香江有情@歷史博物館

咪噓住！咪噓住！所講的「靚仔」當然唔係指基爾，而係新歡Pentax，今次為左要考驗下佢在較陰暗的室內環境中會唔會出現震騰騰、雜訊多等常見問題，就帶佢去博物館見下世面！

香港歷史博物館的「香江有情」專題展覽

博物館逢周三免費入場，就揀喱日出尖沙嘴掃館。掃慣世博館，香港喱D自然係easy job，率先來到尖東的歷史博物館，睇一個「香江有情」專題展覽。其實個展覽已展左幾個月，1月17日就完結了。去到大堂已經post了很多banner同香港老照片，睇真D原來其中一幀係熟悉的馮平山博物館添喎！


文武廟神輿，清同治元年（1862年）製 / 三足鼎及紀念牌匾 / 剛好有導賞團

展覽由康樂及文化事務署與東華三院合辦，從醫療、賑災救濟、教育、社會服務、海外華工原籍歸葬及文物保育等各方面，介紹東華三院對香港，以至海外華人社會的貢獻。入到展聽時剛好有導賞團，基爾於是走近人堆聽下，不過聽聽下就冇乜心機，加上導賞團人多不太方便影相，都係自己巡一圈影下相先。


展廳都幾闊偌 / 展出多種東華三院文物，有牌匾、雕花銅鼎和托兒所兒童書等

東華三院是香港現存歷史最悠久、服務最多元化的慈善機構。1870年東華醫院創立，是香港首個獲得政府撥地支持和具備西方法理基礎的民間醫療機構，由華人管理，並以服務華人為目標。


展出不少昔日的醫療用品 / 文物修復工具 / 置於簷頂的石灣陶瓷裝飾

其後東華醫院推廣至教育、賑濟、殯葬、廟宇管理及其他社會服務。廣華醫院和東華東院分別在1911及1929年成立，至1931年三院合併稱為東華三院。東華其後增辦兩間醫院及不斷擴展服務，至今已有140年歷史。


採中式建築設計的舊廣華醫院 / 醫學用時計 / 茅氏壺

東華三院服務對象主要是本港居民，但也關顧內地及海外華人，這正好見證香港在聯繫內地與海外華人所扮演的樞紐角色。上圖比較特別是右上的「茅氏壺」，它用作輸出蒸氣或已混和藥物的蒸氣，以供呼吸不暢順的病人使用。