2019年5月22日 星期三

雪梨盛夏光年@Coffs Harbour

晨早空氣清新開朗……來到這個靚靚度假村當然不能浪費了和煦的澳大利亞晨光,大清早六點幾醒來梳洗後即刻出外緩跑晨運去!



基爾這次住的是二樓,感覺上較有privacy。不過後園這邊其實也不算太多閒雜人,基本上只有度假村住客才會行經這裏吧!



後花園對出有條小徑,再外面就是條河流,今天這清早正好遇上潮漲,不斷有海水由外面的河口湧進來。



沿小徑再往前走會見到有個公眾燒烤場(度假村外圍),weekend那幾晚在屋裏也會聞到一點由燒烤場飄過來的香味,幸好人聲不算嘈雜。



燒烤場旁邊有個小沙灘,可能由於接近聖誕長假期,都見幾多當地家庭扶老攜幼來玩個day trip,除了可燒野食和游水之外,沙灘旁有間小店可以租借canoe來扒下,同埋仲有可以試玩企在滑浪板上扒的paddle board,但基爾沒膽量試咁就無去八卦睇下幾錢了。



行去另一邊有一排度假村住客專用的獨木舟,不過這朝太早職員counter都未開工,只純粹來巡視一下而已;之後某天中午才再來扒,要先向職員登記領取救生衣才可來取艇(那天剛好未完全潮漲,可以扒到河中心的淺沙洲玩幾過癮,但因怕會掉進水裏所以沒帶手機隨身,一張相都無影到)!



所以風景照片就靠這朝早去影晒!澳洲盛夏的天氣真係無得輸,經常可見到藍天與白雲,大清早也不算太熱,出戶外遊逛唯一要緊記的是戴定牛仔帽和搽防曬!



沿河邊緩跑了一小圈之後又係時候要返歸,大片青青草地真係令人身心好舒暢,果然是度假的好地方(最緊要係看來無乜外地遊客,也不見有人開大喇叭跳廣場舞)!



火速吃了簡單麵包早餐後(都忘了影相所以不記得吃了什麼),才九點幾十點又再駕車出遊了,今朝會去個主題公園睇香蕉。



話時話Coffs Harbour周邊都幾多旅遊景點,但相信應該不是太多外國遊客會來,今次基爾也是第一次來度假,這個香舊樂園眼見來的大部份應是當地人,或者是由Sydney or Brisbane和Gold Coast附近城市駕車來度聖誕長假期的澳洲人吧!



香蕉樂園入面有少量山坡滑道之類的遊樂設施,但不要期望有什麼大型機動遊戲,基爾只集中去巡一巡紀念品店和雪糕店而已。



紀念品店都有幾多林沈野賣,除了慣見的postcard和tee、茶杯、筆、匙扣之外,櫥窗上掛著的這些香蕉仔都幾可愛,AUD$8.95約50蚊港紙一隻,驚阻掟就影相當買了!



最熱鬧的自然係間雪糕店,人地話明係香蕉樂園所以見唔少人都有買香蕉船來食,另外仲有香蕉味雪糕都想試一啖,但條人龍太長所以都係睇過當食了(要減肥呀喂……!)順帶一提上圖左那間是XD Theatre,類似動感影院之類,但因為未見有開場所以水靜河飛。



又唔食又唔玩咁來做咩先?去逛逛樂園入面這些workshop囉!佢有幾間店舖有教人即席整芝士和整糖,仲有示範切割玉石之類,不知這些切開來似雨花石圖案的礦石是否當地特產,但由於有一定重量,基爾完全無打算要買回家擺(也沒有地方擺)!



都係過隔籬檔口睇人地整糖好過,一入到這間店就聞到成間都好香糖果味,即時好有食糖的意慾,幸好基爾定力夠只看不買(肥呀……!)



細路仔入到來可能就會迅即被迷惑了,眼見色彩繽紛的糖果也確實吸引,一包入面有唔同果味和圖案,試食過師傅以閃電手速度整果隻kiwifruit味,真係好香奇異果味道。



運完一輪吉之後,就hea蕩去停車場拎返架車,見到隔籬停了一架鮮黃色香蕉樂園車喎!唔知係咪職員專用,車身都畫得幾靚呢!



逛完香蕉樂園之後,咁見時間又差不多lunch hour了,於是又駕車去返前一晚去過Coffs Harbour市中心那個大商場睇睇有乜食啦!這天來冇記錯好似係weekend所以郵局冇開冇得入去八下,但幸好Target那間百貨店有開都可以有野行一陣!



唔係明明話來食個晏先咩?都係一陣先去shopping啦!商場入面有個幾大的food court,話時話好多年前老家的大型商場都好流行有food court,不過近年差不多都摺埋晒了,小店式經營始終敵不過大財團吧!



喱度的food court明顯仲有不錯的生存空間,中餐食檔看來也是老外的心頭好不乏捧場客,這間名叫「奉天」的基爾有巡過一遍,大多北方菜式為主不算太合基爾胃口,咁再四圍行多陣先反正不太餓。行行下行到一處中庭位置又見到唔少人來排隊喎!估唔到估佢地係排緊乜?



無錯喇佢地並唔係排隊買野食,而係排隊同聖誕老人影張靚相!雖然商場入面係有冷氣,但始終天時暑熱個個穿背心短褲同穿上厚厚紅色大衣的聖誕老人合照,個畫面怪怪的真有點不太習慣!



基爾大人大者又無乜意欲同小朋友爭排隊同聖誕老人影相,咁就在核心的外圍影下相算啦!不過說時遲那時快突然有位鬼妹工作人員以九秒九速度竄出來同基爾講核心外圍都唔畀影相喎!幸好她態度算友善,咁基爾say個sorry就轉身鬆人繼續在商場四圍蕩。



蕩到開始有少少打鼓聲音傳出之際,見商場個map原來外圍有間Domino's喎!反正好似未試過在澳洲食pizza咁不如去試試。不過原來間店位置又真係好外圍橫街,找了好一會要問路人最終先搵到……



平時基爾在老家都好少幫趁Domino's所以都唔太知價錢如何,這裏兩個大批賣AUD$25.95,蒜蓉包就AUD$2.95,唔知抵唔抵食過香港?比較麻煩係這間店原來只做takeaway連少少企位小圓桌或bar table果類都欠奉,咁點呀?……咁咪唯有乖乖托住個大pizza返返入去商場個food court搵個冷氣靚位安安樂樂食囉!



雖然行來行去係有點論盡,但幸好個pizza又幾好食喎!這裏的薄餅餡料當然沒有老家咁多選擇,也沒有乜乜物物芝心手指扭扭批咁多花款揀,但基爾反而很喜歡這種平平實實的薄批,至少不會食滯,批底餅身也很香脆好味。好了!人食飽飽之後,架車當然都要去吃過飽先得,昨天跑了7粒鐘車程之後都仲未去入油。



又係街市行情報道時間!外國入油唔駛問阿貴一定比老家平得多,但到底係咪平好多就要交由有駕車的blog友先解答到……這裏入diesel約莫50L就係AUD$73,三得個三六得個六折算港紙約$410左右吧!隔籬支槍入無鉛汽油好似都係差唔多價。



入完油之後,又係時候返歸,去游一陣水享用一下resort的設施先啦(當然又係無影相)!下午時份熱頭正正,有乜活動好得過浸在泳池中消消暑……hea游個幾鐘感覺良好,又似乎多了quota去吃個輕食下午茶。不過悠閒的傍晚時份,慵慵懶懶不想再出外覓食,咁之前在商場超市買定的零食糧餉係時候出場了!



先來件cheesecake先,基爾覺得Coles出品的這盒芝士蛋糕餅身細滑好味過老家買的莎莉,濃濃芝士味實在令人唔停得口;朝早食過的大條全麥麵包又平又抵食,食幾餐都食唔晒;另外平時不太敢飲鮮奶驚肚仔痛的基爾,見這裏超市有賣lactose free的牛奶就最好不過,飲過完全無事可以放膽飲了!

2019年5月15日 星期三

雪梨盛夏光年@Boambee Bay

巡完一輪館之後,又可以集中返精神,繼續hea寫下外遊網誌……(仲有冇興趣follow?記唔記得上次寫到去邊?)



基爾盡能力在腦海中搜尋旅途回憶片段……話說回來,之前講到這次住的汽車旅館,好似住了兩晚都無乜影過佢外觀,這朝一早起床吃了麵包做早餐(之前一日買定),食飽反正閒著就走到旅館外圍逛逛兼影張相留念。



兩層高的旅館就長這樣!樓下那層有好多泊車位,如果嫌住雪梨市中心太貴,租住這外圍小城也不錯,記憶中好似係約百元澳幣一晚,算唔算平?



之後會合了大隊,再去先食個港式粥麵brunch,約莫十點幾差不多要展開今天的「小企鵝大長征」……開車個幾鐘左右,就來到上圖的第一個休息站Wyong,綠色這間快餐店在澳好似都幾多分店,不過因才剛吃得飽飽,所以只光顧了洗手間。



解決完生理需要問題之後無謂再四圍hea,火速出發上路去,沿途走的是NSW著名的Pacific Highway,整條公路主要沿著南太平洋海岸走,美景也不會令人入睡(雖然基爾也確實無可避免釣了一陣魚)……



兩三點左右又來到另一個休息站Taree,坐車坐到悶加上開始有點餓,拿拿聲入去個food court看看有乜野食下醫肚,除了麥記和Coolabah Tree Cafe之外仲有熟悉的上校炸雞店,結果揀了後者因為屋企人想食家庭全桶餐,個餐提供成支1.25L百事(好耐無見,因為家裏基本上已不會再買這種大支裝汽水,驚飲成個月都飲唔晒),另外還有一大杯coleslaw沙律,記憶中老家的KFC好似不太覺有這種酸菜沙律賣,大鄉里第一次吃覺得酸酸地幾fresh幾開胃好食。



飲飽食飽晒之後,立即又要繼續上征途!如果由朝早十點幾於雪梨開車出發計起,連食飯小休足足沿highway北上走了六七個鐘之久,終於在傍晚五點前來到了Boambee Bay這間resort。



Boambee Bay在哪裏?未聽過喎!基爾其實也是第一次來,這裏已經好近NSW北面邊界的Coffs Harbour,如果再向北開車走多四個幾鐘,就可以去到Queensland的Gold Coast和Brisbane了。



Check-in後拎了鎖匙泊好車推埋行李篋就去間獨立屋豪宅參觀一下吧!平時在老家住慣窩居的基爾,第一次來住這種大觀園式度假屋心情如何當然不用再仔細形容了,特別喜歡佢個森林景大露台,外圍就是無盡的沙灘,更好的是完全沒有西斜的暑熱感……Check-in還附送了天氣報告表,Coffs Harbour這一帶雖然位置更接近昆士蘭,但氣溫出奇地比雪梨涼快得多,夏季日間一般原來只有廿四、五度,夜晚更只得十七、八度左右,對基爾來說是超級正斗的清爽天氣!



唔講咁多無謂野,先安頓好晒行李再拎晒前一晚已買定好的食材,第一時間要準備來豪宅度假的第一餐入伙盛宴,到底煮乜食完全唔記得,開心到忘記了影相……食飽晒之後洗埋碗,見八點幾還不太夜又駕車出去Coffs Harbour個大商場逛街街,主力去超市先入一入貨,因為之後會在resort住成個禮拜咁耐,買定食材煮飯也是必須的指定動作。



駕車來這大商場也不遠,車程也不過十分鐘,規模當然不能與Sydney的大百貨公司shopping mall相比,但入面超市食肆cafe和各式生活用品店舖已齊備,趁未關門火速先巡一巡Woolworths和Coles,由於臨近收舖時間,偌大的超市裏幾乎空無一人很有包場shopping的感覺。



行外國超市經常會有選擇困難症發作,因為實在有太多未見過的野食想試了,加上來到澳洲大部份蔬果麵包蛋糕鮮奶芝士雪糕都要比老家平一大截而且味道種類又多,單單企在雪糕櫃前發呆已經唔想走開……咁最後買了乜先?Honey Gold Mangoes回來老家逛超市好似沒見過有這品種,這裏剛好特價賣AUD$5兩個,超級好味道!Orange Candy Melon有人頭咁大個,售價AUD$2.9(不是以磅計,係兩個九一整個,平到笑,但重點係超好食,平時在老家基爾都不太愛食蜜瓜,但這個確令人食唔停口)。



另外仲有其他無影包括200gm Bacon $4;原條5磅裝麥方包$2(夠食兩三日都食唔晒);1L盒裝鮮奶$2……順帶一提這裏超市也興自助畀錢,但有趣的是架機可以入銀仔幾好玩。入完糧餉駕車返resort,八卦走過去泳池和club house行個圈看看有乜野玩,明天如果唔出去可以來玩陣。

2019年5月7日 星期二

閃巡中上環CP3@大館

由於要預留返少少時間搭車過去銅鑼灣,睇睇手錶餘下去逛Check Point 3的時間就只有約一個鐘左右,分秒必爭趕到出汗!



5:45pm │ 由元創坊九秒九趕過去大館那邊,睇地圖其實話遠唔遠,話近亦都唔算好近。路經上圖這處應該好多人都唔會感到陌生,見到地上的石板就知是石板街吧!



5:47pm │ 石板街正式名稱叫砵甸乍街,好多外地遊客都會來影張到此一遊,或許是喜歡石砌街道的古老懷舊味,19世紀香港開埠初年不少老照片都曾在這些石板上取景。另一樣多人影的自然是那些冷織欄杆套!



5:50pm │ 基爾趕時間暫時不花太多時間在這老街久留了,匆匆忙忙三步併作兩步走上去荷李活道,就來到第三處同屬古蹟活化項目的大館。



5:53pm │ 不太善忘的話可能仲記得基爾去年底才剛去過這幢舊中區警署參觀,因乜事咁快又來舊地重遊一趟呢?主要係上次因時間關係,有部份地方都沒徹底逛過,反正今次再來中環,就來個快閃補遊吧!上圖是路經洗衣場石階,可惜這天沒有放電影。



5:57pm │ 可能三日香熱潮已過,是日傍晚來到不太多人,當然也不用麻煩預約就可進場了。咁就趕快去看看上次錯過了的地方吧!上圖這條藝術味道十足的螺旋樓梯肯定是其中一處熱門打卡聖地……



6:05pm │ 位於藝方大樓裏的這條螺旋樓梯聞名不如一見,真係超多港女(其實也有洋妞)雲集selfie取景,基爾要影條完全無人的樓梯幾乎是不可能的任務(但影出來有點人氣也不錯)。



6:11pm │ 藝方裏其實也有不少展覽廳,藝術這家野自問當然不太懂欣賞,但巨大屏幕播出來的影像也甚覺有震撼力。展廳的空間也確實大,將來如辦更多藝術展,相信這裏是理想的場地。



6:15pm │ 唔識欣賞就不花太多時間逗留了,在展廳裏簡單逛過一圈就準備撤退。不過走之前還有個地方想去影陣相,就係藝方樓上這個觀景台,由這裏可以盡覽人來人往的大操場,天際線也尚算開揚,難怪咁多人會來憑欄傾偈chill一會。



6:20pm │ 最後返回中庭部份檢閱廣場,上次有來過影相所以例牌影多張到此一遊就走人,總括兩次參觀大館算是相當圓滿了。