2013年10月22日 星期二

2Q12瀛遊東北@最終章

「醒來時沒想起來身處什麼地方,記憶變成一個窄小、有著四個角落的純粹空箱子,箱子裡放進的是空白。環視著這片空白,可是一看那並不是空白,而是一個微微昏暗的房間,空蕩蕩冷冰冰,沒有一件傢俱。不認識的場所,旁邊的報紙上還有一隻吃剩的蘋果核。頭混亂了,怎麼會在這麼奇怪的地方呢?」



旅程來到最後一天(其實只剩大半天時間在東京),尋日講過話喱朝要一早起身落去酒店樓下的新宿中央公園晨運,所以點都要去行一陣。



可能因為太早(大約7點幾),落到街都唔見附近的辦公大樓有人返工,條街好似禮拜咁靜蠅蠅。酒店同公園其實只有一條「公園通」大馬路之隔,行過去都唔駛10分鐘。



可能尋晚落過一場大雨,今朝的空氣特別清新,朝陽下的公園裏還瀰漫一陣青草氣息,仲唔快D深呼吸多D負離子?!公園遊樂場的滑梯好似幾刺激,可惜濕左唔玩得。



行冇耐見到喱位叔叔來餵貓,可能佢已經來慣來熟,幾隻唔同色的流浪貓一見到佢就飛撲出來開大餐,看似完全唔怕人。



日本的公園也特別有藝術氣息,經常可免費睇到唔少藝術作品,上圖左的雕塑名為「燮」,右上坐著的叫做「瞭」,唔知係咪大師級作品呢?



今次在青森的奧入瀨和十二湖看了那麼多瀧(瀑布)和湖泊溪流,睇靚景都已經睇到有少少麻木,怎知來到東京新宿的公園裏仲有喱個人工的「白絲之瀧」睇。



之前成個禮拜睇慣左天然靚瀧後,再睇新宿喱個人工瀧真係有少少……幸好在和煦的晨光中泛起了閃閃金光,影出來都可以加返少少分吧!



喱隻黃貓剛剛才見佢同伯伯開大餐,喱頭已經來到瀑布邊,食飽後就來躺躺貴妃椅晒太陽,做日本的街貓其實都幾嘆世界架喎!



在「水之廣場」旁邊原來還有個秘密小花園,雖然已經係10月底的深秋季節,依然有唔少花開,仲打理得幾好。



部機雖然咋咋地,但都影得出少少景深!可能落完雨關係,花的顏色都幾鮮艷。估唔到一個東京鬧市裏的公園都有咁多野睇,早點起身來晨運都值得。



見時間尚早一於行返出去新宿站附近的小田急百貨店,盡最後努力掃下貨,由於無乜特別野想買,就去睇下地庫的食品超市吧!順便睇下有咩野食醫肚……



始終都係賣海鮮魚生檔最吸引,真係乜蟹乜魚生乜八爪魚乜海膽都有得賣而且價錢仲幾平,唔知係咪因為D人怕輻射唔敢買所以咁平呢?



行完買完再出去行下街,之前一晚由於落大雨無乜心機行,喱朝早太陽出來了成個感覺唔同晒。一路行見返尋晚食過的大戶屋,仲有坐位好鬼逼的麥記,行行下又見到喱間香港都有的10分鐘齋剪理髮店,不過竟然要成¥1000,香港一般只須$40-$50,平好多!



前一晚基爾太累,食完飯就返酒店沖涼休息睇下電視就訓覺,聽友人講原來佢仲有去上面喱度行一陣,朝早來到其實無乜野睇,夜晚唔知有咩唔同呢?



由於朝早只係食左個包就去晨運,行左咁耐都開始有D肚餓,就去食個early lunch吧!諗來諗去不如就試下去喱間東海苑食韓燒。



由於是樓上舖,初頭都擔心會唔會又係好逼好細,點知上到去都有D驚喜,可能由於只係11點幾仲未到lunch時段,可以有個小偏廳坐下,唔駛再同人背貼背咁辛苦,而且食店採用半自助式設計,沙律前菜和泡菜、餐湯、飯、冷盤和甜品都可以任裝,對於已經餓到暈的基爾來說實在最好不過!



先叫了幾個比較平價的牛肉豬肉雞肉定食,雖然係叫做set lunch但一D都唔算行貨,份量也很充足!仲講咁多,拿拿林去燒啦……



叫了幾個定食之外,仲叫左喱個貴野──雪花和牛,單單睇個樣都知道幾堅料吧!基爾雖然唔太食牛,喱次都要破戒食左小小試下,真係非常得喎!



平時基爾在香港都比較少食韓燒,因為怕食完後件衫一陣味,不過今次喱間通風設備好就唔覺個身有味。最後食埋個豆腐花甜品,韓國人食豆腐花原來興切粒的?埋單計都係¥7960,真係抵過香港食韓燒喎!



食飽都差不多成1點鐘,都要加快腳步返酒店check out。由於酒店有專車直出成田機場(¥2300),所以都費事拖住行李四周圍去搵機場巴士站(若搭機鐵要先去東京站轉車同埋要¥3000)!由於行高速公路(沿途仲可盡覽東京灣靚景,見到東京鐵塔和新的Skytree),未夠3點半已經安抵成田機場機。



Check-in寄埋行李之後仲有大把時間剩,就兩手fingfing四周圍行下用埋剩下的yen。機場入面原來都幾多餐廳,不過剛才的韓燒食得太飽所以就無再去食喇!



成田機場原來都有幾多唔同種類的店舖,幾值得花時間慢慢行下,唔似得香港機場來來去去就只得果幾間名店和連鎖店悶死人!有幾間賣野食手信和紀念品的也不會開天殺價,定價同外面市區店舖其實差不多,要比十個讚。



喱盒巨型高達只係賣¥2500,即時令基爾兩眼放光,應該比香港平好多吧!不過實在太大盒,唔係好方便hand carry上機,都係睇下就算了!



上面深灰色一盒盒包裝到咁典雅,最初仲以為係雪卡或煙,睇真原來係蛋卷,15條要成¥1050,比澳門果D貴好多,唔知係咪超好食架呢?!木村手中的新相機就同香港差不多價錢。



在成田機場hea蕩兩個幾鐘後終於可以上機,回程5個鐘機,都係睇下有乜戲做先……最終揀左睇《吸血鬼獵人﹕林肯》,邊看邊吃花生飲蘋果汁時,突然令基爾回想起在青森吃的美味蘋果;記得去程時飛機餐有Haagen Dazs雪糕,點解回程的甜品只有金莎!



飛機10時多到達,拎完行李過埋關剛好有機場巴士,三步夾埋兩步飛奔落去巴士站果然趕得到,約11:30pm安抵家中,又完成一次很美滿的旅程!

2013年10月21日 星期一

2Q12瀛遊東北@上野動物園

「這次來了一群麻雀。它們慌慌張張的在玄關附近這裡那裡的搜尋,沒發現什麼像樣的東西後,立即飛到了別的場所。之後一隻花貓到訪,像是附近人家養的貓,脖子上還戴著除跳蚤的頸圈。沒見過的貓!貓在枯萎的花壇裡小便,小便完後嗅了嗅氣味,似乎有什麼不滿的東西,無趣地抖動了鬍鬚,然後筆直的豎起尾巴走到公寓後面消失了……」



離開皇宮之後,火速由東京站搭過去上野站,其實距離也不遠,只係搭3個地鐵站而已,火車站一出去就是上野恩賜公園,喱日來到都幾多人喎!



公園範圍都幾大,沿路仲見到有國立西洋美術館(上圖右)和科學博物館,可惜時間不多,無法逐一入去仔細逛逛;公園裏仲有一班來自中國的雜技團在表演軟骨功。



如果4月櫻花季節來上野公園,仲可以去東照宮賞櫻,聽說東照宮也是東京賞櫻的熱門地點,單看擺在路旁的東照宮櫻花照片就幾靚。



以前去中國大陸旅行,遊逛公園或廣場時經常會見到有公公伯伯拎住地拖一樣的大毛筆在地上寫書法大字,上野公園這裏則興畫卡通公仔,喱位伯伯畫的大象又幾cute幾靚喎!上圖右是公園裏的小松宮彰仁親王銅像。



終於行到上野動物園的正門,連園外的花圃都修剪成動物形態,幾得意!動物園的入場券售¥600,出示passport有八折(¥480),一場來到梗係要入去睇下啦!



正門外還有個小型遊樂場,但這座旋轉木馬就相當大,上面不是一般的木馬,而是卡通人物大集薈,基爾認得的有叮噹、麵包超人和比卡超。



入到動物園即刻見到右邊的熊貓館,大鄉里基爾其實連海洋公園的安安佳佳盈盈樂樂都未見過,反而來到東京才第一次見到熊貓,雖然剩係見到佢地表演開餐,但都值回票價。



睇完熊貓再睇下地圖仲有咩特別野睇先,地圖是買入場券時送的。上野動物園於1882年成立,是日本最歷史悠久的動物園,園裏除了一般常見的獅子老虎大象馬騮長頸鹿之外,仲有幾種獨特的南美動物。



上圖左是貌似果子狸的Japanese Badger日本獾;猛禽區的大鳥籠裏住了貓頭鷹和禿鷲,告示牌上有日文簡介,估計係話禿鷲是世界最大的猛禽,一般生活於海拔3000米以上的高山,成年禿鷲翼展可達3米,重9-15公斤。



睇完猛禽再睇猛獸,老虎比較醒神,正在四圍巡邏;反觀獅子昨夜一定走了去浦吧,只懂在籠裏打瞌睡;右上的馬騮外貌與城門水塘的遠親似乎有點不同。



上圖喱隻Southern Tamandua是生活於中南美洲雨林沼澤區和紅樹林區的小食蟻獸,主要以螞蟻和白蟻為食,偶爾也吃蜜蜂和水果,前肢強壯長有利爪,用來搗毀蟻丘覓食。



再看其他禽鳥館,除了有各種色彩繽紛的小鳥外,還有比較大隻的丹頂鶴和鸛,上圖喱對鶴叫做Wattled Crane,主要棲息於非洲撒哈拉沙漠以南地區。



再去睇D極地生物,上圖左的北極熊又係撞正開餐時間,見佢只係掛住食都唔出來打招呼;右下是海豹,不過喱D唔識表演;右上的雪鴞比較特別,有點似貓頭鷹但全身羽毛雪白,生活於北極一帶。



南美洲區喱三隻都幾有趣,分別是羊駝、南美貘和水豚,可惜羊駝和水豚都返了入屋訓覺,只看到南美貘在散步。南美貘比豬稍大,鼻子圓長可自由伸縮,擅游泳,是南美洲現存體形最大的陸生哺乳類動物;此外還有環尾狐猴和企鵝。



除了睇動物外,園裏的不忍池旁還有棵猴麵包樹,這種獨特的落葉喬木原生地在非洲大陸、馬達加斯加、中東和澳洲,樹高達5至30米,樹齡一般可逾500年。另外,上圖右的寬永寺五重塔則是東照宮以外另一公園範圍內的古蹟。



最後動物園臨閂門前再去睇埋袋鼠、大食蟻獸和土豚,生活於撒哈拉沙漠以南的土豚又稱蟻熊或土豬,是一種「孑遺生物」,牠們的近親物種都已滅絕,是名副其實的活化石生物;比較特別的還有上圖左的「鞋面鳥」,近看牠的鳥面真有點似隻鞋,其正式名稱叫做鯨頭鸛,成年鳥身高逾1.5米,主要棲息於東非的沼澤地。



其餘好多動物都已經返晒屋企食飯和訓覺,最後連管理員都出動趕人走,通知遊客動物園即將關門,所以基爾都要走了。



由弁天門出口離開上野動物園,途中路過了東照宮,夜晚亮燈之後原來都幾靚,可惜因為要趕住搭地鐵返新宿與友人會合,所以無乜時間仔細去行,加上又再落起雨來,都係拿拿林返去食飯算了。



返到新宿見友人竟然係兩手空空,原來一早已經拎晒戰利品返酒店先再出來,咁醒?!不過喱晚雨真係越落越大,行左一陣鞋褲越來越濕都係咪再東揀西揀,就上去喱間大戶屋開餐啦!



香港食肆或快餐店的餐牌,好多時D菜式影出黎就鬼火咁靚好吸引搞到人食指大動,送到上台就完全貨不對辦賣相差一大截,幾乎認唔出咁滯!



不過在日本食野就好少會「出事」,實物通常同menu見到的照片落差不會太大。最後叫左喱幾味:野菜海老雜穀土鍋定食(¥840)、燒魚雜穀土鍋定食(¥820)。



跟住仲有凍豆腐沙律和北海道帆立貝定食,最後埋單都係¥5320,算幾抵而且味道唔差。食完好彩已經落完雨,可以慢慢散步返酒店沖涼訓覺,舒舒服服地度過這次在日本的最後一個晚上。