唔怕悶的blog友，又黎跟基爾去行嘉道理農場啦！今次「中篇」繼續主力去睇睇唔同的奇花異卉！
長在大樹幹上的附生植物「鹿角」，在花墟也有售 / 靜聽潺潺的小溪流水聲
深林裏除左有唔同品種的參天大樹之外，只要留心睇一棵棵有基爾條腰咁粗的巨樹幹上，仲有好多附生或寄生植物，例如這種叫「鹿角」的附生植物，之前逛旺角花墟時也見過有得賣，但當然不及嘉道理這裏天然生長的咁翠綠咁宏偉，成叢的長在粗大樹幹上，像小鳥依人，外形似鹿角的葉面，姿態也格外美！
好靚呀喱朵蘭花，好清純脫俗出塵的感覺
全程睇咁多種花，最難忘的當數喱一株蘭花！向來覺得蘭花好難種，天然的蘭花在香港更難得一見！這次來到嘉道理遇上喱朵白瓣襯藍紋的蘭花，基爾就覺得超塵脫俗得像仙子般美，它還有個很好聽的名字——新瑪麗雅蘭！
幽曲小徑，很有尋幽探秘feel / 密林蔽天，彷似走進一個大山洞一樣
邂逅了清純的野蘭花「瑪麗雅小姐」，與它溫泉繾綣一輪兼拍埋寫真之後，雖有點依依不捨，都要say goodbye繼續往山頂進發了！上山的小徑兩旁長滿芳草，部份要撥開才能繼續前行，好彩係基爾醒目早已全身噴滿蚊怕水，仲加埋貼了蚊貼，才不至於成為草蚊的大餐（但其實手臂都被嘴了幾啖）！
初夏也欣賞到紅葉？ / 一線藍天
除了要力拒蚊蟲的親吻外，山徑一帶其實也很潮濕，所以縱使有大樹遮蔭不怕曝曬，但由於濕度高，走了大半小時已經汗流浹背，好彩帶定大樽水！
行了個多兩個鐘，終於接近山頂了 / 很喜歡這株粉紅色的迷你岩桐，好嬌俏可愛
行到身水身汗之際，終於又見到無敵開闊大靚景！極目遠望，近處一帶的低矮小村屋應是錦田八鄉吧！左方一條長直的跑道相信就是石崗機場，稍遠的高樓大廈就是天水圍新市鎮了！最遠那片若隱若現的「飄渺峰」是深圳灣對面的蛇口……睇完景再去拈花惹草，喱棵粉紅色的迷你岩桐很嬌俏，與「瑪麗雅小姐」的隱逸仙風氣質又是不同style的美態。基爾其實對迷你岩桐的認識不多，大都是從費師傅的blog裏見過，但這種粉紅色的野生品種就從未見過，很是可愛！
石斑木，係咪有石斑味架呢？ / 千鈞一髮間拍下了這幀「山林中的一輛車」
親吻過「俏岩桐小姐」之後又繼續上路！雖然山頂就在咫尺之間，但正所謂「望山跑死馬」，迂迴的山路確實要花不少勁才能征服！下次如果再黎，都係早少少搭shuttle bus上山為上策！不過話說回來，搭車又未必可以邂逅到山野間一眾千嬌百媚燕瘦環肥的「靚女」吧！
貴人出門招風雨，密雲又黎料 / 又見情人菊 / 係咪叫基爾快D走回頭路去避雨呢？
唔知係巧合定咩？！近排寫blog經常寫到落湯雞事件，莫非基爾真係貴人出門招風雨？不過今次係有備而來，已帶定傘，個心都定D！雖然見烏雲逐漸結集於頭頂的一片天，還是鼓起決心繼續去「攻頂」，絕不會退縮半步！
嘉道理上山的路段中，這個髮夾彎也很出名，好多人來到都會留影
嘉道理上山的斜度其實都幾急，如果不是爬天梯小山徑的話，就是走這類迂迴的髮夾彎行車大道！走行車路其實無行天梯咁斜咁辛苦，但就無咁多天然風景睇喇！不過，喱個髮夾彎在嘉道理裏也很出名，不少龍友都愛來此獵影！
樹立在髮夾彎旁的世界名城方向標距柱 / 純白的美人蕉 / 小心車親小鹿斑比
在髮夾彎馬路旁邊仲有喱條不銹鋼鑄造的世界名城方向標距柱，坎培拉、維也納、慕尼黑、倫敦、曼徹斯特、首爾、新澤西、斯德哥爾摩……等全部有齊，check下D「海外幫」blog友究竟依家在邊個方向至得！
久疏戰陣，行到腳軟 / 「黃素馨」咁似人名 / 又遇上另一位純美淨白兼帶點嬌媚的花姑娘
就黎行到山頂之際，忍唔住又要暫時停下腳步，因為又遇上另一位絕色花姑娘喇！純白色的花瓣裏竟然萬千株花蕊伸展出來，好似穿上了純白婚紗的靚新娘，忍唔住要行埋去結識下佢，順便一親芳澤！
原來這位美艷新娘叫做「愛神木」，連名子都浪漫過人 / 整棵樹其實都幾高大
這位穿上純白婚紗的靚新娘原來是來自Aegean Sea的愛神木，原生地希臘土耳其一帶的海岸，是典型的「拉丁洋妞」，移民來到香港之後也適應了四周的氣候環境，生得都好大棵，小小的花朵，遠看就像滿天星……（待續！）
沒有留言:
張貼留言