上回講到歷盡千山萬水終於第一次見到「袋袋」全相的最精彩部份，當然唔會影兩張相就肯走，一定要再探進「袋袋」深處，發掘下佢最靚的一面。
崖上遠眺布袋澳全景 / 布袋澳有不少魚排 / 水退時海灣邊有不少淺灘泥沼
由偏僻的大拗門路左轉入更偏僻的布袋澳村路，再行十多分鐘就到了「袋袋」的底部，由這裏可以直線看到出海的「袋口」，也看到在寧靜海面上漂浮的小魚排，以及欣賞到整個圓圓的峽灣全景！雖然個肚已經頂唔住勁打鼓，但都要再忍一下，影多兩幀相先肯再往前行，走進這個世外桃園小漁村裏去。
入村後向小碼頭方向走，就見到不少海鮮酒家 / 由發記往外望，海面上停泊了不少舢舨
走進布袋澳村，兩旁就見到熟悉的海味檔，出售漁村常見的蝦醬元貝鹹魚之類的海味，但檔攤不太多，看店的公公婆婆也不會叫賣，只是閒坐著一面撥扇子一面看電視。相比大澳、長洲那些喧鬧的海味檔大街，這裏似乎更能感受小漁村風情。基爾唔識買海味，當然不想去「運吉」以免打擾那些公公婆婆，於是就直走進近碼頭邊的海鮮酒家，先醫下已經打鼓打到無乜力的肚皮。
揚州炒飯$50 / 椒鹽鮮魷$50 / 蝦醬通菜$50 / 白灼花螺$98 / 豉汁蟶子$190
由於是第一次來，也不知那間酒家好食，就求其選了有海邊棚屋風情的發記好了。老闆娘還熱情地帶基爾一行人來到一張臨海的靚台，fit到震！雖然時間已接近2:00pm過了午市，但依然乜菜式都可以任叫，服務態度確係Ichiban！立即睇睇menu上面有乜好野食先~~~~就先點了豉汁蟶子、椒鹽鮮魷、蝦醬通菜同埋揚州炒飯！蟶子雖然幾貴，不過確實物有所值，非常鮮味！椒鹽鮮魷則比想像中大碟，而且很脆卜卜兼惹味；通菜及炒飯則一般貨色，勝在夠大大碟，一定夠飽。
粉絲蒸貴妃貝$25each / 寧靜的布袋澳碼頭
後來忍唔到口再encore，加了白灼花螺同埋粉絲蒸貴妃貝，果然無叫錯，兩樣同樣好新鮮，花螺無泥味，外貌睇黎非常乾淨，螺肉又夠彈牙，連本來附上的甜辣醬也不用點，就咁食最鮮味！至於貴妃貝則是因為見到隔籬台有叫，望落好似幾正咁，雖然要成$25隻，不過都好想試下。貴妃貝的外形其實有D似一般扇貝，不過舊肉就大隻D，而且肉身爽夾滑，鮮味十足，雖然唔算好抵，但也值得一試。
布袋澳村內的海味檔 / 洪聖宮 / 疲累的腿 / 回程時路經鑽石山荷里活廣場，有小型足球賽睇 / 16號小巴來往寶琳與布袋澳（$7.5）
食飽飽之後，再加碼叫了$7碗的綠豆沙、西米露、涼粉冰之類的甜品，可以一路慢食一路hea坐傾下偈，一面欣賞下布袋澳的靚景，總算是為這次尋訪「袋袋」之行畫上完滿的句號。看看手錶原來已3點多，在布袋澳小市集閒蕩一陣就打道回府，坐小巴返回煩囂的鬧市中……
附錄﹕西貢布袋澳路線圖
(1) 將軍澳寶琳站；(2) 將軍澳坑口站；(3) 西貢三育中學； (4) 清水灣一灘；(5) 清水灣二灘；(6) 布袋澳；(7) 發記海鮮酒家
沒有留言:
張貼留言