2010年3月21日 星期日

春分神奇楝蛋實驗

「在古老的傳說中,每年春分那天可以很容易就把雞蛋豎立起來,據說是因為春分當天太陽直射在赤道上,南北半球晝夜時間相同,地球的引力較平衡,令雞蛋很輕易就能站立起來。據史料記載,春分立蛋的傳統起源於4000年前的中國,以慶祝春天的來臨。春分這一天是時間的平衡,是白天和夜晚的平衡,這就是全世界人們喜歡立蛋的原因。據說1985年春分時,美國阿拉斯加大學藝術系教授格雷與學生在一間房屋裏,一次過楝起了204隻雞蛋。」



請Blog友唔好怪基爾太無聊,早幾日睇到喱段奇聞之後,一心就要試一試,反正今日星期日就是一年一度的春分,一於來驗證下,睇睇係咪真係咁神奇!

答案在上圖已經睇到啦!基爾搞左一陣之後,確實可以將兩隻雞蛋楝起來,係咪好神奇呢!!!有專家解釋,春分是南北半球晝夜等長的日子,呈66.5度傾斜的地軸與地球環繞太陽公轉的軌道平面剛好處於一種引力相對平衡的狀態,所以令橢圓形的雞蛋很容易豎立起來……真係信不信由你!

2010年3月18日 星期四

白之戀人1881@尖沙嘴

唔知幾時開始,香港人又興起過白色情人節,或許節日從來唔會有人嫌多吧!不過對於無情人的人而言,還不是平常的一天。不過諗諗下,都係要做翻一D平時好少做的事,例如坐下船。



近排收工都比較夜,喱日有相機在身,特別去灣仔坐船過海。我諗都有3、4年無試過由灣仔坐船過尖沙嘴,坐上船之後發現個view真係幾唔錯,除左旁邊的會展之外,仲可以盡覽中環華燈璀燦的夜色。好!扮下遊客先……



記得以前讀U時,放學間中會沿水街行落山,再坐叮叮由西環一路叮到去上環坐地鐵走,有時無聊的話甚至會叮到去中環,然後坐天星過海,一來慳車錢,二來為左hea下。依家不論由中環或是灣仔坐船過海,感覺上都係chat一聲就到,無乜閒情可言了,可能真係因為個海細左。霎下眼黎到尖沙嘴碼頭,尖沙嘴喱邊同埋灣仔的天星碼頭仍保留著50年代英國「現代主義」的建築風貌,比中環那邊的「假古董」來得珍貴,不過早前聽聞尖沙嘴天星碼頭也面臨拆卸重建的命運,唔知又會否掀起新一輪「天星碼頭保衛戰」呢?!



每次穿過文化中心再橫過梳士巴利道,都很喜歡走一走這條行人隧道,總覺得有點時光隧道的味道!話時話數數手指,都有成年無黎過尖沙嘴,喱條「時光隧道」似乎執過黎喎,光猛左好多。



行出隧道就黎到喱度——舊水警總部,依家已經變身成為名店街crossover古蹟的新旅遊景點「1881 Heritage」。自從年前開幕之後,其實一直都想黎喱度影下相,因為見過其他blog友都影得幾靚的,喱次親身來到,感覺似係另一個Park Lane多一點,喱種活化古蹟的方式真係見仁見智,不過確實又真係吸引到好多遊客黎參觀影相,基爾四圍逛四圍影之際,就被幾個唔知係日本仔定係韓國仔叫停,幫下佢地影相(因為佢地用英文問我,所以基爾估應該唔係內地同胞卦)。



由側門入去會經過「上海灘」,很喜歡店外的古老大木門,很有古典味,有點似陸佑堂內迴廊旁的木門,紅磚牆是典型的19世紀英國維多利亞式建築風格。不能不影的仲有停泊在後園的這輛老爺消防車,雖然這裏以前是水警總部,擺架消防車係度似乎有點怪怪的,不過架車又真係保養得唔錯,是名副其實的古董車。



門正喱一邊有個幾靚的噴水池,不過厭尖的基爾稍嫌現代化了一點,與四周的歐陸風情似乎不太配襯。記得以前半島酒店門口也有個類似的噴水池,不過人地果個係真古董吧!中央紫色果兩個大孖心形係情人節裝飾,有唔少情侶行埋去影。基爾就比較鍾意長梯上的舊水警總部大樓,唔知點解諗起了羅馬的Piazza di Spagna,依家喱座三層高的維多利亞式古老大樓已經成為李首富旗下的酒店。



聽說大樓內有一間免費開放的水警文物展覽廳,不過由於基爾來到時已是10點幾,展覽廳早就過了開放時間,甚至商場內的Cartier、Tiffany、Piaget、Vacheron Constantin、Dunhill等大部分都已閂門,只有大樓內的餐廳還營業。



翻查資料,大樓原來落成於1884年(唔知點解又叫1881 Heritage呢? ),原本樓高兩層,1920年代增建第3層,二次大戰日治時期曾是日本駐港海軍的指揮總部,還在大樓地底挖掘了不少「秘道」,香港重光後大部份秘道已經堵塞或荒廢。除了大樓外,另一處比較矚目的古老建築物就係上圖右的圓形報時塔,昔日用作為維港停泊的遠洋輪船報時,驟眼睇有少少似澳門松山上的燈塔吧!



另一處值得影下的古蹟,就係平台花園上的幾尊大炮,雖然有少少生鏽,但就更添古樸味道,都是一些made in GB的大英帝國遺物。站在平台花園上,還可感受到陣陣吹來的海風,而且景觀都算幾開揚,左邊可以見到YMCA,右邊有星光行和海港城,背後有新建的北京道一號。唯一唔好的係前面被文化中心遮擋了維港景,如果以前的尖沙嘴火車站保留下來,觀景應該一定會更靚!



水警總部以前又係乜樣架呢?咁就要靠老照片了!喱張相應是60's-70's年代初拍的,可清楚見到尖沙嘴碼頭,右方則是好熟悉的鐘樓,昔日鐘樓是尖沙嘴火車總站的一部分,但古老的車站大樓在70's年代後期被拆走,變成今日的文化中心。碼頭旁的巴士站仲係度,不過聽聞亦會遷走;巴士站旁的星光行仍是平地,海港城一帶則是九倉的大貨倉。沿梳士巴利道往前走,左邊小山丘上的就是水警總部及報時塔,再隔籬就是舊YMCA大樓及古老的半島酒店,旁邊的停車場則是喜來登酒店現址。半島酒店對面的半圓球太空館坐落之處,當時還是火車軌。



建於1920年代的半島酒店,採用的是當年在歐美各國亦非常流行的「藝術裝飾」(Art Deco)建築風格。雖然經過近一個世紀的歲月洗禮,但歐洲不少大城市仍可經常看到這種風格的建築物,不過香港保留下來的就不多,剩下來只有兩座,其一是半島酒店,另一究竟係邊座呢?



上圖是30年代落成不久的半島酒店,同依家無乜分別吧!算係保養得好好的,只是背後加建了幾十層高的新翼而已。好了,不賣關子,究竟另一座Art Deco的建築物在哪裏?咪就係中環的畢打行囉!係咪講開又真係有D似樣呢……



彌敦道的夜色——左為半島,右為喜來登,再遠少少圓拱外牆果座係遠東大廈,記得有次拎部Canon相機去整,佢地個維修部係在那裏。對面係九龍酒店商場的西武,再遠少少就係新建的i-square(仲未有時間去睇IMAX),幾年前還是凱悅酒店。



時光又倒流返二三十年前的彌敦道,除左馬路上有老爺的士外,右邊係昔日的國賓酒店,即現時圓拱外牆的遠東大廈原址。對面馬路是馬可勃羅酒店,記憶中好似係90's年代才拆卸重建,成為現時西武百貨那幢大廈。旁邊就係好多人有印象的凱悅酒店,兩三年前還屹立在彌敦道旁,依家變成了i-square。



沿梳士巴利道再往前走,就見到新世界中心,好似又話快將拆卸,改建成幾摩天商廈!咁又係~~~喱幅地又真係好值錢的。至於新世界中心又有乜集體回憶?!除了新世界中心及酒店外,相信就係80's年代的日資百貨公司「東急」吧!

2010年3月16日 星期二

天空之城乍現維港@鯽魚涌

雨餘花點滿紅橋 柳絮沾泥夜不消
曉霧忽無還忽有 春山如近複如遙



最近幾日又係超級潮濕的日子,所有的牆呀、地板呀、廁所呀、樓梯呀,全部都霉霉濕濕嗡嗡耷耷咁,春天可能就係咁架啦!雖然忽冷忽熱又潮潮濕濕非常唔自在,不過原來春天都有靚的一面,就好似走左入去迷離境界咁……



「嘩,你睇下出面幾靚!」同事E突然咁話~~~~本來埋首做緊野的基爾就住條頸慢慢拎過去裝下窗外的景色,WoW~~~好大霧呀,但又真係幾靚喎!最衰無帶相機啦~~~~不過唔驚,問同事C借佢架手機,然後即刻擒出去窗邊影幾張相先!



其實平時每逢大霧的時候,都會完全睇唔到對面海,只聽到遠處傳來的陣陣氣笛聲,連係咩船響的都睇唔到。不過今次特別就特別在,海面雖然完全畀濃霧蓋住,但在陽光下仍可清晰見到對面海獅子山、飛鵝山的山脊線,仲有紅磡的摩天豪宅添!



喱邊係油塘藍田秀茂坪一帶,同樣係埋在一堆「棉花」之中,好似真係浮在雲上的「天空之城」咁呀,而且仲好似去黃山睇雲海咁飄下飄下,確實係奇景!!!襯埋上面個藍天,簡直靚到暈,咁大個仔都未見過。香港,原來都可以好靚的!

2010年3月7日 星期日

華星冰室@灣仔

上次講過專程走去灣仔睇畫展,睇完畫展之後其實仲有下場,就係去搵食喇!由於基爾對灣仔一帶其實唔算太熟悉,茫無頭緒之際醒起之前歌王曹提過下面喱間野,好啦~~~就行過去望望先!



來到門口原來都有唔少人慕名而來,門面其實與一般茶餐廳差不多,但招牌上面有個貌似昔日華星唱片公司的大logo,聽說老闆也是以前華星的幕後要員云云。記憶中,這間餐廳開幕時,不少華星舊將如梁漢文、許志安、陳奕迅同楊千嬅等等都有專程來剪綵,場面都幾墟陷的,在娛樂版上佔有一定版面,所以都有留意到。好快有位坐低之後,睇睇個餐牌,其實唔太多選擇,都係一些茶餐廳最常見的「麥兜式」常餐即係特餐~~~特餐即係A餐~~~我諗如果食早餐或lunch都可能攀車邊滿意,不過如果晚餐就似乎就有點兒「寡」了,甚至乎一般的炒粉麵豬扒咖喱牛腩飯之類的也欠奉。算啦~~~就求其一次,志在試試,也無謂要求太高,畢竟是茶餐廳吧!



基爾叫的常餐主要係一碟叉燒湯意粉,都無話好食定唔好食了,另外上圖是同行的死擋Q叫的厚多士火腿配煎蛋,基爾叫的則是炒蛋(無影到相),值得一提係果件厚多士唔錯,比一般茶餐廳的厚一點,而且外脆內軟,至於炒蛋雖然簡簡單單,卻意料之外的有蛋味,看網上推介原來佢地係用味道較濃的日本雞蛋。

除左食之外,最重要當然係四圍望望餐廳內的裝修擺設,因為牆上掛左唔少華星昔日出版的黑膠唱片封套,有哥哥張國榮的、也有梅姐的幾張經典唱片,有些暗星甚至已說不出名字來,部分唱片封套還有歌手的親筆簽名,例如上面兩張哥哥的唱片,都算係幾珍貴的呢!所以黎喱間餐廳幫襯的,我諗絕大部分都志不在食咩好野架喇,只是為了憑弔一下這班80年代陪伴自己成長的樂壇巨星吧了!
 
華星冰室 Capital Cafe
灣仔克街6號廣生行大廈地下B1號舖

2010年3月3日 星期三

灣仔另一端油畫展@藝鵠

在blog中認識了一位前輩傳媒人鄺先生,早前他提過會開畫展。從blog中早已見識過他不少大作,雖然基爾是門外漢,對油畫認識不太深,仍覺得非常出色。知道鄭sir會在牛棚開畫展後,本來打算去捧場,可惜最後因為種種原因而錯過了1月份的展期。後來知道新年前後其畫展會移師灣仔的藝鵠書店添食,無論如何都要抽空去欣賞下。



《另一端》油畫展

是次展覽兼用「圖像」與「文字」雙線創作,
既取其互補,亦試圖牽引出不同創作媒界的碰撞與對話。
作品呈現香港人兩個層面的處境:
‧主權回歸後,香港人與大陸人相對地位發生微妙變化,
隨之而來是複雜、曖昧而矛盾的心情;
‧香港人置身大都會中,小小個體生起渺茫與空洞感




基爾對灣仔的街道不太熟悉,找了一會才找到這間樓上書店!這晚來到時,店內除了staff之外就無其他人,可能正好是食飯時段吧!咁都好,可以慢慢欣賞丫嘛!書店其實不太大,一入門口已看到鄺sir用來做blog頭相的那幅油畫,wow~~~比想像中大張好多,睇真跡就明顯比網上睇的相片來得震撼。油畫,確實係睇真實的畫更精彩,感覺更強烈,也可近距離欣賞到油畫獨有的質感。上面為另一組共6張有獨特政治味道的油畫,雖是同一個維港的天空,但幻變的雲彩和光線,令基爾不其然想起了Claude Monet的La cathedrale de Rouen!



記得鄺sir提過牛棚果邊展出其二十多幅作品,不過來到藝鵠書店,始終不是正規的畫室或展覽館,空間始終有限,所以相信他只選了幾幅得意傑作展出。上圖右這幅中環德輔道中LV旗艦店旁的街景,之前在其blog上也看過一次,還是覺得睇實物更靚更grand;左邊的抽煙人像畫,很喜歡人物的落寞神情,還有背景的光線。睇完後似乎唔太夠喉,期待鄺sir不久將來會再開更大型的畫展!