2016年12月28日 星期三

散策郵誌@秋田

在這片看來似乎不容易找到出口的原始山毛櫸叢林裏走了老半天,全程幾乎都沒吃過什麼,臨近黃昏時份終於返到山腳下的火車站附近,當然要看看這間小食堂會有什麼精緻的afternoon tea等著基爾……



Tea完之後不要忘了到海邊走走,站在流線的堤岸、看著金黃的夕陽緩緩沉落在遠處無際的海岸線上,相信沒有人會覺得是件無聊的事(雖然當時海岸邊正颳起超大風且氣溫大約只有10度8度左右……)!



與上世紀的老照片相比,今次喱D應該算清晰好多!唔講咁多都係快快開估:喱度應該都好多人去過睇紅葉,就係位於日本東北青森和秋田縣邊界上的輕津國定公園十二湖所在地。



開完估咁就又睇返D陳年郵票。原來咁多年來貯貯埋埋,這本郵票簿中的日本郵票都佔有相當大的比例,數量緊次於港中台而已,而且大部份都印刷精美好colourful(日本野好似好少係唔精美);更重要係發現原來有D仲有超過70年歷史的「戰前文物」添喎!



就例如上面這幾張1仙至4仙的舊郵票,上面印有「大日本帝國郵便」字樣,一看就知係二次大戰前的產物,基爾也忘了是從什麼地方得到這4枚郵票,上網check過係1943年發行,郵票上的風景圖案似是東南亞佔領地的椰林樹影和橡膠園。



上圖左面那一set也是很經典的「日本郵便」,全部都是統一size小小的一張,面值由10円至100円不等,主題取材也很廣泛,有些是日本具代表性的文物;也有植物如櫻花、松樹、菊花;動物則有丹頂鶴、梅花鹿等。基爾閒來當然也有上網check過,原來是60-70年代日本的通用郵票,由於發行量相當大,應該好多人也見過。



另外還有一套比較特別的日本郵票,手繪的卡通圖畫固然和風十足,有濃濃的日本舊式漫畫味道,值得留意是郵票底部的五線譜,整套郵票共有十幾張,可以合組成一首樂曲,基爾不太懂日文不知這首是否日本國歌,但也極可能是很著名的日本民謠吧!

2016年12月20日 星期二

看戲參悟五味人生:下

繼續講埋下半part……另一個放假日又早起,吃了早餐再去荷里活(似乎變了VIP熟客仔),因為想睇埋另一齣《怒》。



這套日本片卡士幾強,上映前已是話題之作,應該好多人都有入場睇過,劇情也不用多談,全片主要由3個故仔交織而成,表面上好似同一宗命案都有關,主題都是講人與人之間的信任……



很多人說較喜歡妻夫木聰的一段,因為拍得比較完整細膩(縱使結局幾慘);渡邊謙宮崎葵的一段慶幸最後得到團圓;廣瀨鈴的一段則最令人有點「怒」,醉酒小男友在公園袖手旁觀不敢救人最令人費解……



吉田修一的小說之前好似都有揭過,幾十萬字的推理小說改編成2小時電影或許有篇幅限制,所以基爾有空的話都想睇返《怒》的原著,遲下電影落了畫無咁hit時再去圖書館借來看看吧!



另一天休weekday,當然不能錯過靜靜地睇下午場的好時機,基爾最愛喜歡揀這類「無人時段」看戲,感覺似包場特別爽。喱次睇了另一套日本片《深夜食堂2》,之前基爾有追看這套由著名漫畫改編的電視劇,搬上大銀幕後分別也不大,都是講食客間的小品式人情故事。電影版也沒特別加長,而是由3個小故事合併而成,即係好似一次過睇3集電視版一樣。



好值得讚下家陣睇戲經常有喱類leaflet領取,而且製作和印刷都做得相當精美和認真,基爾間中見到靚的都會拿來留念,例如《深夜食堂2》喱張仲印埋戲中3段故事提及過的3味菜式食譜,材料和步驟都寫很詳細絕不求其馬虎,如果有心機跟住做應該真係可以煮得出來。



講返喱3味菜,基爾覺得首部曲的「豚肉湯」比較輕鬆有趣,原來這味也是食堂老闆的招牌靚湯;第2部份的「炒烏冬」寫母子情也很細膩,母親對兒子的忘年戀前後態度360度轉變也令人絕倒;第3味的「燒肉定食」就最感人,講老婆婆夕起子挾積蓄巨款遠道由九州博多坐JR來到東京,卻誤墮電話騙案(原來日本也有電騙)!幸而獲得食堂老闆小林薰、心地好的美少女食客多部未華子和警員小田切讓關顧,還圓了婆婆多年來想見見兒子(失散多年)的夢想,也讓她終可放下屈藏心底幾十年的愧咎,結局尾段婆婆在車上偷看兒子一家的幸福生活確令人動容(紙巾位)……p.s.很慶幸今次揀的3套電影都很好看,總算沒白費了時間!

2016年12月12日 星期一

看戲參悟五味人生:上

不知不覺漸漸習慣了一大清早起身食過早餐就去戲院,看早場對昔日的基爾來說似是不可思議的事,但其實原來都有很多好處……



晨早來到荷里活戲院原以為是10:30am開場,怎知記錯了,去到才知是開11:00am,無所謂就先買飛,醒起都好耐無去隔籬淨苑走走,襯時間多著就過去逛逛。



意外驚喜是,雖然早已到了深秋初冬時節,但淨院裏的蓮池依舊花影處處,似乎還在依戀著夏日的艷陽不願離去。



微涼天氣來賞蓮感覺更勝炎夏,一來蚊子少了,二來遊人也不多,想點影都可以。由於淨院是熱門的賞蓮勝地,相信盛夏暑假的周末都會幾熱鬧。



影下影下竟覺得自己也變了莫奈一樣,鏡頭下的睡蓮是否捕捉到幾分印象派的神緒?唔怪得咁多blog友都偏好影花影樹影葉……基爾就好羨慕別人神級的靜物攝影技術,美得像油畫。



自吹自擂完之後再睇睇手錶,原來時間都已差不多了,係時候要hea行返去戲院以免睇唔到畫頭。很多時去睇戲都想睇埋下輪電影的trailer,看看會否有心水之選!



這朝早場其實有幾套戲都幾想睇,就先揀喱套《列車上的女孩》,聽聞是美國暢銷推理小說改編拍成電影。



懸疑片向來都算係基爾杯茶,電影一開頭其實佈局都幾ok,至少估唔到兇手是誰?靚人靚景也令人賞心悅目(火車沿途的海濱豪宅區令人神往)。



為免穿橋還是不多談劇情,唯一可透露少少係故事令基爾覺得有一點Desperate Housewives的黑色味道,事實上戲中3位女角都係靚太(不明白為何要叫做Girl),故事也圍繞同一個男人(前夫/老公/情人)有關……

2016年12月6日 星期二

文物探知館@九龍公園

眨下眼2016年又來到12月,雖然老土但真心覺得「光陰似箭」,睇返全年原來只寫了30幾篇blog(無外遊+行山影相也少),係時候要寫返多D無謂野撐下場!



講返之前某日請假,因為要去一趟花旗領事館,發現原來好旺場(勁多強國人),結果要輪成個幾兩粒鐘先搞掂,擺低passport即閃。



反正之後無野做就閒蕩返去天星碼頭,當天剛好舉行完Formula-E,碼頭外的觀眾席仲未拆,因為唔知仲會唔會搞第2屆所以都順手影張相留念。



之前原本都諗住順道去逛逛碼頭旁這間海事博物館,但唔知點解次次都忘記了,今次都唔例外又係上了船才醒起,咁唯有再等下次。



基爾係個好憎塞車的人,如時間許可都盡量揀搭船過海,實際花的時間其實也差不多,但就真係舒服好多,享受多點海闊天空!



過到尖沙嘴咁又去行行九龍公園的文物探知館,依家去博物館完全唔駛錢(專題展覽除外),而且閒日去真係超級少人,幾乎係包場睇展覽!



基爾應該唔係第一次來這間探知館,但對館裏的陳設和展覽差不多是零印象……由於是古蹟活化,展廳入面的間隔都比較細,要遷就保留原建築舊貌,收藏的展品也不多。



老實說文物探知館有很多文物藏品與歷史博物館或文化博物館大同小異,欠缺了特色和新鮮感,有點浪費了這座珍貴保育下來的古建築。



由於館內藏品實在無乜好影(其實無乜人又可以任影唔嬲),反而建築物本身很值得仔細欣賞,間中仲可以玩D平時好少用的攝影技巧。



各展廳中基爾覺得挺特別的就是上圖這個復刻版電車車廂,車窗外有段模擬播放的百年前舊中環街景,坐在車廂內真有點時光倒流一百年feel。



真係好想問叮噹借時光機去返昔日中環玩下穿越Somewhere In Time,恍如置身歐洲老城區一定會好過癮,可惜舊建築大部份都已在70-80年代拆卸,實在可惜!Anyway,這段「電車越空之旅」可說是全館的亮點。



除了中環之外,山頂同樣有好多歐陸大宅星羅棋佈,正如影片的caption咁講:「恍如置身外國一樣」。



至於上面喱間房仔望落有D詭秘,其實係玩遊戲的,用圖中圓柱那個操控桿將畫面上一幢幢舊建築配對返去地圖的正確位置,比較適合小朋友玩。



行返出走廊位有處地方擺放了一個展示鋪砌傳統中式瓦頂的模型,防漏雨的設計顯示出古人的智慧。



基爾覺得全間館最靚就係這個小庭園,每次來都要逛一陣坐一陣先捨得走,這天weekday遊人也只小貓兩三隻,想感受下在富豪大宅花園裏hea坐看看書有幾悠閒,不妨來這裏。



博物館昔日是英軍兵房,庭園裏這些老榕樹想必也有逾百年歷史吧!看它的老樹盤根已覺得充滿歷史滄桑味道。



庭園旁邊一處小角落展示了正進行重修工程的藝術館,開返之後唔知會有D咩新鮮野睇下呢?



臨走前仲去參觀埋佢個洗手間,裝修陳設同樣好有懷舊味,好耐沒見過這種傳統旋轉式開關的水龍頭。



原本來這裏係想八下仲有冇景賢里的開放日門票,答案當然係一早派晒!之後出返九龍公園,再行埋過去擺放動漫人物那邊……



印象中之前都有路經這裏,卻是第一次為這些卡通人物雕像拍照片,牛仔這pair夠經典又溫馨。



上面喱個「壽星仔」都好熟口熟面喎!仲有好可愛的麥兜,都幾受小朋友歡迎,係咪好多人已同佢合照過?



一支公有時靜靜地無無聊聊咁四圍閒蕩遊公園,同小天使確實也有點相似……樂得逍遙!