2013年1月28日 星期一

歐豪年書畫@文化博物館

如果睇開喱個blog都知,基爾隔三、四個月左右就會去巡一次博物館,睇睇今次出巡又有咩特別野睇下!



第一站例牌又係先去文化博物館,今次去到原來正值舊換新的交替期,所以好多展廳都close左準備換新裝,其餘比較有睇頭的就只有喱個「歐豪年書畫展」。展廳正門左邊的山水畫最特別,用了走馬燈式設計,雲海很有動感。



不過入去之前先睇睇廳外幾座巨型工藝品。首先上面喱座由山西應縣送贈的木塔,手工就相當精巧,唔知要花幾多時間先砌得出呢?



再睇隔籬喱座黑龍江送的福桃花瓶,近看可見手工同樣精細……其實若講到整工藝品,中國人認第二相信無乜邊個敢認第一吧!



睇完之後火速入去睇返個書畫展先,掛在展廳天花板上喱幅書法作品最特別,就像由館裏飄出來的感覺,佈置相當新穎,突破一般書畫展比較沉悶呆板的設計。



另一樣抵讚的前衛東西,就係打電話聽導賞的新構思,其實一早就應該要咁啦,唔駛去租耳筒咁煩,每幅畫都有一個dial code,如果有興趣真係可以逐個去打。



如果連打電話都嫌煩,也可索性掃下個QR code,國粵英語聲音文字導賞一應俱備,非常先進。



講返個書畫展,主要是介紹嶺南畫派大師歐豪年的作品,分為山水、動物禽鳥和人物花卉3部份。睇國畫基爾比較愛看山水畫,大廳正門就有喱幅巨型的《黃山》,氣勢磅礡。



基爾其實對國畫的認識不多,不過簡單走一圈也感受到畫中大自然的動感和神韻,確實是計算精準的西方油畫所沒有的。



上面這幅《竹林七賢》是人物部份裏其中一幅代表作,很有點隱逸味道。



由於這天來參觀的遊人不多,只要不開閃光燈也可以任影唔嬲。除了有歐氏的真蹟外,仲有他的畫冊可以任揭任睇。



展廳外另一邊有喱個國畫大屏風,設計也很有中國味。



令人期待的仲有喱個法貝熱藝術展,不過當日去到時展廳還在佈置中,待2月再來就可以睇到。法貝熱是以製作俄羅斯彩蛋稱著,咩係俄羅斯彩蛋?當年基爾都買了一隻做紀念品,可以先睹為快。

2013年1月26日 星期六

荒村人在野:下@馬灣

在馬灣舊村行了一圈,再由舊碼頭海邊一路行返上山頂,咁辛苦撐上去到底有咩睇呢?!



由海傍望上山,見到有座圓塔形似天文台的新建築物聳立在小山崗上,之前來好似無乜留意有喱座野,原來那就是新開幕的「太陽館」。



太陽館其實是繼馬灣公園的挪亞方舟之後的另一新景點,不過去之前,還是先去旁邊的馬灣古蹟館看看,因為那邊好似無咁多人。其實基爾已經來過幾次了,就影幾張館內的相畀新blog友睇下吧!



馬灣原來在4000年前已有人居住,1997年前後由於是興建青馬大橋及發展馬灣,陸續在這裏出土了大量文物,並在昔日的馬灣公立芳園學校成立古蹟館,展出這批獲評選為「97年全國十大考古新發現」的珍寶。上圖是古蹟館的後園。



後園有咩睇呢?最主要係睇唐代和清代的古窯,上圖左兩張是比較完整的清代窯,有逾200年歷史;至於唐代窯﹙上圖右兩張﹚更有逾千多年歷史。



睇完古老野,再行返過隔籬睇新野。太陽館的前門入口幾colourful幾靚,同挪亞方舟那邊一樣都幾吸引小朋友入去參觀。睇門口宣傳poster話有專車由旺角新世紀開出直達這裏,都算方便。



不過剩門票都要成舊水,基爾喱類平民當然就無謂花費掉僅有的開飯錢了吧!只行下門口那條小山路就算了,山路上都擺了一些講解天文地理知識的展台畀小朋友玩。



比較特別係太陽館山腳還開了間銀河餐廳,不過去到當日好似剛剛下午落場咁無做生意,留待下次來時再去扮下食探出巡吧!

2013年1月24日 星期四

荒村人在野:上@馬灣

嚴格上說,今時今日馬灣也不再算是什麼郊野地方了吧!到底依家仲有幾野,咁就要畀少少耐性慢慢睇下喇!



間中會入去友人住的喱個小島hea陣或者燒烤,喱日紅字假又book到爐,點都要請日假期入去re-u聚一聚。



喱度個club house勝在夠大,有空間感之餘仲唔駛篤住叉咁燒,將野食就咁鋪晒落個爐度燒就ok,夠乾手淨腳﹙當然間中要去翻一翻以免燒?﹚。



主人家今次準備左好多野食,除了上圖右的菇菌和三文魚之外仲有和牛及幾種肉丸,同場還有圖左的芝士蛋糕,hea傾偈之餘又食得非常滿足,perfect的一餐!



尾聲仲有澳門薑餅人出場,非常過癮,唔知好唔好食架呢?!Anyway,閒坐到大約3點左右就要交返個爐畀club house,反正食得咁飽就出去閒蕩下幫助消化吧!



今次選擇行遠D又過去馬灣舊村逛逛,記得年多前來仲有D零星士多開門,賣下蝦醬茶果之類的。今次舊地重遊,就完全變成一個荒廢村落了。



兩三層高的村屋好多都變成空空洞洞的,連窗和門也被拆走了,望落更見荒涼。除了有人來影「28日後式」的廢墟之外,仲有人專程來畫素描,記下馬灣村最後的面貌。



仲有村民在牆上寫大字報抗議拆遷安排……香港始終是大財團地產商玩晒,小市民都不會有say,反對也是無效,舊東西都只會被視為發展的拌腳石。



唯一有機會保留的是這個舊碼頭,昔日有街渡由這裏去對面海的深井;依家馬灣至荃灣的航線執左笠,唔知又會唔會恢復深馬街渡呢?



永遠的青馬大橋靚景,影日落一流。將來拆晒舊村起返60幾層高的豪宅,又是成萬蚊呎的黃金地……右上的兩條魚是馬灣舊鄉公所的外牆,之前也有來影過相,若明年再來相信已經成為回憶了!

2013年1月18日 星期五

2Q12瀛遊東北@十和田湖

「巨大茂盛柳樹從石圍牆探出頭來,被風一吹就像一群無處可去的幽靈般無聲地搖曳著……座落在麻布陡坡上到頂的地方,可以看見一群輕盈的鳥正停在柳枝頂端。屋頂有一隻大貓正在陽光下瞇細了眼睛曬太陽,周圍通道狹窄,又彎彎曲曲,幾乎沒有車子經過……」



由新青森火車站搭JR Bus,差不多3個鐘終於來到十和田湖總站。在車站裏又要等酒店的接送專車,索性走入車站旁的便利店,拜托老闆幫手打電話去酒店,叫佢地駛車來接,點知原來都要等大半個鐘。咁多時間就出外面閒蕩一下吧!上圖是樹立在湖邊的景點介紹路牌,原來十和田湖是在1萬3000年前一次火山爆發後形成的鍋狀凹地,依家就成為火山湖,相信不會再爆發了吧!



喱個十和田湖畔休憩公園其實都幾大,仲可以欣賞到大片紅葉,基爾覺得齋紅葉不算最靚,如果紅色的楓葉混合埋黃色的銀杏和綠葉,感覺更鮮艷更靚,影相出黎色彩都繽紛D,有層次感多D!



公園湖邊其實仲有個遊覽船碼頭,由這裏可以搭船返出去子之口,全程也不過50分鐘,收費¥1000,不過由於天色唔好即使坐船出去都唔會有咩野睇,加上去到時已經過了4點鐘,遊船早已泊晒岸收晒檔,所以基爾都係行下岸邊睇下湖景算數了!



在湖邊閒蕩下,一時影下湖景一時又影下碼頭一時又影下紅葉,才發現影出來真係有點像上次去台灣時遊過的日月潭,同樣是平靜如鏡的寧靜湖面,不過喱度就凍好多了……行行下又差唔多行左成大半個鐘,返到車站已見到酒店專車來了,即時上車往酒店進發。



不用10分鐘就由巴士站來到位於十和田湖西邊的王子酒店,check-in後由於還未到食晚飯時間,先在房裏執拾一下明天用的火車票,以後幾天行程每晚這也成了「指定動作」。



約傍晚6:00就去酒店的餐廳食飯了,由於客房費用包了晚餐和翌日早餐(¥9800),所以兩餐都在酒店食(酒店附近無食肆,如要出外搵食就要坐酒店專車返出去巴士總站那邊)。這次來日本的第一餐究竟食乜呢?



原來是6道菜的西式晚餐,看menu才知這個「王子套餐」價值¥5000,折換港元都近500蚊,到底又抵唔抵食?先來的竟然頭盤﹕像打成蓉的圓形物體,menu是全日文唔識睇,只食得出上面那一片像帶子;等了10分鐘才來餐湯(左上圖),是很creamy很甜的粟米濃湯,配很脆的法國小餐包,還叫了waiter encore多一個。



主菜又有咩食呢?忍唔住要用網上翻譯軟件check下,原來係澳洲烤牛肉、十和田湖帆立貝及一條魚仔,比較特別係碟邊仲有一粒粒貌似迷你薯仔的物體,聽說是當地土產。之後還有沙律、幾件甜品蛋糕和餐茶,吃了個幾鐘終於KO晒6道菜!



雖然晚餐唔算食得太飽,但都要有些「餘興節目」幫助消化,就到餐廳外的花園踢波吧!由於花園面向一望無際的十和田湖景,入夜後氣溫跌至10度以下,從湖面上颳來的冷風更勁,踢一陣波當暖下身也不錯。不過湖面就無乜夜色可賞,因為只能見到漆黑一片,可說是零光污染。



踢完波之後再在酒店行一圈,見無咩特別野睇,就準備去浸溫泉了。酒店裏有個景觀很靚的露天溫泉,其實就在剛才踢波那個花園旁邊,所以在浸溫泉時同樣可看到十和田湖的靚景。不過在日本浸溫泉例牌要剝光豬玉帛相見,無可能帶相機入去影,就拎D網上圖片畀大家睇下個溫泉view吧!

2013年1月14日 星期一

賞楓人在野:下@元荃古道

上回講到走過了大欖涌水塘大水閘之後,這次元荃古道之行就來到尾段的「重頭戲」……



咩重頭戲咁巴閉?!咪就係睇大棠著名的紅葉靚景囉!每年12月底至1月間,都係大棠人氣最盛的季節,每逢周末幾乎仲旺過旺角,不過基爾喱日去到可能因為落雨關係,竟是人跡杳然…



基爾當然係超開心,唔駛同人逼之餘也可以任影唔嬲,只後悔因為落雨而無帶相機來影,只能用手機求其影幾張,效果都好似麻麻地。



這條大欖林道大棠段是睇紅葉的勝地,天氣好時會有超多龍友帶晒重裝備長短鏡來影紅葉。幸好這時雲霧漸散,雨勢仲大為減弱了,間中仲有點黃昏斜陽夕照灑落在紅葉上,總算沒有掃了基爾專程來賞葉的雅興。



很佩服友人還帶了價值連城的古董相機出來,說是給基爾開開眼界,實在感激萬分!要知道帶住這種大機行山絕對不是講玩的,膊頭無返咁上下力都無本事拎足全程。



最後沿大棠自然教育徑落山,伴隨黃昏夕陽來到元荃古道的終點南坑排,睇睇錶原來已經5點幾啦,足足行左成5個幾鐘咁勁,不過奇就奇在基爾落山時仲見有人咁晏先上山,唔通想在山中露宿一宵?!



元荃古道全程足足有12.5公里,咁即係有幾遠呢?上網check返大約相當於由尖沙嘴太空館沿彌敦道走到太子的旺角警署來回3.5次咁遠,仲未計上落山的斜度……既然行得咁辛苦,點都要食返餐慰勞宴先散水吧!



來到元朗咁遠不如就去試下大榮華啦!基爾都未黎幫襯過,聽聞有唔少出面食唔到的懷舊菜,上圖左喱個迷你九大簋乜都有好似幾吸引,$650算幾抵食,不過由於人太少食唔晒,最後決定散叫算喇!圖右是叫了的兩味,分別係圍頭五味雞和麵醬乾燒茄子四季豆。



剩係兩味又好似少得滯,就叫多碟盆菜豬肉和金沙脆皮石班球,4味其實都ok,沾上咸蛋黃再炸的石班球最香口;盆菜豬肉基爾只食了淨瘦的一舊,味道也不錯;四季豆就覺得還是用欖菜炒最好味。



雖然基爾忌食太肥膩的東西,不過一場來到大榮華都要試下佢個豬油撈飯吧!這一小砵仔飯盛惠$11,隨飯附上一枝燒豬油和頭抽,落幾多就悉隨尊便了。結果基爾share左半砵仔飯,只敢落3滴豬油,拌隨少少豉油撈飯試下味道就算。可能由於豬油份量太少,味道同普遍豉油撈飯好似無咩分別。



奶皇馬拉糕又係另一樣唔可以唔試的甜品,剛落order時侍應已問是否要叫這味馬拉糕,因為大部份食客都會叫。侍應仲好醒目地見上晒所有菜,最後才將熱辣辣出爐的馬拉糕上台,食落真係有好濃郁的奶皇味,而且夠晒鬆軟,同外面茶樓那些有很大分別,唔怪得咁出名啦!Last仲有糖水送添,實在是perfect的一餐。



最後來一張大合照,成餐飯人均消費都係$100左右,以今時今日出街食飯價格而言﹙快餐店依家一個set dinner都要成六七十蚊閒閒地﹚,基爾就覺得幾抵了!