2015年3月30日 星期一

遺忘的唱盤時光@譚詠麟

天氣濕立立都係時候拎返基爾D「陳年」CD出來抹抹以免發霉,抹完當然順手又擺埋落唱盤聽一陣啦!



近排譚校長慶祝入行40周年,其實基爾問心覺得果首《銀河歲月》真係麻麻地,倒不如聽返喱隻精選CD好過啦!這一輯寶麗金88極品音色系列發行於1997年(眨下眼已經有差不多廿年歷史),之前都講過買了好多張,基爾向來不特別愛聽譚校長的歌但原來也有買他這張喎!



碟中一共收錄了18首歌,基本上九成都係當年一睇歌名就會記起的大路hit爆金曲,沒有太大驚喜,當中的幻影、忘不了您、雨絲情愁和半夢半醒今時今日聽返依然覺得是上乘之作,一路聽就越來越懷念他以前的唱腔(唔知點解依家總係嫌佢唱歌變得過份老練陳腔,酒廊歌手味太濃所以唔太like)。另外有點好奇係第15及16兩track,諗了好耐都唔係好記得係咩歌,完全無印象,聽返才發現一個永遠不好的傷口有一點記憶但不算太熱之作,至於幫我欺騙我就完全係「零印象」(老實說也不算是什麼特別好聽的滄海遺珠),能被選入這類「雞精碟」中實在有點令人難以想像,也摸不著頭腦。



順便搭單講埋黃凱芹果隻吧!早排睇李思捷talk show見佢上鏡幾乎唔認得,幸好依然唱得……始終覺得佢短髮好睇過長髮,尤其是年紀大了!Anyway講返喱隻碟,可能近年始終少聽黃凱芹有咩新歌,即使聽返喱16首舊歌仍有一點點新鮮感,依然很喜歡雨中的戀人們、沒結果的一些感情和情深緣淺,勁鍾意彌月醉巴黎,是編曲很特別的遺珠。比較揼心係竟然沒有收錄到焚情,卻反而有首半冷門的逝去的詩篇……吹脹!

2015年3月23日 星期一

扶輪園賞櫻:下@大帽山

在川龍飲飽荼hea飽就要起行了,春天依然比較早日落,加上大帽山上霧氣較濃,雖只是下晝3點幾,但隱沒在林中的山路已開始有點昏暗……



行了15分鐘沿路都無乜人(因為川龍通常係上午比較多人行山),本來想返轉頭搭巴士或小巴落山算數,不過既然友人拍心口話無問題就繼續行啦!穿過樹林落到去城門水塘引水道感覺上光猛返,望返落荃灣朗逸峰豪宅一帶景觀都唔錯,似多返一點人氣。



若要繼續沿引水道一路行返去城門水塘小巴站又恐防日落西山都未到,途中見到上面這個「往扶輪亭」的路標就決定由喱條捷徑落山,一來去荃灣會快好多直接好多,二來又唔駛怕要對住引水道旁盤踞果班齊天大勝爺。



喱條落山捷徑其實都幾好行,沿途仲可以欣賞到唔少盛開的靚花!所以今次雖然睇唔到最燦爛的櫻花美景,但漫山開遍的宮粉羊蹄甲加埋各式杜鵑花、茶花、紅絨球仲有米仔蘭等都一樣靚,絕對不會令惜花人失望。



咩係宮粉羊蹄甲?咪就係粉紅色果種洋紫荊,雖然平時在公園間中都會見到洋紫荊開花,不過原來漫山開遍的景象又是另一回事,壯觀程度不會比盛放的櫻花樹遜色。



不過紫荊花可能始終係本土常見樹種,又真係好少聽人話專程來行山賞紫荊花,也不似去看櫻花或紅葉咁有股熱潮……anyway如果有興趣賞紫荊花,沿荃錦公路走會是個不錯的選擇。



見到地鐵車廠就表示這次旅程結束了,這裏距離愉景新城非常近,友人原本諗住去那裏看看有乜好野食……



不過沿行人天橋走到中途轉了入中染大廈先去個廁所,原來喱座活化工廠大廈依家都開了不少食肆,就如一個小食坊,無意間仲發現原來有薩莉亞分店(之前北角薩莉亞店已食過幾次),友人毫不考慮就決定入去開餐。



不過基爾感冒未完全好返(好不容易連續飲了7日中醫苦茶才稍見起色),還是繼續戒口為妙,熱氣野當然要掛晒免戰牌,不過其實齋飲野傾偈都幾悠閒relax,店內環境唔太嘈雜,梳化坐位又幾寬敞舒服(坐坐下有點想訓著),順道又可聽埋友人侃侃而談4月即將展開的賞櫻行程,齋聽佢講planning其實已是一件樂事了。

2015年3月16日 星期一

扶輪園賞櫻:上@大帽山

日本一年一度的櫻花季節快將展開,相信唔少人早已book好晒機票準備飛赴東瀛賞花襯熱鬧吧!至於香港2月開始的賞櫻熱就快到尾聲,基爾拿拿林趕上尾班車,今年選了去大帽山睇。



年前試過去長洲關公亭睇山櫻花(又稱緋寒櫻)盛開,由於長洲四面環海較濕暖,所以一般花期於2月初已展開。來到3月初其實唯一的選擇就是到氣候較涼的大帽山!為免人潮太勁,這朝大清早就來到荃灣西站等51號巴士上山,果然好多人排隊!



行走荃錦公路上大帽山的51號由於只是單層巴士,而且班次不算太密(約15分鐘一班),所以架車都幾爆,中途站未必上到車,加上周末假日有不少人上川龍飲茶,所以還是在荃灣西總站等車比較穩妥。



巴士來到「郊野公園」站就可下車了(即川龍之後兩個站),其實都唔駛怕唔識落車,一來川龍站已經相當多人落車去飲茶,二來3月去大帽山郊野公園賞櫻的人也頗多,落車後跟住人潮一直走就來到扶輪公園茶水亭外的櫻花林。



離遠已經見到大棚人拎住大機細機手機不停圍住D櫻花樹係咁影呀影,所以唔駛擔心會搵唔到個櫻花林。不過好明顯今年確實回暖得比往年更快,如果2月底來櫻花應該會開得較燦爛,基爾3月第一個周末來到見櫻花樹已長出嫩葉,花期眨眼已快到尾聲,僅餘一兩株仍見有幾簇遲來的艷紅。



雖然櫻花已不多,但也無減一場來到的遊人興致。純粹來襯熱鬧的基爾影下花又影下影花的人也是一種樂趣,可能早有心理準備櫻花不多,所以也不會有大太失望吧!影飽櫻花之後,基爾都要拿拿林起錨了,當然山長水遠來到大帽山郊野公園,不會咁快就落山散band回家……



之前上網約略睇過櫻花園這裏附近有兩條「零難度」的行山徑,反正過年大感冒病了很久,就趁這次良機hea行個靚山啦!看地圖見大帽山家樂徑和遠足研習徑呈「8」字形,起點和終點其實都是在扶輪公園的櫻花園,路上指示也很清晰所以不用太擔心會迷路。



途中路經camp site見有唔少大陸自由行來紮營,其實附近配套設施也不錯,有洗手間也有燒烤爐,而且3月未算太熱,蚊蟲也不多,也是不錯的露營季節吧!比較意外係友人竟帶了野食來picnic,雖然只係簡單零食,不過在楓樹林下食住傾偈一hea又大半個鐘,如果12月來唔知又睇唔睇到紅葉靚景呢?



齋食零食當然不可以當lunch,正猶疑好唔好落山返去荃灣或汀九那邊食晏,商議過後結果還是決定沿荃錦公路落山方向步行兩個巴士站返去川龍飲茶。雖然已來過不下5-6次,但始終覺得端記二樓露台有個無敵田園靚景最正,所以印象中幾乎次次來都係幫趁佢。



之前通常係大清早來川龍飲茶,之後再去行山(甲龍徑);今次是第一次來飲晏晝茶,茶客感覺上好似無朝早咁墟陷,但依然有不少點心選擇,仲見到好耐無食過的糯米卷和蠟腸卷、大包之類,這類懷舊點心今時今日在外面一般茶樓應不常見了。



至於脹卜卜大大隻蝦餃一籠有4隻之多,大中小點一籠幾錢其實基爾次次來也不太清楚(今次埋單計人均也不過$50);不能不試的還有外面菜田即摘即煮的西洋菜,平時在家慣用西洋菜煲湯,炒西洋菜則比較少食,聽基爾媽講西洋菜在春節過後會帶一點甘澀味道。



第一次來飲晏茶才知原來這裏沒有下午茶時段,伙計大約2:30pm就會自動來埋單及收拾台面作簡單清理就收工(留下了茶壺茶杯讓客人慢慢嘆),結果基爾與友人在露台位hea到3:30pm才願走,整間茶樓就只剩基爾一台客(店門也沒人落閘),四周靜蠅蠅的感覺很特別,只餘簷廊裏籠中的相思鳥間中發出幾下叫聲,似乎在問基爾為何遲遲還未離去呢?同相思say goodbye之後見暮色漸濃,都係時候要繼續起行,穿過川龍菜田往城門水塘引水道進發!

2015年3月9日 星期一

2014古都瀟瀟@神戶燈祭

傍晚離開姬路後,當然不會立即就返去京都食飯訓覺咁浪費千金一刻的旅途時光,長夜漫漫有乜搞作好呢?



既然買了Kansai 1-day pass點都要用盡佢,之前已經諗定會在祌戶先落一落車,因為喱度有個一年一度的冬日燈飾祭想去趁下熱鬧。去旅行前翻查網上資料才知關西地區每年12月都有三大著名的賞燈盛典:大阪光之饗宴、京都花燈路和神戶光之祭典。老實說香港其實也有很美的聖誕燈飾,但近幾年基爾都怕人多提不起勁去看(事實若是一支公去看也實在更覺寂寞了吧),反而老遠跑去人家地頭看燈飾好了!

搭火車來到神戶的三宮驛下車,在車站大堂早已見到「夢與光祭典」的宣傳海報,最初不知是哪個出口,與閘口大叔雞同鴨講後隱約聽到好似話搭多一個站去元町站會近燈飾祭場地少少喎!盤算過如果又返入去月台搭車雖然係唔駛錢但實在嫌煩,反正看leaflet的地圖由三宮驛行過去也不太遠不難找,就博一鋪照行出去搵搵吧!



事實證明擔心搵唔到賞燈祭場地的方向都係多餘,因為基爾一出火車站不遠已經有好明顯的路牌指示,而且街上還有很多警察作人潮管制疏導,基本跟住大隊人行我行就無問題了。

不過喱日來到原來正好是燈祭的最後一天,人潮看來也特別勁,由車站行到去燈祭場地全程20多分鐘,幾乎都跟住一條人龍繞過幾條大街而行,幸好大馬路一早就封了作行人專區,基本上也不算太逼太侷促。由於途經的是神戶「舊外國人居留地」,街道兩邊有好多西式舊宅本身已經幾靚,一路行一路欣賞街景其實都唔會太悶。



來到舊外國人居住地這條約270米的大馬路上,據資料介紹整條街共架設了24座拱門,亮起了約20萬個燈泡,走在這中感覺也幾震撼甚至有點兒眼花,當然也勁多人在街上互拍和自拍。沿大街一直走到街尾就見到個小公園「東遊園地」,這裏搭建了一座像大教堂般宏偉的燈飾佈景,外圍則有不少賣小食的攤檔,但由於實在太多人所以基爾也只是短暫停留影幾張相就走了,因為要趕住去下一場……

p.s.看燈飾的大街上見有唔少年輕人在募捐,後來才知這個光之祭典是為了悼念1995年1月的神戶大地震,翌年當地政府為重建工程籌募經費和振興當地經濟,於是每年都舉辦大型燈飾節吸引遊客重來神戶,至今已經舉辦了20屆。

2015年3月3日 星期二

乙未羊年新春食不停

話咁快又過了農曆新年,今年基爾帶住大感冒過年,所以乜地方都唔敢去,尤其係人多擠逼的花市和賀歲煙花通通都無去,多數時間只在家閉關養病。



話雖如此,但新年的幾餐團年飯開年飯始終係要食吧!不過今年團年飯為了遷就家人時間,所以比較遲食,結果茶樓爆滿就放棄食中餐了。其實之前冬至時也試過「逆市而行」食Pizza Hut,發現原來大時大節去食西餐會比較易搵位,菜式也不會只限幾款套餐而且開天殺價貴到無鄰,例如這個青口set dinner都只係$500有找非常抵食呢!



另外之前閒日有一晚約了前公司舊同事團年聚舊,地點選了銅鑼灣時代廣場食通天的鍾廚,7人叫了8-9道菜人均才$160,又真係抵食,味道也不俗,至少不覺太重味精,當中那味益生菌炒豆苗相當清淡且幾有綽頭(但沒有益力多味)。席間當然仲要八卦打聽一下舊公司的人事情報update返D資訊先得啦!



至於開年飯無辦法逃避要在家中開大餐,不過為免基爾媽煮得太勞累,基爾一早已經出錢又出力、舉腳提議買個大盆菜就算數,結果揀了稻香這個$800大元有找,年初二仲要乖乖大清早步行30分鐘去隔籬村人肉速遞回家(勁重!)



雖則話已經算大大減省了煮的麻煩,但餐後的執台、洗碗、拖地等一大堆「善後工程」始終不能幸免,每年初二的例行勞累工事結果仍是要忙足一整日,雖說基爾是熟手技工,但明年仍會盡全力說服基爾媽索性出街食開年飯乾手淨腳算了!

鍾廚 Chung's Kitchen
銅鑼灣勿地臣街1號時代廣場食通天12樓1201舖