嘉道理尋花問柳之旅終於來到最終章，到底基爾能否「攻頂」成功呢？這篇下集大結局就會揭曉！
估唔到5月黎到嘉道理都仲見到杜鵑花開 / 原來奼紫嫣紅開遍
上回與穿上婚紗頭戴滿天星髮飾的靚靚新娘「愛神木」話別後，距離山頂已不遠了！這時見漫山一片奼紫嫣紅，咩花開得咁燦爛呢？哦~~~~原來係「老相好」杜鵑花！估唔到5月天都仲有杜鵑花開遍，以前基爾叫佢做「公開試之花」，因為每逢3、4月佢開花的時節，都係應付會考或高考的高峰期，見親佢開就諗起挑燈溫書十年寒窗的日子，現在回想起來，是苦，也是甜！
遠眺對面的觀音山，好似一件紫菜飯團
接近山頂一帶，景觀也變得更開揚，遙望對面有座尖尖的小山，非常特別，形態就像小學時美術堂畫的小山丘一樣可愛，告示牌說它就是觀音山，霎眼睇又有D似一件紫菜飯團喎……咦，基爾係咪行山行到有D肚餓呢！
路邊樹立了嘉道理兄弟紀念亭的路牌 / 終於到山頂啦 / 山頂的shuttle bus巴士站
可惜喱舊飯團只可遠觀！罷了，還是趕快去「攻頂」！只差少少咋~~~~見到喱個嘉道理兄弟紀念亭的路牌，即係就到了，希望唔好落雨住啦！最後終於上到山頂，如果坐shuttle bus來山頂就是在這裏下車，可以慳返兩個多小時腳骨力！
在山頂可以睇晒媲美黃山的360度雲海奇峰靚景，累一點都值得
上到黎山頂，當然又要「靚仔」出馬！全景照又點少得，崇山峻嶺雲海仙霞叢林幽壑悉數收歸眼底，在香港行山也絕不多見，難怪位列全港十大行山徑之一！所以即使要行成兩個幾鐘上山，撐到腳仔都軟埋，也是值得的！
山頭有個雅緻的小花園，石砌小徑修葺得很整齊 / 香氣四逸的白蟾
山頂除左有得睇壯闊的綠林景之外，仲有個雅緻的小花園可一逛，而嘉道理兄弟紀念亭就築在小花園裏！話明係花園，當然也種了不少奇花異卉，例如這一大棵白蟾，就有兩個基爾咁高，全棵都開滿了彷似白玫瑰的白花，而且香氣四逸，比什麼Hugo Boss、CK、Armani、Givenchy還要來得幽香天然，行到成身大汗的基爾當然要拿拿林走埋去吸收下D天然香水精華先啦！
與Monet筆下的睡蓮不遑多讓 / 小池塘邊還有大朵粉紫色的野蘭花
畀香噴噴的白蟾薰完一大餐之後，行過D仲見有淡黃色的睡蓮！果然係出於污泥而不染，在山頂小花園見到睡蓮也令基爾有點意外，求其影出黎都好有莫奈的神緒，令小池塘旁邊同樣綻放競艷的蘭花也為之失色。
穿過這道中式拱門，裏面又有個「神秘的花園」
由於山雨欲來，大部份遊人早已落山，來到山頂公園時人影唔多隻，別有一番尋幽探秘味道！穿過喱道中式園林拱門後，裏面又會有咩呢？
穿過拱門就見到嘉道理兄弟紀念亭
沿小徑行入花園裏，原來竟是一處萬丈懸崖，崖邊就聳立了嘉道理兄弟紀念亭！小涼亭的飛檐設計非常有氣勢，加上是臨崖修建的關係，就如一隻大鵬展翼的老鷹，向著連綿山谷乘風翱翔飛去一樣，既灑脫，也有點高處不勝寒！
唯恐瓊樓玉宇，高處不勝寒
明月幾時有，把酒問青天，不知天上宮闕，今夕是何年。
我欲乘風歸去，唯恐瓊樓玉宇，高處不勝寒；起舞弄清影，何似在人間。
在涼亭樑柱之間，隱約呈現出一幅幅山水畫屏風 / 有花紋的蟑螂？
轉朱閣，低綺戶，照無眠；不應有恨，何事長向別時圓。
人有悲歡離合，月有陰晴圓缺，此事古難全；但願人長久，千里共嬋娟！
雨雲已籠罩山頂，基爾相信走唔甩了 / 天然涼亭，去避下雨先
深醉於蘇軾詞浪漫意境中之際，遠處突然傳來雄渾的雷鳴，在幽谷中迴盪著，連正在發白日夢的基爾也被吵醒了，都係時候起程落山，以免天雨路滑不好走……行到半路中途，其實個天已驚好似倒水咁勁，幸好山徑都有「天然大雨傘」保護，大雨經樹葉過濾後都變成小雨粉，基爾當然也不會冒險拎「靚仔」出黎影雨景啦，但仍可以告訴大家，雨中行山其實也挺浪漫的……
沒有留言:
張貼留言