浪遊記二再嘆世界

記得年多前收到blog友KK的大作《KK浪遊大世界》，近月又收到佢的喜訊，原來佢第2個「囝囝」又出世啦！《浪遊2》仲舉行左新書發布會，可惜基爾臨時有事去唔到，但最後輾轉也終於收到他的最新大作。

一面揭著《浪遊2》，感覺比上一輯更有新鮮感，可能因為當中除了日本和澳洲基爾叫做有去過下之外，其餘的印度、尼泊爾、柬埔寨、菲律賓、汶萊甚至英國等，通通都無去過，真係好羨慕佢可以雲遊大半個地球！



打開本書，一開始就已經見到基爾非常回味的白川鄉合掌屋，仲有幪面超人和小露寶火車卡；再揭又見到阿格拉堡、風之宮同埋泰姬陵等印度名勝；去到英國仲有得去睇波添喎，又去埋巨石陣和尼斯湖，只差在見唔到水怪！



《浪遊2》記載了KK由1997年至2009年橫跨十幾年的浪遊足印，相信對他自己和讀者來說都是一個旅遊寶庫。當揭到最後一頁時還有「驚喜」，發現原來KK也不是成日都係lonely planet的，仲有大班朋友陪佢去浪遊大世界，真係非常難得，能同遊的相信都是死黨吧！最後當基爾睇完晒這兩本「浪遊巨製」後，還發現到一個「小秘密」，就係原來去旅行確實係一件會令人「心廣體胖」的樂事，單從這大堆照片可見，KK由十幾年前的「文藝俊型男」發育到依家的「健碩福氣男」，其優哉遊哉的富貴生活已可見一斑……Anyway，都係唔好亂講野費事畀人打！希望KK下個十年、廿年、卅年……，外型上即使會再有咩改變（仲講喎），但內心那團浪遊之火依然不會熄滅！