2015年7月30日 星期四

迷你兵團@沙田UA

唔係誇張,眨下眼真係好似有成年幾無入過戲院,喱個周末友人話有免費戲飛睇Minions,雖然好怕周六日出新城市,不過都去啦!



舊噴水池位喱度真係日日都咁墟陷,因為有個Minions展覽丫嘛!加上係暑假就特別多小朋友和家人來影呀影……由高空望落去又真係幾熱鬧,唔怪得D電影商越來越鍾意用喱種宣傳手法,好過花錢在電視報紙賣廣告啦!



實在太多人,都係拿拿林上7樓先去搵食,原來喱度都有主角果3隻野,旁邊仲有個姐姐工作人員在看守(唔知係咪要硬企成日呢?慘!搵食艱難),莫非係驚會有人偷走佢地?



下面1樓正門果度又有一堆Minions,仲有英國紅色電話亭和御林軍扮相造型的黃色香蕉仔,唔知會唔會有人來舞龍獅旗?基爾怕人多都係去換飛先。沙田UA真係唔知何年何月才可以完成重建,依家仍然只得兩間院,周六日實爆晒要坐得好前,基爾雖然要坐牆邊位幸好都睇得好清楚那些3D效果。

2015年7月27日 星期一

夏日絮語:黑醋+手機鏡頭

旅行野寫得到八八九九,係時候要發掘其他無謂野寫下,以免個blog封塵……寫乜好呢?



早排數字屋又六折又七折搞到大排長龍非常墟陷,基爾覺得如果係有big sale都幾抵,求其行一圈八下有乜野想買先……發現上圖右喱樽黑醋真係幾抵買,最緊要係made in Italy。



另外,基爾某睇報紙仲見到喱盒老虎啤酒的手機鏡頭套裝。喱個比黑醋還要抵因為完全唔駛錢,屬換購性質。



這種衣夾式的手機鏡頭仔其實都出了好耐,確實幾好駛好用,一個夾可以替換廣角、微距和魚眼,去旅行如果懶拎相機的話,單單用手機已經夠玩夠影了吧!

2015年7月23日 星期四

珍郵庫@紅河哈尼梯田

好耐無拎郵票出來間場,最近買了一些新的首日封,係時候又拎出來匯報一下!



香港郵政自2012年起每年都出一套「中國世界遺產系列」首日封,第一、二、三號基爾都有買,分別是萬里長城、麗江古城和丹霞山,來到今年的第四號當然沒有斷了不買的道理吧!



事實上這系列向來以sell靚景取勝,今次第四號也沒令人失望,主角是雲南紅河的哈尼梯田。基爾十幾年前去過一趟雲南,但沒有踏足過南部,睇完郵票上的靚景照片後都好期待將來有機會去紅河、普洱和西雙版納這些滇南地區看看。



講返套郵票,哈尼梯田是2013年才列入世界文化及自然遺產名錄,面積達16603公頃(即係有幾大?),梯田由高聳的哀牢山山坡一路向下逐級伸延到紅河沿岸。哈尼族人原來早在1300多年前已發明了梯田耕作的複雜農業水利生態系統,郵票上的風景是老虎嘴、壩達及多依樹梯田景區。



p.s.順帶一提早前睇報紙話香港郵票在內地又再熱炒,聽聞香港舊郵政總局那套「郵歷香江」升值百倍云云,仲有生肖和「神州風貌系列」又話熱炒,如果係真就勁過炒股喎……

中國世界遺產系列第四號︰紅河哈尼梯田
發行日期:2015年6月18日

2015年7月17日 星期五

2014古都瀟瀟@西本願寺

「一人闖蕩」有個好處係可以行到邊睇到邊,遇到乜睇到乜都可以好隨意……上回講到由東行到西,離開東本願寺之後行了幾個街口就來到西本願寺。



西本願寺雖然沒有東本願寺咁大,但歷史就更悠久,始建於1272年,原建於東山區,直至16世紀末才搬到現址的下京區。上圖是西本願寺旁邊的興正寺,兩寺毗鄰而建,若沒留意還以為是同一間寺院。



正如之前看過的東本願寺一樣,日本16世紀桃山時代的寺院一般都修築有阿彌陀堂和御影堂(分別供奉阿彌陀如來和淨土真宗開山祖師親鸞聖人),建築裝飾都以黑色和金色為主。上圖是興正寺的御影堂門,興正寺雖然寺院細細,這道正門卻甚具氣勢。



從御影堂門垂吊下來的這盞金蓮花燈非常金碧輝煌,是平成十三年(2001年)重新鑄造的,唔怪得咁金光閃閃咁新淨啦!



興正寺規模不大,站在庭園的角落裏,幾乎已經可以一個鏡頭影晒!上圖左就是剛才進入寺院經過的御影堂門。



由於寺內的阿彌陀堂和御影堂都是用了逾百年的木板鋪砌,木樓梯上當眼位已擺了「土足嚴禁」的告示牌,想入內參觀就要先除鞋。



在興正寺簡單逛了一圈後,就要繼續移玉步過去隔籬的西本願寺。穿過上圖右的古老大木門後,在庭園裏環視一圈感覺上與東本願寺的格局如出一轍。左上圖是轉輪藏經閣,裏面據聞有座回轉式書架,存放了古時從中國運來的大藏經,可惜藏經閣沒有開放入唔到去睇,單看外牆上見到的鐘形窗飾就覺得頗特別;左下圖是雙層的安隱殿,殿右邊是古樸的太鼓樓。比較矚目是殿前的一棵百歲老銀杏樹,樹冠非常大,去到時已落滿一地金葉,僅剩禿枝。



阿彌陀堂和御影堂之間有條木砌長廊連接,驟眼睇係咪有點似唐朝宮廷戲的場景……如果是在大陸的乜乜物物影城一定又會提供各式各樣皇帝大臣妃嬪宮女戲服畀遊人穿上影相啦!



單單長廊已經咁有古裝味,阿彌陀堂入面就更不在話下,金碧輝煌的裝飾佈置加上莊嚴的氣氛,彷彿真的以為發夢置身在皇宮中。



行完阿彌陀堂和御影堂終於可以著返對鞋準備離開。西本願寺地方雖然不及東本願寺大,但勝在歷史更悠久,平成六年(1994年)更獲列入世界文化遺產。穿過上圖左的御影堂門,出返去面向堀川通那邊的大街,依然保留了古老的護城河。



走出了寺院後,見對面街好似仲有D野睇,於是行埋過去八下啦!行入橫街裏原來成條街都係售賣佛具法器之類的店舖,另外仲有上圖左喱幢中西fusion味濃厚的建築物,初頭遠看它的大圓穹頂和雕花裝飾還以為是西域的回教清真寺,翻看地圖才知原來是「淨土真宗本願寺派傳道院」。



為免越行越蕩失路,都係先返出去堀川通大街,街上這幢非常宏偉的現代建築原來是「龍谷博物館」,基爾勁like它這幅遠看像竹簾隨風輕拂的外牆裝飾,與下京區這一帶的古老寺院和民居可說是襯到絕,完全唔會同四周古樸的環境格格不入,而且相信這道「竹簾」也有實際阻隔烈日暴曬的作用,香港真係要好好向人學習下。



可惜時間不太夠,最後也沒有入去博物館參觀,後來翻查其網頁才知原來有唔少佛教壁畫和佛像展出……Anyway,繞過博物館返去西本願寺那邊,發現與興正寺之間有條窄長小巷,八卦走入去終於見到西本願寺側邊的「唐門」,剛才在寺裏反而看不到。它同樣以黑、金兩色為主,唐式山形牆和人字板以及精巧的吉祥花鳥瑞獸雕塑,皆屬桃山時代典型的建築藝術風格。由於唐門在日光照耀下色彩奪目金光燦爛,途人路過總會駐足欣賞流連忘返直到日落西山,所以又有「日暮門」之稱。



走到小巷盡頭豁然開朗,還見到一幢很有歐陸味道的古建築,走近看看原來是龍谷大學的大宮學舍。這間龍谷大學的歷史可追溯到1639年,前身是西本願寺附屬的學堂,到了十九世紀明治時期才擴建為大學。



現時龍谷大學共有3處主要的校園,下京區這一part最古老的屬於文學院地頭,身處這種優雅古典味十足的校園,又真係特別有文學氣息啊!不說不知,文學院裏不少鐵鑄欄柵窗花和石材,都是十九世紀時由英國倫敦鑄造及遠渡重洋運來京都組裝,目前已列為日本國家重要文化財產!

2015年7月7日 星期二

2014古都瀟瀟@東本願寺

不經不覺這次關西的古都之旅終於來到了尾聲,翌日大清早就要坐ANA返香港,所以必須好好善用這趟旅程的last day。



老土都要講:一日之計在於晨!美好的一天就由美味早餐開始……本來打算再落酒店樓下商場果間CAFE Lab.安哥佢個brunch,不過聽友人話Inter-Con個早餐buffet幾多野食而且只係HKD$120左右,咁一於去佢個lounge試下啦!由20樓落地玻璃望出去個大阪skyline超靚,日式西式早餐適隨尊便而且選擇多,最正係buffet可以盡量食飽D(因為這天將要行好多好多路)。



順帶一提係lounge裏其中一個唔記得係pan cake定拉麵攤檔裏遇上一位香港廚師,與他傾了好一會偈,原來佢來大阪工作也有幾年了,大多數人應該很羨慕能在日本打工吧!但他說其實人工與香港差不多,平時除了返工外,生活也有點悶(很少機會去周邊地區遊玩),純粹是賺取在外國5星酒店工作的經驗而已!



尋找完他鄉的故事之後,食到飽一飽就拿拿林出發了,這天是「分頭行事」各自各精彩的日子,友人將會整天留守大阪大本營繼續意猶未盡的全天候血拼;基爾昨日追隨shopping兵團大半天已買夠了,喱日選擇做獨行俠,搭JR返去京都盡情享受一支公的「古都闖蕩」。



出發時大約10:30am,已過了朝早返工的rush hour,在偌大的火車車廂裏突然感受到久遺了的「一人遊」的閒情與寧靜,唔駛掛住七嘴八舌同friend傾偈之餘,專登選了駕駛室後的企位角落,仔細欣賞窗外游走的每一幅美景……原來大阪與京都之間的郊區依然保留不少大片小片的農田!



搭的雖然不是特急列車(貪佢中途停多幾個站),但全程也不過45分鐘左右,又回來了熟悉的京都驛。一出火車站就見到之前住了兩晚的Granvia,酒店對面就是Kyoto Tower(之前在深夜食堂遇上的港人母子就住京都塔下面這間酒店)。看地圖沿住京都塔旁的烏丸通行10數分鐘就到東本願寺,完全唔駛搭車,就先去那裏看看吧!



說京都是五步一寺院十步一神社也沒誇張,古蹟大多都有逾五六百年歷史,除了比較多人去的金閣寺銀閣寺清水寺之外,下京區的東西本願寺也頗具規模。17世紀初由於淨土真宗教派分裂,屬大谷派的東本願寺創建於1602年(中國明末時代),上圖是寺外的護城河。



東本願寺在江戶時期曾4次遭火災焚毀,現存寺院主體建築為明治時期(1892年)重建。雖然東寺的歷史比西寺短,但建築規模卻有過之而無不及。上圖是甚具唐風的御影堂門,雕樑畫楝和金箔裝飾都保存得完好無缺。



日本人參拜寺廟前總愛先洗手漱口,正門內大多設有不同型式的小水池,上圖的銅龍龍口就是東本願寺的泉眼。這天不知是否日本假期,見唔少日本人一家大細來到寺裏遊逛。



東本願寺最主要的建築群就是上圖左正在維修的阿彌陀堂和右旁的御影堂。阿彌陀堂由於已圍上了巨型圍板和布幔,無法入內參觀,那就先去看看御影堂吧!



東本願寺的御影堂其實也大有來頭,據聞是現存世界上規模最大的單幢木結構建築,基爾由南端走到北端感覺上超過100米,置身其中似乎真係覺得大過故宮的乾清宮……



御影堂裏面的空間都係超大,只有五六位善信坐在地上參拜,靜靜地祈禱,與中式的香火鼎盛人頭湧湧的寺廟有很大分別,四周環境感覺反而似回教的清真寺多一點。上圖是描繪17世紀東本願寺初建時的古畫。



上圖是御影堂裏其中一part善信祈禱區,由於裏面真係靜到跌眼針落地都能清楚聽到聲音,所以基爾也不敢太打擾,只停留片刻而已。照片中可見善信大多都是在堂裏的榻榻米席地而坐禱告……



基爾還是到堂外的木砌長廊影幾張相留念算了,由於御影堂內所有木地板都是有幾百年歷史的古董,遊客在範圍內都要脫鞋,好似之前去姬路城參觀時一樣,要自己用膠袋挽住對鞋四圍走。



御影堂外其實仲有幾處木建的亭台樓閣值得一看,很佩服古人的樑柱榫卯和斗拱建築技術,即使在經常發生地震的日本依然可以屹立幾百年不倒,非常犀利。



在東本願寺行一圈後,沿寺旁的七条通走幾個街口,向西本願寺出發。沿路見有唔少西式舊別墅,可能是昔日的大使館又或是有錢人的宅第,現時部份已活化為迎賓館,上網check過才知原來上圖這間是熱門的婚宴擺酒場地呢!