且都幾多人圍觀！唔講唔知原來蕭邦生於1810年，聽聞仲會有一名神奇鋼琴家同時用100部鋼琴彈奏蕭邦作品，雖然基爾冇幸睇到有幾壯觀，不過睇到喱個4人鋼琴合奏都唔錯！
連波黑館都有條人龍，真係想考下佢地波黑個全名係咩 / 傳統的織花手帕工藝
睇完蕭邦鋼琴演奏後，見隔籬的波黑館唔太多人排隊，就去睇下。入到波黑館見到一個類似戰場的模型，另一邊有個木質手工製作台，藝術家即席示範傳統手工藝品製作過程。另一邊則有「電影魔盒」，四周環形及平面的屏幕放映各類波黑自然風景影像，當中部份還是獲得聯合國教科文組織列為世遺的名勝。
歐洲聯合館匯聚了不少歐洲小國的展館，例如列支頓士登、聖馬力諾、馬爾他、安道爾等
歐洲區其實只有少量展館可以免排即入，包括上面喱間聯合館。館內集合了不少歐洲小國，如果有留意歐洲國家盃外圍賽的人應該會聽過這一大堆國家名字。由於想買下郵票做紀念，所以先去造訪有「郵票王國」之稱的列支頓士登。喱間館除左郵票櫃位之外就無乜特別野睇，最終就用左RMB＄35買了上面這套列支頓士登紀念參與上海世博與中國郵政聯合發行的連體郵票，一邊是山水國畫，另一邊是風景油畫，中西合璧都幾特別的。
外觀四四方方的瑞典館 / 螺旋狀的丹麥館 / 遠眺圓桶形的拉脫維亞館
買完郵票繼續去高速巡館，首先又見到返尋晚經過的瑞典館，日間睇同夜晚睇感覺又有D唔同，方塊拼砌的外牆令整間館有點似扭計骰。唯一無變就係大門外的人龍，日與夜都一樣長。再過去隔籬睇丹麥館，館頂的螺旋形行人天橋幾特別，可惜又係因為太多人，無乜耐性去排。聽聞館內有尊美人魚像，基爾之前去哥本哈根時也在波羅的海邊同佢有一面之緣，所以即使今次見唔到都不算遺憾吧！
沒有留言:
張貼留言