「月光光，照地堂，巫家有隻大豺狼……」係咪好恐怖呢！不過今次唔係要講鬼故，而係去一個神秘地方！「車~~~東坪洲有幾神秘呀！好多人都去過啦！」咁你就錯喇！大家仲記唔記得古天樂的《陰陽路》系列呢？其中有一段就係在東坪洲的廢屋拍架喇……果度究竟仲有乜鬼野睇呢！大家跟住黎，千奇百趣咪眨眼。
左﹕馬料水碼頭 / 右﹕黃竹角嘴鬼手岩
慣常地大約9點幾在馬料水碼頭出發，在吐露港內尚算風平浪靜，大約半小時終於穿越了赤門海峽，就在船開出大風大浪的大鵬灣之際，WOW~~~個頭90度轉向左邊，竟然見到一片「血色懸崖」！那裏就是黃竹角嘴，依家喱度已經成為地質公園的一部份。典解喱度個山崖會血紅一片架呢？莫非好多人黎依度跳崖自盡？~~~~原來話說大約1.4億年前，大量沙礫、粉砂和泥等沉積物沿河流一直由高處沖到這裏，並堆積在河口一帶的海底。經過幾百萬年沉積物層層相疊，底下的沉積物被壓成一層層的沉積岩。大約1億年前，當時氣候變得異常乾旱，加上受地下水影響，岩層中的鐵質氧化，變成紅色。其後堆積在海底的沉積岩層經歷板塊運動，由海底升上地面，就成為這一片血色懸崖了。
喱個時候船突然慢左落黎，究竟發生咩事？！哦~~~原來仲有野睇！在一片血色懸崖下、在一片亂石淺灘上……咦！竟然有一隻類似Adam's Family的怪手在淺灘上伸上黎呀！喱隻手原來叫做「鬼手岩」，依家佢已經成為地質公園的著名景點之一，可謂「鬼名遠播」。鬼手岩就聳立於淺灘邊，如果要沿陸路去搵它，就一定要翻山涉水攀爬懸崖才能來到，要見它盧山真面目絕不容易，不過基爾坐船黎睇當然就輕鬆好多。鬼手岩其實只是淺灘亂石堆中的一碌小石柱，不過它的頂部有很多坑紋，遠睇形狀就如手指，似乎是一隻皺皮血紅鬼手從海裏伸上來。究竟佢係又點樣形成的呢？原來當砂岩岩層受橫向壓力影響，就會產生褶曲作用，令原本橫積的沉積岩層理壓至垂直。岩石凸起的部分較易受風化侵蝕，逐漸剝落。風化及侵蝕作用則集中於砂岩中較弱的層理發生，造成裂隙，形成鬼手岩上的「手指」。同時，海浪經年不斷沖蝕岩石下方，使它形成狹窄的「手腕」！
上左起﹕赤洲磯釣、東坪洲碼頭邊介紹牌、鬼之洗板 / 下﹕臥佛
同鬼手岩say goodbye之後，船繼續緩緩前行。在右邊的一個小島上，咦！竟然有人喎！仲見佢地在崎嶇不平的懸崖上坐係度，哦~~~原來係在釣魚，不過話時話出左赤門海峽之後就開始好大浪，船固然被海浪拋得恍如坐過山車一樣，遙望赤洲那邊也見到大浪擊向岩岸時捲起的千堆雪，所以玩磯釣的相信也要一定膽量。
坐了大約半小時「過山車」之後，終於來到東坪洲。不過在登岸前，船家特別兜去島的南面海域，莫非又有盞鬼野睇？！哦~~~~原來係要黎睇「臥佛」。從這個角度望向東坪洲，就如一個躺在海上的天然大佛。由於東坪洲碼頭位於島的北面，所以一般街渡是不會繞過南部，要睇喱個奇景就要包船去喇！
近景﹕鬼之洗板（學名wave-cut platform）/ 遠景﹕深圳南澳
船之後繞道返回東坪洲北面的碼頭，登岸後立即就看到非常熟識的「鬼之洗板」。相比起日本九州宮崎縣的「鬼之洗板」，東坪洲的這片「鬼之洗板」也絕不遜色，不少日本遊客也會專登坐船來遊覽。「鬼之洗板」其實也是因板塊移動被擠壓上地面的古老沉積岩層，整個東坪洲本身也是有幾億年歷史的沉積岩層，沿海一帶岩石由於受海浪千萬年來的侵蝕，堅硬的沉積岩層暴露出地表，每當大浪沖擦上這一層層的沉積岩岸時，就令它更以一大片洗衫板。到底夜晚係咪真係有鬼黎洗衫呢？喱個重任就交畀大家去考證下……
沒有留言:
張貼留言