Bistro Lobby@鯽魚涌

平時幾慳家的基爾，lunch一般都只係帶私家飯就算，絕少出去食。不過近排聽同事話公司附近有間意大利菜餐廳幾唔錯的，每次食完返黎都讚口不絕，引得基爾也躍躍欲試……好！喱日見空閒一點，一於唔帶飯，出去試下喱間意大利餐廳先！

Bistro Lobby的門面與附近的茶餐廳無異 / 白汁煙肉焗德國腸意粉

行捷徑過到黎喱邊，原來都比想像中要快一點，行冇耐就見到這間意大利餐廳Bistro Lobby的廬山真面目。外表看來與一般茶餐廳無異，細細的店裏幾張木台排得密密，坐就不算坐得舒服的了。據稱平時lunch hour是要等位的呢！若好似今次兩點後才來就會好D，一來唔駛等位，二來又會有特價平幾蚊，何樂而不為！


煙鴨胸番茄蓉會意粉 / 店內排得密密的木台

坐定定之後再看menu，set lunch其實只有3、4款選擇，當中還有一款新鮮推介麻辣豬扒意粉，基爾當然唔敢試，第一次黎都係穩穩陣陣叫了煙鴨胸番茄蓉會意粉吧！同事則選了另一款白汁煙肉焗德國腸意粉。由於人客不太多，稍等一陣已經可以大快朵頤了。


朱古力soft cookies / 檸茶 / 鮮嫩的煙鴨胸肉

之前睇網上介紹得知，原來這裏的大廚曾任職酒店及私人會所，而且是師承深灣遊艇會名廚Harlan G.，來頭都唔少野！近年確實多左好多喱類臥虎藏龍名廚自立門戶經營小廳餐，都未嘗不是一件好事，至少可以用很便宜的價錢食到一些有水準的菜式吧！基爾這次食的煙鴨胸番茄蓉會意粉確實幾正，鴨胸肉夠鮮嫩，一點也不會鞋烚烚。最正係個番茄蓉醬汁，可以食到一粒粒番茄肉，絕非一般地捫茄汁味道可比。至於另一款白汁煙肉焗德國腸意粉睇落亦都幾唔錯，兩款set lunch連檸茶也只是$34（有$5 discount），以這個價錢食到甚具水準的意大利菜，已算係幾抵的了！由於佢地每周都會推出新款菜式，下一輪不妨可再encore多次，而且據OR介紹佢地個creme brulee脆焦糖燉蛋非常掂當，希望下次可以食到。

p.s. 回程時還專登走去康甜餅舖買「賣飛佛」的朱古力soft cookies做甜品，正！

 

Bistro Lobby
鯽魚涌海堤街18號D2號舖