2018年8月30日 星期四

李永銓玩物作@文化博物館

夏天其實是巡館的最佳季節,一來可以嘆免費冷氣,二來暑假期間特別多歐美博物館借出的文物展;不過今次睇喱個則是來自土炮的設計展。



某日路過文化博物館,見行到熱又入去稍休一陣,順便看看有什麼新展覽吧!不過可能因為剛好轉換檔期關係,好多展廳都正在裝修,只有上圖這個有開放,咁就入去望下……



展廳裏可以拍照,反正有手機就影少少有趣的展品吧!當中覺得上面這一排排八爪魚人仔最壯觀,據場刊簡介話有300個之多。設計師表示八爪魚最似他,擁有不斷變化創新的生命力。



百變毛像是展廳內另一焦點,展出的經典穿大褸塑像換上了蝙蝠俠、咸蛋超人和阿童木等造型,看來比JLA還要陣容強勁,最有趣是每人都手持名店購物袋;左下圖驟眼看以為是鼻煙壺,其實是二澳米的品牌包裝設計。



除了很前衛的設計外,上圖這個上海名錶的包裝設計則好classic古雅,展覽中展示的作品據場刊話多達90幾項,當中除了雕塑藝術品之外,其餘大部份皆屬商業品牌設計的項目作品。



除了古典之外,也有新潮時麾又簡約味十足的設計,唔少作品都反映出設計師35年來對於社會經濟、流行文化和設計的哲學理念云云,當中很多都結合了外地的流行文化元素。



海報是最容易展現流行文化和創意的藝術載體,基爾是門外漢當然未必完全理解設計師的心思,但單單走馬看花式地瀏覽一圈也覺得幾嘆為觀止!



下次再去光顧甜品店時,不妨留意下店舖的食具,因為同樣有D幾卡通的設計,據場刊介紹設計師本身少年時代都睇唔少中外漫畫,自少熏陶下不少創作意念都會用到設計上!



場內的展廳佈置其實也甚覺有心思,除了外圍擺設海報雕塑外,中央則有幾行飾櫃展桌,四周圍上純白布簾感覺自成一國,似個半隱閉式的空間,裏面的參觀人士可不受外圍走動的人潮影響。當天同場仲參觀了「展堂一鱗」的展覽,比較特別是展出了清康熙景德鎮燒製的十二花神杯,不過不可拍照,就影下場外佈置上的花杯吧!

「李永銓『玩‧物‧作』設計展」
地點:沙田香港文化博物館
展期:9.6.2018 - 24.9.2018

2018年8月23日 星期四

武漢迎花潮@通天湖

係咪好心急想知有冇人估中呢?無follow開基爾網誌果D可能唔知到底無端端估乜東東?咁要勞煩自動波click返去睇上一回了。



比較知頭知路果D就跟基爾繼續行落去,話說過了條風雨橋之後回頭一望,就見到上圖這個大水壩,橋下洶湧的水勢形成了大瀑布,係咪同大潭果個大水壩有得fight!冇錯這座風雨橋本身也是酒醉湖的水壩,唔知係咪為附近山區的村民供水供電呢?



再在山坡下另一角度看看這座風雨橋大水壩!相信如果到了夏天雨季時份,這道瀑布的水勢會更強勁,在瀑布旁走過時唔知會唔會被水花濺到濕晒身呢?可能到時來行山要著定件雨褸先掂。



再向前走不遠就見到上面這個「千年鳥巢」和「天書」。大鳥巢看來不是天然吧!以這size計若是真雀巢就肯定是恐鳥或鴕鳥之類了,基爾覺得似小朋友那類嬉戲式的樹屋多些。天書同樣是巨人size,是天然的侵蝕岩塊,應是沉積岩那類,遠看就似一層層的古書冊。



沿途大部份是大大小小的水瀑,也有迂迴的棧道在山谷間穿梭,幸好這天遊人不算太多,沿途總算走得輕鬆順暢,至少不會出現「塞人」情況;來到上圖的浴仙池其實已差不多完成了逾半山路了。



再往下一路走,景觀豁然開朗,原來是一道類似珍珠灘那種斜坡瀑布。水瀑之間仲插了不少木枝(定還是鐵枝),按地圖介紹原來是用作攀爬之用,可惜這天不見有任何勇士來顯身手,相信要有教練陪同及有完善裝備和一定體能經驗才可參與這種歷險挑戰活動吧!



至於平凡人如基爾這一類,基本上只需要作「塘邊鶴」,在旁邊靜靜地欣賞一下這道水勢洶湧的珍珠灘瀑布,其實已經是件樂事了!話明係輕鬆行山健行而已,唔駛搵博亦無意要征服大自然喎!



小莫小於水滴,高山瀑布滔滔流水一直匯聚到山下這個似水塘咁大的通天湖,同樣設有環湖棧道,湖中央仲有條木建的彩虹橋,甚具古樸美。



沿湖邊棧道一直走,仲會路經一處小山谷,見成群大媽爭住行上去有條橫木小橋上面打卡影相,再睇返手上那幅地圖才知原來它叫做「情緣橋」,莫非影完就可找到高富帥如意郎君?難怪咁博命影啦!



本來蠻恬靜的小幽谷變了街市咁熱鬧,無謂同人爭求其影張趁墟相就走人。反而沿湖這邊耳根落得清靜安寧,憑欄遠眺來來往往的遊船感受一下迎面吹來的送爽春風,旅行就是為了享受這份閒情吧!



基爾當然也不會錯過去坐船賞湖的機會(忘了價錢),在湖中兜一圈其實也不花太多時間,大約10-15分鐘已遊完,不過由湖面回望山上風景又有不同景觀角度,如果十月深秋時份來,聽說還可欣賞到滿山紅葉的美景,唔知會唔會似定山溪果類咁靚呢?



遊完船河之後差不多要去返正門走人了,其實絕大部份遊人都集中在山腳這邊遊湖而已,真正願意花點時間和腳骨力行上山的不算太多,不過基爾覺得既然一場來到若沒上山去賞櫻花和山中瀑布,似乎就有點可惜了。



門面驟眼睇其實都有點似大陸古裝街主題公園,又或者乜乜物物影城之類的感覺,突然間醒起又有點似以前荔園隔籬果座宋城喎!拿拿拿……邊個去過宋城的唔好怕醜,大方爽快認左佢!



山中蕩遊不知時日過,原來已經行到成晏晝幾兩點鐘,都係快快趣趣附近搵間茶樓食肆吃個靚lunch先再返入去武漢省城吧!不過大陸叫小菜吃飯一般感覺實在太油膩,好似食油完全唔駛錢大平賣一樣(祈求不是地溝油),味道也確實好一般,不仔細介紹費事長氣了!而且席間隔籬枱果班大叔一直煲煙兼大聲對話實在難頂,九秒九吃夠即走為上着了。



搭車返省城時路經長江大橋,聞說現時跨越長江的大橋有百多座,但始終以南京和武漢兩座大橋最具代表性。武漢長江大橋建成於1957年,除了行車之外下面還鋪設了鐵路,毛主席還曾在大橋附近的河面游過渡江泳。

2018年8月18日 星期六

武漢迎花潮@酒醉湖

逛完個小茶園之後,未咁想快走住喎!其實,這才是整段行山行程的開端,唔賣關子即刻起步出發。



外遊時如果想睇多點大自然靚景,行山好多時係熱門之選,基爾還依稀記得那些年戴住頭盔行太魯閣,也記得捽住惺忪睡眼在上高地看日出的情景!老人家真係特別愛想當年……先將回憶暫擱一邊!這次賞櫻+行山二合一行程馬上開始,這處山路的起步點都幾陡峭,站在懸崖邊望落去萬丈之下的湖面,不是說笑確有點畏高腳軟!



崖邊雖設有鐵索圍欄但明顯有點飽經風雨侵蝕兼生鏽,看來也不太穩陣更有點搖晃鬆脫跡象,卻竟有大無畏同胞搶住倚欄影高空危拍,細膽基爾在旁齋睇已覺背脊冒出冷汗,不其然心裏要寫個「服」字!上圖是途經的兩處景點:九龍飛瀑和千紋岩。



起步這一段大斜坡山路,主要是呈45度角左右的石梯級,部份由於有水簾瀑布和小溪流過,所以都甚為濕滑,很多時要集中精神扶穩欄杆(或者鐵索)搭級而下,全程約半個鐘左右,幾乎都忘了影相,晃眼間已落到去平靜如鏡的酒醉湖,終於可稍歇一陣影下相了。



沿住湖邊的小徑可以悠閒地散策一圈,途中都有不少景點可看,例如上圖這處叫做「望天崖」,相傳唔少牛郎會來這裏希望遇上心目中的織女云云……大陸依家有些景點設施都幾完備,指示清晰之餘還有簡介路牌,不知是否取經自日台韓旅遊區呢?



可惜除了有大媽大叔來影相之外似乎不太見有牛郎織女,咁唯有繼續前行吧!在大陸著名旅遊景區裏,在山崖石壁間看到題字賦詩並非新奇事,當中若是歷史名家留下的珍貴墨寶更可增添遊山雅興,畢竟總比「乜水乜水到此一遊」的刀刻塗鴉來得有意思吧!



如果時間充裕其實還可以租艘竹筏去湖上泛舟,不過眼見似乎沒有船伕划竹筏喎,應該是現代化了加裝了摩打吧!而且感覺上船速都幾快,一下子就在平靜的湖面上畫出一道長長的波瀾……



恍似隻快艇的竹筏不知是否由這條橫垣湖面上的風雨橋開出呢?如果去過湘鄂黔桂一帶的古村古寨古鎮的話,通常都會見過這類橋塔相連的風雨橋,大多是昔日村民為了方便過湖過河而建造,也可作乘涼或遮風擋雨之用。不過酒醉湖上的這座風雨橋,原來還有個很特別的實際功能,先賣個關子畀你估下,留待下回分解!



做乜橋邊會有間爛石屋仔,屋前仲有塊黑板喎!莫非以前係露天課室?八卦基爾行埋去睇下塊黑板原來是石刻,上面雕了成首《賣炭翁》,中學時如果有認真讀過下唐詩的話,應該會對這首白居易的七言古詩有點印象吧?仲念唔念得出「滿面塵灰煙火色,兩鬢蒼蒼十指黑。賣炭得錢何所營?身上衣裳口中食」幾句咁多呢!



因乜事要刻首《賣炭翁》石碑擺在這裏呢?原來後面果間陳年石屋仔係昔日村裏的古炭窯,咁成件事即刻又真係變得好合情合理喎!睇完古窯又繼續向前行,近湖面這一帶其實仲有些疏落零散的野櫻花樹,不過這裏明顯比山上的茶園和西峰山頂暖好多,所以櫻花都早過了滿開期吧!

2018年8月12日 星期日

武漢迎花潮@茶藝園

寫完一大輪過大海之後,仲有冇人記得之前寫緊果個賞櫻遊誌寫到去邊?寫網誌都想盡量有頭有尾做返個完整記錄,咁繼續行埋餘下旅程吧!



上次逛過的山中小村落附近,其實仲有個風景不錯的小茶園,反正時間多,就順路去看看。不來不知原來武漢市郊山區這裏也有茶園,但當然規模比雲南和福建那類連接幾個山頭的大茶園差好遠,也不及普洱或武夷岩茶那類咁有名氣(價錢也沒去看因為冇諗住買)。



如果同基爾一樣對於品茶一竅不通的話,其實也很值得來一遊,因為茶莊裏的小亭園在春夏間風景特別美,明顯醉翁之意不在「茶」,只在乎山水之間的這個隱世櫻花園。



原來除了看日出的西峰山頂之外,茶園這裏也是春天的賞櫻聖地。基爾這朝早來到正好遇上了滿開佳期,更重要係竟然遊人也不多,僅有小貓仨倆而已(心情大喜),以大陸賞櫻熱門景區多數群情淘湧墟陷逼爆人潮計,說這裏是絕佳的隱世秘境也沒太跨張吧!



茶園裏除了看櫻花樹之外,仲有好多盛開的茶花可賞,就如上圖這棵鮮紅色的茶花也很艷麗,不過鏡頭當然大部份也被櫻花樹搶去了……



滿開的櫻花慣常都要配襯古色古香的建築又或者古裝美人,才更顯相得益彰吧!不過今次基爾發現原來換上了起伏山巒作背景,反而更多添了壯麗的大自然味道,同唔同意呢?



之前睇過網上資料,講到中華櫻花源產於西藏和雲貴高原一帶,比較耐寒和適應山區的氣候,可能因為咁,武漢市郊山區這一帶的原生櫻花看來都開得特別茂密,也似乎多添了一份清麗脫俗感覺。



遊人少有個最大好處就係任影唔嬲,要想影什麼效果什麼角度都可以,慢慢諗過度過構圖位置都完全無問題,而且茶園裏的櫻花樹分佈範圍也很廣,基本上想影乜靚景都梗有一處合心水(最重要係唔駛等位)。



基爾眼見園內滿開的櫻花都以粉白品種為主,但間中仍可發現一兩株深粉色的品種盛開,可能深色的品種已搶先一步過了盛放花期,如果早多一兩星期來可能還會見到映山紅的美景。



茶園裏仲有個茶塘,據茶園的leaflet介紹話這池塘稱為茗泉池。相傳池中有一口龍泉眼,聞到茶香就會漫水(咁神奇?)池塘中仲有養魚供遊客垂釣云云,不過這朝早山區依然春寒料峭,不太覺會有人來享受釣魚翁的雅興。

2018年8月7日 星期二

免費玩足上下半場@運動日

眨下眼又來到立秋了!不過夏日艷陽的熱力似乎絲毫沒有減退跡像,有藉口偷懶唔去跑步(驚中暑+蚊多)!



日日三十幾度高溫的八月天,戶外運動真係可免則免。但眼見條褲越來越著唔落咁點算好呢?唯一想做的運動就係去泳池浸下水囉!喱個禮拜日剛好是全民運動日所有政府體育場館都免費入場,咁抵玩要去游下啦!



基爾以往都盡量唔揀假日去游因為一定超多人,預計免費日情況更甚,咁就一於晨早去飲頭啖湯先。星期日流流朝早六點未夠就起身真係覺得自己超神心,連搭巴士都無乜人,去到泳池已驕陽高掛(7a.m.都未夠)!



鏡頭一轉已經游完出來了……清晨游早場果然係上上之策,大部份係長者阿叔大嬸之外其他人也較少,浸在水中人也精神涼快得多,但先決條件係之前一晚要早少少睡,因為驚清晨唔夠毅力起身!



朝早九點人潮開始陸續湧入,十時左右係時候要散水!臨走出閘前竟見到有個counter好似有野派,八卦埋去睇原來有快勞和書籤送喎,隻黃鴨仔咁靚咁可愛梗係帶埋佢返屋企!



星期日lunch通常同家人來這商場飲下午茶,之前話這裏會開吉野家咁基爾媽又話未食過想試下,就臨時變陣唔去茶樓了!不過可能新屎坑關係超多人排隊,條人龍排到出商場認真誇張,幸好不趕時間也沒所謂!

p.s.吃飽飽休息陣咁又去埋下半場,因為喱日健身室都係唔駛錢(有便宜唔駛使頸),初頭都驚人多但去到望下又唔算喎,最多時都係7-8人左右以星期日計可以接受呢!

2018年8月2日 星期四

跟住雷神過大海@何東圖書館

仲夏8月伊始,這個過大海網誌系列迆下迆下又終於寫到來「最終回」了!每次寫旅程的終章總有一份莫名的興奮感(就好似完成了一項龐大工程一樣),唔知有冇人會有同感呢?



上一回講到償了心願吃了豆腐花之後,飽飽的基爾繼續沿住果欄街四圍行多陣,路邊又見到這間梳打埠懷舊店,「梳打埠」這個店名本身已很有古典味,裏面又有好多陳年舊物睇,有些鐵皮玩具還似曾相識……



無聊間又閒蕩返去大馬路近議事亭果邊,本來都係諗住食埋dinner先搭夜船走,不過之前又食粥又食麵又食豆腐花都還未落晒格,5點幾鐘又半能亢咁好多食肆仲未正式有晚市,本來想食埋營地大街果間鳳城珠記水餃都因為尚飽而作罷了,就留返下次來才食吧!



咁飽又仲有咁多時間咁無聊,又有乜野好做呢?一於又行上去崗頂兜個圈先算!以前上到去崗頂總會見到劇院、教堂和上圖這幢古式古香的何東圖書館,但很多時都遇不到開門時間,只能在門外看看影張相打下卡就走,今次見佢竟然有開喎,咁一定要入去行下啦!



原來這幢建於1894年的豪華大宅仲保留了一個充滿南歐風情的小亭園,以圖書館來說算是很特別的設施,至少香港的圖書館應不會設有優雅的後花園畀人睇書吧!入面其實仲有分成新翼及舊翼大樓,沿玻璃樓梯走往新翼果陣頗有點穿越古今的奇幻感覺……



行完一輪圖書館吸收了唔少書卷氣息之後(其實係想去嘆陣冷氣),咁又沿斜巷行返落去營地大街果邊的食肆,見開始有少少餓意,唔駛揀就行入去食北京水餃!上圖店內一副「客似雲來」的招牌字畫下面好似有一行藍色字仔,係寫乜野呢?



行近D睇真,原來係記錄了舊年颱風天鴿吹襲澳門時的水浸水位高度,真係好勁喎!之後快快趣去叫野食先,叫了3樣包括有狗不理包子、韭菜水餃和白菜水餃,夾埋豬骨老火例湯埋單計都係一舊水有找,算唔算貴唔知,但因為太耐無食過北方餃子包點,感覺都算幾好食。



三爬兩撥食飽,又飛快趕返出去大馬路搭巴士出碼頭了,因乜事突然間又咁趕急呢?其實原本係買了9點幾的船飛可以慢慢hea返港,不過見7點半仲有班船返尖沙嘴,即管早點出碼頭博一博看看有冇位,可能閒日關係果然仲有位,咁就索性坐早一班船返歸啦!回程船上可能仲有少少雷神強勁的風尾威勢,隻船堅大浪堅拋,幸好基爾向來不太怕(只係最怕聽到人地嘔吐聲和搽藥油味),仲覺得好好玩好似玩海盜船那種離心力,堅爽!



北京水餃
澳門新馬路新填巷5號A