荷李活道古蹟遊@上環

喱日難得出到去中上環，如果行上山頂時間又好似唔多夠，咁就求其行下半山的荷李活道睇古蹟吧！

可能係農曆年假期關係，難得荷李活道無乜車行，顯得格外寧靜。上圖遠處米黃色那幢舊樓，地舖就是很出名的公利竹蔗水，不過喱日無開門，所以費事行過去了。



沿住自動扶手電梯往上走就最輕鬆，途中路經維修緊外牆的中區警署，上圖右是好斜的奧卑利街Old Bailey Street。



難得士丹頓街Staunton Street仲保留了不少兩三層高的古老平房，很有懷舊味，當然樓價也不會平。



窄窄的伊利近街Elgin Street現在酒吧林立，已成為中環soho區的伸延；上圖右是必列者士街Bridges Street，沿樓梯行上去就是早前人氣好盛的永利街，依家過左3分鐘熱度後又靜返！



來到必列者士街盡頭就見到熟悉的青年會，這座採用愛德華式紅磚牆設計的古老大樓建於1918年。



這座有近百年歷史的大樓已獲列為香港一級歷史建築。



青年會旁邊的樓梯街於2009年也同列入一級歷史建築，樓梯街築於1841至1850年，百多年前在樓梯街上可以遠望維港，依家當然早已被山下的高樓大廈擋晒！



太平山街一幢唐樓的地舖開了這間gallery，昔日這裏的士多茶餐廳等老舖頭，好多都變身成為很有歐洲小鎮feel的cafe。



最後行到去水坑口街Possession Street才折返，水坑口街據聞是香港第一條街道，1841年1月英國海軍就在這裏登陸港島。



再沿荷李活道Hollywood Road，百年前修路時這一帶有很多冬青樹（一說是榕樹），因而得名。



上圖左是豪宅「聚賢居」，友人說原來昔日這裏就是已結業的華僑日報報社，記得小學時基爾都來參觀過，依家已經完全唔認得了；右圖是歌賦街九如坊附近的一幅大衛像graffiti，基爾覺得非常靚，多D喱類靚塗鴉又唔拘喎！