2018年5月31日 星期四

跟住雷神過大海@Rico's

搭巴士由路環的黑沙海灘返到酒店已經三點幾,去到個check-in大堂望一望……嘩!條人龍乜咁長?



明明都仲未到大陸黃金周,但已經咁旺場啦喎!心諗如果真正到了長假期係咪check-in要排隊排到出大門口呢?眼見check-in counter已開了6-7個,但感覺上效率奇低!好不容易才排到去櫃面,原來預book的3間房卻竟然只有兩間ready,雙人大床的一間原本hold了卻不知為何自動消失(不知是否電腦系統問題)。



成件事感覺既混亂又無奈,結果搞來搞去連排隊搞了超過半粒鐘check-in(像被罰站了半粒鐘),這是什麼樣的玩法?如果面對的客人是北方大媽,唔知會唔會索性拉佢出櫃面再私人醒兩巴……



基爾當然要盡量保持decent狀態(但黑面就在所難免),狼狽小伙看來也感受到基爾頭頂燃燒中的小宇宙,最後話upgrade了其中一間客房去Deluxe Cotai Room作補償,話會睇到海景咁話,條氣都叫做順返少少!



好不容易才拿了匙卡感覺很疲累,再去取回先前寄存的行李(慶幸不用排隊)就即上房抖抖瞌一陣,等到成5點幾再落去拎埋餘下果間房(慶幸不用重新再排隊),搞掂晒所有野終於可以安心出去食個靚dinner了。



酒店外面就有巴士站,無記錯好似係搭25X出返澳門市區。按常識計,通常巴士路線有個X字意思係咪屬於express快線車,不過喱架又唔似喎!或許正好遇上澳門放工的rush hour見識過人地塞車盛況,再加上一上車就下起大雨就更加塞上加塞……



結果去到水坑尾街這裏落車,全程巴士用了足足成個幾鐘頭(真係仲耐過去台灣)。不過最值得慶幸係,剛才的一場大暴雨已成過去,落車唔駛再擔遮可以輕輕鬆鬆逛街唔駛咁狼狽。



靜靜講個秘密你知:去澳門其實好多人(尤其愛影相的人)的重點節目就係夜遊舊街小巷,一來貪無咁多拖篋大媽阻路;二來夜色下的古舊歷史建築物格外迷人!沿街一路向前行,基爾立即就畀上圖喱幢靚靚古董大樓吸引,初頭還以為係大教堂……



後來查網才知佢叫做高可寧大宅,建於1916年。高可寧是民初時代的澳門富商,經營船務公司、銀號賭場等生意,當中包括新馬路那間很出名的德成按,依家活化成為典當博物館。至於這間大宅也列為歷史古蹟之一,唔知有冇開放畀遊客入去參觀呢?



繼續向前行無耐會見到一條橫跨成條街的行人天橋,只要認住佢就不會行錯路(澳門一般D街名都好難記,通常只認住地標建築物)。由天橋落返地面再行前少少就見到今晚dinner的目的地了。



無錯又食葡餐!不過喱間同晏晝食果間Fernando又有D唔同,感覺上比較多一點澳葡fusion味道,而且價錢好像更貼地一些。Anyway繼續睇menu學葡文,上圖分別係味道不錯的Moluscos Fritos(葡式炒蜆$90)、Bacalhau Com Natas(鮮忌廉薯蓉焗馬介休$108細份)和白烚豬手……



另外還order了Couve Salpicado Com Alho(蒜蓉椰菜$48)同埋上面喱味招牌特色菜Galinha Com Arroz Cozido Portuguesa(燒雞釀飯$128),掛住食忘了影張切開見到雞入面釀滿飯的照片,飯粒吸收晒燒雞的香味,不枉基爾咁山長水遠冒住大風大雨搭成粒幾鐘巴士來!



富仕葡式美食 Rico's Est, de Comida
澳門荷蘭園羅憲新街16號地下

2018年5月25日 星期五

跟住雷神過大海@Fernando

搭Transmac來到黑沙海灘喱邊已經停左雨唔駛再擔遮,睇睇時間原來已差不多晏晝成點鐘,就去食個lunch先!



以往基爾幾乎每次來澳門,總會到一到這間老牌葡菜餐廳打一打卡,今次都唔例外。這次揀了閒日的食晏時段來貪佢無咁多人,之前試過假期來要排隊等位,好旺場呢!



雖然有成十幾年無來過,但餐廳陳設就好似穿越時空咁一D都冇改變,似乎時間在這裏已失去了意義……還記得上圖那座古老的足球遊戲機,第一次來時成大班人玩到嘈到拆天咁勁開心,估不到佢仲依然放在原位,只多添了些刮花的歲月痕蹟吧!



依舊的古老紅磚牆……依舊的歐式壁爐……依舊的紅白格仔桌布……依舊的白色餐碟和透明玻璃水杯!唯一有些不同的是昔日喧喧鬧鬧的大廳不見了,依家反而可享受難得的清幽悠閒。



安坐後看看menu,發現價錢也早已不一樣了!趕快點了幾味慣常會吃的菜式,趁住還未上菜的空檔就去後花園走走,順便去廁所洗洗手才開餐(廁所入口仍舊在後園那邊)。



最先上桌的幾個大碼豬仔包依然新鮮熱辣皮脆好味,用來點橄欖油、沙律醋以至夾著沙律菜吃都是神來之筆。上圖右是每次來都定必order的葡式烤乳豬($372/2份),皮夠脆肉夠鮮之餘也沒有廣式燒豬咁咸,唯一係食多幾舊會有點膩,這時最好飲多幾啖Sangria($70/半jar)就完全無問題。



至於什菜沙律撈上了酸酸的沙律醋之後更是解膩的還魂丹,平時基爾極少會食生洋蔥,但對這碟鋪滿了洋蔥絲的沙律卻是完全失去抵抗力,愛煞了它對味蕾那種微微辛辣的刺激感覺!嫌唔夠喉咁於是睇睇menu再order埋上圖喱個燒排骨($162)。



平時燒臘檔賣的港式燒排骨通常都沾了甜甜的蜜糖味,葡式這種就沒有太多調味醬料醃製,反而可以食到豬肋骨的原味,只需唧一點點檸檬汁提鮮已夠晒,順帶一讚連伴碟的粗薯條都好好味!



繼之前的睇menu學英文之後,再來多個check bill學葡文吧!先睇最貴果味Leitao,就是葡式烤乳豬;跟住Salada單睇字面都估到係什菜沙律;Sangria應該都好多人飲過,這種南歐水果酒又叫做桑格麗亞(感覺又譯得幾靚咁喎),是由紅酒梳打水葡萄汁柑橘玉桂混合少少切碎生果肉調製而成,飲落似果汁多過酒,但酒精濃度一般仍有7-8度,基爾試過溝七喜或可樂飲依然會有些醉意……



講埋賬單上餘下兩味係乜,Agua應該好多人知係水,這間葡菜餐廳飲水要收費,每桌會擺一枝兩公升樽裝蒸漏水(就好似中餐廳酒樓會擺幾碟花生蕎頭前菜),收$45感覺都幾貴;最後的Entrecosto唔駛估就知係剩返果味燒排骨。結果埋單合計約700幾蚊,以人均消費計雖然比以前略貴了一些,但仍算是可接受的範圍吧!



食飽飽之後襯住沒下雨又行出去黑沙海灘行多陣先走。4月尾天氣仍有點微涼,加上才剛剛下完場大雨,所以沙灘上幾乎都不見有泳客或者游人閒蕩。咁樣其實都幾好,可以重拾返少少昔日澳門那種寧靜的南歐海岸小鎮feel……上圖可遠眺沙灘邊緣盡頭的舊威斯汀酒店,昔日總覺很有氣派,依家降左grade唔知有冇唔同左呢?



海灘邊的石階好似修葺得比以前靚了,仲種了不少樹,上圖由樹梢交錯之間望返出去一望無際的海灣,可能因為天色灰暗關係唔知點解竟多了一份「迷離境界」的神秘感覺!



又真係喎!無人的沙灘總有些獨特的蒼涼味道,對澳門來說算唔算係一幅難得的閒適風情畫……唔知黃金周果陣會唔會又好似西貢大浪西咁有好多大陸自由行來紮營和起爐燒野食唱歌挖沙摸蜆呢?浪漫地行完沙灘之後,係時候搭巴士返去酒店check-in攞房先!



法蘭度餐廳 Restaurante Fernando
澳門黑沙海灘9號

2018年5月21日 星期一

武漢迎花潮@劉家山村

睇完個靚靚日出之後凍到手腳同塊面都冷冰冰,早餐火速去食返碗熱粥和熱豆漿暖身是常識吧!



山寨客棧的早餐選擇實在不多,但勝在有碗熱粥暖下胃,仲有熱辣辣的饅頭包點同埋那隻燙手烚蛋!基爾平時在家時幾乎都不會吃烚蛋,但旅行在外就經常吃到!好喇食到成個人又飽又暖,正常人喱一刻會諗起D咩?梗係出發去玩啦,正所謂旅行一刻值千金丫嘛……



山寨客棧除了有日出團之外,仲有個免費行山團可參與,咁食完早餐又拿拿聲起行去坐電瓶車,第一站就來到山腰這一帶的劉家山村!



在村口有個路牌寫住「宜居村莊」喎!基爾單單睇村裏的青磚民居建築和小路就修建得好新淨好靚,但又唔會好似華東那類古鎮有咁濃商業味道。



去大陸這類古村小鎮,基爾覺得晨遊或夜宿肯定是王道!例如基爾這次未夠9點已經來到這個劉家山村,很明顯外來的旅行團大巴就仲未來到,所以成條村都好寧靜,可以真正感受到古鎮真正的恬靜面貌。



相信如果再過多一兩小時,全鎮又會逼滿一團又一團外來遊客了吧!小河川兩岸定必又會擠滿大媽大叔喧鬧爭位拍照了,很難想像如何可以像基爾那樣站在小木橋上悠閒賞景!



古村其實範圍不太大,像基爾這樣簡單走一圈才不過一粒鐘而已。據資料顯示,目前古鎮裏只餘百多戶人家約五百幾人定居,沿路遇到的村民大都是年過六七十的公公婆婆,有些在家門前閒聊,有些則擺出一盤盤土產果乾魚乾,或是不知名的山草藥之類向遊人兜售,仔細聽他們說的大多都不是國語,應該是湘鄂土話吧!



在岸邊閒蕩時留意到河川上有這些方塊排列的枯萎植物,細看應是種蓮藕採蓮子的浮田。話說山寨這一帶的山區除了春日是賞櫻勝地之外,夏秋兩季也有很多遊客專程來賞荷花和紅葉云云……



不過這條古村落活化改造為旅遊區原來其實只有十幾年歷史,據聞昔日這裏曾是革命搖籃,也是湘鄂地區最典型的窮山僻壤。據聞2005年當地政府才開展這裏的旅遊扶貧計劃,並以這裏作試點村,逐年投入資金修造水泥公路、鄉村學校、公廁,還修葺整治河道修築塘堰水塔電網,令村裏的基礎設施大為改善。上圖好似是位於村口大停車場附近的鄉公所。



旅遊業明顯幫助了村民收入翻幾翻,最難得的是村裏仍保留不少原汁原味的古民居建築,大部份仍有原住村民居住,比不少香港所謂的古蹟活化工程來得貼地又成功。

2018年5月15日 星期二

武漢迎花潮@西峰日出

寫遊誌時翻查手機發現竟沒有在山寨客房影的照片,可能是因為昨夜很晚才來到有點累趕住去梳洗睡覺忘了影,第二朝又天未光就趕住出發……



講返之前果晚客棧外其實聽到有營火會活動,又有人放煙花棚棚聲都幾熱鬧,但因為沖了涼就費事再出去(高山上入夜後其實還有點冷,只有10度8度左右吧),只在窗邊八卦望下就上床睡了!咁急住睡覺是因為第二朝有很重要的任務,就係上去西峰山頂睇日出。上圖是在山頂等待日出前先影一陣晨曦中的雲海美景!



這間山寨客棧其實都幾有規模,除了有個大廣場可以讓住客燒煙花之外,仲有些免費導賞團給住客報名,例如基爾這朝早就參加了日出團,差不多5點幾未天光就要起身,不過為了睇日出都無計。仔細睇睇上圖,紅點那處就係山寨客棧所在的山腰位置。



差不多清晨6點已坐客棧的電瓶車登山,不過最後一段約15分鐘的山路小徑就無法乘車,要自己沿石徑行上西峰山頂。上圖近山頂的懸崖邊有處貌似城牆的頹垣斷壁,據聞就是14世紀元末明初時期的清涼寨遺蹟所在地。圖中那橙衫人靠在城牆邊望來邊去到底有乜野好望呢?



唔駛賣關子即刻開估!咪就係望生長在山崖邊的這幾棵野櫻花樹囉!佢地都係武漢本土原生的中國野生櫻花品種,與日本常見的東瀛品種不同,它的花朵較細,但較耐寒,花期也較長一點,除了白色之外也有粉紅的野生櫻品種。據網上資料所講,清涼寨這一帶山區就有崖櫻、單齒櫻、尾葉櫻、刺毛櫻桃、西南櫻桃、櫻桃等6個中華櫻花品種。另外仲有話原來只有中華櫻會結果,東瀛櫻是沒有果實的,唔知係咪真呢?



東望望西影影掛住睇野櫻花,冷不防原來個咸蛋黃已經靜悄悄地在雲海的夾縫中升起了。還以為這朝早雲霧太多能看到日出的機會不高,幸好皇天不負有心人……基爾只用了手機影日出,影到個小紅點已算交到貨吧!



見個日出咁靚(當時用眼睇實景更美),又花小小心思襯埋棵枯樹和古城牆再影多張靚相,效果也不錯吧!係咪很有點天地蒼茫的塞外風情先?!



對上一次咁神心天未光去睇日出已經忘記係幾時了……這朝早其實算是幸運了,至少沒有落雨,雖然多雲但仍見到日出的瞬間,同道上山來觀日出的客棧旅客也覺得山頂這觀景很值得一來,畢竟西峰這裏雖然只有海拔800多米,但已是武漢這一帶的最高峰了!



睇完一輪日出、野櫻花和古城遺址之後,見山頂實在寒風凜凜不宜久留,都係趕快落山坐返電瓶車回到客棧去食個暖笠笠早餐。之前一晚太夜來到四圍都黑鼆鼆,無去影下客棧四周的環境,咁依家趁大清早遊人比較少就隨手影幾張山寨相先啦(雖然個肚有少少打鼓)!左邊4層高那一排就是客房,基爾好似係住其中一間。



另一邊長這樣!係咪都幾似電視城古裝街那類的拍戲場景,唔知會唔會真係有大陸的古裝劇來取景呢?到時會在客棧撞到D北漂明星都未定……



本來四周圍環境都幾唔錯,唯獨係左上圖無端端搭了個娘味十足的紅色大舞台比較礙眼,記得昨晚這裏傳來陣陣鼓聲,遠看有些簡單的風土表演節目上演,還有客棧住客來放煙花,不過基爾沖左涼就無落去八卦了。客棧大堂則沿用簡約風格,簡單清雅其實已很美了!



之前趕住坐電瓶車出發上山睇日出,都無影大堂豎立的觀日出團告示牌,咁回來時又補影返,佢好細心咁寫了明早日出時間係清晨6:20am,有興趣可到check-in櫃面登記,佢地就會有專人morning call你準時起身!

2018年5月10日 星期四

士林台灣麵@元朗

暫時將幅為食地圖又搬一搬返來老家先,之前提過去元朗新田的購物城運吉,無獨有偶今次也是以元朗作為覓食據點。



山長水遠搭巴士來到又新街,係咪絕大部份人會先去幫一幫襯果間甜品店?不過今次基爾無去喎,難度係驚忍唔到口食得太多甜野會變肥仔嘜,到時著唔落金山買返來果D靚衫咪弊加科!



既然係咁就封一封口先(暫時架咋)!見行行下又行到去千色店,一於去行多陣街當係消耗下D卡路里,陣間去食野就唔駛咁就住就住,驚積聚熱量啦(自我催眠中)……



行千色店其實都係齋睇無乜野好買,唯獨係超市果part發現了筍野,之前聽同事講啡色罐果隻韓國午餐肉好食,見佢咁橋有買一送一discount喎,即係$35有兩罐,咁抵唔駛諗即入貨。回家後已試食,覺得真係無一般午餐肉咁咸而且不油膩,幾好食值得一試!



行完千色店之後都成點幾兩點,係時候移師去隔籬街的目標地帶,結果好輕易就搵到喱間好旺場的士林台灣麵,等位等了近半粒鐘先有得坐,梗係拿拿林叫野食啦!結果叫了一個酸辣香酥排骨麵($49)和一碟香酥雞扒飯(配肉燥$49)仲加多杯珍珠奶茶($18),另外還叫多一客香酥排骨($43),以3人份量計相當夠飽。



豬扒和雞扒都有乒乓球板咁大塊很足料,不過基爾對酥炸類食品有少少顧忌,都係淺酌輕嘗適可而止吧!據聞老闆曾在台灣學藝超過廿年,肉燥食得出很有點台灣風味呢!

士林台灣麵 Shilin Taiwan Shop
元朗西菁街9號富盛大廈地下