從軍行初體驗@石崗軍營

香港唔似台灣、南韓咁推行服兵役制度，所以一般人都無乜機會去當兵。每年只有在五一勞動節或十一國慶時，石崗、昂船洲等幾個解放軍軍營搞開放日，才有機會近距離感受一下軍旅生活。

之前與同學仔M唔知傾開乜，佢話記得讀書時聽基爾講過話想去當兵，基爾心諗實在太不可思議，完全忘記自己有咁講過，不過M好肯定佢無記錯，咁可能係基爾老人痴呆吧！Anyway~~~早前乘工作之便，有機會於石崗軍營開放日入營參觀，確實令人一開眼界，唔怪得每次派飛都咁多人晨咁早去排長龍輪候啦！

石崗軍營平時不對外開放，只在五一或十一讓市民參觀。莫講話入軍營，基爾印象中連石崗咁山卡罅的地方也從來無去過，當然也不會咁神心通宵排隊去輪開放日入場券，這次有機會自然要去睇睇。由家坐火車去大埔墟站，以為坐64K可以直達石崗軍營，不過原來係要在羅屋附近轉54或251M，否則就要行好遠。轉來轉去花了近兩個鐘終於來到石崗軍營大門，已經差不多中午12點了，上午升旗之類的表演睇唔到，不過無所謂啦！拿拿林入去睇下仲有咩睇先。

由正門入去，即見到一個大告示板，上面除了有軍營地圖外，仲有不同表演節目的run down，突然大聲公傳來話大草坪有「反恐演習」，基爾就與大堆人潮一齊湧向草坪睇野。點知行行下已經有幾架直升軍機在頭頂轟轟聲飛過，然後定在一座大樓的上空，跟住有條繩由直升機吊下來，幾名軍人就火速游繩到大樓天台著陸。另一邊草坪上，又唔知係邊度突然有幾架迷彩軍車掟彎駕出來，幾個軍人荷槍衝出，有些伏在草地上嚴陣以待，有些就衝進大樓內，配合大樓頂從直升機吊下來的軍人夾擊恐怖份子，仲聽到佢地用國語嗌咪喝令恐怖份子棄械投降。然後就聽到一輪震耳的呯呯開槍聲音，歷時幾分鐘，打完一輪待煙霧散去之後，就見軍人們用孖葉搭住恐怖份子上車，一溜煙的開車走了。感動上整個反恐演練幾似深圳主題公園的戰爭特技表演，商業味道十足。



睇完勁度十足的反恐表演後，再四圍睇下有乜特別展覽，見到球場喱邊擺左幾支AK47之類的槍械，好多小朋友來排隊試試舉槍的感覺。機關槍當然不會上子彈，而且旁邊還有兵大哥從旁指導。基爾幾廿歲人當然不會去同小朋友爭玩槍，只在旁睇下就算（雖然個心都幾想玩）。

睇完槍再去路邊睇軍車，解放軍車之前在電視見過，實物就第一次見，原來同一般運菜車差不多，只是車頂蓋了迷彩的帳篷吧了！同場加演了解放軍即席示範窄路調頭同埋換車胎。窄路調頭絕對唔係一般駛前駛後轉位咁麻煩，原來佢地係有一個類似「千斤頂」的工具，放在車底可以將整架車托起，然後幾個軍人分別在車頭及車尾合力將軍車180度旋轉調頭就可以了，就好似酒樓食飯的轉盤咁，非常有趣。至於換車胎，二人合力基本上15秒就可以換一個，效率驚人。



睇完換車胎之後，再登堂入室走去軍人宿舍睇下。宿舍大樓只是兩三層高的樓房，每層間開成幾個大房，感覺上似浸會宣道園或嘉道理、北潭涌之類的宿營營舍。每間大房擺放了6-8張床，每張床邊有一個床頭櫃及衣櫃。衣櫃裏掛了幾件軍褸及畢挺的恤衫、各式軍帽及皮帶，還有擦得靚立立的皮鞋。床上則有一張摺到起晒角的被褥，少不了當然仲有兵大哥即席示範如何摺出這張起角的被褥！



睇完營舍後再走出偌大的操場，有單槓雙槓等簡單健身器材，應該係軍人平時操練之用。再走遠一點還可見到迷彩裝甲車展出，可惜不能上軍參觀，繞車睇一圈就繼續往前走。臨走前在大門旁的小花園，見到放置了幾個著名軍人的銅像，每個神態都栩栩如生，例如有正在看書的雷鋒，他在60-70年代文革時期一直被塑造成共產黨員革命象徵及模範。旁邊手持長槍大聲疾呼的是董存瑞，1948年國共內戰時期，他在河北關鍵的隆化之戰中捨身炸碉堡英勇犧牲。每個銅像背後，似乎都有個中國人的血淚故事。



p.s.講開軍人，屋企其實仲有個一個美國大兵figure，係基爾爸送的，見佢手工都相當精巧，軍服、頭盔、手榴彈、軍刀、長靴、望遠鏡、長槍一應俱全，而且仲有美軍的號碼鐵牌呢！咪以為佢只係4、5cm高的細公仔，其實佢都幾高大，有十幾吋高，而且都幾型仔，所以咁多年來都無掉到，一直保存至今。