2019年6月18日 星期二

雪梨盛夏光年@Nambucca Heads

是日看來天氣確實不錯,那就無謂浪費了南半球這美好的藍天白雲與碧海時光,上午去逛過雨林看過瀑布之後,下午又駕車去看看海吧!



Nambucca Heads這裏面向一望無際的南太平洋海岸線,不少當地人夏天都愛來觀潮又或者在內湖區一帶釣魚嬉水划艇之類,享受各適其適的水上活動,不過外國旅行團似乎就較少會來到這種偏遠地方(又或者閃令令旅行書都很少介紹到)……



姑勿論這處濱海勝地是否所謂的地道「秘景」,對基爾而言最大好處咪就係可以優哉悠哉唔駛同人逼,而且搵位泊車(無料駐車場)也非常方便,是個好好享受「靜靜雞」旅行的理想地。



來到這裏除了可以好chill咁沿住著名的地標海濱長堤邊遊逛之外(當然先決條件係唔怕烈日當空曝晒),基本上就沒有什麼東西好做了,因為這裏四周好像也不見有什麼大型shopping mall或者熱鬧的食街,正好是讓心靈好好放空的清淨地(咪講到懶係好spiritual咁啦)!



基爾眼見目測河流出海口這一帶湧浪水流都頗急,而且也有告示牌警告遊人不可落水啊!雖然晒係晒D,但留在岸邊享受來自太平洋的海風送爽,已夠晒愜意了(要幾hea有幾hea)



睇了幾張基爾影的岸邊靚相(事先聲明本身這裏的海濱風景就是美,不關基爾水皮攝影技術事)之後,可能已經有眼利的人想問:做乜喱度有咁多五顏六色的大石塗鴉呢?



卯錯!來Nambucca Heads除了是迤逛海濱長堤看看海景之外,最主要就是來參觀這些防波堤大石塗鴉,沿長堤走見到不少乜水乜水邊年到此一遊的彩繪,有些甚至已有十幾廿年歷史。基爾覺得上圖這幅用不同藍色瓷磚拼湊出來的海浪馬賽克也頗具特色呢!



另外,上面這幅「小孩與海龜」(純粹自己無聊作個題畀佢)睇落也是甚有水準之作,不知是否出自大師手筆定還是某位隱世名家的傑作呢?總之感覺就是與四周的海岸風景融為一體襯到絕呀!



在芸芸眾多靚石畫之中,仲見有舊藍得來又相當搶眼的澳洲國旗石添喎!其實這處塗鴉長堤有個名堂叫作「V-Wall」,上網search看看原來都有唔少人去過影相打卡,唔知有冇西營盤樓梯街那些壁畫咁hit呢?



沿住全長500米的防洪堤壩一直走到盡頭會有處小沙丘,不知這些海沙是否由太平洋遠處吹過來?唔知係咪同日本的鳥取沙丘屬同一類大自然奇觀呢?要注意這裏也有樹立危險告示牌,警告遊人不可在這裏跳水或游水!



沙丘隔籬仲畀基爾發現了一條貌似行山小徑的「秘道」叫做Nyambaga Walking Trail,睇佢樹立果幅小地圖應該是行入去裏面的內湖區,見唔多蚊咁又入去八卦下先!



唔入去由自可,一入去就發現原來風景完全不一樣,這邊明顯風平浪靜波平如鏡得多,同外面長堤那邊凜凜海風幾乎吹甩髻彷彿是兩個世界。見湖邊仲有一排屋仔,唔知係咪有錢人的度假別墅定係resort之類?



總之成個畫面感覺都幾有隱世桃園feel,只見三兩小孩手拿小魚網在湖邊涉水而過,聽他們好像在談論去找什麼石罅泥洞之類,看看會否捉到蝦仔蟹仔……如果唔係怕濕腳基爾都想去玩下喎!



在世外桃園遊走似乎時間過得特別快,轉眼間日落西山又係時候要講bye bye!之後又坐車返到去住處附近那個大型商場看看仲有乜食店會開。睇睇手錶雖然才不過傍晚六七點鐘,但果然大部份店舖都閂晒門,四處都水靜河飛,只得返間Woolworths超市有開!



人地話明係大節流流聖誕前夕,大部份店舖原來晏晝三四點已陸續close了!(如果換轉係海港城在23、24號靜成咁會唔會有D驚?)莫講話食肆food court,連上圖這間無記錯似係蛋糕麵包甜品店都全部清倉無野賣。



好彩住處已預早入定足夠糧餉,再去超市買多少少新鮮蔬菜同埋少少冰鮮肉和生果、麵包先返去煮飯都未遲。不過唯一仲有開的這間大超市都係好靜蠅蠅,不論顧客和店員都唔多見,唔知點解總有少少明日之後feel!

2019年6月7日 星期五

雪梨盛夏光年@Dorrigo

距離聖誕大節流流還有兩天,已預計商場店舖大部份都閂門休業去度假,當然就唔會去逛街shopping吃無謂閉門羹了,咁去咩地方hea最好呢?



基爾又唔太想全日hea在resort感覺有點浪費了這裏的藍天白雲美好時光,點都要出外走走才不覺蝕了機票錢吧!不如轉轉口味暫時遠離碧海沙灘,駕車個多小時深入內陸試下去行山又如何?上圖沿路會經過某些鎮仔,兩層高的老街建築很有點美國小鎮味道。



越駛進內陸就開始進入迂迴的山路和熱帶森林區包圍,同海邊沿岸的度假區又有很不一樣的感覺。幸好途中沒有太多外來遊客,所以也不會塞車,駕車很快就來到上圖這裏的Dorrigo Rainforest Centre……



中學時上Geography堂時也有讀過Tropical Rainforest,親身走進熱帶叢林又是另一回事,果然是「讀萬卷書不如行萬里路」吧!未入去行山之前當然要先去位於大門口的遊客中心走走,入面除了有例牌果類紀念品賣之外,仲有標本介紹森林內會有乜動物生活。



話明係澳洲,叢林內自然居住了好多當地獨有且唔同品種的有袋類哺乳動物,另外仲有好多羽毛色彩繽紛的雀仔標本,全部都好栩栩如生。值得一提,Dorrigo這裏的澳洲東岸雨林區早在1986年已獲UNESCO列入世界自然遺產,唔來真係唔知原來咁有名堂!



唔好講咁多廢話,立即起行入去這個世遺森林逛逛先!穿過遊客中心出口就已經是National Park的範圍了,澳洲人相當大器完全不收門票,迎面就見有條skywalk木橋一直伸延出去山邊,因為這裏有個觀景台可以一覽附近山林以至遠眺東面太平洋的沿岸靚景。



為環保起見,基爾連地圖也沒有拎,順手影了路旁的地圖作引路就算,沿路指示其實都好清晰不用擔心會在森林中蕩失路。比較失望是見到路邊還豎立了一個「Closure」的告示牌,原來走往Crystal Shower Falls的小徑因附近山洞和懸崖有落石危險而封閉了,看網上別人拍的旅行照片可見那裏原來有個水簾洞可以走進瀑布內,風景幾靚幾特別的。



咪以為熱帶雨林就一定係又悶熱又多蚊又濕立立,走在山林裏的小徑上其實反而比外面涼快(基爾都穿了長袖衫長褲),因為抬頭望向天幾乎都被密密麻麻的樹枝樹葉遮蔽了陽光,清風穿過樹林吹來時還有點涼意。看上圖令基爾醒起,有冇人去過烏蛟騰荔枝窩睇過那些「百花魚藤」?Dorrigo這裏的粗藤比荔枝窩還要壯觀百倍呢!



記得以前地理教科書裏講,雨林內的植物有好多層layers,地面除了恐龍時代已存在的蕨類植物之外,有幾十層樓咁高的大樹仲會長出比人還要高的板狀根,有時在老家行山時都會見過類似的大樹根。



看到不少枯樹頭都長滿了青苔,就知這裏空氣水質都非常潔淨無污染了。之前看遊客中心的簡介說熱帶雨林其實就是植物王國的天堂並沒有誇張,樹林內的生物多樣性完全不用懷疑(幸而在澳洲的樹林裏不用擔心有獅子老虎之類的猛獸出沒,附近也沒有沼澤所以應該不會遇到大鱷魚)。



沿住樹上木橋步道走,間中也會見到一些不知名的大雀散步經過(不太怕人),其中有條叫Satinbird Stroll和Lyrebird Link,好想看看真的琴鳥,可惜路上沒有機會影到。



原本如果行晒全條步道,仲可以睇到Tristania Falls等幾條瀑布,但為免基爾媽走得太勞累,結果只走了大約二分一路程就沿途折返了。最後在接近中午時份回到遊客中心隔籬的picnic area,預早已帶定麵包和吞拿魚罐頭之類,就在這裏先食個簡單lunch吧(食食下仲有隻大雀走過來覓食)。



食飽再駕車走多一段山路,因為這裏仲有處叫Ebor Volcano Landscape可以睇下,資料話這裏的火山地貌是2000萬年前已形成,當然早已不再爆發了,其實最主要係想來看看上圖這個Dangar Falls,離遠看氣勢真不錯,可能因為夏天雨季已到,瀑布水頭也很充足,這天走過雨林看過瀑布算是不枉此行了!

2019年5月30日 星期四

遺忘的唱盤時光@Secret Garden

如果睡唔著覺,有冇試過開機播少少純音樂聽下,事先聲明可唔可以當催眠樂曲聽,成效真係因人而異!要是用來寫上網誌,就絕對唔希望令你睇到瞌眼訓……



提到屬於New Age類別的音樂CD,如果有吸收足夠Omega-3、葉酸和薑黃素的應該一定記得基爾數月前都有拎返日本組合神思者S.E.N.S張專輯出來抹一抹發霉菌(萬一吸收不足都唔駛慄,快D去翻看:遺忘的唱盤時光@S.E.N.S.)。若然這款音樂正合你杯茶,咁今次推介的這張Secret Garden精選碟都應該對胃口了。


Secret Garden有人譯作神秘園也有譯秘密花園,名氣應該比神思者還要響,因為這隊由愛爾蘭小提琴家Fionnuala Sherry和挪威鋼琴作曲家Rolf Lovland組成的團隊早在出道之初,已於1995年在愛爾蘭Dublin舉行的Eurovision Song Contest贏得冠軍,當年的參賽作品就是上面這首令他們聲名鵲起的Nocturne(夜曲)。



翻查資料先知,基爾這張Dreamcatcher(追夢人)精選集原來已是2001推出的舊CD,今時今日仲有冇復刻版真係不得而知,不過市面上應不難找到Secret Garden其他的唱片,縱使近年他們都極少再有新作推出。順帶一提New Age音樂列系仲有好多響噹噹的名字,最為人熟悉的例如有日本的喜多郎、愛爾蘭的Enya以至德國的ENIGMA等等都是基爾心水之選,有機會都要逐一摷摷喱堆舊CD出來抹一抹先得。

p.s.無啦啦做乜又加多張Southern All Stars的大海與太陽精選碟?主要原因係佢個太空人封面設計得好靚好前衛,初頭還以為係另一張New Age的CD專輯所以摷埋出來,既然拿了出來又順便聽下啦,聽到樂團主音桑田佳佑的歌聲自自然然又會回憶起好多當年煲日劇的畫面,即使未聽過他的名字都一定聽過點題的那首真夏之果實吧!……咩話竟然未聽過?如果連張學友的每天愛你多一些都無乜印象的話,咁基爾就真係幫唔到你了!