夜晚坐車返歸途中突然接到「追魂call」，原來周日臨時要返工開OT，不過意外收穫係調假後變成原本要返工的B'day又有得放~~~~Great！！！ 之前都諗住去西貢走一轉，一於提早出動！
將軍澳新都城中心內的大電視屏幕，正重播世界盃賽事 / 正門內擺了一舊大石，上面刻有國學大師錢穆的題字「止於至善」， 出自孔子《禮記‧大學》﹕「大學之道，在明明德，在親民，在止於至善」，很有意思 / 廣闊的大草坪彷佛令人以為置身外國的校園
由於今次行喱條線話長唔長，但都要行4至5個鐘，所以都要早少少起身早D出發。與V及W約好10:30am在將軍澳寶琳港鐵站先集合，再坐16號綠van入西貢，車程不太耐，應該半小時可到達1st check point。事先聲明喱架小巴要每半小時一班，逢搭正搭半在新都城二期下面的總站開出，所以最好不要遲到，否則要硬等半個鐘。雖然基爾在10:15am已到達，但最終還是要等到11:00am才齊人，結果要坐11:30am那班車出發。幸而定在新都城總站集合是絕對明智的，一來可以在商場上面涼住冷氣等，二來基爾可以睇住波一路等，三來由小巴總站開出時其實已上滿人，若在坑口站搭一定上唔到車。
校園內古老的愛德華式紅磚牆建築 / 古色古香的主樓是拍攝廣告或舉行婚禮的熱門地 / 幽靜的小徑旁聳立了幾支古老街燈
行程的第一站要先到上洋村的三育中學下車，由於大家都未過去，所以最初都茫無頭緒，幸而小巴上坐前面有位阿姐提醒，才識在清水灣道近濤徑路口落車。點解要去西貢三育中學？當然唔係去返學啦！而係早前基爾在blog友網誌中見過，這間已獲列為三級歷史建築的古老學校很值得參觀，它早於1938年創辦，而位於清水灣道的這所校舍則建於1939年，至今已有逾70年歷史。二戰次大戰前後這所校舍曾借予英軍使用，改建為軍營，到了1947年才重新成為校舍。
大草坪上豎立了紀念該校創辦60周年的仿古埃及式方尖碑，非常特別 / 很特別的門牌號碼﹕清水灣道1111號
2007年這所學校申請改為直資，現時校舍內附設小學部，可說是「一條龍」學校。不過這間學舍最為人熟悉的，是它那恍如置身外國校園的青草地和古老的愛德華式紅磚牆大樓，因為經常成為廣告的拍攝場地。另外，校園的草坪和小教堂也經常會出租舉辦婚禮，可能不少新人就是睇中它那迷人的外國校園氣息。置身這座古老的校園內，四周的廣闊空間和幽美環境令人悠然神往，確實比香港很多中學甚至大學還要優勝。
遠眺碧海藍天海岸靚景 / 蜿蜒曲折的清水灣道 / 遼闊的清水灣二灘
睇完古蹟學校之後再起錨，向今次行程的「主菜」目的地進發。如果懶行的話，其實由三育中學可以再截16號綠van直去揭開「袋袋」的神秘面紗，不過話明係黎行山的，又點可以咁鬼懶，一於行路去。其實沿著蜿蜒的清水灣道往前走，也絕對不會迷路。在林蔭夾道清風送爽的環境下漫步，還可說是一種享受。而且清水灣道兩旁風景有幾靚，應該不用基爾多講吧！沿途望落山崖下面，就是一個個銀線灣、清水灣一灘和二灘的「藍天海岸」，遠遠的海灣還停泊了幾艘白色遊艇，若言再在山坡上加多幾間小白屋，真情會以為自己去了愛琴海度假！不過由於今次行程目的唔係去游水，所以就不打算花時間行落去沙灘了，只是在灘邊望下，就繼續上路去搵「袋袋」。
與布袋澳的天然靚景合照 / 北望遠處尖尖的山峰就是「釣魚翁」 / 呈現袋狀的布袋澳峽灣，清楚可見窄窄的袋口和弧形的海灣袋身
大概走了半小時，由清水灣道右轉入分岔路大拗門路之後，又走了逾半小時，似乎仍未見「袋袋」蹤影，開始有少少徬徨唔知有冇行錯路，於是再問問迎面而來的行山姐姐，答案好彩係「無行錯！」於是可安心繼續前行。行下行下再看看手錶，原來已經成1: 15pm，個肚開始有少少打鼓，原本plan左係入到「袋袋」先食飯，所以今次之行也沒帶備什麼朱古力或乾糧！Anyway，唔好諗食野就唔會肚餓，頂一陣啦就！~~~~~咦，行行下再望出去對面遠處的山麓，發現有一個疑似高爾夫球場的地方，下面終於隱約現出了「袋袋」！無錯，就係著名的西貢大峽灣——布袋澳。喱個「袋袋」係咪比好多LV呀、Gucci呀、anges b呀果D名牌袋靚好多呢！雖然喱個大峽灣並唔係由冰川侵蝕而形成的，但聽去過挪威的V話，布袋澳的壯觀程度確實可媲美北歐那些冰川峽灣。唔理咁多，基爾山長水遠行到黎，即使忍住肚餓都梗係要影下靚仔相先啦！
附錄﹕西貢布袋澳路線圖
(1) 將軍澳寶琳站；(2) 將軍澳坑口站；(3) 西貢三育中學；
(4) 清水灣一灘；(5) 清水灣二灘；(6) 布袋澳；(7) 發記海鮮酒家
沒有留言:
張貼留言