2015年8月28日 星期五

2014古都瀟瀟@清流紅葉

京都的二条城咁大,仲有好多地方未行完。上回講到基爾由本丸御殿穿過西橋和內堀(遇到兩個韓妹還幫她們影相),返出去外圍的清流園繼續走走……



清流園比二之丸庭園還要大,除了有和樂庵、香雲亭等幾座小建築外,也種了不少櫻花樹(光禿禿的櫻花樹雖然不及盛放時的絢麗,但也別具冬日的蕭瑟味道)、紅葉樹和其他林木,儼如一個小樹林。



行得累了也可以在清流園外的小食亭稍休。日本人當然不會容許在古城內開設麥記或星巴克,雅緻的休憩小食亭與四周的古城非常融為一體,完全唔會有格格不入的感覺。



抖完後再行一陣清流園,除了賞花觀樹看池塘之外,這個花園還以奇石出名,例如上圖的「加茂七石」就是著名的枯山水造景。據統計清流園裏有奇石千多顆,大多都是由日本各地蒐集回來。



可能由於賞紅葉的旺季已過,園裏的遊人不多,樹上的紅葉黃葉也所剩無幾,如果想來二条城賞紅葉的話,相信11月中至12月初會是最佳時間。



既然冇紅葉影,咁唯有影下清流園旁邊的內堀靚景吧!二条城的內堀其實都好寬闊,古時如果有外敵入侵,軍隊要越過這條內護城河進攻本丸,相信都唔係一件輕易的事,分分鐘可以穩守一頭半個月都未定。



行行下竟然又畀基爾搵到幾棵遲來的紅葉喎,係咪算有運行呢(好心有好報,以後要幫人影多D相),仲唔飛身過去影返夠本!雖然唔算多只有碩果僅存的幾棵小樹,不過都好過無啦,影出來也不失禮吧!



之前提到清流園入面有幾間清幽的「林中小屋」,包括上圖右這間細細的香雲亭,不過唔知點解要預約先可以入去參觀,唔知入面係咪收藏D乜野珍寶咁巴閉呢?



走出清流園後,基爾幾乎已繞了整個二条城一圈,終於又返回二之丸。由於之前skip了二之丸御殿入面未參觀,畀得大拿拿¥600入場當然唔好浪費。在二之丸御殿前還有段小插曲,話說基爾在影著名的唐門時,由於下午這裏正好背光了好難影得靚,正苦惱之際,幸得上圖左那位光頭澳洲哥哥指教,找到另一最佳拍攝位置,才成功影到這座金碧輝煌的唐門。



話明係幕府征夷大將軍的府邸,採唐破風式建築設計的唐門每處都金光閃閃,華麗程度絕不會比之前看過東西本願寺的唐門遜色,而且比起剛才參觀過的「天皇故宮」桂宮明顯贏幾個馬位。



據聞昔日幕府時代,二条城比隔籬街的天皇御苑更似真正的皇宮,二条城的御殿和唐門上都有象徵德川幕府家族的三葉葵徽號,擺放的位置比象徵天皇的菊花徽號還要高;後來明治天皇重掌軍政大權,第一時間就將三葉葵擺返在菊花徽號之下……



有相為證,上圖的二之丸御殿大門係咪比桂宮宏偉得多,總面積逾3300平方呎(800多張榻榻米大)的二之丸御殿是名副其實的超級豪宅。整幢御殿由遠侍廳、式台廳、大廳、蘇鐵廳、黑書院及白書院共6棟木建築連接而成,由東南伸延至西北呈梯次斜形,是日本現存最具代表性的桃山風格武家書院式建築,進入御殿門口要先在貯物櫃寄存波鞋,因為殿內全是以300多年歷史的木地板鋪砌,所有遊客都要赤腳走在冷冰冰的木地板上。可惜殿內嚴禁攝影,想一睹殿裏著名的古代將軍大名狩獵壁畫,就要親身去看看了。

2015年8月18日 星期二

2014古都瀟瀟@二条古城

離開西本願寺後出返去堀川通見有巴士站,之前睇過搭9號可以去到二条城,唔駛諗就去參觀下喱座聞名已久的古城。



車程雖然只有20分鐘左右但車費均一價¥230。落車站離遠已見到聳立在二条城外堀護城河旁的東南隅櫓(建於1625年),一定唔驚搵唔到。「隅櫓」是指日本古城常見的城郭哨站建築。



東大手門(建於1662年)本來是二条城主要出入口,基爾到訪時剛好搭晒棚架正在維修(古蹟經常都大修葺),並大大個箭嘴寫住改用另一邊的北大手門入場。由於古城本身都相當大,由東門行去北門足足要行成十幾分鐘,幸好最終都搵到個臨時售票處,仲唔拿拿林奉獻¥600買飛入場!



上圖是二之丸御殿外的御馬道,整條大馬路鋪滿碎石方便馬車駛過,可惜喱日唔見有皇室馬車出入。基爾留意到碎石路上有塊「電」字石碑,莫非下面埋藏了電線?左邊一整列的建築感覺幾新淨,主要是紀念建城400年(2003年)的收藏館、売店、洗手間和辦事處之類的近代加建設施。



睇古蹟之餘,少不免要上一陣歷史課吧!二条城與清水寺、金閣寺等古蹟於1994年一齊獲列入世界文化遺產京都古城區,它最早的歷史可追溯至16世紀中業室町幕府足利將軍家族的居城。上圖是走進玄關後見到二条城最具歷史價值的二之丸御殿。



現存的二条城建築主要是1603年初建後保存至今。德川家康於關原之戰後掃平群雄結束日本戰國時代,取得全國軍政大權的德川選擇留駐根據地江戶城(即今東京,又稱江戶幕府),而非天皇所在的京都,二条城成為德川家族出巡京都時居住的將軍府,全名「元離宮二条城」。上圖是二之丸庭園的櫻花樹,這裏是京都首屈一指的賞櫻勝地,4月一定人山人海。



基爾先在二之丸御殿外圍遊逛,容後才入內參觀。這座御殿之所以咁有歷史價值,除了是德川幕府離宮之外,1867年著名的「大政奉還」儀式也在殿內舉行,當年因鎖國政策而江河日下的德川幕府第十五任將軍慶喜,將全國軍政大權重新移歸明治天皇,被視為揭開日本近代史最重要一頁。



二之丸庭園是傳統的日式花園設計,「骨子」得來又似一幅日本山水畫,一樹一石一橋一池都有精心佈局,是典型的日式人工美。上圖樹立在池塘邊的幾支野係咩呢?原來係幾棵有幾百年歷史的蘇鐵樹,由於蘇鐵屬南方熱帶樹種,冬季京都會落雪,必須以稻桿麥桿一圈圈包起來保暖,是二条城內必影的名物(想睇蘇鐵怎樣「穿衣」可click入二条城網頁)。



穿過二之丸庭園後,就來到上圖左位於東橋旁的本丸櫓門(建於1625年)。整個二条城面積逾27公頃(香港的維園約19公頃),除了外圍有外堀(外護城河),包圍本丸御殿還築有內堀(內護城河),可說是城中有城,防禦力比天皇住的皇宮還要森嚴。



現存的本丸御殿外觀有點古舊,規模也不大。原本的本丸建築物早在1750年雷擊大火及1788年京都大火後已燒毀;直至明治天皇掌權後,於1893年將京都皇室御苑裏的桂宮整幢搬遷過來成為今天二条城的本丸御殿,當中也可見證了幕府時代將軍的二之丸比天皇的皇宮還要宏偉得多。上圖左的梯級是舊天守閣的遺址,現時僅存石砌基座。



天守閣的石砌基座遺址相當斜,設有扶手欄杆方便遊人登上觀景。二条城原本與大阪城、松本城、名古屋城等日本名城一樣都設有宏偉的天守閣,不少古畫中可見二条城天守閣樓高達5層,惜焚毀於1750年的大火,後來曾經一度重建;及後明治天皇為了張顯中央皇權管治,遂拆卸全國多座古城(二戰後僅剩12座天守閣),當中二条城天守閣自然不能幸免。



從天守閣基座遺址上俯覽下面的本丸御殿「桂宮」及庭園,綠樹林蔭的雅緻佈局配襯古老的皇宮又別有一種講求精巧的東瀛風情。



可能大清早京都落過一場初雪,基爾發現本丸庭園裏的草地上仍殘留一點點積雪,相信大雪過後二条城又會有另一番美態。

2015年8月12日 星期三

荔園復刻版@中環

夏日炎炎日日都30幾度勁濕熱,真係冇咩特別事都唔想出城,不過喱日破例有個特別任務,就係陪基爾媽去拎visa……



早排有颱風吹襲台灣,外圍環流令香港連日都36-37度,熱風吹來恍如置身火海。喱日出到中環甫出地鐵站已經陣陣熱風昏昏吹,一路斜上山走10分鐘已化水。大半個鐘搞掂後,因為唔想再曝曬落山,一定要慎選樹蔭小徑走,見路旁就是林蔭清幽鳥語處處的St.John's Cathedral,唔駛考慮一於轉入去行一陣降溫。



St.John's Cathedral其實都入過去幾次參觀,早年剛有數碼相機時也來影過相兼寫過blog,教堂裏雖然沒有冷氣,但單靠天花的吊扇已經令人很有清涼感,可能教堂裏特別有種令人心靈平靜舒泰的感覺,果然係「心靜自然涼」吧!Cathedral對面就是French Mission Building,聽聞終審法院幾年後會搬返遮打花園那邊,這座古老的傳道院希望可以活化做博物館之類,到時一定要來參觀下。



Cathedral出面其實仲有個細細花園仔,喱度D古樹就比堅道那邊幸福得多,除了有足夠生長空間之外,仲唔怕會立亂畀人斬。其實如果唔係因為天氣實在熱到high high,都可以在這小花園裏蹓蹥多一陣,感受一下沙漠鬧市中的小綠洲風情……



一路沿樹蔭山坡往下走,原來有條冷氣行人天橋連接渣打總行,唔駛考慮就行喱度。中環咁多西裝人,炎炎夏日要盡量利用喱類冷氣天橋商場過商場,完全唔駛落路面就最正,同外面的火燄山簡直係兩個世界。結果基爾沿天橋穿過Prince Building(第一次去佢個商場廁所,幾靚),再穿過Mandarin,一直出到去碼頭行人天橋,遙遙已望到座巨型摩天輪,不過正午時份好似無乜人去玩。



咁神心行咁遠,咪就係想順道去睇一睇復刻版荔園,搵返D兒時集體回憶,門面的城堡都有少少神緒咁啦!比較搞笑係好多後生仔女抱住去Ocean Park或Disneyland的心情去喱個復刻荔園,結果失望而回兼鬧爆,其實係完全錯晒……簡單一句這只是一座「懷舊遊樂場博物館」,純粹畀人緬懷下架咋!唔好太認真咁諗住去玩咩大型刺激喪嗌機動遊戲和鬼屋,如果你認真咪輸囉!



一入門口已經見到翻生機動大象Tino,如果60-80's去過荔園一定識Tino,就好似去OP一定識海威小姐和去DL一定識米老鼠一樣!另外荔園裏若要選最iconic玩意,基爾諗上圖喱3樣一定位列三甲:旋轉木馬、噹噹船同埋掟階磚送香口膠。



另一邊仲有個類似大生日蛋糕的雕塑,行近睇原來係一排排小露寶砌出來的(喱個時候好多blog友一定又會短暫性失憶咁問:咦咩來架D紅卜卜機械人咁得意?)Anyway,原來荔園大大話話都有成66年咁耐歷史,當然係要計埋已經執笠果十幾年啦!



跟住不能不提仲有喱座咖啡杯機動遊戲,今時今日喱套復刻版咖啡杯靚過以前好多,仲好有西洋味(以前舊荔園果套記憶中係經典茶餐廳特厚果隻咖啡杯造型)。不過唔知點解,杯面和茶壺上面都大大隻字印了著名上市茶記舖頭個名,唔知係咪收了廣告費呢?如果以前荔園識咁樣搵錢,應該唔會咁快執笠吧!



好了終於行到來最具爭議的復刻鬼屋「魔靈小學」,可能細個時基爾媽驚基爾會嚇親,所以從來都無帶過基爾入去舊荔園的鬼屋,記憶中10歲打後亦都再無去過荔園玩直到佢執笠,所以童年陰影就只有鬼屋門口果隻青面長舌女鬼以及傳出來的遊客哇鬼叫聲。依家新荔園鬼屋只係由一個簡陋貨櫃改建而成,千其咪期望會有哈嘮喂級數的驚嚇搞笑指數,評語都係果句:如果你認真咪輸囉!



戶外攤位實在太過無遮無掩,沙漠式烈日當空實在唔講得笑,雖然部份有噴灑降溫霧氣的裝置,但都係形同虛設無乜作用,快快趣去D有瓦遮頭地方抖抖以免中暑。如果唔想排隊玩遊戲都可以揀中午來,因為跟本無乜人,但先決條件係唔怕熱和中暑。上圖右的黑白老照片就係舊荔園的城堡門口,比依家果個吹氣城堡型好多。



由幾個大貨櫃組裝而成的紀念展覽館都好值得一睇,最重要係有冷氣開放,入去之後真係唔捨得咁快走。到底入面有乜睇呢?主要係60-80''s年代舊荔園的老照片,同埋D歷史簡介之類。上圖右仲有隻舊旋轉木馬機拆下來留念的彩色木馬。



睇睇D舊入場券先,原來以前入場費只係$1-$5咋喎!咁平真係好抵玩,以前基爾媽做乜唔帶多D基爾去玩下呢?以前去遊樂場玩真係件大事,幾年先會去一次唔會成日有得去!



展覽館裏的展品都是以老照片為主,唔知係咩人捐出來呢?如果唔識Tino係咩,都可以在老照片中找到。以前香港無乜大型動物園(以前深圳珠海都無動物園),唯一只有在荔園才可看到大象喱類大型動物,Tino會伸長鼻子問遊人拎香蕉。



最特別就係陳慧嫻當年果隻《變變變》的唱片封面,原來就係在荔園的旋轉木馬機拍攝的,基爾細細個時都有在這座旋轉木馬機留影,有空要上網睇返個MV,唔知會唔會仲有其他舊荔園的場景片段呢?



恐龍屋又真係幾盞鬼,不過唔知係咪喱日實在太少遊客,所以好似都冇開門靜蠅蠅咁,無謂花錢入去都係門口睇下算數。結果全程只係匆匆行了大半個鐘,已經熱到唔想再行拿拿聲走人……返屋企順手摷返D新舊對照出來懷緬下,記憶中舊荔園個旋轉木馬靚好多又夠grand,至於坐石獅子果張唔知係咪隔籬宋城影架呢?



速遊完復刻版荔園,近近地就搭天星過尖沙嘴。真係好耐無搭船過海,覺得維港窄了很多,船程只係10分鐘左右。早前聽聞有人提議建造行人海底隧道+shopping mall,基爾覺得都work,希望將來可以試下踩單車過海。



在尖沙嘴碼頭上岸後,順腳又過去Ocean Terminal行多一陣,喱期剛好係Feuerman的游泳主題雕塑作品,大熱天時看到這個仿真度極高的水著游池,係咪特別令人有種不一樣的清涼感覺?!

2015年8月8日 星期六

珍郵庫@中外民間傳說

外國出果D卡通兒童郵票一般都好靚好有特色,但香港出果D就通常效果麻麻唔太出色,不過今次喱套「中外民間傳說」又令人有點驚喜喎!唔駛考慮即扑槌買。



之前出過幾套兒童郵票不是太簡單幼稚就是太概念化完全唔吸引,索性慳返唔買。不過今次喱套共6款又做得幾精巧細緻喎,而且又夠colourful!相信大人細路都會鍾意。



話明係民間傳說,應該是由細聽到大的童話故事吧,但奇就奇在又唔完全係喎!基爾只係比較熟悉愚公移山($1.7)、龜兔賽跑($2.2)和三隻小豬($3.7)而已!其中三隻小豬一齊匿在老三間屋石屋裏避野狼那張最可愛和搞笑;至於愚公移山就最有中國味!



其餘三張的童話故事基爾就無乜印象了:小火車做到了($2.9)係咪即係Thomas火車頭? 野天鵝($3.1)係咪講天鵝湖個故仔?最搲頭係管道的故事The Parable of the Pipeline($5),基爾孤陋寡聞真係完全冇聽過,係咪外國好hit?很期待下次唔知會唔會出小紅帽、人魚公主、仙履奇緣又或者鑿壁偷光、囊螢夜讀之類的郵票呢!

兒童郵票︰中外民間傳說
發行日期:2015年7月16日

2015年8月2日 星期日

泰特色泰國餐廳@荃灣

之前睇blog友寫過荃灣有條食街好多野食,喱日約了久未聚舊的中學同學,正苦思有乜好去處之際,腦中就浮現了「荃興徑」3個字……



問過與會人士全部無異議,咁一於去睇下有乜好野食囉!原本諗住在千色等,貪可以涼住冷氣逛住等,但搭巴士途中收到whatsapp又話直接去先到先霸位,咁基爾就直接在大河道落車行過去會近D。



去到荃興徑由街頭行到街尾都唔見熟悉的身影,電聯後才知團隊原來仍在千色,結果基爾在三十幾度濕熱高溫下兩頭撲,無可避免地要化成水人了!Anyway,好彩上面喱個椰青焗海鮮飯($88)都幾正,D飯泌滿椰青味幾清新,幾有消暑感覺。



由千色沿行人天橋行返去荃興徑那邊,一直覺得D天橋起到好核突礙眼,但總算叫做方便唔駛過咁多條馬路……來到「食街」主要想試blog友話幾抵食的泰特色泰國餐廳(因為有八八折!)為免勁多人等位,所以5:45pm已入坐,入面一台客都冇喎!不過半個鐘左右後已經七八成full了。



除了原個椰青飯之外,仲叫了水晶晶海南雞半隻($68)和三式彩椒炒蟶子($68),兩味都幾大蝶份量好足,唔會因為係特價menu菜式而將貨就價「縮水」咁老土,味道亦都確實唔錯。飯後仲有馬豆糕和椰汁糕送,實在沒什麼可挑剔了吧!後來留意睇睇個menu,才發現這間泰特色原來與基爾之前食過下午茶餐的那間水晶晶泰國餐廳係同一個老闆。

泰特色泰國餐廳 Thai Special Restaurant
荃灣海霸街91-93號荃好景大廈1樓及地下F鋪