2012年9月29日 星期六

風從寶島來@水里

波上寒煙,總是在這樣的美景裏
盡量壓縮指縫,織就一張沒有漏洞的網
捉住起光陰,捉住流水,也捉住噙煙的漣漪



由集集搭多一個火車站就來到水里,果然係站如其名,月台上竟然有個水長流的大水桶作裝飾。除此以外水里站的格局與集集一樣,也是充滿小鎮風情。



由月台要行落路軌,才能走到對面的火車站大樓出口。由於集集線的火車班次甚疏,即使在路軌上隨意拍照也不會有人理。



出左火車站,眼前就是全個水里最繁忙的大街——民生路。由於差唔多已到食晏時間,又見喱條街都有唔少食肆選擇,於是決定在這裏食埋晏先走。



上圖右是火車站外的長階梯,很有氣勢!由民生路一直往前走,無幾耐就見到貫穿水里鎮的水里溪,左下圖的告示牌係叫人保育條河,唔好在這裏釣魚云云……



水里溪的水流其實都幾急,上游連接日月潭和明潭水庫,溪中亂石頗多,可能係雨季排洪時由上游沖落黎的。上圖右是泊在水里溪橋上賣菠蘿的三輪車攤檔。



行到累了,索性去食個晏又可竭竭腳,就在民生路旁揀了這間麵店幫襯。左上圖是台灣著名冷盤小吃「黑白切」(雞蛋拼皮蛋),黑白切取自台語讀音,意指隨意地切菜,是種不講究刀工與食材的一種小菜;左下是餃子麵。醫完肚之後,又要拿拿林出發往下一站了。

2012年9月26日 星期三

風從寶島來@集集

你用思念添幾縷白髮
我讓歲月雕刻我憔悴的手
然後在街角我們擦身而過
漠然地不再相識
啊!親愛的朋友
請別錯怪那韶光改人容顏
我們自己才是那個化妝師



在台中叉足一晚電之後,第二朝大清早就馬上出發去玩「集集線」了。之前聽聞過集集線的火車特別colourful,果然係聞名不如一見,果然係好有度假feel,不過車廂裏就同普遍捷運差不多。上圖右為途經的員林站。



搭火車到底有咩好玩?不說不知原來集集線是台鐵最長的鐵路支線,也是南投縣唯一仍在營運的鐵路線,至今已經有成90年歷史,喱D老餅野又點少得基爾果份!上圖右是另一途經的源泉站,月台上竟長出一棵矮樹,路人要彎身才能走過,畀著香港就一早畀人斬走吧;最後大約花了個多小時就來到集集站了。



上圖右是集集站候車室的木閘,甚具日本味道;至於月台就採用較簡樸的設計,與四周的小鎮風情非常配合。由於火車站與旁邊的集集鐵路文物博覽館相連,路軌旁就泊了這架工程維修車火車拖頭,相信是展品之一,好似之前去大埔鐵路博物館也見過類似的古董火車拖頭。



見博物館果邊好似幾多野睇,於是先行過去睇下,眼前立即就被這架高大威猛的黑色蒸氣火車頭吸引,據介紹原來是20年代集集線剛建成時的產物。聽聞集集線每年都有定期搞一次懷舊蒸氣火車復駛日,唔知喱架老古董會唔會復出開行呢?



古老的集集火車站確有幾分「和風」味道,它與集集線同是始建於1919年(日治大正八年),1922年通車時,這個古老車站已聳立於此。1999年台灣九二一大地震時,集集站曾遭損毀,但其後很快就修復原貌!



鐵路文物館裏有很多來自世界各地的遊客,就連台灣本土遊客也有不少,在這裏除了有火車文物睇之外,還有一架坦克車,可能是替該鎮內的軍史博物館做宣傳吧;此外當然不能少了逛紀念品店,上圖右是其中一檔售賣貓仔book stand!左上則是車站對面的「信不信由你博物館」,唔記得去邊度都見過類似的一間,感覺上「把鬼」居多所以無入去。



睇完博物館之後,都係時候正式出去逛下集集,感覺台式的小鎮風情了。集集其實說大不大,說小也不算小,租單車遊一圈也是不錯之選。



無耐就蕩到黎喱條集集古街,叫得做古街當然年紀都唔細啦!歷史可追溯到乾隆四十八年(1783),當時第一批華人遷來集集鎮就住在這裏。



不過由於太早黎到,大部份店舖都未開,所以都係window shopping行陣就算。左上圖是一間生果舖,西瓜超大個;泡冰挫冰檔就未開;右圖是一間紀念品店外的公仔,主要係呼籲人捐錢幫助貧困家庭的。



圖右是古街裏另一間老店「集集書局」,唔知點解覺得幾有《戀戀風塵》味道!行行下見無乜野好再行,就出返去行埋初中街假日廣場,左上喱架咖啡列車純屬係布景,唔識郁的!左下是泊在街邊賣豆腐花的三輪車,但又係仲未開檔!



上圖右是流經集集鎮的清水溪,如果有時間落去澗下水都唔錯!左上是假日廣場裏另一座仿古木塔樓,有小小似大陸果D「三國城」,但就無人即場表演,可能晚上才有吧!左下是一個台灣好興的木偶戲戲台,但當然又係夜晚先有show睇啦!



再行無耐又見到喱間龍泉宮,也是集集另一古蹟,相傳建於300多年前的清朝康熙年代。台灣的廟一般都裝飾的很金碧輝煌,有皇宮的氣派。



臨走前再去埋「軍史公園」,如果鍾意睇飛機大炮坦克車的遊人都應該來睇下,公園裏面擺左唔少陳年退役軍備,大部份係昔日美軍送贈的大禮,例如左上的坦克和左下的驅逐艦雙管砲。



上圖喱架F-104G星式戰鬥機都好型,唔好見佢殘殘舊舊咁,其實佢係一架超音速戰機,最高飛行速度可達到音速的2.2倍,是50-60年代最先進的戰機。



左上是另一架C-119運輸機,它有個花名叫做「老母雞」,由美國FAIRCHILD航空公司製造,最高續航時間長達13小時,1959年由美軍送贈,主要擔任補給、空役、風災、救援、搜救、降人造雨等任務,至1997年才正式退役。



還以為愛護動物協會才有「認養服務」,原來軍史公園喱度都有得「認養環境」,唔知「認養」一架戰機要幾錢呢!



見時間都差不多,遂沿路返出火車站,途中見到的這條火車軌,其實係昔日的觀光小火車鐵路,不過已停駛多時了。返到火車站再check下時間表,又係時候向下一站進發!

2012年9月25日 星期二

青藏牛肉麵@北角

星期六若要返工,通常都不帶飯,又可以跟同事出去試新野,喱日就揀左喱間青藏牛肉麵。



喱間麵店位於一條橫街小巷裏,如果不是在街口豎立了一個易拉架廣告牌,基本上都唔易搵到!



基爾唔太食牛肉點解都來幫襯?因為其實佢除左牛之外,仲有好多其他小食,例如上圖的香酥腐皮卷和麻香涼玉子豆腐,都是不錯之選!



另外,上圖左喱串孜然羊肉串都幾唔錯,肉汁豐富,少少羶但接受到!如果怕羶也可揀孜然牛肉串。主菜係碗麵,基爾點的這碗青藏羊肉拉麵,肉質與羊肉串又有點分別,拉麵之外仲有刀削麵選擇。唯一係冷氣不太夠,食到大汗疊細汗,可留待秋涼後再來encore。
 
青藏牛肉麵 Noodles
北角錦屏街27A號地舖

俄羅斯謎旅程三十

遊客來到香港通常都會上太平山,去到莫斯科又可以上咩山睇風景呢?


去到外地旅行,好多時都要「登高」,其中一種選擇是上電視塔或什麼高樓大廈之類,通常要畀入場費,另一種唔駛畀錢的就是上山頂。上圖是上山途中又經過了莫斯科河,這一段河道兩岸較少建築物,感覺比較天然。



只要打開地圖睇睇就知,莫斯科其實係坐落在一片大平原上,除了一條彎彎曲曲的莫斯科河之外,基本上是「無險可守」,所以當拿破崙和希特拉殺到來時,俄人只有「堅壁清野」收拾家當有咁遠走咁遠逃難一個方法而已!全市中地勢比較高的就只有位於西南方的列寧山(Lenin Hills),它又叫「麻雀山」,海拔高度僅220米,比552米的太平山還要矮一半。



山上有個很大的觀景台,往下望就見到1980年莫斯科奧運主場館「盧日尼基體育場」。好彩莫斯科市內的高樓大廈不多,所以即使列寧山不算高,仍可盡覽莫斯科的全景。



至於觀景台一帶其實是個小市集,有各式攤檔售賣遊客紀念品,夏天時也有不少莫斯科人到山上來乘涼和看風景。上圖右那座斜形的鐵梯,是冬季時才開放的滑雪跳台!



列寧山上仲有一座重點建築物,就是莫斯科大學,它始建於1949年,至1953年落成,採用典型的斯大林式建築風格,是當時歐洲最高的建築物,中心塔高240米、共36層。目前莫斯科市內還有7座斯大林式大廈,當中以莫斯科大學規模最大。



原本想行過去莫斯科大學那邊睇睇,不過後來發現實在太遠了,烈日當空下還是留在觀景台這邊為妙。在觀景台hea蕩之際,突然發現了一架剷泥車出現,原來係用黎收集垃圾的,乜原來莫斯科係唔興用垃圾車架咩?都係唔好理佢,因為這時行到有D「小急」,可能因為剛才食晏時飲水太多的關係,拿拿林去搵下廁所先。點知!基爾搵勻全個列寧山就只有一間公廁,仲要係個男廁竟然上了鎖,可能是維修……忍到落山先去又驚急到爆,點好呢?無理由去女廁卦……人急智生下,發現唔少男士都走左去公廁後面的樹林。唉!雖然大個仔之後都未試過,不過急得滯都無其他方法,一於以9秒9極速入去解決算了,希望唔會畀人偷影啦!

2012年9月20日 星期四

風從寶島來@一中街

在這池塘邊知了,在聲聲叫著夏天
在這鞦韆上
只有蝴蝶停在上面的季節
在這悶熱的時光裏
對我的旅行生涯來說又翻開了新的壹頁



由日月潭搭車返到台中時已經過了傍晚時份,不過由於不算太餓(大淶閣那個high tea尚未落格),所以還是先去預定了的博奇飯店check-in,放下行李才再出動。與初抵台中那晚住的巧合飯店比較,博奇的房間感覺上較寬敞,而且D野無咁甩皮甩骨,最特別是「房中有房」的設計,兩房基本上是「無縫相連」,非常過癮!雖然距離台中火車站比巧合稍遠,但也是步程可達的距離。在房裏玩左一陣之後,就起程出去行夜市了。



由於第一晚初來甫到又要掛住去買車飛,所以只在車站附近簡單逛了一圈(詳見之前的「台中篇」),特登留待這晚由日月潭返回台中才plan去夜市。本來諗住去逢甲,但可能朝早太早起身加上在日月潭行得幾金,感覺有點累,索性去較近的一中街夜市逛逛就算了,反正台灣個個夜市也大同小異,而且去一中街毋須搭車,只需徒步廿多分鐘就到。上圖是華燈初上的一中街夜市,也夠熱鬧吧!



夜市街邊檔來來去去賣的也是愛玉冰、苦瓜汁、蚵仔煎、胡椒餅之類,沒有意外驚喜,其他無謂野就更加係齋睇八卦下就算了。見行到咁上下,都係去食飯好過!最後見上圖喱間「好功夫飯廳」好似幾抵食,更重要係唔少本地人幫襯,應該無衰啦卦!上圖是餐廳的熊貓logo,唔知同功夫熊貓有無關,但店內就有唔少李小龍poster。



上圖為「白醬豬排意大利麵」(台灣人慣稱「白汁」為「白醬」),記憶中幾唔錯,連野飲約HKD $36,屬大瓜樂價錢。



仲叫了上圖喱個小食「炸彈花枝丸」(感覺上台灣食肆的菜式名稱總是怪怪的),HKD $14有6粒,食落其實是吉列花枝丸吧了!



仲有唔可以錯過上圖喱個「起司白醬嫩雞焗烤」(「起司」即「芝士」),記憶中味道也不錯,同樣不算貴,只需花HKD $35左右即有得食。左下是不太辣的「招牌香雞串咖喱飯」,叫得「招牌」感覺上一般都較「穩陣」,而且都係約HKD $30咋!食完飯見仲未係好夜,返酒店時途經台中公園,順腳行埋旁邊的Holiday Inn商場,其實都無乜特別野睇,反而中庭喱架老爺車吸引了基爾同佢影張沙龍。



回到酒店,又順便行去餐廳八下,又幾大幾靚喎!

2012年9月18日 星期二

俄羅斯謎旅程廿九

去民居式餐廳食個餐,真的可以畀你一份「莫斯科尋常百姓家」的感覺?


之前行國民經濟成就展覽館行左足足成3個幾鐘,腳又累肚又餓的情況下都係快快趣趣去歎返個美味午餐先得!行行下街又見到一張Elton John演唱會海報,之前已經見過George Michael的海報,睇黎都幾多巨星來莫斯科開騷喎!



入到餐廳發現喱間都幾有民居feel,不過幫襯的顧客不多,只見bar台旁有對依泣中的男女,基爾當然不會去打搞佢地,求其四圍影下D裝飾布置先,都幾有懷舊feel喎!



其中一面牆上掛了一幅郊外風景畫,好有田園色影,令餐廳內的空間感突然太增。另一邊仲擺放了一個真人大小的士兵木偶,由於像真度高加上燈光昏暗,遠睇真係有少少似真人呢!



薯仔忌廉湯同燒雞扒飯算是不過不失啦!反而店內的陳設更吸引基爾,所以一食完就去四周圍參觀兼影下相,其中一個窗台前就擺放了古董衣車和打字機。



另一邊牆又掛了沙皇時代的俄國鈔票,已有上百年歷史,唔知依家會炒到幾貴呢?行行下去到隔籬的偏廳,竟發現原來仲有個偌大的桌球室,真誇張!



桌球台旁邊仲擺放了一個大輪盤,唔通夜晚喱度有得開賭?!不過基爾對賭無乜興趣,反而另一邊的這部古董唱盤更吸引基爾,聽餐廳侍應講個唱盤保養得唔錯,仲work架喎!



這間半民居博物館式的餐廳確實幾多野睇,值得慶幸係這個時段剛好太不多顧客,所以基爾即使周圍去影相都唔怕騷擾到人,至少同木偶士兵影相都唔駛同人爭位啦!



在餐廳搞搞震一大輪之後,又係時候起錨了。沿街行返出去,途中見到喱座幾靚的東正教小教堂,不過見佢無開門,就無入去睇。可能由於喱一區係住宅區,所以都幾多餐廳食肆林立,右下角喱間仲有個小亭院,入面的牆上畫了幅好靚的大型風景畫。



搭車去下一站的途中又經過了莫斯科河,由橋上這個角度看克里姆林宮的紅色圍牆,又似乎有另一翻味道,記憶中「瞬間看地球」鏡頭下的莫斯科,就是從這裏拍的。



莫斯科河實在太闊,一個鏡頭又點影得晒,唯有補拍多張對岸的風景照吧!如果有時間,在河岸兩邊逛逛相信也很愜意。



又來到河岸的另一邊,這處是莫斯科河的一條小支流,也是克里姆林宮的護城河,河邊是個寧靜的公園仔,唔少莫斯斯人一家大小會來hea下,又或者釣魚。公園裏除了有可愛的鴨仔雕塑外,仲有一雙雙真鴛鴦棲息。



護城河對岸就是克里姆林宮的另一邊城牆,仲可以遠眺部份城裏的建築物,配合水中的倒映,真情可以做一幅puzzle啦!