2017年9月19日 星期二

珍郵庫@饒宗頤畫作及書法

係呀又係講郵票,看來基爾都要努力少少為大典發掘開拓一些新鮮題材,有乜好提議?定還是繼續享受半休blog呢?



不過,點都寫埋今次喱套先啦!這套以國學大師饒宗頤的水墨書法作品為題材的首日封,可說是今年的重點之作,看訂購單張時已覺得好靚,是今年度必訂之選(有可能全年最賣得就係喱套)。



點知原定於3月底發行的首日封竟一波三折(唔係IQ題,咪誤會有折頭),3月中時收到email通知話「印刷出錯」要重印,仲要延後到不日通知新發行日期(到底印錯乜野咁蝦碌,下面再講)!無止境的等……結果一等就大半年,在幾乎淡忘了之際……



8月中又收到電郵話終於定了9月5日會補出返喱套首日封,咁遲到都好過無到啦!基爾激愛上面喱個$10《荷花四屏》小型張,係咪靚到冇人有呀!印象中上次去美孚那間饒宗頤文化館有見過這幅美得令人心動的荷花寫真,立即翻查舊blog果然有影到(可click去:饒宗頤文化館@美孚),想睇返可以click去睇下!



話明係重點推介,又點會只買一個小全張咁少,一定要買埋其他書畫郵票先安樂啦(開動大解慳囊mode)!上面一套6款郵票幅幅都係代表作,等基爾慢慢逐一話你知係咩名堂吧(一定又要係度拖時間短話長說了)!



好啦由平到貴逐個講:$1.7《黃海虯松圖》和$2.2《九松羅漢》都是饒大師的山水花鳥畫代表作,分別繪於1984和1993年,留意連個郵戳都係饒大師手筆,特別得來又好classic。



跟住上面見到$2.9《閒中有富貴 壽外更康寧》和$3.1《澤潤四方》。開估!就係印錯了$2.9這詩句的簡介。這兩句詩係來自宋朝陸游的《自喜》,寫簡介果個要打patpat太懶唔上網confirm一下,將「壽外更康寧」寫成「壽外處康寧」。陸放翁五律原詩是:「了了復惺惺,蓍龜未是靈。閑中有富貴,壽外更康寧。身備鄉三老,家傳子一經。春回元不記,出戶四山青。」這首未必很多人會讀過,相信《示兒》就大部份人在中學時代一定有讀過吧!



溫習完宋詩之後繼續講埋餘下兩張:$3.7《摹唐人觀音》和$5《金文錄陳曼簠銘》。金文就是刻在青銅鐘鼎上的遠古中文字,饒大師除了精通詩詞文學和書畫外,也鑽研上古史、甲骨學、楚辭學甚至古樂曲等十幾項領域,故有國學大師之稱。



心水清blog友可能會留意到,上面除了兩個首日封之外,側邊好似仲有盒野唔知係乜喎!咁就開埋估啦(其實應該都無乜人想估)!就係上面喱盒野,影埋出來畀你睇知唔知係乜東東?



睇真其實佢係個passport套,唔訂開郵票首日封可能唔會知,依家訂郵票係好似去超市買野貯積分和印花咁,訂郵票係有積分貯,咁貯貯下又有好多分可以換唔同紀念品(其實好多禮品都係D唔等洗無謂野),例如年頭訂生肖郵票會送生肖利市封和生肖金牌(A貨咋);訂颱風郵票會送颱風訊號手巾仔之類……記得那時預訂喱套饒大師首日封時見到有得用積分換喱個passport套,基爾已經好心心眼,填表交錢時問郵局叔叔可唔可以換喱個套(連自己有幾多分都唔知),郵局叔叔話照填啦!夠分佢自然會畀你云云……結果等大半年等到郵票出先知有定冇,係咪辛苦過等桃花到!

饒宗頤教授畫作及書法
發行日期:2017年9月5日(原定:2017年3月23日)

2017年9月3日 星期日

珍郵庫@香港珍稀植物

話咁快又來到9月,暑假放完感覺上暑熱天氣都開始有點消退,朝早夜晚還有點秋意,又係最適宜開動懶洋洋mode的時候(到底一年四季有哪天不想慵懶先)。就在喱個偷閒季節裏,一於快手寫返個郵票blog吧!



基爾知道唔少「花控」blog友周不時愛share靚花靚相,如果係就不要錯過今期喱套郵票了!話時話記得春夏時節唔少人都愛去尋覓花蹤,由櫻花、紫藤到鳳凰木、黃金雨、蓮花、勒杜鵑……秋天悄悄來到之際唔知又興去賞乜野花呢?



好喇……講左咁多無謂廢話,都係時候講返套郵票,今次基爾依然只係買了小全張,貪佢一張有晒全套郵票嘛!到底香港有乜「珍稀植物」咁巴閉?有冇D係行山時候都會見過呢?



先看$$1.7的細花冬青,它是常綠喬木,高6至9米,冬青係咪即係聖誕花果類?首日封的簡介話原來19世紀跑馬地有好多冬青樹云云;$2.9是二色石豆蘭,蘭花多數是附生植物,多見於熱帶和亞熱帶,基爾行花墟時多數只見跳舞蘭文心蘭加多利蘭或者新年常見的蝴蝶蘭,原來這種於1830年已在香港發現的石豆蘭才算是「原居民」。順帶一提,上圖是首日封上的手繪花圖案,畫得幾清雅幾靚,令整套首日封生色不少呢!



再看$3.7的秋海棠,基爾細過時都有種過紅色的常見品種,也種過較大朵的玫瑰海棠,非常粗生又易種易開花,好有成功感,室內室外皆適宜,好適合新手試種。海棠本身也有很多唔同顏色和品種,只要剪下一小節花枝浸出根再種入泥盆,好快又長出一大棵,價錢也很便宜;最後$5是大嶼八角,白色星形的花冠很美很特別,唔知同食得的花椒八角係咪同科?這種大嶼八角顧名思義是來自大嶼山,1905年於鳳凰山首次被發現,高約3米屬小型喬木。最後簡介上仲有講,今次這套首日封還貫徹了環保主題,郵票和小全張均以獲森林管理委員會認證的紙張印製,紙張的原材料和生產過程符合嚴格標準。



橫掂睇開郵票,咁再睇埋喱款澳門郵電局發行的「中國戲曲:霸王別姬」小型張吧!依家香港部分大型郵局都有出售海外發行的郵票,某日行過沙田那間就入去八下,見到喱套「霸王別姬 」幾靚而且唔貴,最重要係仲有貨,咁無得唔買啦!



郵票原本全套有4枚,分為澳門幣$2、$3、$4.5及$5.5,不過基爾只買了這個大張一點的$12小型張,上面印有西楚霸王的京劇造型(可惜沒有虞姬舞劍)。網上翻查原來佢個郵戳都好靚好有特色,澳門郵票向來設計得很有水準。基爾去到問賣郵票櫃位那位姐姐時,她還說我很好彩這是最後一張了,賣完就售罄!

香港珍稀植物
發行日期:2017年8月17日

中國戲曲:霸王別姬(澳門郵電)
發行日期:2017年6月8日

2017年8月28日 星期一

香城墨色@港大美術館

之前去了一趟中大看任白展,緊接著當然要去埋港大,那裏有間美術博物館一直想去逛逛,上次回去竟休館了望門輕嘆,今次梗係check過晒開館時間先去啦!



Once upon a time基爾諗返青蔥歲月年代係曾經來過這裏,那些年這幢古老建築物還未成為美術館之前,原本是一座西洋古典味十足的圖書館(就像Harry Potter那種),正門一入去就是兩層高非常宏偉的圓形大廳,由牆邊到天花板是一整列發出陣陣古書味道的書架……



人面桃花物換星移,依家雖然古樓依舊,但裏面已經完全唔同晒,古董書架通通消失了,取而代之牆上換了今次展出的多幅香港半世紀水墨風景畫,如有興趣不妨去一趟賞畫,當中不少作品還可看到昔日的香港街景和民生,都幾值得一看。



不過基爾還是比較有興趣四圍走走看看能否重拾昔日圖書館遺留下來的舊痕跡。除了看畫之外,館內仲收藏了很多中國不同朝代的古董,感覺有點似濃縮版本的文化博物館。



除了看古董之外,館內最特別是有個展廳專門擺放了數件創意十足的現代藝術品作展覽,可說是古今創意一次過睇晒!如果去開港大都不妨來這裏一逛,看古蹟之餘(馮平山樓及徐展堂樓)也可看古今藝術品,而且門票全免,是暑假其中一個好去處。

「香城墨色:館藏當代中國繪畫」
地點:香港大學美術博物館
展期:28.6.2017 - 27.8.2017

2017年8月18日 星期五

九十風華帝女花@中大圖書館

之前睇新聞才知中大圖書館搞了個任白珍藏展,上網check展期原來到7月底就結束,基爾趁最尾果日剛好有假期就趕上了尾班車。



第一次來到中大圖書館,原來地方都幾大喎!加上正值暑假,圖書館內人影唔多見,在大門口做過簡單登記就可以入去展廳。



任白珍藏展廳其實就在圖書館ground floor,不用搭電梯,按圖書館工作人員指示轉個彎就見到,不會太難找。



與常規博物館的展覽廳有點分別,這裏的展廳採用開放式設計,基本上是劃出大堂一角就用來擺設展品了,感覺上很寬敞開揚,展廳旁邊已是圖書館的閱覽廳空間,如果看展覽看得累了就可過去坐坐稍休。



展題之所以叫做「九十風華」是因為今年正好是白雪仙的九十大壽。展品中大部份是仙姐和任白慈善基金捐贈予中大圖書館的珍貴藏品,例如上面這本古董《紫釵記》劇本。



至於上面這本任姐用過的《再世紅梅記》泥印本也很珍貴,按照展覽場刊的介紹,昔日粵劇團的泥印本一般只會印製十幾份,是戲班台柱、打鑼、提場等主要工作人員的專用劇本。



另外最吸引基爾的是五六十年代仙鳳鳴舞台演出的劇照。紫釵記帝女花蝶影紅梨記等任白戲寶,基爾只曾看過電影版,這次還是第一次看到真真正正舞台上演出的大戲劇照呢!



除了劇照外,仲有唔少任白與唐滌生梁醒波任冰兒和雛鳳一眾弟子的生活舊照,就像瞬間回到了六十年代的黑白粵語長片時代一樣,任姐仙姐的打扮在當年來說都非常之潮!



同場仲有展出唔少珠釵頭飾之類,都是手工非常精巧而且保養得完好無缺的藝術珍品,不少傳統手工技藝相信已經失傳。如果嫌唔夠喉的話,仲可以再去文化博物館,那裏珍藏了更多昔日粵劇大老倌的戲服髮釵裝飾,如果是戲迷一定看得更滿足吧!

「九十風華帝女花」
地點:香港中文大學圖書館
展期:27.3.2017 - 31.7.2017

2017年8月8日 星期二

珍郵庫@人體五感官

人體五感官都可以出郵票,今次喱個主題又幾特別喎!究竟一張小小的郵票點樣可以表達出五感呢?



今次答案在這裏係搵唔到!因為基爾都無訂到果5款郵票,只買了以樂園為主題的$10小型張,上面一次過有齊晒聽覺、視覺、嗅覺、味覺和觸覺等5個小朋友公仔圖像。

翻查資料其實今次那一套5款的郵票都值得買,據聞有些還有桃味和雲尼拿味;有些用了特別的印刷技術令郵票有仿真籃球的皮質感云云……有買到的不妨去索下舔下睇下係咪真係咁好味先?

兒童郵票:人體五感官
發行日期:2017年7月18日

2017年7月28日 星期五

川淮居@沙田

7月話咁快又來到尾聲,又係時候基爾要稍稍郁下個blog,驚太耐唔update會有人以為喱度close了!



寫為食野應該最萬無一失吧!好耐無見的旅行腳之前分批聚了兩次,其中一次來到沙田,好少閒日來到新城市,似乎人潮是少一點。可能是趁暑假關係,這次大堂的展覽以camping旅行作主題,見好多大小朋友入去帳幕和旅行車上玩自拍。



旅行腳部份因為要返工,要晚一點會合,其餘休假或退休人士(咁快退休真羨慕呢!)都幾早到商場裏各自遊弋,基爾遊了一輪無甚收穫,還是先上預訂的茶樓霸位……



由於時間尚早關係(6點幾左右),店內其實食客不多,到了7點打後就開始陸續坐滿了,但觀察所見大部份都只係做一輪生意而已,可能始終是閒日無假日咁熱鬧吧!



Anyway,會合晒所有與會人士後就order了這個4人套餐(因為某銀行卡有折)。前菜這個麻醬青瓜粉皮基爾覺得清新得來又幾好食。



點喱個套餐因為見佢菜式都幾豐富,雞鴨魚蝦燉湯樣樣都有,大路得來又合胃口。說時遲那時快,桌上迅速地來了隻醉雞,濃濃的花雕酒香味,可謂雞不醉人人自醉(即係點)!



緊接著又到熱燙燙的燉湯登場,取名為「瑤柱花膠螺頭燉雞」,味道ok而且幾足料,人均可以飲到兩小碗,當然如果自己家裏煲的還是稍勝一籌(因為可以飲兩大碗)。至於那條金腿糟蒸黃花魚基爾不太懂欣賞,略嫌多骨但肉質算是鮮美,可惜嗜魚團友今次缺席否則必可大快朵頤。



這味乾燒明蝦球原本份量頗大碟,只是吃了大半才記起忘了影相(掛住講旅行經),基爾唯有快快手手撥返埋一小碟才補影返張相,所以賣相稍為打了折扣,原本係靚仔少少。



最後的重頭戲是片皮鴨,整體來說是average水平,沒驚喜也不會有失準之作。以埋單計人均$230左右計算是不過不失之選,當然最重要其實係可以坐足全晚,單單聽領隊未來一年半載的外遊大計,也是件賞心樂事呢!

川淮居 Sichuan Garden
沙田新城市廣場一期8樓801C號

2017年7月7日 星期五

珍郵庫@數字颱風信號百周年

踏入風季經常都時晴時雨,上月中更率先掛了個8號波,唔知郵政署係咪要配合返喱種夏日天氣,就推出喱個颱風百年首日封!



在這小城長大的人應該對颱風絕不陌生,小時候總會期待打風因為可以唔駛返學……Anyway講返套郵票,唔講唔知原來香港首次用數字颱風信號是在1917年,當時按風向和風力分為1至7號;到了1931年起改為1至10號;至於現今信號系統則是1973年才確立。



全套颱風郵票有5張,包括5個級別風力:$1.7(一號戒備信號);$2.2(三號強風信號);$2.9(八號烈風或暴風信號);$3.7(九號烈風或暴風風力增強信號);$5(十號颶風信號)。



此外還有$10的十號風球小型張,右邊印了1917、1931和1973年信號圖案的改變,原來以前除了有十字和三角形之外,仲有掛圓形、長方形和菱形的颱風信號,都幾有趣喎!基爾無去過尖沙嘴天文台的開放日(太多人了),反而幾年前有去過澳門松山果個,見過那些不同形狀的風球信號,原來都幾大個架喎!

p.s.心水清blog友可能會問:紅白色果舊野好似天氣圖上的風球標誌係乜東東?其實果舊係條壓縮毛巾,包裝成風球標誌連同訂郵票時送的,不過買郵票送毛巾又係咩玩法?唔通留返打風落雨時用來抹身?

數字颱風信號百周年
發行日期:2017年6月13日

2017年6月28日 星期三

盈福28@馬鞍山

早起身有個最大好處,就係感覺上全日時間好似特別見洗!大清早去完逛一輪博物館之後,lunch就去左食喱間有點新派味道的粵菜館。



每逢大時大節去酒樓晚飯,如果無訂座真可說是一位難求(有些茶樓甚至不設訂座要親身去排隊霸位),所以為免麻煩好多時會選擇提早做節,又或者改為食晏晝飯。上圖可見這個「變陣」非常奏效,這間食店果然有大把位任坐唔嬲,唔駛勞師動眾等位咁煩。



先來的是小食:鳳凰自醉$68和沙薑豬手$68,白雲花雕鳳爪好有酒香味,基爾平時唔飲酒但都覺得幾香幾好味;至於豬手的沙薑味肯定無得輸,兩款同樣係上乘的開胃菜。



再來就是賣相極靚的松子鱸魚$198,老實說基爾因為怕骨對魚通常都麻麻地,不過喱條松子魚表面炸到好鬆脆已經夠香口,魚肉仲係無乜骨啖啖肉,對於基爾喱類完全唔識侖骨的人來說可謂極品!另外仲叫了左上圖的椰汁日本南瓜芋頭$78和左下的玉桂香鴿$38,當天去原來每台客送一隻乳鴿,非常抵食!



另外點心類叫了上面喱個花菇松露$49,造型真係好似一個冬菇,咬開入面果然散發出濃濃的松露香味,唔知價錢算唔算貴但都值得一試。店裏其實仲有幾款設計別緻的新派點心,基爾相信都係主打年輕人市場吧!連茶芥每位$10,最後埋單計約六百幾(某銀行卡有九折相當於免加一),整體而言算是可以一試之選。



講開食晏,順便講埋平時基爾返工多數帶飯,但間中都會出街lunch。至於出街通常食乜呢?上圖喱間算係其中的心頭愛,因為佢個下午茶時段真係好鬼抵食,碗飯大大碗之餘仲好平又經常有新款式揀。



之前食過佢個松露芝士煎雞飯,加埋海苔味噌湯和泡菜都只係$35左右唔知有冇記錯。基爾食過一次就無再推出可能成本貴,改左做松露芝士豚肉和牛肉飯。另一次又食左上面這個胡麻醬玉子豚肉撈鳥冬$28,餐飲轉抹茶紅豆冰只係+$5係咪好抵?基爾對佢個半生熟的玉子其實麻麻地,不過甜甜地的胡麻醬就幾好味!



p.s.反正講開食野咁又搭多段豬頭骨短blog。之前同blog友講開去街篤魚蛋,咁基爾本身就好少做喱樣野,因為通常都在家自己整咖喱魚蛋,每次煮咖喱燜薯仔時總愛加埋魚蛋一齊煮,感覺好食過街篤果D好多,自家用開果隻咖喱磚味道唔錯,想再辣少少可再加紙包裝咖喱粉,味道可自行調節。最後講埋早前U記的感謝祭,襯熱鬧走去買了件$79短袖tee,今年過了大半年就只買了這件衫,向環保綠色生活又邁進一步了!

盈福28 Fortune Young
馬鞍山新港城中心2樓2E-91號舖

2017年6月20日 星期二

繪畫‧金庸@文化博物館

睇完宣傳雷聲比較大的羅浮宮展覽之後,再行返落博物館地下果層,因為要睇埋個金庸展先走。



唔講唔知,原來金庸展已經成為文化博物館裏的常設展館,咁就唔駛經佢會咁快完結了,有興趣去參觀的,可以等有空慢慢先來睇都未遲,而且係唔駛入場費呢!



金庸館裏展示了不少屬於金庸先生的珍藏物品,包括有上圖的私人印鑒、書刊、手稿、五六十年代早期版本小說和報章連載版甚至相機等等,當然還有很多他的舊照片……



金庸由1955年寫第一部武俠小說《書劍恩仇錄》開始,一直到1972年完成《鹿鼎記》後封筆,十幾年間總共寫了15部膾炙人口的經典武俠小說,之後仲有好多漫畫、電影和電視劇版,不斷翻拍又重播,說他是二十世紀最具影響力的武俠小說作家絕對當之無愧。



依家電視正播緊最新翻拍的《射鵰英雄傳》,可能金庸人氣又再度回升,來博物館參觀的遊人都幾多。上圖右是李志清畫的郭靖水墨畫;左上圖是館內擺設的一座巨型金漆屏風,上面又係畫滿射鵰人物造型,非常有氣勢;左下圖是金庸與屏風合照,旁邊仲有最經典的一副對聯:「飛雪連天射白鹿,笑書神俠倚碧鴛」。



如沒記錯上圖已泛黃的原稿紙,上面寫的就是金庸的《笑傲江湖》手稿,這本經典小說原來是於1967-69年在明報連載,當時正值文革火紅年代,唔知同小說中的人物有冇關係呢?



另外仲有好經典的金庸武俠電視劇劇照,首輪夜晚黃金時段做果陣唔係好識睇,不過好彩後來中午經常有重播,基本上天龍八部、神鵰射鵰和鹿鼎記重播得最多,故事人物最熟悉,展廳裏仲有重播八十年代經典劇集片段,依家我諗電視台就唔會重播了(畀錢頻道好似有得睇)!



上圖用明報陳年日月logo信紙寫的又係乜東東?睇睇佢個簡介,原來係「1988年查良鏞致明報編輯部手諭」,當中談到明報副刊的方針,還有逐一評說明周、明月和明報,提到新聞版風格要做到「新聞副刊化,副刊新聞化」……明唔明?



再睇埋明報明周創刊號,原來明報是在1959年開始發行,數數手指原來都有差不多60年歷史。依家報紙多數跟英文由左向右讀,以前就是由右向左讀,比較特別。另外,關正傑和射鵰果兩隻碟基爾家中都有喎!不過當然是復刻版而不是這裏展示的原版。



記憶中基爾細個時有在報紙上追看過每日連載的衛斯理科幻小說,但金庸的就沒看過,上面這張副刊是六十年代產品,連載的是《倚天屠龍記》。話時話依家報紙仲有冇連載小說呢?可能時代唔同了,已經唔興了吧!



走之前記得要玩下喱個「高手過招」真人融入漫畫的玩意。基爾見成班印傭姐姐爭住同漫畫人物影相玩得好開心,而且影出來效果又真係好逼真喎,幾有趣!

「繪畫.金庸」
地點:沙田香港文化博物館
展期:1.3.2017 - now