2010年10月6日 星期三

《下女》情慾老土中有笑料

真係好耐都無寫過電影,估唔到再開筆寫會一齣韓戲,因為基爾向來唔太愛睇韓劇,即使韓戲也看得不太多。喱次有人請睇《下女》,雖然係中午12:00場,而且要碌出去九龍塘AMC,不過因為係當時得令的全度妍主演,片中的情慾床戲仲成為熱門話題,所以都要去睇下。



相信大家一定係最想知到底咩「情慾戲」咁巴閉,其實片中的三級場面並唔多,數埋都只係三兩幕戲,但都算係有必要的,唔係搵戲黎做果隻。不過喱度唔係鹹網,姑且唔寫喱方面住!

先講擔重戲的康城影后全度妍,今次佢都算係由頭搏到尾,完全唔錫身咁「訓身」演出。基爾冇睇佢之前獲影后的《密陽》,唔太清楚佢演技如何,也不太記得之前有否睇過佢其他演出,不過今次在《下女》中老實說就唔算太突出,演技發揮一般。全度妍絕對唔算係孫藝珍、全智賢、金喜善、李英愛那類的典型韓式大美人影星,但都算係有型格的。今次可能因為要演工人,所以也經常脂粉不施素顏上鏡,殘樣多過艷光。如果有機會都會睇返《密陽》,睇下佢的演出係咪真係咁堅。

其實全度妍在戲中沒有發揮出預期那種影后級的光芒神采,某程度上是因為被戲中其他幾名女角的精彩演出蓋過了。演李政宰老婆的瑞雨固然係新晉靚女影星,難得演嫉妒的內心戲竟也不俗,可說是無期待中的驚喜。另外,值得一讚的還有演女管家的尹茹貞及演李政宰外母的李美淑,翻查資料原來兩人其實都係韓國國內的著名「老戲骨」型女星,宮心計式的陰謀詭詐戲份都演得入木三分,女管家的冷寞和外母的陰毒都明顯搶戲過全度妍的純真。



最後當然點都要講講男主角李政宰,記憶中之前只睇過佢同全智賢主演的《觸不到的戀人》。撇開搞笑類型例如車太鉉那些不說,唔知點解韓國男星十居其七八總覺得有點木獨和土氣(所以唔明點解師奶會鍾意睇韓劇男星),李政宰今次在《下女》中的演出也是好一般,其中一幕係佢一路彈琴一路發嬲質問外母的戲,李美淑演得ok,但李政宰就麻麻地,形成的張力也因此打了折扣!

寫此blog前翻查資料,才知原來《下女》係翻拍1960年的韓國經典同名舊片,唔怪得睇戲時總覺得有點似粵語長片式的陳套橋段(初頭仲以為韓戲係咁老土架啦),而且也覺得全度妍演的女傭實在「純情」得近乎白痴的地步,如果故事背景仲係60年代的話,都仲有少少說服力;若說是發生於2010年現今世代,那就似乎太不可思議了!至於戲中那場所謂「最具爭議性」的口交情慾戲,基爾個人就覺得也是「兒戲」得近乎有點可笑,只見全度妍除下李政宰條褲之後,就眼金金咁望實話﹕「噢,實在太耐無見過了……」(忘了exact的wording),然後就質個頭埋去,唔知點解果個場面係帶點「搞笑」的感覺(事實上當時基爾也聽到附近傳來不少女士的笑聲),有可能係導演處理手法上出了一點點問題,又或者是韓國與香港文化的某種差異,基爾也說不上問題到底出在哪裏?Anyway,某程度上這種無端的「搞笑氣氛」就破壞了戲中悉心營造的不倫奇情感,實在令人有點遺憾!

沒有留言:

張貼留言