2011年5月31日 星期二

嘉道理聽鳥賞花:上@錦田

嘉道理農場,相信對好多人來說都係一個古老名字,小學時可能會去過旅行吧?!大個左就好少人會再去……基爾記得最後一次去好似係U1時去field trip,這次舊地重遊,重拾了不少青蔥回憶!


$10入場,是香港少有要畀錢的行山徑 / 雞場,勁多雞啼 / 可愛大肥豬

在太和會合大隊後,坐64K浩浩蕩蕩入去林村嘉道理農場。其實去林村許願樹或者石崗軍營都係坐喱條route,沿途風景唔錯,車程也不遠,約30分鐘就到。到大門口office box先買入場券,其實$10都抵的,可行足大半天!


在山腳起步前先影地圖 / 出發了!起點見到公雞夏令營告示牌

買左飛就出發!本來諗住坐schuttle bus上山,但車票已派晒,無所謂啦話明黎行山,就行上去當做運動出身汗!山腳其實都有幾個農莊,包括雞場和豬場,雞場裏的雞勁啼,好耐無聽過雞啼啦,好有大自然天籟feel。隔籬無幾遠又見到豬場,這裏的豬場好乾淨,完全無臭味,隻大肥豬個肚腩仲耷到拖晒地,好搞笑,立即令人想起長城牌午餐肉招紙上果隻,基爾最鐘意喱D肥嘟嘟野!


出發時還是藍天白雲一片 / 森林中的一條船 / 蕨類植物是地球上最古老的植物品種之一

睇完雞同豬之後真係要起行上山了,以免太晚落山會遇到「野獸」!出發時天空還是藍天與白雲的呢,點知後來……還是以後再講!行無耐就見到喱艘「森林中的一條船」,好中式的設計,唔知有咩用,或許只用來裝飾吧!另外,山徑兩旁也長滿了這類蕨類植物,是恐龍時代已有的活化石!


修女花園裏果然有好多奇花,可惜不見有修女種花 / 路邊岩石上滋長的地衣,好有層次感

行上山無耐就來到喱個「修女花園」,反正是上山必經之路,就入去賞花吧!雖然這次來到已是初夏,本已有心理準備不會有太多花,但原來都唔係喎,都仲有好多花開,愛花之人一定要到此一遊。要勞煩「靚仔」出動了!先影地衣,地衣是一種原生真菌藻類叢生植物(即苔蘚類),一般生長在潮濕的石面上,而且必須是水質無污染而且空氣質素極佳的地方才會滋長,可見嘉道理喱度空氣絕佳!


原野遊遍花醉人,花開千里香;蝴蝶來到親芳澤,繞花飛舞若狂 / 天梯

「修女花園」裏除左賞花之外,仲可以觀蝶。腦海中突然泛起了阿姐(或黃韻詩)撲蝶的搞笑場面……唔知係咪D蝴蝶畀基爾嚇走晒,一隻都見唔到喎,只見到幾條毛蟲咋,可惜呢!唔緊要啦,繼續行上去喱條「天梯」!


用SF(超微距)拍的小藍花,都幾靚幾sharp / 一貫嬌艷的大紅花

花園裏有好多花的品種,從最常見的大紅花,到上面喱種小藍花都有,有好多都係第一次見,連個名都未聽過,大自然真係好神奇!


倩人菊係咪摘畀情人架呢 / 紅吊鐘 / 有不少告示牌簡介花與蝴蝶昆蟲的品種

影花影到唔停得手!這種街邊常見的小黃菊,在嘉道理也開了一整片,而且更黃更燦爛,明顯在這裏住得很開心,鏡頭中的花彷彿也在笑!原來它也有個很好聽的名字,叫做「情人菊」!係咪摘畀情人架呢?另一邊仲有一整片紅吊鐘,以往行山都成日會見到這個品種,在嘉道理這裏經悉心栽培當然開得更燦爛!


攔路突然伸出這株美人蕉花蕾,非常挺拔 / 山腰上可遠眺一整片蒼翠山林

繼續沿「天梯」行上山,途中還見到這株橫伸出來的美人蕉花蕾,好似在叫路人一定要同佢影張相先走咁,唔知佢開左之後係咩顏色的呢?一路行終於行到山腰喱段路,穿出了樹林,眼前風景豁然開朗,忍不住要深呼吸一下!


看似蘇鐵一類的樹木品種 / 蝴蝶園有介紹「莊周夢蝶」的典故

山徑兩旁可謂古木參天,所以即使係仲夏時節來到也不怕曝曬。路邊就有唔少這類蘇鐵類的大樹,幾乎整片天空也給它蔽擋了,彷彿為路人撐起了天然的大傘子。這時還留意到山邊有個「蝴蝶園」的路牌,上面仲有簡述《齊物論‧莊周夢蝶》的典故,而且中英文版本對照的,係咪畀外國遊客睇架呢?


古木蔽天一景,恍如進入了Tim Burton電影中的奇幻境界

這片原生熱帶雨林的壯闊景象,可能就是千萬年前香港的自然景觀面貌吧!在密林中完全感受到大自然物競天澤汰弱留強的競爭性,每棵植物似乎也在爭奪屬於自己的一片天空。只要抬頭一看,扭曲交疊的樹丫彷彿在開戰,將整片天空也擠得密麻麻,也感覺到人類是如何的渺小……

沒有留言:

張貼留言