2014年7月27日 星期日

遺忘的唱盤時光@達明一派

上次聽床下底cassette時已經翻聽過達明一派的《石頭記》和《意難平》,今次摷摷下見仲有張舊CD,又拎返出來聽下啦!



喱張精選碟來自「寶麗金88極品音色系列」,睇睇碟底的資料顯示原來是1996年發行的,至今已有成18年歷史,當年出世的BB今時今日都已經考DSE了,時光飛逝有時真有點恐怖。



整張碟只有17首歌,以達明而言確實不算是一張很完備的精選CD,因為佢地好歌實在太多即使出3CD都未必裝得晒!幸而很多熱門又好聽的喱張基本都有收錄,今時今日即使再聽返佢地初出道的繼續追尋、迷惘夜車和Kiss Me Goodbye也一點不覺得out,好聽的歌果然是永恆的!



記憶中這一set寶麗金精選應是最早推出的系列,雖然只有硬卡紙套包裝比較「簡約」慳皮,但以當年計賣40幾蚊價錢算是非常超值。由於銷情非常好,所以其後各大唱片公司都爭相仿效不斷重複又重複咁推出喱類翻炒舊歌手的精選碟。



對於喱類「行貨」精選碟也毋須期望太多,事實上基爾幾喜歡的傷逝崩裂那個下午我在舊居燒信都悉數沒有收錄,所以若以達明計,其實買專輯好過買精選碟,因為專輯好多時有整體概念設計,還經常有意外驚喜呢!p.s.基爾這次仲摷返寶記同系列的幾張精選CD出來,唔知下次講邊張好呢!

2014年7月22日 星期二

茶木台式休閒餐廳@銅鑼灣

喱日收工後拿拿林出銅鑼灣因為約了友人食飯,平時絕少放工rush hour出旺區,幸好又唔算太塞車,不過由於唔熟路結果兜了幾個圈先搵到喱間人氣食店。



話明係人氣食店果然一上到去已經見到成堆人堆在大門口場面異常墟陷,友人由於day-off已早到先拎飛輪位,不過結果都要輪成個鐘真係人都癲!



由於在店門前齋罰企實在太無聊,見部份人拎飛後已率先離場到附近大型商場逛陣街再算,其餘也有人問侍應拎定menu研究下一陣食乜!基爾八卦又去睇睇menu果然價錢多數around$50-$80又唔算貴喎,唔怪得咁鬼死多人啦!



再加上依家旺區peak hour好多餐廳都限時限刻趕人走,但喱間又無喎,這樣有好有唔好,食客固然可以唔駛咁趕,但相對輪候就要耐D!終於嗌到飛入去,餓到死即order了蚵仔湯飯,另外仲叫了黑糖薑母油嫩鴨($56)和上圖右的五香燉肉排($54)。



友人今日係主角佢自己就叫多味噹噹辣子雞($56),基爾雖然唔太食得辣但都食了兩三舊,確實係幾惹味,不過同時也辣度十足,試了小小即掛免戰牌。



至於其餘3味都ok,平時比較少食薑和鴨的基爾都覺得喱味黑糖鴨不錯;五香燉肉排甜甜地似鎮江骨,肉質鬆軟不會鞋烚烚。在menu上見佢個酥炸蚵嗲($62)比較乾身不似傳統台式一pad杰醬那種煎蠔餅,但侍應妹妹又話賣晒,下次如再來真要試下!



來喱間店除了食台菜之外,重點係要食佢地個雪糕厚多士,嬲爆的是佢最正最多人叫果個芒果厚多士又係售罄,咁唯有揀次選的藍莓香草蜜糖磚塊($68)吧!



樓高3層的「厚多士山」切起來又真係幾有切生日蛋糕氣氛,食完成餐飯再食三大塊厚多士本來都驚太飽食唔落,不過原來中間和底層多士係空心的,才不至於太飽。另外原本還想叫個香草大蝦沙律($58)同樣又係話賣晒,咁鬼好生意如果返兜再來幫襯喱間「百冇食店」一定要揀頭輪先得了……



食飽飽再過去隔籬希慎行陣幫助消化,因為世界盃期間喱度有個高橋陽一《足球小將》手稿展覽,之前想過特登來睇但又嫌山長水遠太費事,喱晚行過點都要上去睇睇。幾喜歡上圖右的盧比度叔叔,足球小將粉絲好多對佢都有情意結!



商場外仲有個成3-4米高的小志強塑像,又真係幾型架喎!立即勾起返細個時日日追睇430的日子,每集《足球小將》上半part基本都係重溫上一集劇情,一場波分分鐘踢成個禮拜,難得當年又咁天真無邪日日去捧場喎!



商場另一邊其實仲有戴志偉、麥泰來和林源三巨像,全部都拎足姿勢分。兒時除了喱套經典的足球小將外,基爾最鍾意的還有千年女王、He-Man、叮噹、藍精靈、忌廉、IQ博士、未來警察、高立、美少女……等等,細個睇卡通片又特別入腦(讀書又唔見咁叻),到依家仲記得D主題曲。最後要提提兩齣「神級」冷門卡通,唔知仲有冇人記得笑到人肚孿的天界小神仙和娛樂金魚眼呢?有興趣不妨重溫N年前基爾寫的「追憶卡通年華」老人院系列網誌,一齊回味下兒時的集體回憶!

茶木台式休閒餐廳 TeaWood Taiwanese Cafe & Restaurant
銅鑼灣軒尼詩道489號銅鑼灣廣場一期6樓A舖

2014年7月17日 星期四

海馬公園廿載重遊:下@黃竹坑

來到下集仲有咩睇?嫌悶的可以轉channel,唔嫌悶就繼續跟基爾領隊行埋餘下的行程吧!



話雖說唔係太有意欲帶基爾媽去玩機場遊戲,但一場來到海馬公園象徵式點都玩少少唔太激的,就去搭下喱個「海洋摩天塔」啦!因為喱個刺激度近乎係零,但沿住巨柱一路轉上去可以盡覽山頂一帶的無敵靚景,有點似上了觀光塔,姑且花了點時間去排隊。



在「觀光塔」上除了不時聽到附近機動遊戲傳來的尖叫聲外,仲可以俯覽下面的太平洋海岸館,山崖邊還有一座很美的小燈塔,裏面仲可以讓遊客餵海獅,一於去睇下!



海岸館主要飼養了加州海獅,基爾來到時見有不少已攤在人工岩岸上晒太陽。當工作人員拎住裝滿沙甸魚的膠桶出來時,個個又突然變得精神百倍,企定定等遊人來丟魚,大部份都非常目光敏銳張大嘴巴百接百中。



沒受過訓練的海獅已經咁機靈,在海洋劇場參與表演的這批「專業演員」就更加犀利了。其實相隔廿幾年重遊成個海馬公園,基爾最有印象的就只剩下吊車、山坡上的海馬圖案和海洋劇場這裏而已。



今時今日雖然早已沒有仙遊了的海威小姐,但海豚海獅海豹的縱合表演依然吸引,另外加上類似少年Pi奇幻漂流的故事背景,不論小朋友大朋友都一樣睇得開心,這已很足夠了!



睇完海洋劇場表演都已經差不多5:00pm,見仲有時間就行埋中華鱘館先落山。早幾年由大陸「移民」來港的中華鱘聽聞住了幾年才適應下來,原來這種恐龍時代「活化石」魚類已在地球生活了1億4千萬年,目前全球鱘魚僅剩27個品種,中華鱘是當中體型最巨的,成年中華鱘體長可達5米。



不能不行的當然仲有水母館,除了食海蜇熏蹄之外,基爾對這種軟體生物其實沒大太偏好,不過2006年落成開放時又真係熱鬧了好一陣子,身邊友人同事個個去海馬公園都話必看水母館。



這間名為「水母萬花筒」的展館佔地達4500平方呎,館內有逾千隻水母,當中包括10款珍稀品種,開幕時號稱是全東南亞唯一獨立式水母館。不過基爾置身其中又唔覺地方好大,可能因為館裏其實同時還有兩間餐廳。至於水母品種基本上也不太懂欣賞,驟眼睇只覺得有點似海中的冬菇又或者漂浮的垃圾膠袋。



當然D水母到底靚唔靚,都好受展廳裏的燈光折射佈置影響,喱方面真係一門高深的學問。不過色彩變化奪目的水母其實同毒箭娃一樣,只可遠觀不能捉摸,否則畀佢地D觸鬚炸親都唔係講玩!



睇完水母館出來後已接近打烊時份,去到吊車站又見到條「超級人龍」本來都有少少想打退堂鼓,因為始終如果返去搭海洋列車落山就唔駛排咁耐隊,不過見基爾媽想搭吊車多D,又即管去花點腳骨力排下。



平時基爾係最鬼怕排長龍輪候買野或去食飯等台的人,今次雖然花了足足大半個鐘去排隊搭吊車,基爾卻覺得非常值得,因為只要一上吊車就即時勾起了好多好多難忘的兒時快樂回憶……



山腳的吊車站依家變身成「香港老大街」,雖然裏面只是一些假唐樓門面搭建的傳統攤位遊戲,不過在手機鏡頭下又幾有懷舊味道。有好多「荔園式」的經典古老遊戲如掟階磚,還有傳統麥芽夾餅小食之類,相信好多小朋友都未必玩過食過吧!



之前專登去中環大會堂睇懷舊巴士展,原來老大街喱度都有古董巴士和電車展出,電車可以上去下層影相,巴士則只能遠觀無法上去睇下,比較可惜!



傍晚時份返到「夢幻水都」人工湖和大噴泉果然已經比正午時涼了一些,在日落晚霞襯托下一面欣賞音樂噴泉的變幻起落一面走向大門離開其實都幾浪漫,希望下次再來時不會又是晃眼廿幾年之後吧!

2014年7月11日 星期五

海馬公園廿載重遊:中@黃竹坑

睇完海洋館和熊貓館當然無咁快就走人,基爾山長水遠來到海馬公園真係仲有好多「新鮮」地方未去過,一於繼續四圍遊下。



由於近年多了大批內地遊客來訪海馬公園,連接山腳山頂的吊車經常大排長龍,早就不孚應用,所以年前就新開通了這列「海洋列車」令遊客上落山的運載量大幅提升。上圖是山腳的海洋列車總站。



既然咁多年無來海馬公園,基爾自然也想試試搭海洋列車的滋味,不過除了比較方便唔駛排長龍等車之外,搭列車其實都幾無聊,因為全程車窗外都係漆黑一片無景可睇,似搭地鐵一樣,只有車頂的LED畫面播出虛擬深海影像片段,幸好車程也不長,大約數分鐘就到了山頂。



從山頂的高峰站一出來真有點海闊天空豁然開朗的感覺,車站外就是一個大觀景台,可以遠眺整個香港仔鴨利洲的南區無敵靚海景。喱日雖然有點熱但幸好煙霞不多視野也較清晰,連南丫島和南海的擔杆列島(上圖左下)都可看見,非常正!



去過海馬公園都知大部份機動遊戲都集中在山頂區,不過由於基爾這次是與基爾媽同行就無謂玩得咁激,而且為免在三十幾度烈日當空下排隊輪候成個鐘會中暑,還是快快走入去「冰極天地」睇下企鵝為妙!



一入到去冰極館果然很有點冰天雪地感覺,除了因為有座南極冰山海岸佈景之外,場內溫度計顯示只有攝氏十度左右!大批遊人都圍在企鵝廳屏幕前影相……



基爾行近睇,見假山上都企了不少企鵝,部份企在岸邊,也有些在水中暢泳,不過基爾始終覺得名古屋海洋館的企鵝廳比較靚,佈景更立體可觀,香港始終地方較淺窄。



「冰極天地」除了有企鵝睇之外,仲有海豹睇,此外還有隻北極熊做「迎賓」,當然那只是假的,館內也沒有北極熊,如果要北極熊住在炎夏的香港也未免太虛待了吧!



雖然沒有北極熊,卻有平時比較少見的海象,見飼養員不斷將魚仔餵給牠吃,間中又會轉過身來玩噴水捉弄圍觀的遊人,又真係幾精靈可愛。



冰極館除了可在岸上眺望海豹海象之外,仲有一條「海底隧道」畀遊人從水底角觀賞牠們的泳姿。在岸上時由於牠們體型龐大行動比較遲鈍,但一落到水裏就非常生猛而且流線的身型令牠們顯得份外敏捷。另一樣要佩服的是海馬公園的「生意眼」,幾乎每個館出口都連接著紀念品店。



睇完冰極館已差不多兩點,都係先去食個飯再行。雖然餐廳條龍唔太長(相對機動遊戲而言)但都排了3-4個字,set lunch選擇也算幾多,不過價錢當然幾貴,焗豬扒飯連汽水就要$90,辣雞肉脆pizza連汽水也要$60,另外還加了個細杯HD雪糕和芒果布甸,幸好有八折券計埋約$140左右。



食飽飽繼續在山頂四圍遊多一陣,行行下又來到「熱帶雨林天地」。喱度同剛才的冰極館又有很大分別,因為大部份地方都係開放式,仲有個機動遊戲「熱帶激流」穿梭其間,即使唔玩都可以向途人射水槍玩濕身。上圖是雨林館裏飼養的絨猴。



狨猴(Marmoset)是現存世上體型最細小的靈長猿猴類動物,成年狨猴身長只有10-12厘米,體重約100克,霎眼睇還以為是老鼠。原產於南美洲亞馬遜原始森林,由於性情溫馴,自古代起已成為印第安人的寵物。除了比較特別的狨猴外,當然不能少了亞馬遜河棲息的食人鯧和電鰻。



除了魚和馬騮仔之外,仲有常見的巴西龜和蜥蜴。另外比較吸引基爾的是另一種中南美洲「原住民」毒箭蛙,牠們每隻恍似都穿了花轆轆緊身舞衣一樣,色彩異常繽紛。毒箭蛙其實正式名稱是「箭毒蛙」(Dendrobatidae),迷你的體型只有1-6厘米長,與狨猴一樣若不留心看幾乎都察覺不到牠存在。



由於毒箭蛙的皮膚會分泌出高濃度神經毒素,只需微量已足致命。雖然牠們有劇毒但由於擁有美麗的外表,所以都幾吸引遊人參觀,上圖喱兩隻就好似鑲嵌在青苔上的藍寶石一樣咁靚。



雨林館裏仲有好多亞馬遜河流域特有的奇異生物物種,例如上圖的海象魚、福鱷和南美紅尾鯰魚基爾都未見過。海象魚擁有尖長的魚頭但龐大身軀有點似龍吐珠;福鱷更有趣,牠似長了個鱷魚頭的大魚,張開血盆大口吃魚時個樣真有點似鱷魚……不過基爾唯一不太滿意的是館裏的燈光效果比較遜色,好應該派人去日本取經,學習人地先進得多的技術,讓遊人參觀時更有趣味!

2014年7月7日 星期一

Made in HK Restaurant@觀塘

好耐無去觀塘食野,喱日相約友人來到apm,發現大堂除了被播世界盃的大電視和宣傳攤位霸佔晒所有空間之外,樓上幾層的食肆數月間幾乎已來了一次大執位大換血……



位於1樓的這間Made in HK門面有點似走懷舊茶餐廳路線感覺,以前來時唔太覺眼,友人話喱個位就係以前的紅螞蟻,見係新野就入去試試吧!



話雖是茶記格局,但入得大商場自然價錢也非舊區茶記可比,order了兩個set lunch連加一其實已經逾$200幾蚊,唔算平,幸好味道還可叫做ok的!上圖是餐湯忌廉湯和餐麭,一人竟然有兩個麭,食完已飽了兩三成;另一set的前菜則選了無咁heavy的雜菜沙律。



主菜分別點了焗青蘋果豬排飯和燒雞扒意粉,原來豬扒除了配蕃茄芝士菠蘿之外,同青蘋果一齊煮味道也不錯,雖然飯和意粉的份量不算大,但可能之前已啃下了兩個餐麭所以都幾飽。最後值得一提係窗外的觀塘市貌,同apm入面一樣已有很大轉變,舊樓拆掉後又陸續有新建築物、馬路和小巴站出現,舊日的足跡似乎已所剩無幾了!

Made in HK Restaurant
觀塘創紀之城5期apm1樓13號舖

2014年7月3日 星期四

海馬公園廿載重遊:上@黃竹坑

真的已不太記得起上一次來海馬公園是什麼年代了,大概應是讀中學的時候吧!隱約記得在海洋劇場有show睇,仲有黎瑞恩唱歌……Anyway,喱日反正唔駛錢,的起心肝同基爾媽去走一轉。



久居深山的基爾要去海馬公園其實都幾山長水遠,研究過多條路線後還是選擇在北角轉車入南區最便捷。來到海馬公園已是正午時份,喱日雖然熱但幸好比較天陰,而且唔駛點排隊換入場券,就可輕輕鬆鬆入場遊園。



隔咁耐世紀重遊舊地,當然好多野都完全唔同晒,而且好多地方都未去過,首先迎面就見到個「夢幻水都」人工湖和大噴泉,不過由於太熱還是不宜久留,先入去「海洋奇觀」海洋館涼一陣冷氣先。



一入到海洋館就見到喱個足有3-4米闊的大魚缸,不過裏面無乜大魚,主要是養了各種珊瑚魚和珊瑚。



除了有個一corner可以畀小朋友摸海星之外,行入小小仲見到養了龍蝦的魚缸,不過原來龍蝦算是深海棲息的生物,魚缸的燈光也調得特別暗,基爾只用手機影也幾乎影不到。



成間海洋館要數最矚目的一定係喱個養了多種鯊魚的展廳,去年睇新聞好似話因為輸錯氣體死了幾條珍稀的雙髻鯊。由於鯊魚泳速比較快好難影,反而魔鬼魚就容易捕捉美態得多。



除了山頂上面有自成一家的水母館外,海洋館喱邊其實都有幾個水母缸。水母本身其實係透明無乜特別顏色,不過打了五顏六色的燈光後又幾有奇幻feel。



睇完水母穿過一條走廊,走廊牆邊裝設了不少稜鏡,望出去有點似個大型萬花筒,光影折射出來的視覺效果都幾靚喎!可惜手機影出來唔係太夠光度,如果正經拎相機出來影相信更美。



基爾其實都幾鍾意上圖右這座cylinder大魚缸,相信足有7-8米高,圓柱巨缸裏面雖然大部份只係一般小魚,但由於佢地群情好洶湧,全部都喉住上面吊下來的餵食籃子一擁而上,好似一重重海浪咁,感覺好壯觀。



除了巨柱魚缸之外,海洋館裏仲有一個號稱全世界最大、直徑達5.5米的天幕式圓頂魚缸,只要抬頭一望成日會有魔鬼魚的巨大黑影在頭頂「飄過」真係幾過癮!



去完深海探險之後出返來,繼續行埋隔籬的熊貓館。基爾之前去日本的動物園其實都睇過熊貓,但反而香港的就從未見過,都想見識下海馬公園的設備又如何。



喱度間熊貓館比東京上野動物園稍大,而且設計成山坡形地勢,可能係想盡量似返四川山區的熊貓基地面貌。



由於盈盈樂樂聽聞最近忙於交配正在閉關,見客的重任就只有交託老伯伯安安負責。不過安伯伯得「一丁友」似乎比較怕羞,只在山坡頂若有所思般來回踱步,間中向牆屙尿和抓痕而已,並無行前來表演吃竹葉,確實有點兒失望……