2012年12月25日 星期二

尖沙嘴午間小聚@訊號山

山長水遠出到去尖沙嘴,當然唔剩只去1881,點都要四周圍行多陣先肯走!



第一站先行過去海港城,順便去睇下聖誕裝飾,其實好多人都已經去影過,所以基爾只係求其在正門影左兩張相,日間睇雖然無咁五光十色,但又好似有另一種夢遊味道。



行開海港城當然要去睇下佢個Gallery,今期展出的是「寧芬堡皇家瓷器工坊」瓷器,自1747年起它已成為德國巴伐利亞皇家御用瓷器工坊,是歐洲頂級老牌瓷器工坊之一,展覽還有英女皇昔日參觀工坊的老照片。基爾見其中一個展出的類似果盤的白瓷器,就要成18萬港紙。



海港城實在太多自由行強國人,搞到無乜心機行,行多陣Page One之後就走人。依家由北京道行地下商場的九曲十三灣隧道,可以一直通往K11,說方便也可以,因為即使外面落大雨也無影響,不過就要好留心睇路牌指示,因為實在似個大迷宮,隨時蕩失路。



行去K11唔係為左要買D咩特別野,只係因為由K11向緬甸台的出口往前行,可以去到喱個訊號山花園,這種「清淨地」比充斥購物慾望的大商場更合基爾口味。



之前去1881時登上過報時球塔,那個報時大銅球於1907年就搬到了訊號山的這個訊號塔上。上圖右可見古老的訊號塔與背後的摩天大廈形成強烈的新舊對照。左上是山頂的涼亭;左下是山腰的一間小屋,昔日是負責懸掛颱風訊號的,現在成了公園的職員辦公室和公廁。



到了1933年由於無線電報時已漸普及,報時球就不再運作,與尖沙嘴鐘樓同採用愛德華式紅磚建築的訊號塔卻一直保留下來,直至1981年建成訊號山花園。



百年滄海變桑田,以前訊號山又叫黑頭角,山崖下已是維多利亞港,時至今日填海已經填到好出,多了一條漆咸道和海濱長廊,好彩係新世界中心剛好拆了,對面海由鯽魚涌一直至灣仔中環都可以睇晒,第二時如果前面起返樓就無左個咁靚的全維港景了。



有逾百年歷史的訊號塔,close-up看它的紅磚牆確有點似尖沙嘴鐘樓,鐘樓原是尖沙嘴舊火車站的報時塔,建於1915年,比這座訊號塔還要「年輕」。



訊號塔每日下午4時才會開門,如果想入去塔入面睇,就要夾好時間。塔裏其實沒有什麼東西,只有幾副掛牆的老照片,還有一條窄長的迴旋樓梯直上2、3樓。



在2樓已經可遠眺喜來登酒店那邊的風景,訊號塔原高42呎,只有3層,到1927年加層了高20呎的半球形塔頂,令報時訊號更清晰。



由3樓望出去,景觀更開揚,可以望到港島區灣仔、銅鑼灣一帶。本來諗住試試上埋去4樓閣樓參觀,點知通往閣樓的鐵梯有鐵欄封鎖,上唔到去,失望!



在3樓四周的落地大窗台影完相再hea多一陣之後,又沿窄長迴旋樓梯返到地下的一層。



地下喱一層有張發黃黑白舊相,是百年前訊號塔剛建成時拍的老照片,舊相下方那條長長的馬路就是今日的梳士巴利道。依家馬路兩旁早已是酒店商廈林立,百年前這裏卻甚為荒蕪。



臨走前再影下訊號塔的大門內外……忽發奇想﹕唔知一百年後,基爾的照片又會唔會成為別人的老照片呢?

2012年12月23日 星期日

尖沙嘴午間小聚:下@1881

時間夾得剛剛好,遊完內庭外廳之後,返去Mariners' rest坐低無耐,靚仔waiter就即刻將Starter送上台。



前菜總共有3款選擇,分別是England Seafood Chowder(英式周打海鮮湯)、English Chopped Salad(英式煙肉沙律)和Prawn Cocktail(維多利亞雞尾蝦沙律),唔客氣一於3樣都叫齊。



周打海鮮湯有乜料?包括有魚肉、青口、魷魚及脆餅,值得一讚係個迷你法包都好夠香脆。



Main Course又如何?友人叫了喱個Steak and Guiness Pie(焗酥皮牛柳批),Slow cooked tender steak and smoked bacon, Served with vegetables salad。慢煮的牛柳配上煙肉,如果愛食牛也不錯吧!



基爾則order了Chicken Chili Carne Carne with rice, sour cream and tortilla chips(墨西哥辣豆肉醬烤雞拼白飯及酸忌廉墨西哥薄餅)。此外主菜還有一個選擇是Fish and Chips(酥炸比目魚配薯條及嫩豌豆,Beer Battered Halibut with chips & peas)。



跟著的Dessert也很令人期待,共有2款選擇﹕Lemon Cream & Crumble(香檸忌廉脆脆布甸),面層的crumble脆粒配搭香檸忌廉,友人話食落酸酸地;基爾的是Vanilla Cheese Cake, Mango Salsa(芒果雲尼拿芝士蛋糕)底層的cheese cream好香滑,食落唔似cheese cake,反而似食極軟滑的牛奶布甸,甜甜酸酸的芒果醬更是神來之筆。唯一可挑剔係份量實在太少,唔夠喉!



最後的coffee也很香濃,唔落奶只落方糖的基爾,完全索得到即磨咖啡的濃郁香味。



食飽hea飽傾偈傾飽之後,又係時候去探訪下個廁所。唔駛講,個廁所一定要貫徹成間1881的古典氣派吧!



方便完之後,行返出內庭時見外面有點微雨,索性又周圍閒蕩下影下相,等雨稍停後才走。上圖是擺在迴廊邊的瓷缸,初時以為只作裝飾,行埋去一睇先知原來裏面有養金魚。



下午時份1881裏客人也不多,微雨中的內庭也顯得格外寧靜,上圖這種兩層式的古老建築彷彿似曾相識,係咪有D似中環半山的中區警署?又或者香港公園裏的茶具文物館(舊三軍司令官邸)?



基爾尤其欣賞迴廊天花高高掛著的大紅燈籠,充滿中國傳統古典美得來,難得又帶幾分潮,完全唔會覺得似「蕃鬼扮中國」那種唐人街老土食店的味道。



行行下發現微雨終於停了,於是行返出外面花園行多陣。今年1881的聖誕裝飾以Teddy Bear為主題,之前見唔少鍾意熊仔的blog友都有去影過,基爾一場去到當然要同佢合照下啦!中庭果隻Giant Teddy Bear最矚目,再次證明Bear Bear熊比蜜蜂係大好多的!



唔記得之前有無入過去報時球塔,反正今次有大把時間就入去睇下,裏面原來有條迴旋樓梯上2樓,中間喱部百年古董升降機就係用黎升起銅球,向來往維港的遠洋輪船報時。



報時球塔內的牆上仲有詳細圖文介紹這個時間球是如何操作的,時間球直徑6呎,從1885年起除周日及公眾假期外,每天早上都由人手將報時球升起,於下午1時卸下,港口的船隻就能憑報時球的升降對時,調校航海天文鐘。1907年後,報時球遷往地勢較高的訊號山。



再返入1881下面個商場,不說不知原來除了名店之外,仲有個細細的文物廊,它本來是一個小型的防空洞,現在就擺放了一些介紹1881歷史的文物。



此外仲發現有個小型展覽廳,今期以香港芭蕾舞蹈團為主題,展品包括有華麗的芭蕾舞服飾,以及香港芭蕾舞團經典演出的珍貴照片,不過同樣都係靜蠅蠅……

2012年12月21日 星期五

尖沙嘴午間小聚:上@1881

平時行過1881 Heritage間酒店,總會頭岳岳望下裏面那些露天茶座和餐廳,不過從來都無諗過入去幫襯。某日聽友人話裏面有間餐廳做團購lunch,只需$138就有3道菜,唔駛考慮,去馬!



提早少少相約友人在地鐵站會合,再一齊行上去,好彩唔算太難找,Mariners' rest其實就在1881 Heritage的內廳裏,隔籬仲有間好出名的中餐廳隆濤院。



之前從來未入過1881酒店裏面,多數只在外面花園行下影下相,入到去才知原來裏面都幾大,感覺很有點19世紀維多利亞女皇時期英式殖民地建築的味道,與HKU的Main Build如出一轍。先睇睇果3道菜lunch有咩食?!



Mariners' rest裏面最eye catching的是那個古董味十足的紅木bar台,另外就是掛滿整幅牆的發黃老照片,展現了1881的百年歷史風貌。好彩係基爾比較早到,未有太多客人,可以霸到長梳化卡位,坐得比較舒服,遲來的就要坐小圓台。全個廳其實就只有7、8張台,唔怪得要預訂啦!



Order好晒野食之後,就周圍行一陣影下相,餐廳內進還有個小房間,原來是舊警署的拘留室,睇真確係有少少監獄feel,冷冰冰的只有四面牆和一張長石凳,倉門都是鐵鑄的。



睇完拘留室之後,見仲未有得食,索性出去內庭參觀。餐廳外是一條長長的柚木地板走廊,唔知有無翻新過呢?不過可能為了營造歷史感,長走廊四周比較昏暗,只有擺在牆邊的洋燭台作照明。



1881的內庭比HKU的Main Build還要大,可能因為無乜樹的關係吧!而且也沒有荷花池,外面四周也沒有太多高樓大廈遮擋,所以感覺上比較開揚空曠,無Main Build咁逼。



到訪當日臨近聖誕節,所以偌大的內庭擺放了一棵聖誕樹,看來有點孤單。至於四周的迴廊石柱邊則擺放了鳥籠作裝飾,總算是增添了一點生意。



昏暗的走廊只以洋燭作照明,可能百多年前1881水警總部初落成時,也是這樣子吧!上圖右是面向內庭一個小偏廳的中式木欄柵,唔知係咪隆濤院的偏廳呢?



再行返出去正門附近,嘩!竟然仲有個咁鬼華麗的西式客廳,裏面有棵著晒燈的聖誕樹。即使未入夜,已經感受到火樹銀花的節日feel,襯埋喱間咁有氣派的客廳環境,真係有少少以為自己正在拍緊《名媛望族》呢!



鄉下仔基爾今次真係絕無誇張架,霎下眼真係很有點梵爾賽宮的氣派,如果可以在喱間客廳食下lunch再訓過晏覺,你話幾正呢!



如果去過梵爾賽宮,應該有行過裏面好多間金碧輝煌的salon吧!喱間客廳即使擺在皇宮裏也不失禮,最特別是天花掛著的宮燈帶點中國味,而且從拱廊外望,仲可以睇到外面的時間球塔和尖沙嘴文化中心,在梵爾賽宮就一定睇唔到喇!



在「皇宮」發完王子夢後,都係時候行返去Mariners' rest,準備慢慢嘆下個「御膳」先得……

2012年12月17日 星期一

越空西大嶼山@文物酒店

大澳西邊盡頭的小碼頭,向來是香港睇日落的勝地,媲美元朗流浮山的白泥,記得幾年前都有來過一次。幾年無來,原來這裏已經有很大的轉變。



最主要原因係喱度多了一間Tai O Heritage Hotel!不過正確來說也不算是「多了」,因為這幢建築物在一個世紀以前已經屹立在這個海灣旁的小山丘上。



記得年多前來這個小碼頭看日落,那時只有一個殘舊的小涼亭,當然也沒有修葺得那麼靚的小花圃,依家就當堂唔同晒,沙灘旁仲開闢了一條林蔭夾道的幽雅小徑直通往煥然一新的文物酒店。



酒店旁的小沙灘也很幽靜,可能由於到訪當天已入秋,所以沙灘上不見有遊人嬉水。



講返喱座大澳文物酒店,它於今年3月才剛開幕,前身則是始建於1902年的舊大澳警署,建築外貌仍保留了百年前英國殖民地時代的風味。



昔日大澳警署歸水警管轄,主要負責大澳的公共安全,也會為村民排解家庭糾紛及平息爭執,警員不時以舢舨在社區巡邏,當然也要負責打擊臨近海域的海盜。上圖左的門口入去是其中一間文物展覽廳。



展廳其實是昔日的拘留所,地方不算很大,卻擺了不少以前警署所用的物品,例如警棍、警帽、警章等,當然牆上還掛了大量百年老照片,以及播放介紹大澳警署的短片。



上圖就係展廳裏的前拘留室,裏面基本上只有一張石椅,如果被困在這裏一晚都幾慘,同樓上的酒店房實在有天壤之別。



拘留室的石牆上現時已加設了木櫃,擺放了很多文物酒店出售的紀念品,大多是以舊大澳警署作題材,包括有環保袋($128)、相機帶($50)和紀念郵票($58-88)等,幾識做生意!



酒店每天下午都設有導賞團,由服務員帶領訪客在酒店走一圈,講解酒店的歷史掌故。上圖是導賞姐姐正在介紹一處鋼板窗上為何會有幾個子彈孔,據聞是幾十年前某位沙展與同袍爭執,結果在推撞間手槍走火,子彈就打到鋼窗上。



上圖左的小房間是二戰時期的防空洞,戰後警署將它改作貯物室,現時酒店則闢作酒窖,聽聞防空洞裏冬暖夏涼、保持恆溫,確是作酒窖的理想地方。



2009年活化大澳警署的文物保育計劃正式展開,令舊警署搖身變成今日的酒店,不過原來修葺時也非常講究歷史文物的保育,所有門窗磚瓦都要修舊如舊,就連酒店旁山坡上的一棵百年老榕樹也要全部保留下來。



基爾問過導賞姐姐,才知現時整間文物酒店只有9間客房,大部份都是由昔日警長沙展的辦工室改建而成,基本房價是每晚$1380,似這類精品酒店而言並不算貴,有興趣不妨上網訂房,不過聽聞如果要book周末和紅字假期,已經要排隊到農曆年後了。



上圖是昔日警署的天台,以前駐守這裏的警員會在天台晾衫;變成酒店後,這個天台當然不會咁浪費做曬衣場,加建了玻璃屋頂後就成了景觀一流的餐廳,夜晚仲可以上黎睇星星。



天幕餐廳外的平台上,仍保留了舊警署的警崗,時至今日好多舊式警署例如黃大仙警署的圍牆上,都依然有這款圓形的堡疊式警崗。



一場來到喱個咁正的天幕餐廳當然不會過門不入吧!時間正好3點幾,之前行山行得咁辛苦,一於入去嘆返個「悠閒下午茶」,睇睇個Tea Set有咩食先?



初頭以為這類餐廳都係得個樣靚,食的通常都係貴夾唔飽,不過睇落又唔係喎!Tea Set選擇包括有﹕各式精選蛋糕、扒芝士火腿三文治、雞肉蘑姑批,各款都配咖啡或茶(加$15可轉沙冰系列或紅樹林特飲),每款都係$68 per person。



基爾點的雞肉蘑姑批是驚喜之選,熱辣辣又大個又好味道,屬水準之上。上圖是友人點的扒芝士火腿三文治配埋薯角和蕃茄雜菜絲沙律,也算是抵食之選。風和日麗的秋日下午,在這種古色古香的懷舊靚絕海景餐廳食個tea才不過七十幾蚊(連加一),結果hea足成個鐘頭才願走。



臨走前仲經過喱架斜拉式的升降機,聽聞是全香港只此一部,睇住部lift緩緩地由山腳升到酒店平台,似足一架微型的瑞士登山纜車,不過全程只需30秒左右!



返落大澳碼頭時,反正都接近5點,當然又順便企多一陣睇埋日落先走人啦!大澳能成為香港三大日落勝地之一,都係有原因吧!



沿路返出去巴士總站搭車走,又經過不少破舊的鄉下屋,裏面好多時都已經無人住,變了製作蝦醬的小工場或雜物房。上圖右是路過橫水渡橋拍下的典型大澳日落照片,記得以前未有橋時,來到這裏都要畀5毫子坐艇過河,依家有了橋雖然方面了交通來往,卻只能在橋上懷緬昔日坐艇仔的風味了……