2013年5月22日 星期三

2Q12瀛遊東北@十二湖

「庭院裡的樹木也修剪得十分美觀。巨松把寬大的樹影投在地上。視野相當開闊,但舉目所及,看不見一戶人家。特意選擇如此不便之處隱居的,一定是個很不願意和人交往的人物……拉開沒有上鎖的大門,走進去,沒有人出來迎接。在異常寬敞寧靜的玄關脫去鞋子,走過擦得明亮的冷颼颼的地板,進入客廳。從客廳的窗口能望見連綿的山巒,像一幅全景畫。波光粼粼、蜿蜒而行的河流映入眼簾,景致非常美麗!」



一場來到十二湖,基爾當然唔會只行「雞頭場之池」和「青池」兩處咁少!由青池沿山徑再拾級而上,就見到喱個介紹「十二湖之由來」的告示牌。不說不知原來十二湖只有300幾歲而已,在地質史上算是非常年輕,原來1704年這裏發生了一場大地震,並在白神山地這一帶形成了33個大小不一的堰塞湖。



若從大崩山遠眺湖區,可以欣賞到12個主要的湖沼,所以就統稱為「十二湖」。來到行山徑的最高點,這裏有一片號稱全世界最大的山毛櫸原生林。



由這裏開始往下走,穿過森林就來到這條小溪流,相比奧入瀨那邊,這條算是迷你型的了,但水依然清澈見底,雖然這天沒下雨,但冰涼的溪水仍涓涓不絕流下來;偶爾抬頭望天,還見到樹縫間飛過的飛機,在天際劃出了3條白煙……



原來這條小溪也頗有名氣,是「平成之名水百選」,溪水之源來自山上的沸壺池。由於溪邊還有間「十二湖庵」,豎立在溪旁的這尊神像就令四周環境更添靈氣。



十二湖庵對面就是「落口之池」,離開了林木區這裏景觀豁然開朗,廣闊的湖面就似是一個小水塘,但當然不會見到水壩或抽水塔之類的人工建築。難得這裏有片小小的湖畔休憩地,索性在這裏坐低食埋預早買定的麵包當午餐吧!



其實都唔剩止基爾一個,專程來這裏行山的日本人都係選擇喱度作中途休息站,對住喱一大片隱世靚湖景食個lunch或者tea,確係人生一大樂事吧!由於入秋之後,位處高緯度的青森會開始早入黑,食飽兼抖夠之後最好還是拿拿林上路,以免入夜都未落到山。



沿落山方向走,無耐就先後經過「落口之池」和「中之池」,自然又要駐足影一陣湖邊紅葉靚景。香港的水塘若在雨季貯水量較充足時,偶然也有機會拍到這類浸樹景,但當然不會見到這樣色彩豐富的紅葉啦!



途經的喱個十二湖養魚場可供遊人免費參觀,事實上入面也不見有人看守,偌大的魚池養了很多不知名的大魚,告示版係咪叫遊人唔好餵佢地呢?



除了青池之外,介紹十二湖的旅行書還會重點推介埋王池,事實上王池在12個池沼中算是「一哥」,不論湖的面積和深度都居首。雖然這個季節來到,不會期望在池邊拾到什麼花,但楓葉確實有一大堆,任執唔嬲!上圖右是一個養黑熊的獸籠,但裏面就唔見有黑熊。



王池中間有個向湖面伸出的山嘴,將王池分為東湖和西湖兩邊。上圖是東湖的一邊,喱日天氣真係超正,先幾日的雲雨天一掃而空,連紅葉影出來都份外sharp一點。



喱度仲有間甚為簡陋的王池旅館,唔知有無人真係會入住呢?不過如果要行晒整個十二湖區,可能真係要在這裏借宿一宵吧!旅館樓下還有間小食堂,但靜蠅蠅的唔多似有營業。



王池喱個小山嘴除了有間木建的洗手間之外,仲有個停車地方,方便自駕遊旅客來這裏泊車。那時剛好遇上一位日本大叔在這裏泊車休息,只見他指手畫腳地向基爾說日文(當然完全唔知佢嗡乜),還用簡單英文問基爾來自何方,最後他拿出記事簿簡單寫上「日中友和」4個字,一切謎團終於解開,原來是位友善的日本大叔,連忙與他握手再say goodbye!

2013年5月10日 星期五

2Q12瀛遊東北@五能線

「沿著依山勢遊走的海岸線,特快列車描畫出一條長長的彎道,這時,看見了並排浮在天上的兩個月亮。在靜靜的海面上,它們醒目地浮著。黃色的大月亮和綠色的小月亮。輪廓無比鮮明,距離感難以捉摸。在這月光的照耀下,海面上的細浪宛如點點碎玻璃,閃著神秘的光。兩個月亮追隨著彎道在車窗外緩慢地移動,將那細細的碎片作為無聲的暗示留在身後,不久便從視野中消失了……」



喱日晨早七點幾已經起身,到樓下酒店大堂食了簡便自助早餐之後,就拿拿林返房收拾行李並check-out,酒店近火車站有樣好就係容易預時間,東橫Inn就在秋田站旁,拉篋過去都係10分鐘就到,8:25am已安坐在出發的五能線列車上。令基爾最興奮的是,尋日在角館抱返溪谷和秋田掃興地落了整天雨,今朝終於迎來燦爛的晨光,一定要把握好天氣影返多D靚相先得!



五能線是連接日本東北青森縣和秋田縣的一條很出名的觀光鐵道,叫得上做「觀光鐵道」,係因為途經的都是靚絕的風景區,特大的車窗也是專為方便乘客賞景而設。



窗外最先令基爾嘩嘩聲的,就是上圖喱一大片秋田郊外的無際田野,10月底來到時大部分農田都收割晒,亦唔見有秋田犬的蹤跡。除了鄉郊田野之外,火車還會穿越著名的世界自然遺產「白神山地」。



經過了岩館站之後,列車正式開進了沿海路段,窗外換成了碧海連天的「日本海wallpaper」。以往基爾一直好期待嘗嘗坐日本觀光線列車的滋味,今次搭五能線真的讓基爾大開眼界,沿途風景真係靚到dum一聲,雖然用左成2700蚊買個JR Pass都絕對值回票價。



火車線很少會起得咁接近海邊,窗外不時出現怪石磷峋的日本海岸,離遠都可清楚望到浪濤泊岸激起的浪花,全程兩個鐘的車程基爾都罕有地無瞌過眼訓,要忙碌地捕捉窗前每一個靚景。睇景之餘,車廂裏仲有喱本免費的《五能線之旅》觀光手冊,吃喝玩樂景點介紹資料一應俱全,即使唔識日文都要拎本睇下!



大約10:30am左右終於來到十分古樸且很有點明治時代風情的十二湖站,木建的車站如果不留神睇,還會以為是和式民宿。火車站對面馬路就有JR Bus前往白神山地的十二湖風景區,車程也不過30分鐘左右,由於有Pass所以毋須另付巴士車費,爽!



如果年輕力壯又時間充裕的話,當然可以由山腳一直行上山,不過基爾還是選擇比較便捷的方法,先搭巴士到山上的總站,再沿山路一面賞湖一面往下走,會輕鬆自在得多!上圖是行山徑起步點一處阻止車輛駛入的路障欄杆,上面還鑄了幾隻小麻雀雕塑,很趣緻。



由車站先往山上走,率先映入眼瞼就是這個波平如鏡的「雞頭場之池」。這天來遊湖的人其實也不少,但當身處這種世外桃源時,遊人都會自然調低聲浪,彷彿驚會打擾了這片仙境!



在十二湖的12個比較著名的池塘當中,「雞頭場之池」算是中型池,襯托住環湖而生的茂密原生林,難怪咁多日本龍友都帶齊「重裝備」來影相。



基爾當然無本事托住這種「重裝備」來行山(即使在香港行山也不會),不過即使用輕便的傻瓜機好求其咁影,都已經影到不錯的風景照,因為個景本身就係靚!



行行下發現路邊有個簡介「白神山地」的告示牌,去日本旅行有個好處,即使只有日文也不怕,齋睇漢字其實都估到七八成講乜。白神山地於1993年12月獲UNESCO列入世界自然遺產,總面積達1300km2,橫跨青森秋田兩縣交界,比香港還要大;而十二湖所屬的津輕國定公園,也是位於白神山地範圍內。



沿山徑一直往上走,攀上一條小木梯之後就來到「青池」。來到這裏自然會明白什麼是「青出於藍勝於藍」,青池雖然不大,卻被譽為十二湖中最迷人的池塘,全因池水在日光下泛起一種神秘而迷離、恍如藍寶石般的色彩光澤。



青池四周除了有開始轉色的紅葉林外,池邊還長滿了苔鮮類植披,證明喱度環境係「零污染無添加」,先可以有咁厚的青苔生長,亦難怪有咁多品種的雀仔都棲息在這裏。

2013年5月5日 星期日

2Q12瀛遊東北@秋田

「周圍一片亂哄哄的,周圍的桌子也是,對面的桌子也是,同席的客人們都像哪裡被壓迫住了似的喘著氣。突然閃電忽現,青光直射入屋,照著店內土房裡的人們。這時雷聲大作,幾近能將屋頂震裂。驚訝地站起身來時,擁擠在土房裡的客人們,一齊將臉轉向這邊……」



由角館大約坐1小時火車就來到秋田,初頭以為秋田是鄉下地方,來到火車站落車才知原來是個大都市,火車站四周就是商業區,有很多高樓大廈酒店辦公室和西武之類的百貨公司,而且秋田站也確實幾大幾宏偉,有天橋連接周邊各大商場、百貨公司和酒店等,站裏還有不少雕塑擺設。由於在秋田只留一晚,基爾選擇住火車站隔籬的東橫Inn,在酒店check-in及放下行李後立即出街搵食,酒店receptionist介紹了上圖右這間專食刺身的道場。



雖然看地圖這間刺身道場只在秋田站附近,不過人生路不熟的基爾穿街過巷搵極都唔見,唯有拎住酒店receptionist寫的店名和地址字條冒昧地向一位日本妹妹問路吧(她當時正站在街旁與男性友人傾偈)!當然日本妹妹又係雞同鴨講咁講完一大餐最後還是一頭霧水,她索性熱心地帶基爾去算了,反正她說那間刺身道場就在不遠,而且確實也很出名的。結果基爾撐著傘跟她行了幾條街,果然在火車站對面街角位就找到了,原來是基爾太傻瓜繞了一個大圈所以找不到而已,在店門口基爾當然要90度鞠躬多謝返日本妹妹帶路啦!



入到店裏,格局其實幾有趣,全部用木板間放一間間「?房」咁非常有privacy,分分鐘在房裏搞乜,外面的店員都唔會知(但可能有CCTV未定)。打開menu一睇,價錢又真係幾抵喎!唔怪得當地人都推介,肯定唔會昆遊客水,可以放心叫菜,先來碟芥末青瓜和燒牛舌作前菜,兩樣都幾好食(可能因為肚餓)所以再encore多一round。



剩食前菜當然唔夠飽,再來兩味燒雞塊(左上圖)和清酒煮蜆(左下圖)。食咁多肉為免太有罪咎感,一定要叫多個沙律,就點上右圖這味魚生沙律吧,清新得來又夠食得健康。



魚生沙律裏其實以菜為主,魚生只有幾片作點綴而已,實在唔太夠喉!再睇睇menu發現上面喱個本有刺身盛(¥598)又幾抵食,一於打孖來多個,果然三款魚生都好新鮮,只係50蚊港紙左右算係抵食吧!



食魚生食得咁興奮,不如再加多個旬鮮五點盛(¥1659),成隻小木船擺上台好壯觀,船上擺滿三文魚、吞拿魚、蝦、花枝刺身齊晒!食咁多生冷野驚唔驚呢?!



好彩因為夠新鮮關係,食咁多魚生都無見肚痛。最後叫返幾樣熱葷:煎蛋餅和炸雞翼……



以上圖喱味吉列豬扒作為圓滿的謝幕,埋單計也不過是¥10446,而且無加一,只加了5%消費稅,折合人均也不過HKD$160左右,很抵食吧!



食飽出返去依然未落完雨,不過喱個時候管它呢!在附近逛逛尚未關門的店舖也不錯,行行下仲見到間Lawson便利店,當然要入去掃下貨,結果買了上面喱排味道不錯的牛奶朱古力,只售¥105……不過後來在東京新宿一間藥房竟發現同款朱古力只售¥88,蠢左!



另外不能不買的仲有喱兩款盒裝的日式咖喱磚,依家香港的日式超市買類似的S&B日式咖喱磚,大盒裝的已經加價加到成三十幾四十蚊,喱兩盒每盒也不過¥140左右,很抵買!千萬不要忘記仲要買多個大麵包,準備聽日行山時當作簡便午餐……