2014年11月27日 星期四

渣打藝趣嘉年華@銅鑼灣

除了一年一度的年宵花市之外,基爾平時真係好少夜嗎嗎走去逛維園,喱個周末咁神心去就係想去睇喱個由香港青年藝術協會舉辦的「Arts in the Park」夜光巡遊。



基爾實在孤陋寡聞,不說不知原來喱個銅鑼灣藝趣嘉年華已經舉辦了好幾年,2008年開始移師維園,去年起更加插了壯觀的夜光大巡遊。



基爾由天后那邊入維園,可能由於要配合夜巡節目關係,好多燈都熄了,嘉年華入口都係黑嗎嗎的,很有點神秘感,但入到場內已經見好多人圍觀好熱鬧。



不斷聽到有人嘩嘩聲和音樂聲,原來夜光巡遊已經展開,基爾當然要拿拿林逼入少少去睇下,冷不防已經見到一隻全身亮了led燈且貌似大飛蛾的怪獸撲面而來,緊接著仲有隻藍色大龍蝦在身邊慢慢游過。



因為預了影夜巡,本來一早帶定腳架仔方便影得清少少,不過大巡遊夾道兩旁實在太多人了,基本上係無乜可能放到腳架,咁就盡量隻手定少少影啦!上圖這張「花仙子」算是無咁手震的,仲見到可愛小仙子的俏臉。



全場要數喱個「七彩流星槌」最百厭,經常揮動扑向兩旁圍觀的遊人,畀佢扑中的人全部都唔會嬲只會卡卡笑。



唔知點解成班巨型螢光怪物造型都好有點Tim Burton奇幻風格,不過身邊小朋友見到喱D食人花和巨蜘蛛怪,又好似唔係好驚唔會嚇到喊喎!



另外仲有巨型水母和瘋狂博士出場,隻螢光水母最生猛仲經常滿場飛,夠盞鬼又夠閃夠colourful!



其實聽聞weekend下晝的嘉年華都有大型日間巡遊活動在銅鑼灣舉行,出年如果再有大巡遊都可以早少少來睇。



除了睇夜光巡遊那些怪獸之外,維園另一邊仲有一班唔發光的怪獸,上圖這朵吐舌食人花好搶鏡,佢個造型夠晒核突!



原來咁多喱D造型古怪的「藝術品」係來自全港九新界廿幾間中學的學生手筆,果然創意無限,不過睇勻好似都唔見基爾間母校參與。



夜巡完畢後,所有螢光怪獸齊集在main stage同遊人say hello兼謝幕,全部聚首一堂鬥靚又鬥創意,真係幾壯觀喎!



可能因為燈光效果關係,始終「花仙子」影出來最sharp最清最靚,其他果D因為不停地擺動和揮手,用基爾部古董傻瓜機基本上係好難影得靚。



時間都差不多,D怪獸都要逐個揮揮手say goodbye,一個跟住一個咁離開!開始散場了……



臨走前幸運地搵到一處無咁多人的靚位,終於可以近距離同幾隻螢光怪獸影返幾張似樣少少的靚相,希望無令blog友們失望吧!



螢光怪獸走晒之後,main stage重新開燈,一時間對眼都唔太適應,睇真D原來台邊仲有幾隻擺設的機械獸。



總括而言這個夜間巡遊都幾有趣幾靚幾好睇又夠熱鬧,好多人都一家大細來看,熱鬧程度也不遜於新年花市和中秋時的維園,明年如果再搞這個嘉年華,一定會再來襯下熱鬧。

2014年11月21日 星期五

散策郵誌@薩拉戈薩+馬德里

你:去到皇馬個球場咁有冇見到邊個球星練波?
我:梗係有!仲見到碧咸同施丹……張相和波衫?
你:……



「成本郵票簿乜得一張畢加索郵票是來自西班牙咁少?」基爾搔搔頭有點後悔的說:「那時大概還未想過買郵票留念吧!……那次其實不只去了巴薩隆拿,還去了其餘幾處地方,有沒有興趣再看老照片?這裏是Zaragoza,應該不少人也去過這間建於17世紀的Basilica Nuestra Senora del Pilar(雲柱之母大教堂),據聞因為聖母瑪利亞曾在教堂裏一條雲石巨柱上顯靈而得名,它也是全球最闊最橫的天主教堂建築。」



「那時有沒有去馬德里?聽說皇馬的球場很宏偉。」基爾找到班拿貝球場的照片說:「這裏就是Santiago Bernabeu Stadium,基爾還扮球迷在球場外拉起了球會的頸巾影張到此一遊呢!那條頸巾依家還在但好少帶,是在球場裏那間souvenir shop買的。」



「那次住的酒店就在La Castellana附近,它是馬德里最長最寬的大馬路,沿住大街由球場一直走到Plaza de Cibeles,四周圍的古典建築群真係好靚,尤其是路中心迴旋處的西貝萊斯噴泉,描繪西貝萊斯女神策騎獅子拉動的戰車上的英姿;旁邊的通信宮Palacio de Comunicaciones也相當宏偉,入面很有點老舊郵局的味道!」



「近年西班牙經濟差,聽說治安也麻麻,這樣在大街上hea逛驚唔驚?」基爾不其然回憶起飽吃驚風散的經歷:「初時也覺得無問題,斷估也不會當街搶野咁誇張,只要提防小手應無大礙,後來還一直走到皇宮行一轉。入夜後太陽門Puerta del Sol一帶遊人非常多仲旺過旺角,本來諗住在街邊快餐店食個包就返酒店,始終唔敢留太夜,點知擺在隔籬凳個背囊轉眼間就消失無蹤遍尋不獲,銀包和相機都無晒,幸好passport在褸袋裏,唯有去附近警局先報案拎返張報案紙回來claim旅保!」



「有時覺得逛小城鎮比大城市有趣得多,係咪?」基爾點頭深感同意:「Absolutely……某程度上都係因為在香港生活本身已經周時都要逼車逼人夠晒煩,去旅行時都盡量唔去人多車多的地方,這也可理解吧!」



「距離馬德里西南面不遠就有個小山城Toledo,車程只大約1個鐘左右,很值得順道去逛逛。它可說是西班牙的古都,早在公元前1世紀已由羅馬人建立,直至1088-1561年間成為西班牙國都,1986年獲聯合國教科文組織列入世界文化遺產名錄。」



「看地圖就知其實古都的範圍不太大,不過由於有塔霍河Rio Tajo蜿蜒流過,影相出來景色靚絕。古城主要由San Martin's Bridge等幾條古老小橋與外地連接,單單在橋上影相已差不多用晒成卷菲林。」「古城入面有乜特別野睇?」「事隔十幾年其實印象已經好模糊了,印象較深是建於中世紀的Alcazar城堡和城中心的大教堂。由於千百年來這個小山城先後受過羅馬人、西哥德人、摩爾人等統治,所以即使在城裏的橫街窄巷閒逛亂蕩,看看風格不同的古老民居,純粹去感受一下歐洲小城味道,已覺得好enjoy!」

2014年11月17日 星期一

珍郵庫@吳冠中畫作

年前基爾去尖沙嘴藝術館看過一次吳冠中畫作展覽(吳冠中畫舞樂@藝術館 ),當時只簡單走一圈,沒太深入仔細看每幅名作的介紹。喱次郵政署發行這套首日封,二話不說就買下來作為留念。



令人驚喜的是,今次選擇的吳冠中名作中,原來不少都早已在基爾之前的「巡館記」網誌中出現過,證明眼光有返咁上下吧!在這7張名畫郵票中,基爾始終至愛的仍是「三部曲之美」中的「雙燕」($3.7)和「水巷」($2.9),當中「雙燕」畫裏的大白牆和簡約線條美堪稱為吳氏的代表作。



另外幾幅也很有印象,包括「維港寫生」($1.7)、「鄉情與鄉愁」($2.2)、「朱顏未改」($3.1)和「天涯」($5),前兩者以水墨的神韻展現出西洋風景油畫的意趣,「朱顏未改」是其水墨抽象畫名作,至於「天涯」則是以畫喻人生的晚年代表作。



至於$10小型張上的「休閒」初時霎下眼還以為是吳冠中另一名作「東風開過紫藤花」,無獨有偶兩幅都呈現吳氏富韻律的線條美筆觸。如果將來尖沙嘴藝術館大裝修完重開再辦吳冠中書作展的話,真的很值得再去看看!

香港館藏選粹吳冠中畫作 
發行日期:2014年6月17日

2014年11月11日 星期二

山系迆遊:下@南丫島

上回講到在索罟灣樂不思「行」,結果hea到兩點幾才終於正式起錨,幸好南丫島喱條行山線比較短,咁遲出發其實都無乜問題。



一行出索罟灣大街即被這片河口靚景吸引,據樹立在旁的告示牌稱,這裏是河流出海的淺灘,有一種獨特的紅螯螳臂蟹在這裏棲息。



由海濱淺灘一路拾級而上,其實山坡的斜度也不太大,行山徑也修葺得很整齊,可以說是零難度。不久基爾就來到半山的觀景亭,由這裏望出索罟灣的風景應可位列香港十大自然靚景之一吧!



沿山路一直往前走,雖然無乜大樹遮蔭但入秋後已沒有盛夏的暑熱,間中清風隨來感覺幾爽,再配合山坡下豪宅級數的無際海灣日落靚景,忍唔住都要駐足欣賞下影下相先肯走。



雖說已經入秋,但來到洪聖爺灣時依然見到勁多人來游水,28-9度的氣溫唔冷唔熱,可說是全年最佳天氣!當穿過榕樹灣村時,友人被撲鼻的燒烤香氣吸引,決定放棄去睇大風車,留在大街上吃燒雞翼算了。之後為免太逼人,決定提早搭5點幾的船離開,上到船發現已幾乎坐無虛席,喱班船都相當爆。



6點幾咁早出到中環碼頭因為仲有後續節目,先去ifc附近的Four Season借廁所洗個面,再兜返去逛逛citysuper,可惜遇唔到有咩明星暗星shopping……搞咁多野因為要等埋其餘無行山的友人會合一齊去上環泉章居開飯。上圖是必食的霸皇雞。



由於人數眾多就點了個6人餐,除了全隻霸皇雞外,仲有蝦醬通菜牛肉、豉汁蒸大鱔、西檸芝麻蝦球、椒鹽豆腐和粉葛湯,基爾除了唔食鱔之外,覺得其餘幾味都屬average以上幾好食,最重要係可以由7:00pm一直坐到10:10pm完全唔駛煩住要交台,而且埋單人均才$160,比在南丫島食的富貴海鮮餐平了近一半,都算是抵食之選。

2014年11月7日 星期五

山系迆遊:上@南丫島

翻查「大典」才知原來基爾上一次去南丫島已經是5年前的事,就以這小島作為今個行山季度開季的目的地吧!



由於驚旺角塞人塞車,還是搭火車出發穩妥一點,來到尖東舊Sogo地底商場依然圍滿圍板,咁多舖位唔出租真係幾浪費喎!唔知係咪等新世界重建完先再開返呢?



之後行返出碼頭搭天星過海,可能真係好耐無出尖沙嘴,望過對面海發現Big Wheel已經砌好晒,唔知幾時正式開張呢?



在中環碼頭上岸後,反正仲未夠鐘索性行過去睇摩天輪,近睇真係幾巨型幾靚,不過聽聞坐一次要成百蚊都幾貴……另外旁邊仲有新開的海事博物館,不過基爾咁耐都無入過去,反而之前在赤柱美利樓的舊館就行過一次。



今日無時間入博物館,唯有另擇吉日再來吧!無耐集齊人馬後,便搭天虹專船入南丫島。不過原來這專船會再停靠尖沙嘴碼頭才開往南丫島,早知唔駛搭天星去中環咁蠢啦!上圖是途中遇到有十幾層樓咁高的處女星號,基爾大鄉里也未去搭過呢!



搭這種細船去南丫島原來都要成45分鐘才到,上岸後行去隔籬這檔海鮮酒家,由於時間尚早無乜其他顧客,可以任揀位坐。友人自動波發辦點菜,上圖是其中兩味:白灼蝦和咕嚕肉。



此外還有豉椒炒蜆和上面喱味很正的蒜蓉粉絲蒸扇貝,炒蜆睇落見殼唔見肉,扇貝最正係上面鋪滿香噴噴蒜蓉加上有粉絲索汁非常野味,是整餐飯的亮點!



至於這味鹽焗蟹似乎遠遜上次的屯門三聖村興記,蟹糕蟹肉不多且得個咸字無乜鮮味可言。最後埋單計人均要成300蚊,雖則話包埋船費但未免太貴唔抵食了,始終是賺遊客生意吧!



食完個貴氣海鮮餐後,友人仲話要去隔籬間cafe shop歎陣啡咖賞下漁村海濱靚景先願出發,真有點懷疑今次來南丫島究竟是行山定係hea飲hea食架呢?

2014年11月1日 星期六

金饍韓國料理@尖沙嘴

之前睇人地blog見到喱間位於尖沙嘴北京道1號的新韓菜館覺得幾唔錯,餐廳個view正之餘價錢也抵食,喱日終於召集到班閒人同學仔去試試。



尖沙嘴多韓國菜館好多人都知,競爭都好激烈。之前去過堪富利士道的老字號錦城飯店食韓燒味道不錯,不過價錢稍貴;北角的韓食家也食過兩次味道則只算一般,可能是不太偏好韓菜吧!上圖係金饍個門面紅噹噹寫滿韓文書法,裝修陳設算是有心思……



依家好少出尖沙嘴,來到北京道一號都要搵一陣先識點上去,最初去到大堂還以為係office building完全唔似開餐地方,上到去其實間隔真係好返工feel,幾乎以為搵錯地方。因為唔知多唔多人食晏所以已預先book位,坐低即刻睇menu有乜選擇呢?之前在網上search過知道喱間野其實係鴻星旗下食肆,menu望落set lunch價錢都係around 60幾到百幾不等,以韓菜來說算是中價吧!



每個set都包括了3小碟前菜(三色椒和泡菜豆芽之類)、主菜和湯、飯各一碗。先order了烤雞肉飯($55)和烤牛肉飯($68),雖然唔係自己燒不過都幾香幾惹味!食韓菜好似多數仲會叫埋這味人參雞湯($118),喱度係用原隻「黑皮膚」竹絲雞,食落好味過韓食家果款,隻雞唔鞋,幾乎可以成隻食晒,唔知驚唔驚會補過龍流鼻血呢?!



食下傾下再欣賞下窗外靚景消磨一個悠閒下午真係幾愜意,可能由於weekend關係,食晏時段唔算太過排長龍,也唔駛急住要交台,附近幾台都係似名店放食晏的靚女sale士居多,也聽到有講國語的自由行客,像基爾這種閒人似乎唔太多,相信閒日lunch時段附近多office或許會墟陷一點。



望完靚人再望下窗外靚景又望望台面美食,人生這樣過也不錯了,這就是知足常樂的道理吧!最後上台的是上面這味鰻魚雜錦飯($80),日式的鰻魚飯食得多,韓式的還是第一次,感覺好似無日式的醬油咁濃咁甜。埋單計人均才$120算是OK,之前聽聞新開張時有七五折一定更抵食。



說這餐又食又拎真的沒有誇張,同學仔仲私人醒了這3舊野畀基爾,之前其實已經用過右手邊那種貌似午餐肉的,今次仲多了幾個款式,左邊貌似砵仔糕的可以擺在公司用,唔傷手又環保,真係幾唔錯喎!

金饍韓國料理 KimChee
尖沙嘴北京道1號8樓