記得舊年解放軍軍營開放日去過石崗參觀，今年則有機會去見識下昂船洲海軍基地。
昂船洲軍營門口也大排長龍 / 坐的士入營 / 昂船洲軍營開放日門票
基爾從未去過昂船洲，去之前上網check下坐咩車去。昂船洲屬軍事禁地，平時無公車入去，每逢開放日才提供特別班次巴士和小巴。喱日本來10:00am已到了美孚，但等搭6R的人龍長到見首不見尾，醒目地立即改變策略返入美孚商場附近搵的士，直入昂船洲軍營才廿幾蚊per head，唔駛受排長龍之苦已值回票價！
進入軍營的大馬路 / 瞭望塔下唔少人爭住同迎賓的兵哥影相
昂船洲在回歸前英軍管豁的年代是一個海軍基地小島，回歸後經過大規模的西九填海工程，現時已經有陸路與九龍半島連接。雖然如此，但由於百多年來早已叫慣叫熟，所以仍保留「洲」的舊稱。
直升機停泊在海邊的停機坪上 / 軍營中央的大操場上有銀樂隊表演
雖然已經搭的士趕入去，但在軍營門口也要排一輪隊、經過安檢後才可以入去參觀。入到軍營已經成10:45am，錯過了10:30am的升旗禮，比較可惜。
在操場上列隊操兵的解放軍海軍，套制服幾靚 / 看台上早已逼爆人
睇唔到升旗，唯有繼續行入去，見軍營中央的大操場圍滿人，一定有表演吧！就行埋去八下，見原來係海軍的演練，整場表演分為幾節，有軍樂隊演奏、拳術、槍械團體操、獵人戰鬥等表演，與上次在石崗看的大同小異。
兵哥在操場上表演拳術，以及徒手、短刃埋身搏擊等武術
雖然距離比較遠，但其實都感受他們到拳拳到肉的氣勢，在電視上睇可能好多人都見過，不過現場就更有實感，好彩相機都算zoom得夠遠，而且不太手震。
當兵絕對唔簡單，又要捐窿又要淋水托杉兼跳火圈
喱個實戰軍演比較精彩，是整個閱兵演練的重頭戲，見成隊大兵輪住捐窿，轉頭又要畀人兜頭淋水，再去跳火圈，之後又要托杉射擊游繩，非常考體能。與此同時高空中還經常傳來隆隆炮火聲，真係耳膜都幾乎震穿！
睇完軍演再去排隊上軍艦參觀 / 岸邊停泊了幾架迷彩直升機畀人影相
整體而言，昂船洲這個軍演其實都OK好睇的，不過感覺上次在石崗睇果個反恐軍演更有特色，可能又有直升機又有槍炮出動吧！比較好彩係今次天色較多雲，無咁曬，否則要暴曬住咁睇仲慘！
要排成十幾分鐘先上到軍艦睇，超多人
睇新聞先知原來果日有成萬幾人去昂船洲參觀，唔怪得乜都要排隊，不過一場去到喱個海軍基地，又無理由唔上軍艦睇，唯有死死地氣排啦！
在海軍船塢的岸邊可遙望遠處的ICC和西九一帶的豪宅大廈，仲隱約見到港島的IFC
其實開放的軍艦唔算太大艘，基本上排隊仲耐過參觀，加上艦上開放的大多只是甲板範圍，好多內部船艙也沒開放，在艦上簡單行一圈就要落船了。
岸邊有兩艘登陸艇和一艘導彈護衛艦開放，幾乎每艘都逼滿遊人
由於唔想花太多時間排隊，所以基爾只選了人龍較短的一艘小型導彈護衛艦艇參觀。艦上其實也沒太多特別的東西看，只在甲板上影下相而已。
同肥仔兵哥影返張相先 / 艦上的重型導彈炮管
唔少人都係一家大細來參觀，所以艦上都有幾多細路走來走去當是在遊樂場玩，艦上的兵哥當然又成為人肉佈景板咁同遊客影下相之類，都是很友善的。
由船頭拉到落船尾的彩帶旗幟 / 艦上的炮台，又係影相熱點
此外，艦上唔少炮台、導彈炮發射台等都係影相熱點，成棚人圍住係咁影，基爾都係做路人甲在旁邊求其影D畀大家睇下就算了。
岸邊的「人海」比展出的軍車還要壯觀
睇完戰艦後返上岸，岸邊其實仲有好多直升機、軍車、裝甲車等參觀，有些還可上車影相，不過由於實在太多人，所以大多只「遠觀」而已。另外同上次去石崗一樣，仲有好多防彈盾牌、手槍步槍之類展出，可以畀人拎住影下相。
英偉的連長 / 連長房間的露台 / 一整列營房 / 營房下面停車場的軍車
由於有幾幢軍營開放，基爾見唔太多人排隊，就上去睇下。軍營大樓只有3、4層高左右，每層有十多間房，除左住房外仲有茶水房和休憩間之類。先看連長的房間，昂藏6呎幾的連長在房裏筆直的站著迎賓，房內只有兩張床，是他與副連長的，其他陳設也很簡潔，只有木書台、書櫃和衣櫃，還有小露台。
普通士兵的房間 / 表演摺被
再行過少少就是普通士兵的房間，一間4人居住，有4張床，木書台和衣櫃等，士兵會向訪客敬禮，還會即席表演摺被。上次在石崗也見過，好神乎其技，三兩下手勢就摺出起晒角像個方盒子的棉被，好整齊，犀利！
開放參觀的11號兵營大樓 / 回到大操場的看台上
行完營房一圈之後，都已經差不多1:00pm了，開始有少少肚餓，行過canteen那邊又係超多人排隊，而且供應的也只是士兵製作的小糕點，為免同人逼，都係搭車返出去先食晏吧！
在看台上影的全景照，可能由於天陰關係，拍出來效果不算太理想
臨走前，再返去剛才看軍演的大操場，走上看台睇睇，由於軍演時看台上實在太多人，逼不上去，原來看台上的景觀也很開揚，看軍操時可欣賞到整個陣式佈局，應該會更精彩吧！
沒有留言:
張貼留言