2012年5月31日 星期四

韓食家@北角

農曆新年後本來一直諗住去試下喱間韓食家,不過一直太多野做都無機會出去食,喱日突然有個小空檔,一於出去做下食探!

去到先知原來荃灣也有分店,不過喱間就係2月才開的,舖面也不大,幸好這天不太多人,完全不用等位,good!。坐落睇下個menu都幾花多眼亂,懶諗,都係叫個4人餐算把啦!



份量原來都幾多,基爾本身就幾飽。由於掛住傾偈,只影了部份菜式,先來的是前菜三小碟(上圖右)﹕泡菜、魚片、青瓜絲,至於左圖的鐵板牛仔骨也很惹味。



之所以話好飽,主要係個餐包了兩客石頭窩飯,上圖右的石頭醬爆牛肉飯比圖左的雜錦石頭窩飯正好多。另外仲有一碟蔥油餅,但無上次食尖沙嘴的韓國錦城飯店咁好食和正宗。



基爾食野向來偏好清淡,圖右上的凍豆腐就幾合口味,只是不知上面紅色的醬汁係乜醬(可能係南乳),但原全不辣,幾清的一味菜。右下是人參雞湯,不過基爾燥底,唔係太敢食,都係飲啖滋潤蜂蜜柚子茶為上。
 
韓食家 Baab Korean Casual Dining
北角英皇道560號健威坊LG樓層L9B-D號舖

2012年5月28日 星期一

遺忘的唱盤時光@Divas Live

「老餅點唱A to Z」今次講下D字頭的「Divas」,說的是一大班老牌級天后歌星。



這兩張精選CD大大話話都買左成十幾年,是非常值得收藏的live version CD,紅色封面的《VH1 Divas Live》收錄了1998年紐約Beacon Theatre的一次慈善演唱會,演出的天后歌手包括Aretha Franklin, Gloria Estefan, Celine Dion, Shania Twain及Mariah Carey。

另一張《The Greatest Female's Hits: Live in Concert》則網羅了包括Whitney Houston, Mariah Carey, Diana Ross, Janet Jackson, Olivia Newton John, KD Lang, Linda Ronstadt, Donna Summer等幾代樂壇天后的演唱會選曲。



聽Divas的唱片,基爾偏好揀live version,因為只有聽現場演繹版本才足以感受到她們超凡的歌唱水平和感染力。這兩張CD大多是她們的首本名曲,例如Sade的Smooth Operator,雖然首歌已經有差不多30年歷史,但Sade唱來依然係咁型同咁有獨特韻味,難怪當年可以成為Sade首支打入美國Billboard十大(最高第5位)的代表作!

之前講Air Supply於80年代初翻唱了《Without You》大hit了一輪,估不到事隔一個decade之後,Mariah Carey再次翻唱《Without You》這首原作於70年代初的傳奇歌曲,也令她正式躋身世界級Divas之列。時至今日Mariah Carey每逢開show,歌迷都例必要她再唱這首成名作,才肯讓她收工。

2012年5月25日 星期五

風從寶島來@梅荷園

葉子,是不會飛翔的翅膀
翅膀,是落在天上的葉子
天堂,原來應該不是妄想
只是我早已經遺忘



幾乎遺忘了的台灣行網誌,都係時候要再執筆寫返,否則零散的旅行筆記將沒可能再重組,成為將來的記憶!懶有詩情畫意的一個開場白之後,翻查上次是2010年5月寫的「涵碧篇」……沒錯,就是雨中行涵碧步道!這條小徑其實不長(1.5公里),一邊連接水社碼頭,另一邊盡頭側是梅荷園。沿中興路登上小山丘上的梅荷園,途中見有架泊在路邊的私家車,莫非又是蔣總統坐過的座駕?這裏實在有太多「蔣家遺物」了,例如上圖左建於民國六十年(1971年)的耶穌堂,採用莊嚴宏偉的羅馬列柱式建築風格。由於蔣介石夫婦皆信耶穌,昔日每逢來日月潭度假時,都會到耶穌堂做禮拜。



行上梅荷園其實最主要係想去觀景台,由於這裏地勢較高,可以盡覽日月潭的靚湖景。由於地勢優越,梅荷園也是昔日憲兵的崗哨要塞。如果下面水社碼頭那邊在節日時有放煙花活動,梅荷園就是最佳的觀賞地點。可惜這天下雨,當然也不會有煙花看,還是沿名勝街的古老長樓梯返回民宿吧!



打道回府途中仲發現原來附近有間郵局,可惜已過了office hour,一於明早再來吧,看看有否收穫!左上圖是梅荷園的日月潭石碑,唔少大陸遊客都來影張「到此一遊」;右圖是水社碼頭旁的太陽餅大廣告,水墨畫風格很有格調,但基爾覺得太陽餅就一般啦,唔算好好食!



基爾那次住的民宿「桂月村」就在水社碼頭旁,無論去遊湖或逛逛附近的步道小徑,甚至去搵食都非常方便。在房裏稍休後,見毛毛雨也停了,肚又開始打鼓,是時候出去食飯兼夜遊。可能由於日間大部份旅行團都走晒,日月潭湖邊一帶的大街小巷都靜晒,正!

水社碼頭旁最豪的酒店「大淶閣」,華燈初上時份顯得更迷人,由於基爾無帶腳架在身,要影這類夜景影得靚其實都唔容易呢!



夜闌人靜的水社碼頭,與日間遊人來往如鯽的熱鬧情況完全是兩個世界!碼頭邊仲有個小噴泉池,與大淶閣三四樓露台傾瀉而下的一條人工瀑布相映成趣。



不要以為只有歐洲市集步行街才有擺檔幫遊人畫人像素描的畫家,原來日月潭這裏也有,仲要係在晚上仍開檔。除了素描外,顧客還可選擇畫Q版肖像畫,只收200蚊台幣(約50港元),算是超值吧!



日月潭附近的夜市小街其實很短,除了食肆外就無乜特別野行,求其食D野就行返去訓了,因為明早仲有「特別任務」呢!

2012年5月21日 星期一

俄羅斯謎旅程廿四

原來除了香港人愛排隊之外,莫斯科人竟然都係「龍」的傳人?


歐洲城市的街頭經常見這種大圓柱廣告 / 克里姆林宮外的市容也有很典雅

在克宮裏逛了整個上晝已經有點累,個肚仲打緊鼓,原來早就過了中午,還是先去覓食吧!沿路走過莫斯科市中心一帶的大街,其實市容都幾靚!


來到這間佈置幾有住家味道的餐廳 / 街上見到這架車上的廣告幾有趣,唔知賣乜架呢?


等食的時候,先在餐廳裏四圍貢下影下D陳設吧!喱間餐廳唔知係咪由昔日蘇聯時代的莫斯科民居改建而成,很有懷舊味。


有60-70年代風味的組合櫃、衣車和打字機


餐廳裏面除了有很傳統的木餐台和椅子之外,仲有唔少古老家具,包括木造的組合櫃、花瓶擺設,還有好耐無見的打字機和衣車,連放在餐台上的茶壺也很似古董。


麥包浸羅宋湯 / 薯仔炆雞肉


其實過左咁耐都唔太記得果餐食左咩,不過睇返D旅行相,當中就有喱兩味常見菜式,包括有羅宋湯和薯仔炆雞肉。俄國人習慣飲的羅宋湯,比香港茶餐廳慣常飲到的或罐頭湯果隻都要清一點,至於薯仔幾乎是每餐必備。


大街上好多人排長龍喎!搞咩呢?


食飽飽又出去行下,咦~~~咦?!乜喱度咁多人排隊?莫非有野派?應該唔係好似以前蘇聯時代咁排隊買麵包吧!


條長長的人龍實在不見首也不見尾 / 街上仲有差人維持秩序 / 繞過去花園後面八卦下


原來成村咁多人係來喱間教堂參觀,唔知係咪喱日教堂裏有特別的彌撒呢?!所以咁多莫斯科人來排長龍入去做禮拜。


哦~~~原來係黎喱度!


喱間教堂在莫斯科原來非常出名,叫做「救世主大教堂」,豎立於莫斯科河畔已經有百多年歷史。不過見佢整座建築物外表都好新淨,又唔以有成百歲喎……原來裏面係有段故的!


嘩~~~~仲未見龍尾 / 行行下在街上見到這種古老的電動巴士,以前北京和上海也有


話說原來早在1812年俄國人擊退拿破崙大軍後,沙皇亞歷山大一世下令在莫斯科河畔修建一座宏偉的大教堂,以感謝救世主基督「將俄羅斯從失敗中拯救出來,使她避免蒙羞」,並紀念在戰爭中犧牲的俄羅斯人。


救世主大教堂外的莫斯科河大橋上有對情侶在依泣中 / 在橋上遠眺莫斯科河兩岸靚景,左邊河畔有座高達200米的彼德大帝乘帆船銅像,是莫斯科地標之一


Cathedral of Christ the Saviour
The Cathedral of Christ the Saviour is a Church in Moscow, Russia, on the northern bank of the Moskva River, a few blocks south-west of the Kremlin. With an overall height of 105 metres (344 ft), it is the tallest Orthodox church in the world.


莫斯斯河上有不少觀光船來往穿梭 / 大橋上精巧的雕花欄杆 / 橋下的人龍好似無乜郁過


教堂後來足足建了70多年,到1883年5月26日沙皇亞歷山大三世加冕同一天才正式竣工。當時該教堂是俄羅斯全國以至全世界最大的東正教教堂,並成為全俄羅斯東正教普世大牧首的主教堂。


從莫斯科河大橋上遠看非常宏偉的救世主大教堂


可惜到了1919年10月革命後,俄國東正教會所有財產被沒收,救世主大教堂也被查封,1931年俄共還議訂於大教堂原址修建龐大的蘇維埃宮,其後大教堂的鍍金圓頂、十字架、銅鐘、上層柱廊和基座上的浮雕被陸續拆除,教堂的銅門、壁畫、壁板、大理石雕塑、吊燈和大批東正教法物也被拆走,殘餘建築甚至被炸毀。不過由於後來經濟不景資金匱乏,加上莫斯科河氾濫及二次大戰爆發,蘇維埃宮最終都只是空中樓閣無法建成,50年代大教堂地基還曾改建為公眾泳池。


遼闊的莫斯科河 / 救世主大教堂下面的大花園


現存的救世主大教堂其實是於90年代蘇聯解體後重建的,從資金籌措到工程完成足足用了10年時間,1996年先舉行了祝聖典禮,至2000年8月才告竣工,唔怪得咁新淨啦!


彼德大帝銅像遠看很有自由神像的氣勢 / 莫斯科河大橋的巨型花崗石橋躉

2012年5月17日 星期四

廢話小說極短篇@悉尼五

「下一世如果要投胎做動物,你會揀做咩?」
「嗯……就樹熊啦!」「貪佢可以成日訓覺?」
「係貪成日可以攬住碌木呀!……(成碌木咁!)」


左上﹕悉尼市郊的Featherdale Wildlife Park,規模雖不算很大,但也應有盡有,大門口設有紀念品店 / 左下﹕海棠春睡白袋鼠 / 右﹕美人回眸食火雞

「聽人講話鍾意動物的人都好有愛心……」曼迪將相機鏡頭對準圍欄裏的白袋鼠說,在另一邊一碌木地凝視著一隻黑色大鳥的基爾回應道﹕「真係未聽過,乜係架咩?……咁養蛇蟲鼠蟻算唔算!」「……」「,喱隻係咪鴕鳥呢?」「喱度咪寫住係Casuarius,佢原來係食生果、菇菌、蝸牛、昆蟲、青蛙、蛇……」「唔係食人就得啦hahaha!」


左﹕樹熊 / 右﹕神仙企鵝

「睇睇下佢又真係有D似你!」「咩呀?!」「佢瞌眼訓個樣都幾得意丫……你前世會唔會係樹熊呢?!」「……(#$&%@XYZ)」「都係唔睇喇咁悶,去睇D企鵝仔好過啦,睇落好似活潑D。」「果D係神仙企鵝呀,背脊仲藍藍地,細細隻咁走來走去幾可愛。」


塔斯曼尼亞魔鬼黑鼆鼆的,有D似隻king size大老鼠

「嘩!喱隻咩黎架,黑鼆鼆咁,個樣仲咁醜惡的……」「佢原來叫做塔斯曼尼亞魔鬼,依家野生的只有在塔斯曼尼亞才有,學名叫做袋獾,好矜貴架!」「原來澳洲都幾多有袋類動物的……唔知佢識唔識好似林峰咁飛呢?」「爛左少少喎喱個gag!」


左上﹕肥嘟嘟的袋熊 / 左下﹕隨處走的小綿羊 / 右﹕一隻孔雀在身邊catwalk而過,完全唔怕人,仲問人拎野食

「喂,你睇下!做乜有隻樹熊爬左落地架……」「你睇清楚D啦,唔係樹熊黎架!」「係喎,原來佢叫做wombat,佢係食齋的,行埋D睇都無妨。」「駛唔駛咁蛇quer呀,佢一定走得無你咁快啦咁鬼肥!」「唔係喎,喱度寫話佢最高快可以跑到時速40公里咁勁架喎,快過你踩單車呢!」「咁又睇佢唔出喎肥成咁都可以跑咁快!」「其實喱個動物園都幾好喎,部份動物可以任佢四圍行,可以同D綿羊、鴕烏其至孔雀零距離接觸下……」「無介紹錯呢~~~~~」

2012年5月14日 星期一

開科取士:下@歷史博物館

由於篇幅太長,這個展覽就分拆為上、下兩集出以免悶親人!下集仲有乜野睇?Here we go……


雖然基爾不太懂看八股文,但也很欣賞當中秀麗的字體

能通過科舉考試晉身士途的讀書人萬中無一,比現在入大學難上萬倍,所以不少有錢人家會為子弟「捐官」,即用錢購買部份小官銜,算是光耀門眉。


四書備旨

由於上京考試路途遙遠,不少考生為求行裝輕便,只會帶「精讀」於路途上溫習,所以這種只集中四書精要內容的「備旨」也甚流行。也由於這些精讀本小巧易於收藏,後來還成為「出貓」的天書。


寫滿四書五經內容的「出貓背心」

作弊當然不是現今考試才有的東西,早在科舉年代已有,出貓手法還五花八門,例如將經書內容抄到衣袖或背心內衣上,這件「出貓背心」上的字細到每個幾乎只有1mm,遠看還以為只是花紋圖案,可謂巧奪天工。


考籃 / 考試室

以前考試並唔係只考兩、三小時那麼簡單,一考就是一整天,所以考生要帶埋考籃入考場應試。重達5公斤的考籃裏有乜呢?必備的是紙筆墨硯,甚至有剃鬚刀和枕頭,當然仲要有飯盒和糧水,否則就要整日捱餓了。狹窄的考試室就如一個禁閉小監倉,基爾當年在南京也參觀過,坐入去基本上也沒有什麼舒展空間,硬坐成日都幾辛苦。


「春風得意」木雕和新科狀元報喜圖木刻花板

現時會考十優狀元都可以賣幾日新聞,以前中狀元咁難當然更要大鑼大鼓慶祝下。上圖左的正方木雕意念來自唐代詩人孟郊登科的故事,下方的木刻則描繪狀元騎馬遊街的盛況,也顯示科舉及第帶來的榮耀。


五子登科繡品 / 陞官博戲圖

另外,上面這幅刺繡是歌頌五代時期一位母親教子有方,結果5名兒子全部高中登科,此後「五子登科」便成為中國吉祥圖案之一。


竹製狀元籌

考科舉一點不好玩,但由科舉引伸出來的玩意又幾有趣,這種有點以牌九的「狀元籌」遊戲似乎有點複雜,看完簡介也不懂得玩。至於上面提及的「陞官博戲圖」則是類似「康樂棋」的玩意,由白丁一直玩到中狀元,是幾有趣味的棋盤。


清代一品文官的朝服 / 翁同龢的書法扇面

看過清宮片的一定見過這類朝服吧!在黑色的長袍上,心口中央都有一個刺繡方格圖案,原來官位高低是由不同珍禽瑞獸圖案區分,圖中的仙鶴是一品文官專用,由二至九品官分別為錦雞、孔雀、鴛鴦、白鷳、鷺鷥、鸂鶒、鵪鶉及藍雀;至於武官朝服則多用麒麟、獅子、豹、虎、熊、犀牛等猛獸為圖案。


京師大學堂試卷

1898年領導「百日維新」之一的翁同龢(光緒帝老師)曾一度倡議廢除八股科舉,但變法以失敗告終。直至光緒三十一年(1905年)清廷才正式發布上諭廢除科舉,歷時千多年的科舉制度才正式告終。廢科舉後,北京大學前身「京師大學堂」成為晚清最高學府,上圖為當年的試卷。


正於香港科學館舉行的「美食科學」展 / 鏡子世界

古人窮畢生精力寒窗苦讀,基爾不消一粒鐘就可以閃電經歷晒!睇完順便去逛埋隔籬的科學館,之前上網check過佢有個「美食科學」展覽好似幾特別,可惜去到喱個專題展廳竟然不設免費日,畀錢就當然不會入去啦,算佢蝕抵無得同佢做宣傳!Anyway,話晒一場來到,臨走前都求其行下隔籬個「鏡子世界」吧!其實喱個展廳都幾特別,例如上圖喱個就用鏡子造成獨特的折射效果,令人產生錯覺好似身體隱形了只留下頭部,幾過癮!

2012年5月10日 星期四

和昌大押登高懷古@灣仔

行完一輪百年校園古蹟之後,本來諗住去canteen tea一tea,點知原來快樂不知時日過,已經過左下午茶時段,都係搭車落返灣仔睇下有乜好野醫肚。



落車後忽然醒起之前都想去參觀下另一灣仔古蹟,反正時間尚早,不如就先去遊一遊這幢戰前唐樓吧!



基爾相信有去過灣仔的大多都會路經過和昌大押,不過平時就多數只在樓下過馬路時望一下,好少會行上去,今次基爾一於上去八卦下。唐樓正門有條又長又窄又斜又黑鼆鼆的樓梯,戰前唔少灣仔舊唐樓都係咁,上到去見電梯口旁邊仲有長古董戲院椅添喎,莫非等電梯時可以坐下?!



和昌大押連地下及天台計,其實只有4層,上到天台才發覺原來比想像中開揚,修葺成一個小花園咁都幾靚,在這裏開陽台派對最適合不過了!



可能對出就是莊士敦道電車路和修頓球場,所以雖然旁邊有不少高樓大廈但景觀尚算開闊,一點也不會感到侷促。當日除左基爾外,都仲有唔少人上來影下相。



平時由街下面望上來就多,喱次都係第一次由這裏天台俯覽灣仔風景,又幾特別喎!和昌大押確實係好值得保留。



搵返張灣仔老照片來「新舊對照」一下!相片中間那幢就是昔日的和昌大押,其實50-60年代莊士敦道電車路這一帶仲有好多舊唐樓,全部都是只有三四層高,非常整齊,不過今時今日就只拆剩和昌大押。



天台小花園的牆上掛了不少和昌大押的老照片,見證了灣仔今昔的風貌。另一面的告示牌寫住其實天台是向公眾開放的,不過唔係咁多人知,以為一定要有幫襯酒吧先可以上去。



和昌大押這幢舊唐樓現時已變身成為西式酒吧餐廳The Pawn(都係沿用「典當」名稱),而和昌大押當舖則移師往隔籬大王東街繼續經營。



The Pawn咁高消費,基爾當然係無去幫襯啦,近近地都係行返過去修頓那邊食波士頓吧!數數手指真係唔記得有幾多年無幫襯過喱間老牌餐廳,記憶中對上一次都只係食鑽石山荷李活果間分店(執左N年)。



依家做食肆其實都好難撈,整間餐廳都只得四五個侍應,相信廚房也一樣踢晒腳,叫了個鐵板餐結果都要等成十幾廿分鐘先有。見咁得閒就拎返剛才買的校園紀念品出來睇下吧!喱個file用了Mainbuild的古董地磚花紋來設計,非常有心思……等左好耐的豬扒鐵板餐和龍?柳終於上台,豬扒果個唔太特別,志在sa下,但條龍?魚就有少少驚喜,本來以為只是食開那種雪藏剩肉一條,點知原來係原條有頭有尾咁上,仲幾大條添!



食飽hea坐一陣之際,無意間留意到台面張紙先發現,原來喱間餐廳已經開業了四十幾年,可算是老字號了,唔知有無blog友在1966年佢開業時來幫襯過呢?!