2012年10月19日 星期五

綠怡咖啡廳@鯽魚涌

辛勞一輪之後,老細的慰勞宴當然要有大食大啦!不過lunch地點無乜選擇,結果去了這間酒店裏的綠怡廳食buffet。



當日正在打3號風球,坐在落地大玻璃窗前看著雨點不住滴滴嗒嗒打在窗上,初頭都有少少驚,後來見無咩事就照坐無調位了!望落街,見成條街的行人同一時間吹反遮,其實都幾壯觀的。



野食方面其實無乜特別,都係例牌有蝦、青口等海鮮,仲有生蠔,不過基爾無食,另外仲有壽司、三文魚生和幾味中式熱葷、點心、麵,還有菜、炸魚柳、炸雞和咖喱,當然少不了甜品,可惜款式不太吸引,雪糕也不見有Haagen-Dazs,如果要二百幾蚊一位就唔算太抵了!
 
綠怡咖啡廳 Greens Cafe
北角英皇道665號北角海逸酒店2樓

2012年10月18日 星期四

風從寶島來@七星潭

奇松怪樹攀附在斷崖懸壁邊
垂死的龍鍾老態擰緊了冠狀動脈
沁涼晚風順勢轉變為強勁的冷風
削過車窗發出的尖銳抽氣聲
在五臟六腑間摩擦碰撞



在花蓮的「五星級民宿」叉足一晚電之後,第二朝食過簡單早餐,就坐民宿主人的專車出發。由於是淡季,基爾全程都係「包車遊」,首站逛完柴魚博物館後,就來到上面的七星潭。



七星潭不是一個湖,而是面向太平洋的廣闊海灣,站在沙灘上幾乎看不到兩邊的盡頭。正確來說七星潭其實是個礫石灘,聽說是花蓮觀星賞月的聖地。



在灘上還可以見到航機飛往花蓮機場降落的景像,令人回想起昔日九龍城的情景。



行完石灘後坐十多分鐘車程,沿蘇花公路穿過上左圖的崇德隧道,就來到台灣八景之一的清水斷崖。上圖左下白色果架就係民宿老闆的專車。



清水斷崖這邊的藍天白雲全海景比七星潭更靚,沿小路可以走落石灘邊拍照。海拔2408米的清水山就在灘邊以近90度角拔地而起,面向來自太平洋的驚濤泊岸,非常有氣勢。



香港西貢對出的果洲群島最近發現了1億4000萬年前遠古超級火山,原來有1億5000萬年歷史的清水斷崖也是台灣著名的地質公園,這個氣勢磅薄的斷層海岸由大理岩、片麻岩及綠色片岩構成,被譽世界第二大斷崖。至於世界no.1斷崖會唔會係英國多佛爾港的白堊懸崖,又或者係澳洲的十二門徒石呢?

2012年10月15日 星期一

極拉麵串燒Bar@北角

今次出巡的極拉麵串燒Bar,與之前講過的Big Bite和ibis都是在同一條街,喱日本來諗住去ibis食lunch,點知行過喱間拉麵店時發現原來佢weekdays的1:45pm之後有八折,既然咁抵就改變策略,入去試下!



店裏與Big Bite一樣,也屬蚊型陳設的餐廳,幸好來到時已過了食晏繁忙時間,所以人客不多,不算太逼。雖說這是間拉麵店,不過看過menu後發現食飯比較抵(拉麵大部份五十幾蚊碗),與同事各自叫了燒牛肉和燒雞肉飯定食,也不過三十幾蚊(未計八折)。



珍珠米飯和雞肉的份量很足,沒有因為八折而變成「迷你版」,同事說燒牛肉飯也不俗,最搞笑係用Asahi杯飲凍檸茶都係第一次。由於實在抵食,後來又去encore多次,基爾試過燒牛?飯,比雞肉更正!值得一提係店裏長期播放超正的80年代中英日金曲,有陳慧嫻、林憶蓮、林姍姍、松田聖子、柏原芳惠、Wham、Pet Shop Boys……輪住陪食飯,真係食完都卦住聽歌唔捨得走,老闆的品味與基爾甚為一致,或許是同年代人!
 
極拉麵串燒Bar
北角渣華道148號嘉威大廈地下12號舖

2012年10月14日 星期日

風從寶島來@花蓮

困於渾然的無知而孤立
只聽說有你和連環群島
就像岸上人或許有意
探深海海豚的珊瑚紅礁



這次「慢」遊台灣大置可分為前後兩部份行程,如果覺得前半部的台中南投集集日月潭唔悶的話,就即管跟基爾hea埋下半部吧!去邊?即刻揭曉……



無錯,就係去花蓮!其實由台灣西岸的台中去到東岸的花蓮,可乘長途巴穿越中部依山而建的橫貫公路,不過聽聞車程(連中途轉車)要逾10個鐘,最後還是坐繞行台北的太魯閣號列車,差不多4個鐘就到,沿途仲可以欣賞埋宜蘭花蓮的海岸靚景。



花蓮訂的民宿比較偏離市中心(其實只是十多分鐘車程),來往火車站和市區都由民宿主人接送。至於間屋有幾靚,還是先賣個關子……因為要趕住出海先!由於花蓮位於台灣東部面向太平洋的花東海岸,4至5月都係出海觀鯨北遷的旺季(其實近年香港也有搞類似的觀鯨團,但多數睇唔到)。



據聞花蓮台東海域曾發現逾15種鯨豚,包括比較少見的虎鯨和抹香鯨。不過這類觀鯨tour其實也不保證一定看到鯨魚,早有心理準備只是出海遊一轉而已,不過海豚就多數會見到,咁都好丫!



果然無耐就見到一群海豚遊近遊艇,唔知係咪一個family呢?!聽說大澳也有出海睇中華白海豚的tour,下次再入大澳都可以去八下。



上面喱條勁喎!可能知道基爾山長水遠來到,仲表演「反身翻騰兩周半轉體三周」,犀利過海洋公園果D,而且係純天然無訓練員培訓的呢!



「觀鯨」變「觀豚」之後回到民宿抖抖,順便四圍影下間「豪宅」留念吧!以前從未見識過喱種一幢3層的別墅式民宿,上圖是地下的客廳和飯廳。



由於那時正值淡季,基爾與同行友人可以獨霸全幢別墅,幾乎可以由地下捉衣因到3樓,再由3樓打筋斗落地下都得,每間客房仲有私人廁所浴室。



在香港住慣白鴿籠的基爾,來到這裏簡直就好似上了天堂,總算係見識過咩叫「5星級的家」。



飯廳的牆上掛了一幅印有各類鯨魚的掛畫,雖然出海時見不到鯨魚,看看這幅畫都算是試過「觀鯨」吧!



傍晚時份坐了民宿主人的專車出花蓮市區食飯,由民宿住宅區出返去最旺的中山路,車程也不過十多分鐘,上圖右是花蓮港教會。



全條中山路也不算太長,但食肆的選擇也不少,結果去了這間「鵝肉先生」,上圖是去親台灣都必食的皮蛋豆腐。



「鵝肉先生」原來是花蓮的著名食店,好多旅遊書都有介紹,基爾一場去到當然要試埋佢個撚手菜「鹵水鵝」。食到飽晒之後再去行一陣夜市,花蓮個夜市其實唔算好大,由幾條小街組成,都係街邊食檔、手信店和賣衫為主。行到9點幾10點本來諗住「打的」回府, 後來都係決定膽粗粗摸黑漫步返去,最後唔駛半粒鐘安抵民宿。

2012年10月10日 星期三

俄羅斯謎旅程卅一

公園太大有時真係會令人感到迷失,尤其是在莫斯科?


在樹林「解決」完之後速離列寧山,落山後就坐車來到勝利廣場(Victory Square),它雖然不及之前去的那個國民經濟成就展覽館園區那麼大,但都有成135公頃、約7個維園的面積。



廣場建於1995年,歷史不算久,當年是為了紀念二次大戰擊退納粹德軍50周年而建。公園四周都擺滿了舊式的坦克車、高射炮,成為了小孩子的大玩具,另外還有不少悼念在衛國戰爭中陣亡的無名戰士銅像。



勝利廣場裏的主建築就是上圖的勝利女神紀念碑和衛國戰爭紀念館,高達141.8米的紀念碑象徵了衛國戰爭中歷時1418個日與夜,三稜形的碑身每面都有細緻的浮雕,描繪了當年莫斯科等12個蘇聯城市擊敗敵軍的激戰場面,碑頂的勝利女神手持金光燦爛的桂冠,身旁還有吹奏勝利號角的小天使。 紀念碑的下方則是「神奇勇士」格奧爾基手持長矛刺殺毒蛇的雕像,底部的5層台階象徵戰爭的每一年。



紀念碑後面是一座弧形的建築,它就是衛國戰爭紀念館,基爾由於時間唔夠,所以又要放棄入內參觀。翻查資料原來紀念館大廳內有6幅大型立體畫,描繪了包括莫斯科保衛戰、列寧格勒反圍困戰、斯大林格勒戰役和攻克柏林等幾場二戰時蘇軍的重要勝仗。



唔入展館,其實齋遊下個公園都幾舒服的。廣場右側仲有一組大型噴泉,遠處金頂白牆的建築物就是常勝聖格奧爾基大教堂,不過由於又係實在太遠,加上天色好似突然轉暗,有山雨欲來之勢,所以都係唔行過去了,費事行到半路變落湯雞。



點知四圍行下蕩下,就咁蕩失左!由於個公園實在太過「一望無際」,一時間都無法搵返友人會合,最後唯有花少少錢打電話吧!



離開勝利廣場後,行返出去就見到這座莫斯科「凱旋門」。莫斯科市內聽聞仲有幾座這樣的凱旋門,這座高28米,是19世紀初沙皇為紀念俄軍擊退拿破崙大軍而建造。門頂有一尊手執月桂花環、背生雙翼,正駕御6套馬車的勝利女神像,門柱間還有4尊身披盔甲手執槍盾的俄兵雕像,氣勢宏偉,媲美巴黎凱旋門。

2012年10月6日 星期六

燒烤王龍尾人在野@大美督

玩開快閃速遊就唔好畀佢停,這次地點轉移到更遠的汀角大美督,究竟基爾今次閃去做咩?唔賣關子速速揭曉……



在大埔墟火車站會合大隊後,第一站率先去龍尾的「燒烤王」搶灘!說是「搶灘」一點也不誇張,因為假日喱度通常都超級多人,基爾大約12時半來到由於時間尚早,好彩去counter買套餐的人不多,1點左右搵左阿姐來開爐已經可以開工燒得。



燒烤王最大好處係由二人至N人餐俱備,唔駛花時間去諗買咩燒,其中最勁仲有個夠廿人食的超級燒乳豬套餐($2086);基爾的4人餐亦只不過$390(連開爐費$40),已經有晒豬牛扒、雞賢、叉燒粒、雞中翼、魷魚、腸仔、牛丸墨丸、方包、蜜糖和4枝飲品,最後除了拎走麵包外全部掃清,好少燒野食可以just make不浪費食物!



食飽飽之後大約三點半離開燒烤場,行落去龍尾灘散陣步先得!之前聽聞話龍尾灘將於11月封灘,之後會改建為人工沙灘,所以好多人去幫手搬走海星海膽和魚蝦蟹仔,喱日來到依然見有不少人來到淺灘上拯救生態。



石罅間基爾也發現了一隻黑黑實實的蟹仔,就由得佢繼續生活吧!可能牠也感應到基爾正替牠影寫真,轉瞬間已怕醜地爬返落石罅底了。



本來都好想去睇下大自然中生活的海星,不過唔知係咪之前幾個禮拜已經畀人遷移晒,基爾行到好出都見唔到有海星的蹤影!實在有點可惜……



海底只見到大堆牡蠣蠔殼之類的生物,不過這裏海水真的很清澈,唔怪得聽聞話有幾百種自然生物在這裏棲息啦!不少人都烏低身不斷將灘上的石頭翻來覆去,看看石底仲會有咩蟹仔或彈塗魚匿埋。



不少人仲行到海中心,遠睇真係有少少似正在施展「亨功水上飄」!由於龍尾灘的水深普遍都較淺,行出離岸二三十米的海中心,水深大約只及膝頭至腰之間,不過基爾是第一次來當然不會冒險行太出,只離遠睇人踏浪。



幾年前去印洲塘那邊,都見識過這種紅褐色的花崗石。吐露港這一帶的地質非常獨特,除左有多個地質公園之外,最近仲發現億年前的超級火山和由熔岩凝結而成的六角柱石,至於這種紅色花崗石也有成億年歷史。



即使唔落水,單單在岸邊睇下海景都已經很愜意,很難形容到這種與太自然零距離接觸的興奮感覺,只能親身去到才能真正體會得到。



海岸邊的紅樹林,幾棵紅樹幼苗正在茁壯成長,唔知將來建成人工沙灘之後,佢地仲可唔可以繼續聳立在這片泥灘上生活呢?明年夏天希望可以再來探它們吧!



咁浪漫的海灘,當然唔會少得有雙雙對對的鴛侶來嬉水吧!可惜這天的天氣麻麻地,似乎不見有人來影婚紗相……在灘上左影右影之後,基爾都係無謂做電燈膽,拿拿林再向下一站進發。



由泥灘行返上汀角路,其實已經好接近大美督了,馬路上突然迎面駛來一架很型的3輪電單車,一身鐵騎士型裝的車手大哥仲停車擺晒甫士畀基爾任影,真係掂!



行無耐在臨海的汀角路邊仲見到有喱間好華麗的別墅,似十足港島南區的超級豪宅,睇真D原來係一間叫做「巴希雅」的燒烤餐廳,同事之前已提議基爾去試下,不過由於佢要到下午1點半先開,所以就無等佢。睇返門口個價錢牌,任食每位也不過是$168,而且唔駛自己篤住叉對住個火燒咁熱,下次再來一定要試下喱間先得。



好難得在一片雲海中乍現曙光,令本來打定輸數無得睇日落的基爾重燃了希望,急急腳繼續向大壩方向進發。平時如果踩單車,都可以好快就踩到上去,這次齋行就慢左D。



終於行到去大美督巴士總站旁的燒烤場,喱日由於係紅字假,當然也不會少人了,極目望過去都是一片人海。究竟邊個人講話香港可以承受1000萬人口架呢?!如果香港將來真的有成千萬人,實在太可怕了……



穿過人山人海的閘口,終於行到上船灣大壩,實在很難想像一條這麼窄的水壩上竟然可以擠滿咁多人,踩單車的照樣踩單車,放風箏的又可以照放風箏,還有人推BB車、踩4輪家庭單車,甚至hea行hea蕩,似乎每個人都樂在其中。



大壩上放箏的場面可謂蔚為奇觀,連高難度的長龍式風箏都有人放,男男女女都想方設法將手中大大小小的麻鷹鳳凰一飛衝天去……有成功的,也有放極都墜落的,但也無損興緻。



當然大壩上來往如鯽的「單車手」也隨時會被突然下墜的風箏篤正頭殼,也有被風箏線界頸割喉,有些又會突然迎來勝利的衝線,這些搞笑場面都盡入hea坐壩邊的基爾眼瞼,別具娛樂性。



結果等到最後都係睇唔到日落,雲層實在太厚了,唯有影下個水塘景,就要火速起錨趕返去巴士總站,因為那邊早已打晒蛇餅,結果足足等了成個鐘才上到車,結束這次快閃逼爆大美督之行。