大喜屋@中環

唔知係咪食開「日式放題」有條路，上次食完上環的浦和後，短時間內來又有encore。今次又係揀中環，不過係近蘭桂坊果邊的大喜屋，評分比浦和稍高，有3.6分……咁堅？！姑且又去做下食探見識下。

清酒煮蜆 / 三文魚及北寄貝刺身 / 各款壽司

可能同行友人係「貴人」關係，以前試過同佢食lunch明明好好天，食完都會變成黑色暴雨，喱次出中環都不例外，又係倒水咁倒法，加上唔係好識路搵（鄉下仔Gael好少出中環），在Landmark等左一陣見雨勢弱少少，沿皇后大道中行上石板街，找到威靈頓街，又問左幾次人，才終於搵到，當然下半身已經濕左一大截啦……Anyway，齊人後就拿拿林去開餐！


燒大蔥 / 煮花螺

感覺上大喜屋地方比較淺窄，台與台之間較逼，無浦和坐得咁舒服，幸而都可以坐到張大單邊台，至少傾偈方便少少，人聲無咁嘈雜。雖然這間比浦和稍貴，但人客多很多，莫非真係好食D？定還是只係午市同晚市的分別？這就不得而知了……首先食的當然又係刺身併盤，此外還叫了清酒煮蜆同幾款壽司。刺身併盤有甜蝦、北寄貝、三文魚生等，雖然蝦細隻少少，但OK新鮮。之前還叫了燒大蔥（喱味掂都無掂）和煮花螺。記得以前北酒場未執笠時很喜歡去那裏食花螺，喱間則稍嫌細隻。


甜蝦北寄貝三文魚帶子刺身併盤 / 燒鯖魚 / 青芥八爪魚 / 蟹籽什菜沙律 / 和牛鍋物

由於個刺身併盤唔錯，所以encore多次，此外還order了燒鯖魚、蟹籽什菜沙律、和牛玉子豆腐鍋物，以為甚有特色的青芥八爪魚。因為之前食併盤前唔記得影，所以encore時補影返，賣相都真係好靚架！燒鯖魚亦燒得夠香，沙律同和牛煲就一般。第一次食的這種青芥八爪魚就幾得意，八爪魚很新鮮，又夠青芥味。值得一提係喱間點菜係靠剔紙仔的，每張台都放了成大本notepad係度，分為刺身、燒物、炸物、鍋物等等，都好方便，而且waiter亦算勤快，也不會漏單。


八爪魚壽司 / 燒羊鞍 / 軟殼蟹手卷 / 芝士煙肉焗蠔 / 燒牛利

由於見佢地D八爪魚新鮮，再叫幾款壽司時特意再剔八爪魚，此外還叫了一輪熱辣辣的燒物，包括燒羊鞍、芝士煙肉焗蠔同埋燒牛利。羊鞍由於有香草醃過，所以不太羶；牛利也燒得軟硬適中，非常合格；芝士煙肉焗蠔味道就較淡，而且比較細隻，幾乎只吃到周邊的芝士薯蓉配菜而已。見唔算太飽仲有quota，再叫了軟殼蟹及海膽手卷，點知中計！軟殼蟹只在飯中間插了隻蚊型蟹腳，海膽亦只有超迷你的一小篤，同浦和那些相差幾個馬位，絕對係唔食無損失之選。


點菜的notepad / 各款壽司 / 魷魚絲豆腐

食到八成飽之後，傾一陣偈落下格，差不多10:15pm左右waiter就來叫last order了，於是再點了壽司和豆腐，最後還送上了生果併盤，主要係西瓜和橙，不過由於實在太飽所以也吃得不多。值得一提的是這裏的汽水也是任飲的（當然也飲得不多），但就唔見有果汁或檸茶奶茶供應，連甜品亦只有一粒綠茶雪米滋，似乎小家了一點。最後埋單計連加一每位約$240，比浦和還要貴廿皮，抵唔抵真係見仁見智，但見OR評大喜屋高達3.6分就覺得有點過份吹捧了，若浦和亦只有3.1分的話，大喜屋頂多只值2.8至3分左右。

 

大喜屋日本料理 Daikiya
中環威靈頓街2-8號威靈頓廣場6樓